Isto s'atura... por bacanzas

Bueno, como he dito en o comentario d'antis, he d'aturar d'escribir iste blog... por agora.

Maitín marcho enta un puesto muito lexano ta aprender a charrar una luenga rariza... y no tornaré dica o cabo d'agosto.

Puestar que bel diya pueda coneutar-me a internet por ixas tierras y ficar-ie bella cosa, pero isto no ye seguro.

Nomás aspero que tos aigan feito goyo istos chiquetz articlos d'o prenzipio d'iste blog: isto no ye que l'escompezipio, aspero que bi aiga muito más.

Aspero que totz pasez unas buenas bacanzas!

¿Metro u tranbía?

En istos diyas me trobé con una parella de reporters (cal dizir que son prou simpaticos) d'a telebisión autonomica. Yeran demandando a la chen de qué s'estimaba más ta zaragoza, si d'o metro u d'o tranbía...

A yo iste tema me pa prou intresán, y por ixo dentro a dizir as mías opinions:
O tranbía, ta yo, no soluziona os problemas de trafico de zaragoza, si no tot o contrario: ye un meyo de transporte útil, pero que ta yo no sirbe que de complemento d'atros, como lo bus u o metro. Cal fer-se cuenta que o tranbía emplega a superfizie y por tanto ocupa puesto en a mesma, cuan o problema ye prezisamén a saturazión d'ista.
Antimás, iste meyo no se puet emplegar que en as grans carreras: ye dizir, l'autur y bella zona d'o zentro como independenzia: poco más.
Por isto no creigo que siga o meyo de transporte que ameniste zaragoza.

O metro sindembargo puet soluzionar parti d'os problemas de trafico de zaragoza: prou que ye más caro (y más que más en una ziudat que tiene muitizas pozas baxo lo sulero), pero prou que tamién muito más útil. Güe, cualsiquiera ziudat que plege t'o millón de resindens amenista iste meyo: zaragoza plegará amenistando-lo (si no ye menester agora mesmo).

Tamién cal dizir que clamar "metro lichero" a ixo que disiempres se l'ha dito tranbía ye un engaño demagochico (d'istos que te fan carrañar).

Muere a tortuga más biella d'a Tierra

Ayer murió Harriet, a tortuga más biella d'a Tierra: orichinaria d'as islas galapagos, teneba 176 añadas. En a suya bida, Charles Darwin la lebó dende o suyo puesto d'orichen dica Inglaterra cuan teneba 5 añadas. Fa 20 añadas, fue lebada t'un zoolochico d'australia, concretamén de queensland.

De seguras que toz la emos puesto beyer en bel documental: yera uno d'os animals más retrataus, grabaus y estudiaus d'o mundo, al estar parti d'una mena de tortugas prou desconoxida y en grau peligro d'estinzión.

Antimás, se trataba de l'animal más biello d'o mundo: y ye que ista mena de tortugas granizas biben si fa u no fa 150 añadas, tenendo o record atra que bibió 188 añadas, a cuala yera pertenenzia d'o rai de tonga.

Os suyos cudiadors han dito que a suya muerte ye estada ascape: o suyo corazón aturó de traza limpia y de camín.

Colla mosical chuzona

Una colla mosical dita "Garzón" y naxida fa dos añadas pero cosa conoxida ha de cambiar de nombre, al considerar o chuez Garzón que l'emplego d'iste ye una "intromisión a la suya imachen". Si no se cambeaba o nombre, Garzón menazaba con enrestir contra els.

A colla, sabedors d'o poder de Garzón, no dandalión en cambear o suyo nombre. Asinas en metat d'o festibal de benicassim (en o cualo els i yeran) dezidión cambear-lo, con chuzonas declarazions, prou que sí:

"Como dizió Franco tras a petada de Carrero Blanco, de mal no bi'n ha que no siga de bien benir. En reyalidat, mos ébanos feito cuenta de que no teneba sentiú continar dizíndonos "Garzón". L'ochetibo d'o nombre yera onrar a lo chuez más gran d'españa. Manimenos, o tiempo, ixe chuez supremo que da y saca razons, ha ditau sentenzia por nusatros. Tot o que puya, en baxa. Bi ha que mirar enta l'esbenidero. Dende güe, biernes 21 de chulio, a colla "Garzón" se dirá "Grande-Marlaska" "

A Grande-Marlaska l'ha feito goyo ista situazión y ha dito que no ferá cosa.

Que'n son, de socarrons! Agora suposo que asperan que a prensa se faiga eco d'isto ta conseguir publizidat... Encara que a lo menos m'han feito redir una miqueta.

Tucas, mons, ríos, lagos, crateres y minas d'oro en Titán

O radar d'a sonda "cassini" (nimbiada por a NASA, AEE y Achenzia Espazial Italiana ta Titán, una d'as lunas de Saturno) ha descubierto que en o sulero d'iste planeta se troba una cheolochía prou parellana a la d'a Tierra.

Istos azidens d'o terreno s'han trobau, más que más, en a parti dita "Xanadú" (parti d'a luna que tien, alto u baxo, o espazio de un continente).

Iste descubrimiento puet abenturar atro posterior muito más importán: a bida en iste puesto.

Manimenos, as baxas temperaturas parixen un barrache t'a formazión de bida en Titán: de feito, os espertos consideran que ye prauticamén imposible de trobar augua en iste planeta. Os ríos, de estar de berdat ríos y no pas atra cosa, serían de metano u etano.

Sindembargo, simpre bi ha a posibilidat de que s'aiga desarrollau bella traza de bida que no ameniste que os elementos que en Titán se i troban.

Adios a Deep Purple

Mala nueba t'os aimans d'ista colla mosical: o suyo conzierto, que ayer se suspendió por o mal orache (a sulero d'o pabellón principe felipe tenió 20 centimetros d'altaria d'augua debido a la tronada), no se ferá a la finitiba.

Dimpués d'ista plebia, os bombers desaconsellón a reyalizazión de cualsiquiera autobidat en iste puesto: con o mal orache, as instalazions eleutricas quedón feitas un chandrío. Agora mesmo 20 espezialistas son triballando ta fer tornar tot a la normalidat en o pabellón.

A interpresa promotora d'o conzierto d'ayer, Gamerco, ha dito que dimpués d'a suspensión d'iste conzierto, ye prauticamén imposible fer-ne atro debido a la preta achenda de Deep Purple.
Luego se ferá a tornada de diners t'as chens que bosón ta beyer-lo.

Presentazión d'o libro "La charrada" de Alejandro Cortés.

Ista tardi se ferá a las 7:30 en a cambra d'ambito cultural d'o corte inglés de independenzia, a presentazión d'iste libro, o cualo ya tenemos as personas que marchemos t'o congreso a semana pasada.

He de dizir que me lo soi leyendo, y me ye fendo muito goyo: te permite aprender bocabulario, ditos y frases feitas d'una traza amena: con as istorias que rezentan chen de toda mena y con os debuxos, antimás de conoxer millor as tradizions, costumbres u aneudotas, te se queda en o tozuelo o significau y os emplegos d'as parolas y frases d'una traza rapeda.

Sin duda, una buena ideya ta l'aragonés y lebada d'una traza sobrebuena. Sisquiera se fese una colezión de libros chiquez como iste (a estar posibles feitos de raso en aragonés), con parolas y frases feitas en aragonés!

Banuatu: un exemplo a seguir

Seguntes a Fundazión Británica de Nueba Economía, iste chicorrón país (formau por bellas islas en o pacifico) ye o que millor enreliga o progreso con a efizienzia en o meyo, sin ferir-le ni manullar-lo.

Ista mida se fa fendo mezclallo d'a esperanza de bida meya d'os abitans y l'impauto ecolochico d'as autobidaz que se i fan.

Ye curioso que garra país d'o g-8 se troba en a lista d'os 50 primers países: drento d'os países ozidentals o que se'n troba en millor puesto ye malta, y dimpués austria. Estados unidos se'n troba en o zaguer puesto.

Si ye que, os ozidentals con tantas cosas que abemos... pero siempre tenemos o sueño de pasar unas bacanzas en una placha polida, debaxo d'una palmera.

Se bende patrimonio

Una ermita romanica en ávila se ye bendendo porque os suyos autuals amos no tien diners ta mantener-la.

http://www.abc.es/20060716/cultura-cultura/venta-millones-ermita-romanica_200607161722.html

No ye un nuebo caso: ye conoxiú que una ripia de castiellos son estaus bendius, en muitas begadas porque os suyos dueños u conzellos d'os que penden no pueden fer-se cargo d'els...

Pero me ha trucau o ficazio... porque me pienso que si o gubierno y a unibersidat no fa cosa por as luegas d'aragón, bien podeban dixar a competenzia a las chens que si en fan.

Una miqueta de lirica

Güe t'escribo istas coplas

porque sabes que te quiero

dimpués de tanto aguardar

a la fin tenemos tiempo.

-

Asperé... y asperés

pero más no asperaremos

d'esbarres, no bi'n abrá

ta cuan chuntos mos aimemos.

-

Luna, sol, estralas, ziel

dende a tasca tot se beye

manimenos cuan con tu i soi

no bi ha cosa que deseye.

-

Agora que semos chuntos

de situazión, no'n trobamos

amigos u obligazions

son barraches ta nusatros.

-

No dixamos de querer,

querer caminar, charrar...

querer os dos estar chuntos...

No quiero dixar-te d'aimar.

Reflecsions dimpués d'o segundo congreso

Estoi que si yes leyendo istas ringleras ye porque l'aragonés ye una chicota pieza d'ixe puzzle que ye a tuya bida (puzzle con muitas piezas como a parella, parentalla, amigos, treballo, estudeos...). Ayer estió un buen diya ta l'aragonés, y por ixo me pienso que o puzzle que ye tuya bida se ferá un poquet más contento dimpués d'istos tres diyas que nunca no ixuplidaremos.



A ran presonal, ista esperienzia me ha premitiú quitar as siguiens conclusions:

1. O consenso, encara que cal buscar-lo, ye asabelo difízil d'obtener : o problema ye o trancau que pueden plegar a tener o zerebro as presonas: a totz mos CAL UBRIR-LO. Yo, dende a mía lochica, dica fa no guaire no beyeba platero ixo de meter a -t zaguera... dica que me s'esplicó ista posizión (a -t zaguera ye útil ta una grafía común, d'a mesma traza que a -r zaguera d'os infinitibos d'os berbos). Alto u baxo me pasaba o mesmo con os plurals en -tz d'os que charró Chorche Díaz... Son proposas que me parixen prou utils y más lochicas d'o que me pensaba. Tamién ye berdat que dende o mío punto de bista basau en a lochica tampoco beigo esclatero a -v u a -h... porque os argumentos que se dan no me conbenzen (isto ye asinas porque yo, que no tiengo conoximientos d'isto, cuan en charro, lo foi dende a lochica d'un mozet que cuasi no sabe cosa).
Con isto no quiero fer una proposa de grafía ni cosa parellana: no quiero dizir que si totz mos ubrimos de mente, pensando todas as proposas y razonando un berdadero si u no, o consenso ye posible.
Se que isto cuasi nunca no se da. Allora, o que cal ye continar con as balurazions más azeutadas, pero nunca no aturar tot o prozeso. No me prexino que a democrazia parlamentaria remate porque todas as presonas no sigan capazes de botar a un mesmo partiú.

2. O congreso ta yo ye estau una esperienzia enriquezedora: he puesto ascuitar chistabín, cheso, patués... y mesmo he puesto charrar con chen patrimonial de bellas d'istas bariedatz. He puesto beyer que o mobimiento d'esfensa de l'aragonés ye más gran d'o que me pensaba y he puesto beyer que chen d'o gubierno y a unibersidat han mostrau o suyo interés por l'aragonés (ya siga d'una traza ipocrita u no, qui sabe). He puesto ascuitar una ripia de luengas y trazas de pensar de la romanía intresadas, prou que sí, por tot iste prozeso.

3.Como dizié ayer, iste no ye que o prenzipio d'una corrida. Una corrida que dentre totz emos de ganar.

Galizia-Aragón: un camín de zien añadas

En o glorioso diya de güe, s'ha constituyiú l'academia de l'aragonés como totz sabemos (por muito que bellas presonas digan que ixo no puede estar asinas, totz sabemos que as cosas o se fan por parti d'os que aman a luenga aragonesa, o no se fan). Güe plega, por tanto, o ziclo de formazión d'as instituzions lingüisticas que se miren d'a normatibizazión d'as luengas minoritarias d'o estau español:

1906 > Real Academia Galega

1907 > Institut d'Estudis Catalans

1919 > Euskaltzaindia

1945 > Institut d'Estudis Occitans

1980 > Academia de la Llingua Asturiana

2006 > Academia de l'Aragonés

O diya de güe escomenzipió de traza normal, con una charrada d'o prestichioso filologo Michael Metzeltin (charró d'a situazión de l'aragonés en cheneral).

Tras isto se continó con a botazión d'os academicos, dimpués d'un debate intresán:
105 botos a fabor (79%)
23 botos en contra (17%)
4 botos buedos y un boto nulo (4%)

Antis d'isto a muller d'o siñor Francho Nagore "dio la nota" faltando de mala traza a Fernando Sánchez, dizindo-le que o siñor Nagore triballaba tot lo diya por l'aragonés y que no se merexeba isto: ye bergüeñoso, patetico y triste que diga ixo cuan lo congreso ye estau o más consensuau posible, cuan Nagore a puesto seguir y dar a suya opinión en tot lo prozeso y cuan soi seguro de que Fernando Sánchez ye una d'as personas (si no a que más) que pior l'ha pasau con os zaguers problemas y cuan ha triballau muitas oras por a reyalizazión d'iste sueño de totz.

Dimpués, una ripia d'asoziazions de luengas minoritarias europeas (como lo sardo, occitano, asturiano, gallego, catalán, basco...) charrón a trabés de representans. Cal dizir que, encara que as charradas no yeran guaire luengas, estión en total 19.

Se continó con una chicota charrada d'o sozconzellero de cultura d'o gubierno d'aragón (dizió alto u baxo o mesmo que a l'escomenzipio d'o congreso) y dimpués charró Felipe Pétriz, reutor d'a unibersidat de zaragoza, o cualo dizió una cosa prou intresán: a formazión d'una catedra de filolochía aragonesa... Ya que estiese berdat.

A la finitiba totz minchemos un ternasco suculoso (a lo menos se feba suculoso dimpués de tantas oras d'asperar a chentar).

Y... ya sabez, ista tardi totz con os gaiters en o zentro zelebrando iste logro ta l'aragonés... Encara que cal remerar que iste no ye que o prenzipio d'una corrida que s'abentura positiba por muitos barraches que bi'n aiga.

En a prensa:

http://actualidad.terra.es/cultura/articulo/concluye_academia_congreso_aragones_crea_987150.htm

http://www.heraldo.es/heraldo.html?noticia=171628

Isto contina entabán

No m'asperaba que o congreso fuese a marchar de tan buena traza como lo ye fendo dica agora.. O diya de güe s'ha feito en uesca, en una sala gran an que lo calor no se feba sentir y an que no bi abió garra problema de soniú.

A las conferenzias de Fernández Rei ta charrar d'o galego (luenga con una istoria prou polida... qui sabe, puestar que bel diya no guaire lexano meta bella cosa en galego por parte de "rosiña") y de Grosclaude (estoi que ye l'onico que ha puesto conseguir que toz parásenos cuenta d'a suya charrada durante toda ista, e ixo que yera en una luenga que no conoxébanos, encara que encara asinas, s'entendeba prou bien: aduyaba también o suyo buen fer y a suya simpatía), le siguión as comunicazions de Óscar Latas y Pilar Benítez, que charrón de l'ansotano en cheneral; Fernando Sánchez, que charró de l'aragonés d'Agüero; Chorche Díaz, que charró de como amanar una grafía cheneral a lo caso d'o patués (prou intresán ta yo ista charradeta); Guillermo Camallonga y Natxo Sorolla que s'han zentrau, cadagún por indibidual, en contimparazions dentre l'aragonés y o catalán. Ta plegar Henrike Knörr ha charrau d'a luenga basca en cheneral y d'a suya grafía en particular.

A la fin s'ha feito un agradeximiento a las instituzions que han refirmau o manifiesto y la campaña de chuntos en cheneral.

Ta rematar, cal dezir que os meyos s'han feito eco d'o segundo congreso... ta bienen unos casos y ta mal en atros:

http://www.abc.es/20060714/nacional-nacional/comunidad-opone-academia-unificaria_200607140243.html

http://www.elperiodicodearagon.com/noticias/noticia.asp?pkid=261631

http://actualidad.terra.es/articulo/985511.htm

"Maitín un nuebo amanixer ta toz y todas..."

Escomenzipia o congreso que marcará l'esbenidero d'a nuestra luenga

Iste maitín escomenzipió o II congreso tantas begadas menzionau, y que en os zaguers diyas mos ha traito una ripia de taquicardias... Manimenos escomenzipia bien:

Tras conferenzias sobre lo catalán, o gascón (feita ista en a luenga parisina) y l'asturiano (prou intresán as conclusions d'ista zaguera charrada, más que más por a parellana situazión de l'asturiano y l'aragonés, o que mos premite aprender o que s'ha feito bien y mal con ista luenga) feitas iste maitín, se pasará ista tardi a la botazión d'as autas de l'academia.

Dende o mío punto de vista, os onicos puntos negativos por agora son estaus: por una parti a manca d'autobidaz en a carrera, y por atra, a confirmazión fura d'o sobconzellero de educazión (o presidén y a consellera no se atrebión a benir-ie) de que, en primeras, o nombre "academia" ye problematico.

Edito ta charrar d'a tardi: se fazión comunicazions que i mancaban (parixe que cuasi no les doi importanzia, pero de berdat que no ye asinas: ye más, ye a parti que más goyo m'ha feito por agora. O siñor Bernat Joan ha charrau de l'aragonés como nunca no lo ha feito garra presona "forana"; s'ha charrau d'a que posiblemén siga a bariedat más "pura" de l'aragonés, que ye lo de Setué; Rosa Berceo mos ha tornau a una reyalidat que probablemén emos ixuplidato charrando tanto d'as custions graficas y de l'academia, que ye a bisión que tienen os fabladors patrimonial d'a suya luenga; y a la finitiba Lluis Xavier Flores mos ha feito un resumen d'as proposas graficas y d'as grafías meyebals ta l'aragonés prou fazil t'os piors tozuelos, con una conclusión que ha d'estar a norma cheneral cuan se trata de luitar por l'aragonés: o consenso de todas as partis, zediendo cuan cal, y prou que aportando bisiones, ta prener lo millor resultau).

Dimpués d'ixo se fazión as botazions d'as autas de l'academia, con un resultau asabelo d'esclatero:

101 botos a fabor > Seguntes Francho Rodés, isto suposa o 91% (yo me lo creigo, no tiengo ganas de fer operazions agora en bacanzas)
15 botos en contra > Seguntes o siñor Rodés suposa o 6%
8 abstenzions > O 3%, prou que seguntes Rodés.

Ya sabez, si he feito bella cosa mal as culpas ta Rodés. :-)

Por zierto, ya se fa beyer en a prensa os buenos resultaus d'o congreso:

http://www.diariodelaltoaragon.es/noticias/detalle.php?id=180269


------------------------------------------------------------------------------------------------

Manimenos, no tot ye l'aragonés ;-)

Suyiza a nuei chitaus en a tasca

anque con tú en o mío canto
rara, no bi'n eba cosa
antimás tu ya sabebas que te amo

Diya triste

Diya triste o d'ayer...
Pensar que cuan yera fendo una gambada por o zentro o chugando a la piszina moreban dezenas de presonas en india...Asinas como ninons en palestina...Por no charrar de irak...

Dentro d'o nuestro micromundo, u mesmo en o micromundo d'o nuestro micromundo que ye fablilandia as cosas son ambiguas: si, ya sabemos que o IEA ha meso en a achenzia EFE un comunicau en o que pasaba de chuntos y d'o congreso, en mancar nomás 24 oras t'a reyalizazión d'o mesmo (personalmén, ixo me pa que ye de carnuzes)...

Pero garra feito ni garra presona mos sacará d'a ilusión d'un esbenidero millor... Ye esclatero, qui no quiera millorar as cosas, a un canto se le dixa: a resta imos entabán.

Triballador colombiano muerto en as obras d'a expo

Iste maitín, un triballador murió en as obras d'a expo en o turno de nueis.

Parixe estar que yera manipoliando una ormigonera cuan, no se sabe encara prou bien por qué, cayó dentro d'a maquina y no podió fer cosa ta salbar-se.

Ye triste que pasen ista mena de cosas, y más que más cuan se trata de chen que i biene t'aber una millor bida y, en muitas begadas, cudiar d'a suya parentalla en os suyos lugars d'orichen.

No aspero que se le faiga o reconoximiento que se merixe.

Se troba fosal de 1800 años baxo a sede d'o COI

Una colla d'arquelogos suizos anunzión que en o castillo de vidy (autual sede d'o COI) se bi ye trobau un fosal con 80 fuesas que ban dende a puenda romana dica o siego XVI.

Os triballos con istas fuesas continarán durante 4 u 5 semanas, y han aturau as obras d'ampliazión d'a sede d'ista organizazión.

Ya en as añadas 90, cuan s'enamplaba en atra begada iste puesto, se i trobón restos urbanos.

Capuza-te!

Por as carreras de zaragoza, te puez trobar en as paradas d'os buses, en as piszinas y en atros puestos a nueba campaña d'o conzello de zaragoza ta aganar-mos a fer serbir as piszinas publicas iste berano. Lastima no aber teniú una camara dichital en o inte en que beyé uno d'ixos cartels en o coso baxo ta retratar-lo y ficar-lo-ie...

O lema d'ista campaña ye: "capúzate" (aparixe ista parola en meyo d'un fondo azul "piszina"). Me pa sobrebuena a ideya d'emplegar parolas aragonesas que encara se conoxen en zaragoza ta nunziar as autobidaz, y tot en cheneral.

A beyer si istas campañas con parolas aragonesas continan entabán...

Medusa asasina en australia...

En australia, bi ha aparexiu una nueba mena de medusa, a la cuala, a suya descubridora, Lisa-Ann Gershwin, ha dezidiú dezir "irukandji". Seguntes ella, ye prou tocsica, y o suyo solimán ye asabelo raro y furo. Y ye que parex que iste solimán fa alta a presión sanguínea, orichinando en poco tiempo un infarto zerebral.

Plega dizindo que ista mena de medusas ye a risponsable d'a muerte de barias personas en as zagueras añadas.

L'arte causa a mallor parti d'as feridas en alemania agora en o mundial...

Dica fa pocos diyas se podeba trobar en as prenzipals ziudaz d'alemania balons de fútbol plenos, no con aire, sino con ormigón... y yeran igual que os d'o mundial... ta más chanada, se i ficaba a frase siguién: "Can U Kick it?" (Puez chutar-lo?).

A polizía engarcholó por unas oras a dos d'os creyadors d'ista ideya, dimpués de que bellas presonas se faziesen feridas al mirar-se de chutar-los. Els se desincusón dizindo que yera una manifestazión artistica con a que quereban simbolizar que o fútbol ye un fenomeno de masas.

Si ye que, ya se sabe, l'arte puestar peligroso y tot...

Fuesas en gallego

Os conzellos de bels lugars de galizia dan diners a las presonas que dezidan fer serbir o galego como luenga en a suya fuesa... Curiosa a ideya... Nunca no eba pensau en morir-me en aragonés, pero no me'n fería fastio.

Si se quiere fer serbir una luenga en toz os ambitos d'a soziedat, prou que también s'ha d'emplegar en ista mena de cosas. Ya no digo que os conzellos ni o gubierno d'aragón aduye a la creyazión de fuesas en aragonés (ixo ye utopico), pero bueno, estoi que tampoco no ye una mala ideya a seguir por os que mos intresamos por a nuestra luenga.

Como curiosidat, belún sabe si bi ha bella fuesa feita en aragonés?

Os "zibilizaus" gastamos más diners en as nuestras mascotas que no en os "inzibilizaus"

Fa no guaire beyé en uno d'os periodicos gratuitos una nueba soprendén, pero reyal: os ozidentals gastamos muito más (deziban os porzentaches, pero no'n remero) en cudiar as nuestras mascotas que no pas en rematar con a fambre en os países d'o tercer mundo...

Y no ye que ixo: cuan bella presona se proposa d'ir a bel d'istos puestos ta aduyar a las suyas chens, ye un raro que no sabe lo que fa.

No charremos d'a ipocresía d'a mayor parti d'a nuestra soziedat con a inmigrazión: ¡rematemos ya con a fambre en o tercer mundo! Ixo si, que no i biengan, millor que se mueran de fambre en os suyos puestos an que sabemos que nunca no podrán trobar-ie soluzión a la suya situazión.

Y ye que en o nuestro "micromundo" de color rosa, tot ye prefeuto... Pero que no mos quiten d'astí!

Cabo de semana: fin de fiestas de l'almozara

Plegó lo domingo y rematón as fiestas de l'almozara. Dimpués de beyer o que s'ha feito ista añada, me pienso que cada añada istas fiestas ban a pior: de ferias, no bi'n ha abiú; as autuazions, jautas; as berbenas, pues d'ixas trazas (manimenos cal dizir que en o primer diya cantón "baxando t'a escuela" d'a ronda y prou que en aragonés...). Pero d'astí no sale a presenzia d'a nuestra luenga en as autobidaz...

Asperaba más d'un conzello que no lo ye fendo mal en os autos festibos: pilares estión bien feitos, con os millors conziertos gratis en independenzia, fazión en san Balero una muestra de mosica por independenzia con grupos aragoneses (an que se podeba trobar-ie a popular colla mosical amaral), dimpués fazión un concurso mosical por as carreras de zaragoza (o popyrock, con o suyo lema en aragonés: a tot estrús)...

A lo menos, como bella cosa positiba, cal dizir que no s'han ascuitau sirenas que rezenten bel coma etilico, como gosa de pasar todas as añadas.

As drogas estricallan o ziclismo

Notizias tristes mos plegan dende o mundo d'o ziclismo: a las sorpresas de Heras y Manolo Sainz s'achuntan as de Ullrich, Basso, Beloki y Manzebo dentre atros... Ye triste conoxer que os ombres más importans d'iste esporte son enreligaus en l'escandalo d'os dopantes... A tot isto cal adibir a nueba de que Amstrong plega de reconoxer fa uns diyas que se dopó antis d'a suya malotía.

Prou que ye un esporte escamallatador, pero poliú ( a lo menos en as etapas de mon y as contrarreloches).
Manimenos, a competitibidat no ha de fer ixuplidar que os esportes han d'estar sanos: a competitibidat ye buena, pero sin esnabesar unas mugas...

Y ye que si queremos que os ninons no se fopen de lapos cuan chugan a bella cosa, me pa que dentre toz emos de dar echemplo.