Tornando a l'orache barrenau...

Ixo de ir de nueis en pleno nobiembre si lebar gambeto no ye normal como tampoco no en ye que os arbols encara tiengan fuellas berdas y que encara se puedan beyer flors, y totz os que bibimos en a capital emos puesto comprebar-lo. Y ye que iste mes no ha feito a fridor que ye normal en ista puenda de l'año, nomás istos dos zaguers diyas emos teniú temperaturas que, si fa u no fa, s'amanan más a lo corrién.

A temperatura meya ye estada 13,3 graus (3,3 más que en 1971, o nobiembre más caluroso que se conoxeba dica agora) . Por atro costau, as plebias también son estadas menos: iste nobiembre ye, chunto con os nobiembres de 1990, 1992, 2001 y 2004, o más xuto. Nomás bi ha abiú dos diyas de plebia consistén. Antimás, tampoco no bi ha nieu en as montañas.

A ragón d'isto ye o mezclallo d'as baxas presions atmosfericas d'as islas britanicas, chunto con as altas presions d'o sur d'europa. Isto ha motibau as plebas d'a bertién atlantica, y a sequía d'a rechión mediterránea.

Y seguntes os meteorologos isto no ba a cambiar: istos dos diyas de fredo que semos pasando, plegarán o biernes, cuan as temperaturas tornen a estar arredol d'os 13 graus de meya diyara (agora mesmo semos en 7)

Tornará Napoleón?

Charles Napoleón, deszendién d'o emperador Napoleón I, se prisentará candidato a diputau por parti d'o partiu UDF (zentro) en as elezions lechislatibas franzesas beniens d'o 2007, informón risponsables d'a colla politica.

Se prisentará por parti d'una rechión d'o departamento de Seine et Marne, en a redolada parisina. Autualmén, o deszendién d'o emperador ye teniente d'alcalde en Ajaccio, en a isla franzesa de Corcega, d'an que yera natural o suyo zelebre anzestro.

En a suya pachina web, Charles Napoleón ecsplica por qué no se diz Bonaparte: "A zaguera branca encara biba de l'árbol chenealochico d'os Bonaparte, a de Jerome Bonaparte, d'a que yo desziendo, eslichió en a puenda d'o mío bislolo prener como apelliu o nombre propio d'o que estió emperador d'os franceses".

De la Rosa no correrá l'añada benién

Ron Denis, o mainate d'a colla de formula1 mclaren-merzedes, ha anunziau que o compeñero de Fernando Alonso l'añanada benién en dita colla será Lewis Hamilton, y no pas Pedro Martínez De la Rosa, como beluns pensaban.

Lewis ye choben (tiene 21 añadas) y plega d'estar campión d'a GP2 (l'antecambra d'a formula1). Iste s'ha mostrau ristolero: "iste ye un sueño feito reyalidat". Por a suya parti, l'atro candidato (De la Rosa) ha dito: "no ye una sopresa a elezión de Hamilton. Prou que ese quiesto correr yo, pero entiendo os motibos d'a colla ta eslechir a Lewis. Le deseyo tot lo millor y aspero continar treballando con él". D'ista traza as opzions d'iste ta correr bella begada una temporada plena en formula uno son asabelo de pocas, en tener 34 añadas.

Atros pilotos, como Coulthard ya han ecspresau as suyas discrepanzias con a eleczión: "Creigo que mclaren le ha ubierto a puerta masiau luego. S'arrisca a pasar momentos complicaus, más que más por tener como compeñero a Alonso, que ye dos begadas campión mundial (...) ixo puet destruyir a suya confianza"

Momentos complicaus ta una persona que lo ha merexiu tot en iste esporte, y que beye como a suya trayeutoria profesional pasa sin tener garra oportunidat.

Zaragoza eslechida miebro d'a comisión echecutiba d'eurocities

O conzello de zaragoza ye estau eslechiu miembro d'o comité d'eurocities, o rete europeo de ziudatz más importán, que autúa como interlocutor y organo consultibo d'a unión europea, ta esfender os intreses d'as grans urbes d'ista.

Zaragoza será tres añadas y ye estada trigada, de begada, ta coordinar a colla de ziudatz que son en iste rete. O nombramiento iste se ha feito en l'asambleya cheneral d'o rete, que se ye fendo zelebrando en manchester dende o miércols 22 de nobiembre.
As chanzas d'iste proyeuto suposan de begada un mayor rispeto por o meyo ambién.

Eurocities se creyó en 1986 y en iste s'enreligan 128 ziudatz, d'as que 105 son d'a unión europea y atras 23 d'atros países tamién europeos. Zaragoza s'achuntó en o 2002, pero dica güe no eba formau parti d'o comité. Ta isto, ha aduyau que en o 2005 a ziudat estase premiada por a cooperazión internazión por o esfuerzo feito en a formazión de chestors iberoamercianos a trabiés de "ebropolis".

Asinas, o comité echecutibo con siede en Lyon, que ostenta a presidenzia, ye formau por zaragoza, la haya, copenhague, biena, chenoba, leipzig, ljubljana, manchester, nantes, estocolmo y barsobia.
Zaragoza tamién será a cordinadora d'as ziudatz d'o estau español que fan parti d'eurocities: barzelona, bilbao, chirona, gijón, madrit, malaga, murzia, santiago, sebilla, terrasa y balenzia.

A campaña "pixa goyosa" fomenta las infidelidatz dentre os lolos brasileños

No ye una notizia seriosa, pero no podeba dixar de meter-la-ie.

En o lugar brasileño de novo san antonio o conzello donó, de traza gratuita, viagra ta totz os ombres mallors de 60 añadas. A iste estrato d'a poblazión les fazió muito goyo a ideya, manimenos ista campaña dita "pinto alegre" (pixa goyosa) tamién prebocó problemas.
Seguntes o conzellero mallor "Bi ha bels lolos que ya no buscan a la suya bielleta. Tienen atros romanzes". Dimpués adibió que dende allora as pastillas azulas se donarán a las mullers: "Con os nuebos regles, imos a continar donando cuatro comprimius por semana, pero en bez d'os ombres, les ne daremos a las mullers. Asinas ellas, cuando les s'agane, les ne dan a los suyos mariús (..) Dende que prenzipiamos con a entrega gratuita d'o estimulante secsual, os nuestros mallors cambión. Son ristolers. Ye que cuan pierden a potenzia secsual, pierden o estimulo de bibir". O retrato ye o cartel d'a campaña.

Bai, que cosas tiene lo mundo! Si querez leyer bella cosa seriosa y d'a luenga aragonesa ir t'as leuturas en aragonés que se ferán iste sabado dende as 5 dica las 8 y an que serán representans d'os partius politicos y o reutor Felipe Pétriz. Más informazión en o chemeco d'as parolas.

Istos diyas soy a saber-lo aqueferau, asinas que escribiré menos, pero continaré cuan pueda.

Y a lo güeiteno diya, benió dios y fazió lo metro!

A monico s'amanan as elezions t'o conzello de zaragoza, y as sospresas ya ban aparixendo. Una promesa eleutoral estió a creyazión d'o metro en a capital, pero ascape s'apresurón a dizir que no a situazión de l'azienda d'o conzello yera un chandrío y no se podeba fer. Pero a cambio sí que tendremos tranbía, que d'una traza pispotero clamón "metro lichero" ta conbenzer-nos de que sí, de que a nuestra ziudat tendrá metro grazias a els... Pero muitas son as bozes que s'han carrañau con isto y a la fin sí que s'ha dito que bi abrá metro.

Se ferá (de fer-se, prou que sí, porque leban dizindo-lo muitas añadas) dende a gara delizias dica la gara miraflores, tenendo 5,1 kilometros. O conzello tendrá que bosar por ello dentre 182 y 255 millons d'euros (ixa marguín de 73 millons ye sospeitosa no? Bueno que dimpués d'a expo tampoco no ye guaire...). O 30% será bosau por o ministerio d'economía, 0 10% t'o gubierno d'aragón y lo conzello de zaragoza y a resta ta conzesionarios y prou que sí, t'a chen. Se suposa que será presto en 2011.

Personalmén, estoi que a ziudat l'amenista, pero se leba dizindo isto muitas añadas y nunca no se fa. A beyer tamién si no bi ha ecstraños en a traza de bosar. Si se fa bien de seguras que ferá muitisma onra.

Más de 20000 presonas en "amostranza 06"

A conzellera d'educazión d'o consello de zaragoza, Concha Nasarre, destacó ayere o gran ecisto d'a feria "amostranza 06", por a que pasón más de 20000 presonas durante o cabo de semana.

Ista ye a primera begada que se fa una autobidat asinas. Ye estada parada por a delegazión d'educazión d'o conzello, y una bentena d'instituzions y asoziazions que treballan por a cultura y as tradizions aragonesas i partizipón. Se fazión dezenas d'autobidatz, como conziertos, charradas, tallers... Dentre ellas i yeran ligallo de fablans y nogará.

Seguntes parolas d'a siñora Nasarre "biene a meter de manifiesto lo gran intrés de ziudadanía en toda mena d'aizions educatibas y culturals, más que más en ixas que tiene que beyer con a cultura aragonesa".

A conzellera ha anunziau tamién que en os diyas beniens se escomenzipiará a treballar ta parar a edizión de l'añada benién.

A berdat ye que estió un ecsito: muitisma chen se i amanó, conoxió bella cosa más d'a cultura d'aragón y d'a luenga aragonesa (como por exemplo, por qué dizimos co) y con bella mica más de conzienzia. Garra presona d'as que se i pasó por os puestos de nogará y ligallo metió mal rostro [a lo menos cuan yo i yera, y no creigo que siga por yo, ;-)], y muita chen s'intresó tamién por aprender a luenga.

Sobrebuena a ideya y aspero que se faiga durante muitismo tiempo. Ya nomás mns cal una lai de luengas.

Amostranza 06

En as carreras de Zaragoza son aparixendo cartels con una parola aragonesa "amostranza".

Iste ebento se trata d'una trobada d'esferens organismos y asoziazions que se carauterizan, dentre atras cosas, por lebar una labor d'educazión de toda mena de cosas a las chens.

A feria abrá puesto en una carpa en a plaza d'o pilar y bi será dende iste biernes a las 6 d'a tardi dica o domingo. No tos lo perdaz!

Antimás serán presens asoziazions que treballan por l'aragonés, como Nogará u Ligallo.

Sadam ba a morir?

Milentas bidas y milentos de milentos de dolars les ha costau a guerra a ixos que l'han quiesto fer ta ganar diners a trabiés d'a moneda d'o petroleo.

A estratechia ye mala, y a la fin o pueblo iraquí se ye sublebando y ye enrestindo contra ixos que son os "salbadors" pero que cuan les peta les fican bombas cada metro cuadrau en as suyas ziudatz y en os suyos lugars matando ninos y tot lo que siga astí en ixe inte.

Bai ombre! S'amanan as elezions! ¿y que podemos fer ta ganar-las dimpués de tanto estrapaluzio? Ixo de fer trampas como se fizo en a primera lechislatura dixando sin o gubierno a Al-Gore (tamién caldría beyer qué fería) ya no fa onra, ixo trucó muito o ficazio de rostro a lo mundo. Ixo de dezir que Sadam y Osama son os culpables de totz os problemas que bi ha en o mundo tampoco no fa onra ya... Qué se puet fer allora?

Jolio, ya lo tenemos! Acotolar a Sadam! Y ta que no siga escarau que lo faiga un chuez musulmán, asinas muere, ganamos botos pero nunca no somos os malos...

Allora bien, de berdat lo ferán? A guerra cibil de Irak espleitaría encara más dica mugas inpensables... cuento que no lo ferán... sería una gran error. Por tanto qué ye tot isto? Ye platero: maniobra demagochica... Iste ye o mundo y o sistema que queremos?

Europa cuasi se queda sin lumbre

O 10% d'os franzeses (5 millons)se quedón sin lumbre en fallar o suministro por parti d'alemania. Iste problema en o rete d'eleutrizidat escomenzipió a las 10 d'a nuei y enduró por una ora alto u baxo.

Encara que o problema afeutó más que más a franzia, también bi abió apagons en españa, italia, alemania y mesmo anglaterra.

Iste desequilibrio en a produzión europea cuasi orichina un "black out" (apagón total) en toda europa.

Ta restablir o equilibrio y con a fin d'ebitar ista mena de problemas os sistemas automaticos curtón de raso parti d'a corriente ta dimpués continar tot normal.

Charrando de zine: os borgia

Fa 2 semanas alto u baxo aprexió en as carteleras una pelicula ispano-italiana que trataba d'a bida d'unas d'as familias que más ha dau ta charrar t'os istoriadors: os borgia.

Ayer la beyé, y he de dizir que ta yo a pelicula ye bien feita: os bestuarios son sobrebuenos, l'aizión tamién (encara que bel rato se fa desucada) y a berosimilitut d'os feitos creigo que tamién, encara que no conoxco guaire toda a istoria d'ista parentalla.

Os actors no son conoxius (menos Paz Vega) pero no lo fan mal (bella begada se puet millorar a interpretazión de belún d'els, como lo que fa de Cesar Borgia)...

Resumindo, ye una pelicula buena ta beyer, más que más si quiers crebar con o costume de beyer peliculas "made in Hollywood".