1.7.06

As drogas estricallan o ziclismo


Notizias tristes mos plegan dende o mundo d'o ziclismo: a las sorpresas de Heras y Manolo Sainz s'achuntan as de Ullrich, Basso, Beloki y Manzebo dentre atros... Ye triste conoxer que os ombres más importans d'iste esporte son enreligaus en l'escandalo d'os dopantes... A tot isto cal adibir a nueba de que Amstrong plega de reconoxer fa uns diyas que se dopó antis d'a suya malotía.

Prou que ye un esporte escamallatador, pero poliú ( a lo menos en as etapas de mon y as contrarreloches).
Manimenos, a competitibidat no ha de fer ixuplidar que os esportes han d'estar sanos: a competitibidat ye buena, pero sin esnabesar unas mugas...

Y ye que si queremos que os ninons no se fopen de lapos cuan chugan a bella cosa, me pa que dentre toz emos de dar echemplo.

30.6.06

Retratos d'as añadas 50 y 60

Güe he puesto beyer una polida esposizión de retratos en o museu Camón Aznar, d'a zaragoza d'as añadas 50 y 60, asinas como retratos d'a resta d'aragón.

Antis eba estau bella begada en o museu, pero nunca no eba puesto beyer o que teneba: ye un puesto manifico t'os amans de l'arte, an que te puez trobar retratos de Goya, el Greco, asinas-asinas. Antimás a suya colezión d'arte renazentista y barroco ye graniza.
Me fa bergüeña que dica güe no sabeba que tenébanos un puesto asinas en o zentro d'a nuestra ziudat.

Dentro d'a suya colezión tos recomiendo a esposizión temporal d'agora, a d'os retratos d'a zaragoza de fa media zenturia: ye curioso beyer o paseyo independenzia de fa 50 añadas con o suyo "bulebar", o palazio de l'aljaferia sin foso, una romareda cuya redolada yera bueda, una replaza aragón con parque, una replaza españa más gran t'os autos (millor que no a d'agora), os trajes d'os polizías, y os bestius d'as chens, con as mullers con as suyas faldas blancas y os ombres con os suyas chambras y crabatas...

A la finitiba, un puesto poliú ta beyer t'os amans d'a cultura, y que agora mesmo ye gratis... (a resta de l'añada o pre ye de 0.60€: estoi que tampoco no ye guaire).

29.6.06

12 lunas



Güe he marchau t'as ofizinas d'o cipaj (en a casa d'os morlanes, amán d'a madalena) ta prener o programa 12 lunas (iste programa ye feito por o conzello de zaragoza ta ufrir nuebas autobidaz t'a chobenalla en as nueis de berano), y me he trobau con una d'ixas sorpresas que fan goyo de beyer: a portada d'o programa en castellano mete os titols en as dos luengas, aragonés y castellano. Yo sabeba que antismás feban dos programas, uno en aragonés, y unatro en castellano, pero me pa que meter os titols en o programa castellano en as dos luengas ye nuebo.

Aizions como istas fan pensar que a bel politico zaragozano si que de berdat l'intresa l'aragonés, pues en zagueras parixe que s'ha mirau de fer serbir a nuestra luenga ta bellas autobidaz: metión o lema d'a competizión mosical "popyrock" en aragonés (a tot estrús), i ficón dos poesías en aragonés en a campaña "con a boz en a parola"... Lastima que en atras autobidaz más importans dixen l'aragonés aparti... y ye que encara fa dulor y ferá dulor ixo de fluvi y no pas chisla.

O fútbol...

Ayer de nueis yera con os míos amigos tornando d'a piszina cuan se dezidió ir a beyer t'a plaza d'o pilar o partiú de fútbol d'a selezión española.

A yo no me'n aganaba guaire: encara que cualsiquiera competizión gosa de fer-me goyo, trobo que os partiús de fútbol gosan de estar un catén, y antimás, no cal que beyer as imachens y a mediatizazión con un poquet d'ochetibidat ta beyer que o que prima en o clamau "esporte rei" ye os diners y a politica... Sindembargo, me estimaba más d'ixo que no d'ir ta casa.

No más plegar ta plaza beyé que bi'n eba alto u baxo 200, de presonas, y que, curiosamén, bi'n eba con chambretas francesas (puestar que isto d'o esporte reyalmén aduye al entendimiento, pensé). Manimenos cuatro matutans no tardón guaire en chilar-les "fillos de puta, bucos, carnuces..." creyendo-se graziosos. Os franzeses no tardón guaire en ir-se-ne.

O partiú correba y yo, que cuasi no paraba cuenta d'él, prebaba más de picar a los míos amigos dizindo-les que benzería franzia. Tan y mientras, tampoco no podeba esplicar-me cómo ixa chen chilaba "españa, españa" cuan reyalmén no saben que ha feito "españa" por els... O más importante ye a propia presona, o demás nunca no ha de tener más importanzia.

Pero, sin dandalo, o pior de tot estió o que pasó cuan franzia escomenzipiaba a ganar: alto u baxo 30 presonas prezipión a fer-se a mofla d'os chugadors negros y a faltar-les...

Toz sabemos que o esporte, y más que más o fútbol, son diners y politica (no cal que beyer tantas banderas ta comprobar-lo), pero si antimás no aduya a la toleranzia, sino que creya razismo y biolenzia... ¿ta qué esiste reyalmén o esporte? ¿por qué chen, que parixe normal, fa istas faltadas? ¿qué ye o que se ye fendo mal?

27.6.06

Mayor autobidat polizial...


Suposo que toda la chen que bibe en Zaragoza ha puesto beyer un mayor numero d'aizions polizials en istos zaguers meses...

Son asperando amagaus ta apiñorar-te (sincusar o mío malo pensar, pero me pienso que isto ye berdat): no puez ir en bezicleta por o galacho de Juslibol, meten siete "tozineras" en o parque miraflores ta rematar con o "botellón", fan rechistros a presonas que son fendo-se una gambadeta por a carrera, ya saben os diners que han de conseguir apiñorando autos, asinas-asinas.

Con tot isto no quiero espernir a la polizía: cuento que a suya labor ye asabelo importán t'a buena marcha d'a soziedat. Manimenos, ista tendenzia fura d'a polizía zaragozana creigo que no ye guaire efeutiba, pues antimás de creyar malestar dentre os zaragozanos y zaragozanas, no retalinia o berdadero problema: tanto te se'n da que se baiga por o galacho en bezicleta u no (no ye o mesmo t'os automobils, prou que no), o numero de comas etilicos contina estando igual, os camellos continan estando en os mismos puestos y bendendo lo mesmo, y os azidens de trafico en a capital no'n son menos...

Antimás, ista tendenzia d'a soziedat d'amostrar a la chen o que ha de fer, y si no punir-la, cuento que ye prou negatiba: as cosas cuasi no milloran, y gosan d'ir entabaxo (a biolenzia crexe, as ideyas s'estreman, a presona pierde identidat enreligando-se en a "masa"...)

Puestar que siga menester cambear a traza de pensar y d'autuar, china-chana pero con seguridat en cada paso.

26.6.06

Cursos intesibos d'aragonés



L'asoziazión cultural Nogará-Religada fa, en o més de chulio y setiembre, cursos intensibos d'aragonés. Ditos cursos son de 60 oras en cheneral, a razón de 3 por diya. Bi abrá cursos de primer ran y de perfeuzionamiento.
O pre será de 59 euros, mesos os materials d'o curso y cuatro numeros de l'Espiello (publicazión periódica feita por l'asoziazión cultural). Por atra parti l'orario ye ubierto: penderá d'a propia chen que s'apunte.

Ta apuntar-se se puet gritar a lo telefono de Nogará (976390708), nimbiar un correyo a acnogara@hotmail.com , ir t'a sede de l'asoziazión en a carrera Gavín nº6 u mesmo besitar a suya pachina web: www.nogara-religada.org.

Estoi que ye una buena oportunidat ta ixas presonas que quieren conoxer a luenga aragonesa pero que no pueden por treballo u estudios en a resta de l'añada.

25.6.06

Federico... charrando faltando y sin saber-ne


Leyendo en a ziber-rufierta beigo un enlaze a lo programa de Giménez Losantos en a COPE, en o cualo charraba d'a luenga aragonesa...

http://www.lamanana.com.es/index.php?/lamanana/escuchar/jueves_22_de_junio_de_20064/

Bueno, ataca a l'aragonés de traza fiera (dialecto, idiolecto, analfabetismo asinas asinas, imos tot ixo que s'ha contrimostrau falso dende fa 30 añadas). O problema ye que se saca argumentos d'a pocha y antimás se creige que en son filolochicos y seriosos...

Si no sabes d'un tema, no charres de él y muito menos sigas contrario a lo que ye contrimostrau por espertos...

Antimás, no s'atura astí sino que falta a presonas dizindo-les "sosos" u mesmo bergüeñosos.

A conclusión que yo tiengo ye que una presona que tien un programa de radio prou ascuitau no puet ir-ie dizindo falazias ni faltadas: Isto l'onico que fa ye creyar biolenzia.
Y tampoco no puet charrar de bella cosa cuan ni sisquiera tien conozimientos d'ixo.

Escomenzipiamos!

Bueno, escomenzipio a fer iste blog en aragonés (u a lo menos ixo prebo de fer, sincusar si lo mío ran no ye guaire bueno).

Miraré d'autualizar-lo cada diya, u un diya par d'atro (que chanada berdat?), charrando d'o tema más intresán u curioso que beiga : luengas, zienzia, politica, esportes, asinas asinas.

Prou que tos combido a partizipar-ie con as buestras opinions, pero fez-tos cuenta de no faltar ni estar maleducaus.