Os benezolanos refusón a reforma constituzional proposada por Hugo Chávez, qui tenió a suya primera derrota eleutoral en nueu añadas. Seguntes as zifras ofizials dibulgadas iste lunes de maitinada, o 'no' ganó o referendo d'o domingo por poco más d'o 50% d'os botos. De todas trazas, filtrazions d'altos funzionarios an deixau entrefilar que bi ha abiu una falsificazión d'os porzentaches, estando o 'no' botau por o 65,7 % d'a poblazión."Por agora no podiemos lograr l'aprebazión d'a reforma constituzional" dizió Chávez, repetindo una frase suya que fazió zelebre cuan fracasó o golpe d'estau que lebó en 1992 contra o ex-presidén Carlos Andrés Pérez. "M'estimo más que as zifras aigan plegau t'o ran d'a irrebersibilidat", dizió, chustificando a demora de l'autoridat eleutoral en rebelar os resultaus.
"Con o corazón les ne digo, tiego barias oras debatiendo-me en un dilema. Ya salié d'o dilema y soi tranquilo, aspero que os benezolanos tamién" siñaló Chávez. "No se troben tristos nian amorgallaus", dizió o chene d'estau a os suyos seguidors. "Agora benezolanos y benezolanas confiamos en as instituzions", afirmó o presidén en una conferenzia de prensa transmitida en a cadena nazional de radio y telebisión.
Chávez felizitó a os suyos adbersario por a bitoria, pero adbirtió que "nusatros somos feitos para una baralla luenga". A reforma estió presentada en dos bloques a os eleutors. El A, feito por 46 articlos proposaus por Chávez, y o B en feito por 23, proposaus por l'asambleya nazional. O primer estió refusau por o 50,7% d'os botos y o segundo por o 51,05%, seguntes os datos ofizials.
L'abstenzión estió d'o 44,11% d'os eleutors. Cuan o presidén d'o CNE anunzió o resultau adberso a la reforma d'a carta magna, una clamor puyó en a ziudat de caracas y milentas de personas salión t'as carreras a fer borina. Os estudians espleitón en goyo, con as mans puyadas, en escuitar o boletín ofizial que dio a bitoria a o "no" en o referendo.
O mobimiento por o "No" estió liderau por o mobimiento estudiantil, naxiú en mayo pasau en no renobar-se a lizenzia d'a canal opositora RCTB. Antiparti, rezibió o refuse d'o ex-ministro d'esfensa y emblematico cheneral, Raúl Baduel, que lideró o mobimiento zibico melitar que remató o golpe de 2002 y fazió tornar a Chávez ent'o poder.
Tamién estió apoyau por una disidenzia chabista integrada por o partiu sozialdemocrata "podemos", barios inteleutuals y dica a suya propia ex-esposa María Isabel Rodríguez, que estió constituyén en 1999.Baduel demandó a o país d'estar alerta debán d'a posiblidat de que Chávez impose os cambios por atros meyos diferens a l'asambleya constituyén.
Dimpués d'a suya reeleczión, l'asambleya nazional -feita de traza zenzera por chabistas por o boicoteo a as lechislatibas d'o 2005-, dio a Chávez o poder de lechislar por decreto mientres 18 meses sobre barios temas, a trabiés d'una lei abilitán. Baduel combidó a o "pueblo a superar ista fase (de confrontazión) y remontar-la chuntos en una asambleya constituyén".
"Asinas se dexará luen ta siempre o totón d'as dos benezuelas" sozrayó o militar en rueda de prensa dimpués de conoixer os datos ofizials d'a botazión. A constituzión impide a Chávez presentar una nueba iniziatiba de reforma constituzional mientras a suya estacha en o gubierno, encara que encara puet comboyar a una asambleya constituyén.
Estoi que esto contromuestra que chavez no ye un dictador. Garra dictador pierde unas eslezions.
ResponderBorrarNo me fa goyo d'estar un 'conspiranoico' sin pruebas firmes, pero fe-te cuenta:
ResponderBorrarEn o zaguer resultau que salió antis d'os definitibos se dizió que a 'no' yera ganando por un 67%, y en 4 oras pasó a estar nomás un 51%.
O ministro d'esfensa, o siñor Gustavo Rangel, fa uns diyas dizió que o peligro d'un pronunziamiento popular-militar si ganaba o 'si' yera muito altero, pero que ya eba parau cuenta d'a situazión y eba parau os exerzitos. Para cuenta que sabeban que si ganaba o 'sí', podrian salir perdendo.
Reyalmén, yo me pienso que ye o resultau que más ha benefiziau a Chávez. Una bitoria ese desembolicau en un pronunziamiento que posiblemén ese esbarrau en una guerra zibil, mientres que una derrota muito ampla ese deixau en muito mal puesto a Chávez.
Antiparti d'ixo: o 'si' tenió un diya más de campaña eleutoral que no o 'no', por lei de Chávez. O 'si' podeba estar propagandau en toz os meyos, o 'no' nomás en beluns. Bels diyas antis d'a botazión Chávez dizió que 'os que botasen 'no' tendrían denzima o peso d'o plomo que él mesmo iba a ficar-ie'. Y fa no guaire tamién Chávez dizió que 'os estudians unibersitaires yeran o parasito d'a soziedat'.
Tamién ye berdat que son estaus, aparentemén, os comizios más 'legals' con Chávez, con a presenzia d'o mayor numero d'obserbadors internazionals. Mesmo en a ziudat de Guacara a guardia nazional de Chávez, arrestó a uns chavistas que yeran mirando de fer trampas.