En o zaguer post comentaba a gran distanzia entre os estudios de corpus de l'aragonés (replegas, documentos istoricos...) y o poco que s'eba reflesionau dende ixe corpus. Prenzipiaba esposando a grans rasgos o desembolique d'un atra teoría, fisica, a d'a grabedá, y beniba a dezir que, dimpués de n obserbazions, a la fin se desembolicó una teoría a aplicar a la resta d'obserbazions.
A esferenzia entre o desembolique d'ista atra teoría y o estudio de l'aragonés ye que, dimpués de 40 añadas, nos continamos zentrando en a replega de corpus baxo o esprito romantico que pilla o lema ''l'aragonés, luenga a descubrir'', y pocos estudiosos s'han adedicau a la reflesión dende ixe corpus.
En iste post entraré en as posturas que se pillan tocán a ixas teorizazions, que troban un antedezedén en a Gramatica d'a Luenga Aragonesa de Francho Nagore (feita con o poco corpus replegau en ixos tiempos), pero ta ixo, primero i tornaré a ficar as posturas que s'han preso tocán a la teoría d'a grabedá ta dimpués fer o paralelismo.
Una begada formulada a teoría d'a grabedá, se tornan a fer esperimentazions. Pueden ocurrir tres cosas:
1. Que as nuebas esperimentazions confirmen o dito por a teoría d'a grabedá. Ye dezir, que os cuerpos se atrayen con una fuerza direutamén proporzional a las suyas masas y inbersamén proporzional a o cuadrau d'a distanzia que los desepara.
2. Que as nuebas esperimentazions no s'achusten de tot a o que deziba a teoría, calendo allora chiquez retoques u matizes en a teoría inizial. En o caso d'a grabedá, isto pasa si se forachita a famosa mazana de Newton no dende un mazanero, sino dende a Torre de Pisa (u más encara, dende o Burj Khalifa): cal adibir a la formula un nuebo sumando que represente a disminuzión d'a fuerza motibada por o coefizién de rozamiento de l'aire.
3. Que as nuebas esperimentazions contradigan de tot a teoría, abendo-la de cambear. Isto pasó con o perihelio de Mercurio, que o suyo mobimiento no se podeba esplanicar dende a grabedá, y tamién con os mobimientos de particlas sozatomicas. Aparixioron allora dos nuebas teorías: a d'a relatibidá, que antimás d'esplanicar os fenomenos d'a grabedá clasica tamién permitiba esplanicar o mobimiento d'o perihelio de Mercurio, y a mecanica cuantica, que mira d'esplanicar os fenomenos sozatomicos. T'o desembolique d'una nueba teoría, ye muito importán a creyatibidá d'o zientifico: iste ye o treballo más embolicau d'as interpresas zientificas y se da nomás cuan o modelo zientifico anterior ye acotolau, y parixe que baxo unas determinadas circustanzias sozials (Thomas Kuhn, The structure of scientific revolutions, 1962).
¿Cómo s'aplica isto a o caso de l'aragonés?
Como deziba en o post, ye poco o que s'ha teorizau, pero dende o teorizau (y dimpués amostrau en asoziazions culturals, difundiu en escritura, asinas-asinas), ascape surten as criticas. Criticas muitas begadas feitas con gran razón y alimentadas por o desembolique d'estudios de corpus (bariedaz dialeutas, documentos istoricos...).
Asinas, se fan listaus con as parolas y estruturas que se fan serbir mal en aragonés estándar (por un regular en estar calcos d'o castellano y/u mirar de fer-las o más esferén posible d'o español, pillando localismos u formulas que no se corresponden con a entidá fonetica, morfolochica y sintautica de l'aragonés). Istos listaus son muito buenos y un serbidor ye o primero que para cuenta d'els ta amillorar o suyo aragonés y fer os menos errors posibles cuan escribe (encara que en iste blog sé que muitas begadas no lo parixerá).
O problema surte cuan istas modificazions d'o modelo inizial se proposan como una nueba teoría y no como modificazions d'o modelo inizial. Dito d'atra traza, istas modificazions se consideran dentro d'o punto 3 d'o esquema proposau t'a grabedá: se planteyan istas modificazions a o conchunto d'estudios de l'aragonés d'a mesma traza que se planteya a teoría d'a relatibidá como superazión d'a teoría d'a grabedá. Lochicamén, un listau de 50 (metamos mesmo 100) correzions d'emplego de l'aragonés no ye prou como ta constituir-se una teoría. Ye como si dezise que a grabedá ye incorreuta nomás porque l'aizión d'o rozamiento de l'aire fa chiquetas desbiazions en o resultau esperable cuan a mazana caye dende a Torre de Pisa. Por atro costau, as correzions no fan onra nomás ta fer una nueba teoría: as teorías se construyen dende a creyatibidá, no dende a destruzión d'un atra. Una teoría no se fa nomás trobando errors parzials y chicoz d'un atra.
Iste problema se fa más gran cuan se pasa a descalificar a teoría inizial d'a que se parte (prezisamén a mai que ye alazet de toz y que, repito, nomás se maquilla y se millora con istas criticas, pero no se cambea). En aragonés he bisto cómo beluns fan serbir fabla en contraposizión a aragonés ta descalificar a atra chen. Mesmo bi abió qui miró de popularizar o termino raragonés. Me pareix una falta de respeto, pero antimás, si ta ello se basan en modificazions puntuals d'o modelo inizial (parolas, bella estrutura sintautica...) ye tamién una falta d'umildá.
Antimás, estudiando una luenga tenemos uns feitos ochetibos y inmutables (muller ye muller, dona, mullé, y talmén bella atra opzión que no conoixca, y prou. Isto ye presén y no se puet sustituyir asinas como asinas por atra opzión). Por ixo, si se quiere creyar una ''nueba teoría'' (punto 3) o que cal ye ir dillá, pasar a un grau d'abstrazión más altero que de begada abraque os resultaus ya pillaus, ye dezir, fer proposas de gramaticas y estudios d'esprito cheneratibista, cognitibista y estruturalista ta dimpués enfrontinar-los. Bella cosa me diz que no tenemos una comunidá d'estudiosos tan presta como ta fer istas cosas... (sisquiá m'entiboque).
RESUMEN: En aragonés s'han feito prous criticas a os modelos esistens, alimentadas en parti por os nuebos estudios de corpus. Istas criticas fan muita onra ta amillorar y escoscar l'aragonés que femos serbir. Con tot y con ixo, bellas begadas s'han proposau como teorías alternatibas completas d'os modelos d'os que naixen, cuan no son que listaus de parolas y bellas estruturas sintauticas que no plegan a la zincuantena d'exemplos (y tasamén creigo que puedan plegar a o zentenar). Ista situazión s'ha feito más grau con descalificazions (fabla vs. aragonés) que no son so que faltas de respeto y d'umildá. Cal remerar que ta desembolicar una teoría, cal muitismo treballo prebio y tener una creyatibidá innata.
Un anexo istorico (PARA CUENTA: si no t'intresa a filosofía d'a zienzia no contines leyendo. Isto puet-estar un autentico coñazo).
En prenzipiar o sieglo XX, o positibismo que confidaba esplanicar toda a reyalidá dende a zienzia (más que más dende a fisica y as matematicas), continando asinas con a ideya razionalista d'a ilustrazión d'os sieglos XVIII y XIX, entró en crisis. ¿Por qué?
1. Os dos prozedimientos epistemicos por eszelenzia, induzión y deduzión, entroron en crisis.
A induzión (ex. si beyemos zinco güellas y as zinco son blancas, pasamos a considerar que todas as güellas son blancas) presentaba uns problemas bien conoxius dende Aristoteles.
A deduzión (ex. partimos d'a lei unibersal de que todas as güellas son blancas, por o que si nos dizen que bi ha una güella en cualsiquier puesto, de seguras que ye blanca) amenistaba uns asiomas que a suya naturaleza no yera mica clara, y por atro costau, trobó grans problema con o teorema de Gödel (1931).
2. Muitas teorías consideradas ''infalibles'', falloron. O exemplo más claro estió a grabedá de Newton y a suya imposibilidá d'esplanicar o mobimiento d'o perihelio de Mercurio y o comportamiento d'as particlas sozatomicas.
En breus, o ideyal de zienzia como sustituto de l'antiga relichión ta esplanicar tot d'una traza ''razional'' s'esbafaba. ¿Cómo prozeder allora con o treballo zientifico?
Karl Popper (Logik der Forschung, 1934) proposó una nueba traza que s'ha conoxiu como falsazionismo. Resumindo en un parrafo milentas de densas pachinas, o que se quiere dezir con o falsazionismo ye o siguién: ya que no podemos conoxer tot con seguridá dende a zienzia, emos de mirar de falsar-la, de contrimostrar que as teorías esistens son erronias, ta dimpués poder trobar-ne atras millors (en cristiano: imos a tocar os güegos a las teorías esistens).
Mientras o sieglo XX o propio falsazionismo estió socheto de falsazión, ye dezir, de critica. Buena cosa d'istas criticas se zentran en o destrutibo que resulta o falsazionismo: ''muito bien siñor Popper, emos puesto falsar as teorías. ¿Y agora qué? ¿Cómo aconseguimos fer-ne atras millors?''.
En breus, o ideyal de zienzia como sustituto de l'antiga relichión ta esplanicar tot d'una traza ''razional'' s'esbafaba. ¿Cómo prozeder allora con o treballo zientifico?
Karl Popper (Logik der Forschung, 1934) proposó una nueba traza que s'ha conoxiu como falsazionismo. Resumindo en un parrafo milentas de densas pachinas, o que se quiere dezir con o falsazionismo ye o siguién: ya que no podemos conoxer tot con seguridá dende a zienzia, emos de mirar de falsar-la, de contrimostrar que as teorías esistens son erronias, ta dimpués poder trobar-ne atras millors (en cristiano: imos a tocar os güegos a las teorías esistens).
Mientras o sieglo XX o propio falsazionismo estió socheto de falsazión, ye dezir, de critica. Buena cosa d'istas criticas se zentran en o destrutibo que resulta o falsazionismo: ''muito bien siñor Popper, emos puesto falsar as teorías. ¿Y agora qué? ¿Cómo aconseguimos fer-ne atras millors?''.
Tocán a l'aragonés: ''muito bien siñor X, ha contrimostrau que o modelo d'aragonés que se fa serbir ye malo (OJO: nomás s'ha dito en bellas custions particlars, a o menos por agora) ¿Qué ye o que me proposa? Aspero que no sigan nomás parches de l'anterior...''.
Una respuesta que ha resultau muito importán t'as zienzias sozials ye a que dio Thomas Kuhn en o suyo libro A estrutura d'as reboluzions zientificas (1962), y d'o que fico una foto alto.
No cal complicar-se tanto a vida. A creyacion d'un modelo de luenga estandar ha de partir de a conoixencia de a realidat de a luenga, pasada y present. O problema de l'aragonés ye que no existe una variedat que tienga una abantalla en l'uso sobre a resta. A gramatica de Nagore ye una aproximacion a saber-lo de buena contando lo poco que se conoixeba d'aragonés ta part d'alavez. Prou que s'ha iu retocando, pero ye cierto que a ideya que muitos tenebanos sobre a naturaleza de l'aragonés se basaba en prencipios que no yeran os fundamentals, ye decir nos centrabanos en cosas superficials, folcloricas y que no constituian l'esprito d'a luenga. Con os anyos, a experiencia, l'aprendizache d'atras luengas se va mirando de trobar ixe esprito, ixe ADN, y poquet a poquet se va trobando. No s'ha quiesto fer una nueva teoría, se mira d'estructurar a luenga dende os alazetz dica lo que la plena, y mirando d'estar correctos, yo no me complicaria tanto a vida. Quan leigo textos d'Anchel Conte foi cuenta que un modelo de luenga común que bebe dreitament d'as fuents ya existiba, lo que pasa ye que s'ixuplidó,... y ya m'estoi envolicando masiau.
ResponderBorrarDabi L.
Estraordinaria reflesión, si l'adubimos o contesto y os presonalismos... tachán "fablilandia".
ResponderBorrarO que diz Dabi, tien lochica, y puede aber parti de razón, agora la clau, y dita con rispeto, ye que o inconszién le traiziona "mirando d'estar correctos", toma ya!!! Correctos respeuto a qui??? Cuála yera la norma??? Cuála yera la incorreuta??
Tenemos lo que nos merexemos, que ganas de que tot isto rebiente y l'aragonés se'n baiga ya á cascar-la. Lis ne contaré a os fillos como cuentos de lolo, porque lo que somos fendo ye a gran fimera de la nuestra fabla, u luenga u quemisió. Y toz istos "aventurers" bel diya beyerán la m... que salió de "chuntos por l'aragonés". "Chuntos" ironías d'a istoria.
Y que conste que probablemén as grafías y más cosas cal ixa reflesión, ye nezesaria, pero no pas dende a baralla, a mofa y o insulto. Ni dende l'amaterismo.
Perdón s'incomodo a beluno, pero jodo petaca ,a luenga muerta, a chen pasando y por astí charrando d'a "sciencia" y de a "corrección".
Salú.
Sobrebuén articlo que dixa bien platero dica qué punto ye nozible bibir aposau en una terne cretica, que cretica o que cretica, e dimpués a cretica d'a cretica... ta estar tot ro día reimbentando-nos mientres, en o nuestro paralís -cretico-, a luenga s'amorta.
ResponderBorrarMuy oportuna reflexión la de esta entrada. Enhorabuena.
ResponderBorrarBuen diya.
ResponderBorrarCuento que l'articlo ye una miquinina esbarrau, pa yo pareix que a chent que qüestiona bels puntos de l'antiga fabla (tot entrecometau) ye un diaple, y cuento que, enca i habiu chent que ha faltau (como tamién por l'atro costau), no i hai un esprito de trencar de tot ixos modelos, prou que se tien en cuenta os estudios de Nagore y cia.
Cuento que i hai personas que tienen mas intreses que a propia lengua. En veyendo a iniciativa de Chuntos por l'aragonés, de prebar de arroclar a TODA a chent, mesmo a patrimonial, y veyer que yera posible que complegasen en una Academia...¿qui ye qui no tien en cuenta l'aragonés?, si mesmo as patrimonials acceptaban ixos minimos.
D.A.
Primer de tot, muitas gracias a totz por os comentarios. No veyeba o blog dende feba un par de dietas y agora me trobo con isto y no dixa de fer ilusión, pos o que me fería goyo que estase a nueva blogosfera en aragonés ye un espacio de debate que pueda compachinar-se bien con os retes socials.
ResponderBorrarDito isto:
1. D.A.: Siento si en a redacción d'a entrada he cheneralizau muito parixendo que tot qui ye en contra de determinadas posturas no reconoixe o treballo feito d'antis. No iban por astí os míos tiros: de feito bi ha chent que adopta nuevas posturas de treballo que me parixen sobrebuenas (no me cortaré en decir que una d'ellas por exemplo ye a d'os que desembolican o software en aragonés), y igualment personas que son susceptibles d'ista critica no se pueden encuadrar en denguno d'os comentarios i ficaus. En breus, no he quiesto cheneralizar ni apuntar a denguno, porque ixo sería precisament alimentar tot o negativismo d'a critica: cadagún que faiga o suyo examen, pos en totz os costaus trobamos de tot.
2. Dabi L.: 'No s'ha quiesto fer una nueva teoría, se mira d'estructurar a luenga dende os alazetz dica lo que la plena, y mirando d'estar correctos, yo no me complicaria tanto a vida. Quan leigo textos d'Anchel Conte foi cuenta que un modelo de luenga común que bebe dreitament d'as fuents ya existiba, lo que pasa ye que s'ixuplidó'.
Si lo interpreto bien, estoi que en o fundo pensamos igual. Con o que no soi d'acuerdo ye con a cheneralización que fas: 'lo que pasa ye que s'ixuplidó'. Cuento que beluns lo ixuplidoron, atros no. Si no, por exemplo, l'aragonés que m'has amostrau sería muito pior. D'atra man, cuan sa fació estió por tener más intreses que no a propia luenga, como diz D.A. Y d'isto zaguero, en trobamos casos por totz os costaus.
A entrada puet-estar una mica embolicada, como bien prencipias decindo. O que miro de fer con ista nueva puenda d'o blog ye aplicar a mía faina profesional ta y en aragonés (y agora en prencipiar, nomás ta l'araognés). Con ello quiero aportar o mío granet d'arena en a normalización de l'aragonés, quiero contribuir a superar os tipicos clichés de baturrismo, bucolismo y politica dende o que o que m'adedico. Claro, uno se troba con que bellas cosas que quiere expresar de traza divulgativa son a saber-lo d'embolicadas, y trobar o punto medio entre 'rigor intelectual' (sincusatz si pareixco fachendoso, pero no trobo atra frase) y divulgación-aplicación no ye mica fácil.
En fin, muitas gracias a totz, Dabi L., D.A. y anonimos, porque l'ochetivo de tot isto ye chenerar un espacio de debate constructivo y pareix que s'aconsigue.
Y t'o mayestro un fortal abrazo ta el y t'os suyos!
Alabau!! De berdá que bi ha cosas igual que en tiempos d'a lola Ramona. Fueras de bella cosa, creigo que la chen no beye que ya no somos en los 80 como deziba un anunzio pa mercar autos.
ResponderBorrarSoi patrimonial (toma palabro absurdo) y no tiengo dengún intrés dillá d'a luenga, y creigo que ya ni en a luenga. Imos, que con l'aragonés no me ganaré a bida, ni antis ni agora, ni beigo futuro.
Mirar, de la chen "patrimonial" y ya ye bien de faterías, o 100% de más de 20 años, igual no pienso bien los años, somos ANALFABETOS en aragonés. Y os escasos crianzos d'agora con un par d'oretas por semana, más inglés, franzés, ruso... millor que cosa, pero sigamos serios, bale de charrar de mitos. Y lo de patrimonial, en fin, me lo fería mirar. Yo charro un aragonés que te cagas, pero..., en qué?? En as dembas en que quedó un aragonés rural y agricola. Qui sabeba fa 30 añadas cosas de sofware, de dreito, de telebisión, de custions teunicas, de luenga culta, qui???? Qué somos escolarizaus y bibiendo en castellano!!!! L'aragonés patrimonial yera y en ye FOLCLORICO, llibré, grupos folcloricos, costumbrismo, igual mesmo baturrismo.... Que se'n ese feito sin estudios y a chen que ha beniu treballando en as 40 zagueras añadas? Poco, miquitinas. Para, sí, oregonés para foranos... que me sulse os adintros. Por no charrar de la joya "bien dito" de oregon tv.
Que agora bi aiga qui se gana la bida con l'aragonés, chapó, entadebán, pero bale de chorradas de patrimonial, neo, new, guai, fetén y entenaus.
Cliché politico??? Ye o que en tenemos anque a yo no m'asusta fer politica de l'aragonés, lo que me fa miedo ye fer PARTIDISMO.
De chuntos por l'aragonés una academia??? Basemias toz en tenemos. Tíos que una Academia ye un ente de dreito publico, no una colla de chen que s'achunta pa fer tragos y pasar-lo bien. Y lo siento, no tenemos chen pa fer una academía, toz prexinaz un mangante de Vallekas (perdón por o estereotipo) d'academico. Miau!!! Estar de o casería más alto de lo lugar más pincho ye credenzial pa estar academico??? Pobre aragonés. Cal una academia de chen capaz, y agora una academia de chen con conoximientos, dimpués caldrá otros perfils, pero que somos en o submundo, si no sabemos ni como escribir, si somos una luenga culta plena de clichés y errors mal transmitidas, porque no en sabemos, denguno, bale de patrimonials por fabor que sabemos de o nuestro, o de os lolos y pais.
Más umildá, menos egos y más ganas de treballar de baldes, sin querer figurar.
Si espazios como iste sirben pa charrar a calzón baxau, bien, si continamos espardindo as mesmas chorradas que se sentiban en Uesca y Zaragoza fa 30 añadas, emos abanzau, un montón, pero enta la fuesa.
Salú, soi anonimo 2, perdón si falto, no ye a mía intinzión. Anque me agarro cada carrañazo leyendo seguntes que cosas, que... me ba mal pa la tensión.
Y lo siento, los amaters tenemos que fer-nos ta zaga y refirmar y aduyar en o que podamos, a os filologos, os de o software, editors, a qui siga que pueda tirar entadebén.
Muitas grazias, ye una umilde opinión, presonal y segurismo que erronia.