Ent'o Eixe Cafetero (i): a facienda Bosque del Samán y o Parque d'o Café

Tornau de Barichala, me pertocaba de maitinar o martes, pos a ixo d'as cuatro heba d'estar en o colechio ta concarar unatra experiencia: o viache cabo de curso d'os escolanos de primero d'a ESO. Me venió cuasi por casualidat, pos no tiengo garra clase con ellos, pero as baixas de companyers facioron que i entrase yo. Y tan contento, pos yera unatra oportunidat ta continar conoixendo Colombia y a os mesaches los conoixeba una miqueta por guardias.

Antis d'o meyodiya arribemos en o nuestro aloix, a facienda Bosque del Samán… y qué luxo! Una finca de novela, graniza, con muitas plantacions y edificios, y an que dimpués de fer o nuestro check-in, retantir y chentar, nos amostroron o proceso de producción d'o café, dende as primeras simients y matas, dica o producto final socarrau. Por agora, una d'as mías millors experiencias en Colombia, por naturaleza, por café, por profesionalidat y comodidat d'a facienda, y por a companyía d'a profesora Alexia, d'os guidas y d'una catrinalla asabelo de maja. En ixa experiencia aproveité ta vestir-me de cafetero colombiano: don Marco Juan Valdez!

Dimpués, marchemos ent'a piscina, con toda a catrinalla cremando enerchías, y yo l'unico adulto que se ficó en l'augua. Por o camín, me sorprendió asabelo as selvas d'un vechetal que me pensaba que yera bambú, pero que en verdat yera una mata diferent pero d'a familia: as guaduas. Tendrían diferencias, pero tamién s'emplegaban en as construccions de toda a redolada. Por ixos camins, tamién me trobé con una simpatica vaca cheposa.

A l'atro'l diya, marchemos t'o Parque d'o Café, parque tematico d'atraccions que estió l'atractivo favorito d'a colla. Servidor, que se fa viello, reviscoló y aproveitó tamién as atraccions: o karting, o teleferico, as tres montanyas rusas —a roya, a millor— y a torre d'altaria. Con tot y con ixo, o que más me fació goyo estió l'espectaclo de danzas colombianas, an que no i fuemos que o guida Leandro, Alexia y Servidor. Una amostranza d'a danza de cada provincia, mientres bells pocos minutos cadaguna y durando un total de bells 40 minutos. Perfecto! Bailarins profesionals y vestimentas asabelo de treballadas en un espectaclo que no he trobau en Espanya y que sería bien poliu: cuatro minutos d'ixota, atros cuatro de chotis, atros cuatro de sardana…

Tornemos cansos perros t'a finca, an que cenemos —asabelo de bien— y faciemos una trobada de reflexión d'a chornada. Os guidas ya iban experimentando, ta bien y ta mal, o que ye tener una catrinalla de ninos de colechio privau: chalanguers, movius y mica violentos, pero con más grant irreverencia de l'amenistada.