A ministra de sanidat y consumo ha dezidiú meter-se fura y aturar os "botellons" d'a chobenalla en meter-ie una nueba lai que probablemén será operatiba a metat de l'añada benién. Tot isto lo fa en tratar-se d'un problema de salut publica con consecuenzias no conoxidas encara en o esbenidero.
Seguntes ista lai a piñora t'os pais si o suyos fillos son bebendo en a carrera u en cualsiquier puesto publico (bars, discotecas, peñas...) será de 600 euros. Os adultos tamién se beyen afectaus por ista lai, pues no se podrá bender bebidas alcoholicas de garra mena en garra puesto dende as 10 d'a nuei dica las 8 d'o maitín.
Atra mena de puestos an que se i bende alcohol pero con atras funzions u finalidatz (como pueden estar establezimientos etnolochicos) abrán de tener una lizenzia espezial y tampoco no podrán bender cosa t'os menors de edat. Tampoco no se podrá beber ni bender alcohol en puestos esportibos cuan bi aiga ninos u chobens.
Agora bien, tocando-me o tema prou, encara que a lai no me afeutará... en caso de que se faiga a lai como parex estar... ¿se cumplirá? ¿u será una chanada como l'autual lai anti-tabaco? Ye berdat que o botellón causa muitos problemas de salut y tamién fa fastio dentre as chens que biben amanadas t'os puestos an que se i fa (güello, a chen que gosa de dixar emporcau tot son ninos de 13-15 añadas, a chobenalla más mayor empuerca, pero no pas como lo fan ixe atro estrauto d'edat), ¿pero ye soluzión a mano dura? No creigo... Puet-estar que a soluzión no siga mirar-se de que os menors no beban sino más bien ufrir atras alternatibos d'ozio, sin bedar-les beber, pero fendo que lo faigan con considerazión... y parando puestos ta que no faiga fastio dentre a chen que i biba.
Que os menors beban no ye nuebo (totz emos sentiú a los nuestros mayors charrar d'as suyas borinas cuan teneban 15-18 añadas u menos)... o que sí que ye nuebo ye que se faiga tanto y con tan poco rispeto como agora. Bella begada parex que bel choben no bibe que ta beber: astí ye an que yo beigo lo problema...
En fin, ya beyeremos en qué para ista lai... pero ya digo que me pa que será bella chanada parellana a la lai anti-tabaco...
4 comentarios:
Jolio!!! cada begada ba a estar asabelo de mal ta zorrupar en a carrera. Me remero que en os mias añadas de chobenallo yera mas fazil zorrupar en os bars porque yera mas barato y os salarios yeran mas grans, pero poquet a poquet todo ixo ya ye una utopia.
Boi a enrestrar isto articlo que me pienso que ye prou importan.
A Plantar Fuerte
Yo no tiengo problemas con ixa lei si se fa. No me fa goyo d'ir ta o parque a beber con chen zorros como canastos, ni a pasar fredo agora que ya se'n ba a calor.
O que m'interesaría d'ixa lei ye que, por exemplo, en a carrera que bibo i hai muitos inmigrans que no fan que zorriar ya de parte tarde. Cuan yo torno ta casa mía, i hai buena cosa de problemas con ixa chen que (encara que minoría) no tienen respeto ni se controlan con os que pasamos por astí.
Ixa lei tamién les afectaría y les obligaría a beber en casa suya u an que sía, pero no en o mío portal ni en a mía carrera. Que en zagueras ya fa miedo.
Bueno, ye o que tienen as leis: benefizian a la chen, pero no pas a toz. En o mío caso, si se fa a lei como dizes y se cumple (no como a d'o tabaco, mui bien dito), me benefiziaría.
Yo creigo que as presonas en cheneral y os chobens más que más tenemos una costumbre chuzona de que nos cuaca fer ixas cosetas que son bedadas y que se "beyen mal" (isto zaguero con un toque ironico-truculento)... Una fateza, prou que sí, pero por desgrazia ye asinas(u asinas lo beigo).
Talmén si no se fomenta una imachen prohibitiba de l'alcohol no se fería o que se fa agora (se fería pero como antismás, que seguntes me rezentan yera millor). Güe bi ha chen de 14 añadas que no bibe que ta beber, triste ye: antimás me rezentan que os ninos bebeban con 14 añadas, pero no bibiban ta beber como me pienso que bella begada se fa agora. Tamién pienso que cal ufrir nuebas alternatibas d'ozio y puestos estratechicos ta que a chen que quiera fer botellón lo faiga pero con midas de seguridat y más que más sin fer fastio en a redolada. Tamién abría de parar cuenta en o entorno d'os colechios e institutos.
Charrabis como dizes a lai ye buena pero me pienso que no ye a tautica millor ta rematar con tot isto. Ye como o tabaco, disiempres he pensau que bi ha una traza senzilla de rematar con él sin guaire polemica: dar una tarchenta identificatiba a los autuals fumadors y fer-la nomás en un chiquet periodo de tiempo ta que os fumadors puedan demandar-la. Dimpués d'ixe tiempo no pueden mercar o tabaco que a chen que tienga ixa tarcheta. Agora si fas lais que enristan contra os puestos (bars, triballo...) nunca no se ferá cumplir de raso.
Que baiga bueno!
Pues ixa ideya no ye mal. Yo en teneba una que me feba más goyo: puyar-les MUITO o pre d'o tabaco. Que contribuisen con él a la sanidat publica más que no agora y que se moderasen más con a cantidat que fuman ta cabidar diners. Pero bueno, como nos leiga bel fumador enluzernará.
Yo lo siento, pero o tabaco no lo puedo ni beyer.
Con o tema de l'alcohol, ye un problema. A chen prou que continará bebendo-lo. No sé si como se feba antes u como lo fan en atros paises d'Europa, en casa suya, pero si se prohibe fer botelladas d'ixas que i hai agora y se empiñora a os pais, cuento que as cosas se apañarían un poquet más.
Si no, no sé qué se puede fer ta que os chobens deixen de beber tanto. Que chen de 13 u 14 años s'enzorren toz os cabos de semana me pareixe una barbaridat.
Con tot y con ixo, una cosa cal dezir: cuan yo dentré en l'aragonés, a chen teneba fama d'estar mui daus a l'alcohol (pero dimpués beyé que en i hai de tot).
I hai chen que diz que "l'aragonés ye una luenga etilica". Yo no lo beigo asinas por agora.
Publicar un comentario