Enta Phú Quốc (i): a isola paradisiaca de Vietnam

Un mes en Hanoi, y dimpués de muitos altos y baixos emocionals, y de muita faina por a capital vietnamita, china chana pareix que soi aterrizando. Y ya posau, con o examen de Teoría de Chuegos feito -que dito siga de paso, me salió prou bien-, con os viernes libres y con os pres baratetz propios de puenda baixa, pos pertocaba una salideta. D'atra man, yera trobando a faltar augua, más que más mar, y un ambient amistoso y chalanguero. Asinas que totz os factors d'a ecuación daban como resultau Phú Quốc, una isleta en a muga con Camboya conoixida en toda Vietnam y diría que mesmo en tot o sudeste asiatico.

O viernes de maitins me'n puyé luego, facié a cartera de camín, y preté en taximoto enta l'aeropuerto de No Bai, do prenié o vuelo domestico ta Phú Quốc a ixo d'as diez. En dos horetas m'i planté, con espectactivas de trobar una isoleta filipina tipo Camiguín, Siargao, Siquijor u Bantayán, pero más masificada, como gosa de pasar en os puestos turisticos vietnamitas. L'aterrizache me confirmó o primer, pero no pas o segundo. Y malas plegar, veyé que a chent yera en cheneral muito amable, siempre de buen implaz y sin guaires ganas d'escular-te -encara que de cabo quan heba de parar cuenta: quasi se podría decir que torné t'as Filipinas rurals, encara que cal decir que aduyaba a iste sentimiento o feito de no tener guaire turismo en puenda baixa y de que me ahuespedé en o bico de Ông Lang, rural, sin guaires cosas a fer, pero tranquilo y con una placha amanada disierta, nomás ta yo y perfecta ta enamoraus que quieran intimidat.

En l'aeropuerto m'asperaba una moto que heba logau antis por o rete, a que sería a Marqueta 14 -pos a Marqueta 13 ye a que logué en Hà Giang con Marta y Miguel- y no sin problemas ta pillar-le o truco d'enchengar, m'enfilé enta l'hotel que heba reservau, humilde y en o campo, pero con una piscina repolida. Dimpués, marché a chentar en o lugar, que no yera guaire grant, y que yera chingarriau por hosteletz de campo, quasi totz ells vuedos. Trobé una cantineta propia d'o lugar, y astí me preté o tipico plato combinau asiatico, de roz, una mica de carne y bell verdín, tot acompanyau por suco de canya de zucre y, en o caso vietnamita, por un unto dulce de peixe sobrebueno. Sucosismo tot y más en ixe ambient tan puro! As mulhers que i yeran con os suyos ninetz, asabelo de mahas!

Y ya chentau, marché a visitar as plachas d'astí, polidas en a marguin pero con auguas marrons por o bardo y con mareya alta que feba embolicau ficar-se-ie en bells trozes. Manimenos, yeran disiertas, o paisache de palmeras en a marguin yera repoliu, y aproveité ta fer o primer banyo marino dende Brasil. O mío cuerpo reviscoló dimpués de meses de presión y cansera, y ta rematar, encara con sol, marché t'as gorgas y badinas de Đá Bàn, con bells grupos de vietnamitas locals y con dengún forano, en un ambient rural asiatico que yera clavau a Filipinas, de no estar por o sinyal de Vietnam ficau en a dentrada. Caminando por l'augua me s'eslampó una alpargata, y bien se vale que una colla de mesachas chovens me la pilloron antis que no baixase por a cascada! Atra colla de mesaches, que no yera guaire luent, me convidoron a una biera y pasé un ratet con ells, y encara que yo no charro vietnamita y ells no charraban anglés, nos entendiemos y nos faciemos bellas risas, pos yéranos de buen implaz! Tamién les animé a ligotiar con as mesachas, pero totz y todas yeran muito timidetz, lo menos en ixe momento. Sí, ixa chent pareixeba fililipina! 

De nueitz marché t'a capital d'a isla, dita tamién Phú Quốc, y astí visité o paseu maritimo, con o faro, un templo budista y bells postichons. Os primers dos yeran en un pueyo que ufriba fotos repolidas, y aproveité ta fer-ne. No guaire luent, encara en o centro d'a capital, se trobaba o mercau nocturno d'a ciudat, an que s'achuntaban botigas de venda de beliquetz, ropas y comida, muita comida, más que más marina. Aproveité y cené por astí, pasando-ie bellas dos horetas y picotiando en os esferents puestos, con pres no guaire caros pero que doblaban os que te trobabas por os lugarichons. Como siempre en Asia, tot bien acompanyau de luces, luces y más luces.

Nomás bellas horas en Phú Quốc, pero tot yera perfecto y feba presachiar un cabo de semana de bitibomba: a cansera mental y o estrés d'as zagueras semanas s'iba esbafando a cada segundo!

Enta Hanoi: chislas arredol d'a Universidat de Hanoi

Asentau en Hanoi, y ya con ratos libres, he iu mirando cosetas ta fer y conoixer, y o antigo lector que yera en o mío puesto, Juan Miguel, un diya me recomendó varias cosetas a fer a man d'a Universidat de Hanoi, an que vivo: a pagoda de Trieu Khuc y l'aldeia de Van Phuc.

Asinas que un viernes de maitins que teneba libre aproveité y pillé a moto ta plantar-me en a pagoda de Trieu Khuc, a tasament 10 minutos de casa. Presidida en a dentrada por un galacho, como a más grant parti d'as pagodas, a replaceta y o palacet ufriba un puesto relaixant en metat d'a chungla de motos y rudios que ye Hanoi. En o galachet d'a dentrada, una colla de ninos y mesachotz yeran pescando, y dentro, a tipica torreta-pagoda con os templos relichiosos y as casas d'as familias que cusiran o templo. Obviament, no ye un atractivo indispensable t'o turista en Hanoi, y antimás a man d'a universidat tamién ye a pagoda de Phung Khoang, no tant grant pero diría que mesmo más polida. En Trieu Khuc, ixo sí, a chent me saludaba y sonrediba, muito amistosos, o que ye sinyal de que por astí no pasa garra occidental y a cultura d'o bico ye muito más local.

Vista a pagoda y feitas as fotos de rigor, cosa que no me levó más de 15 minutos, pillé a moto y marché ta l'atro puesto que m'heba recomendau Juan Miguel: l'aldeia de Van Phuc, u aldeia d'a seda, puesto con más de 1000 anyos d'historia y que se diz tien a mesma historia en fer ropas de seda. Decenas, u diría que centenars, de botigas especializadas en prendas de seda, más que mas femeninas, bien aprestadeta t'os turistas, más que más locals. Os pres no yeran especialment baratos, y servidor no amenistaba garra camiseta ni trache luixoso, asinas que fue más a gambada que no atra cosa. Aduyaba a disfrutar d'o puesto o parquet que bi heba en a dentrada y un ambient relaixant, sin trafico y con pocos rudios, contrario a o común d'a ciudat.

Aproveitando que ixe maitín de viernes me yera salindo prou bien, y encara con enerchías, decidié fer una visiteta a o circuito de Formula 1 de Hanoi, que yera cerqueta y que ye famoso porque ye l'onico circuito de Formula 1 aprevau y confirmau que nunca no ha visto una corrida, asinas que lo puetz trobar en videochuegos tot y que encara no s'ha estrenau. A qué fin? Pos porque o GP de Hanoi heba de fer-se en 2020, pero a pandemia petó y lo canceloron. Dimpués, problemas burocraticos y de corruptelas han espaldau o prochecto de fer un grant premio de Formula 1 en Vietnam. Parti d'o circuito ye en una chigant avenida quasi disierta an que nuevos rascacielos se'n son construindo, y que tien, ixo sí, o campo de fútbol principal d'a ciudat. Atra parti ye nomás circuito, pero yera encletada y no se podeba visitar. A o fundo d'ista atra parti se veyeba o edificio d'o paddock, tot enruniau, igual que a resta d'a pista exclusiva d'o circuito, colonizada por matas y con as luces enronadas: un circuito pantasma que no pareixeba haber estau presto nunca ta acullir una corrida de Formula 1.

Finalment, ta rematar as chislas d'iste post y encara que no ye cerca d'a universidat, un sabado, en fer un mes d'a mía arrivada en Vietnam, marché ta Bat Trang, lugar especializau dende antismás en a producción ceramica, y que furne d'istos productos no nomás a Hanoi, sino a tot o país, dende fa 500 anyos u mesmo más. Ficau en a marguín d'o Río Royo, a tasament 30 minutos de Hanoi, en arrivar-ie se troban centenars y centenars de botigas. I fue con una amiga dita Phuong que me recomendó a suya visita, y ella que sabeba exactament d'o yeran as cosas, me levó t'o museu d'a ceramica, no guaire anunciau por o rete y de difícil trobar en a moto.

Un museu de edificios de cinco plantas feitos de ceramica con disenyos contemporanios, con exposicions, y tamién con partis practicas an que, dimpués de veyer un video d'explicación, te posan en un torno de posientos bien baixos -como ye normal en Vietnam-, te dan un poco de buro y te deixan astí fer o que bien puedas fer, con a posibilidat de ixucar-lo dimpués y levar-te-lo ta casa. De tot o museu, a yo personalment m'impresionó a obra d'un artista local choven que puliba basueras, ceramicas y fustas ta dimpués, chungando con luces y uembras, debuixar personas famosas y atros motivos en os paretz. Repoliu y esparpallant! Y o café y o té que ufriban en a zaguera planta, con envistas a las canals d'o Río Royo, remataban d'estar a guinda perfecta! O museu d'a ceramica de Bat Trang yera muito bien disenyau y apatrusquiau, ubrió chusto antis d'a pandemia y ixo ha feito que no siga encara conoixiu, y os poquismos cartels en inglés fan entrefilar que ye muito más dedicau a o turismo local que no a os foranos. Y precisament ixo estió o más intresant d'a experiencia: conoixer os museus y as formas d'ocio y cultura enfiladas a propio publico vietnamita, y que garra cosa han d'envidiar a os puestos feitos t'os turistas foranos!

Enta Hà Giang: as montanyas d'os Hmong

Segundo cabo de semana en Vietnam, y con l'animo más recuperau y aproveitando que ya heba feito quasi todas as chestions de l'aterrizache en un nuevo país y una nueva vida, le demandé a Miguel y Marta qué iban a fer ixe cabo de semana. Cata que marchaban t'as montanyas de Hà Giang, en a muga con China, con paisaches repolius y no tant masificaus como os de Sapa -ixo dicen- y que no me pillaba de tot mal dende Hanoi. Asinas que d'un diya t'atro, pillé un bus de seis horas y marché t'a cabecera d'a provincia, dita tamién Hà Giang, an que o sabado de maitins me trobé con os chirmans.

Miguel ya teneba tot apatrusquiau, asinas que ni me molesté en mirar-me o qué fer. Antiparti, ya sabetz que do bi ha patrón, no manda marinero, y aquí o patrón yera Miguel, que ta ixo s'heba mirau a cursa. O mesmo sabado de maitins loguemos as motos en l'hotel an que nos auespedemos a primera nueit, y que dito siga de paso, nos fació una miqueta de burro falso: se lo podrían treballar más, a verdat, sobre tot en contimparación con a numerosa ufierta que ufre Vietnam y a propia Hà Giang, pero feremos la d'aquell.

Prencipiemos malament, pos moto de Miguel, manual y más cara que no a scooter que prenié yo, teneba una clau que feba malas farchas, y malas chitar benzina, se remató de doblar. Habiemos de gritar a o loguero d'as motos, y con dificultatz ta entender-nos, a la fin nos la cambió por atra igual pero con buena clau, y pasando a benzina d'una ta l'atra. Solucionada a contumancia, pretemos a fer o camín, a ixo d'as 10 coladas, camín que ixe sabado remataría en a ciudat de Đồng Văn, aturando en un lenau ta fer una biera, en una pagodeta, y en o fito que marca a muga con China, presidiu por un sinyal d'o Vietnam granizo, y ye que pareix que isto de veyer qui la tien más grant -o sinyal- no ye exclusivo d'a politica espanyola. Tamién cal decir que ista redolada ye estada victima d'as pleitinas mugatizas dentre China y Vietnam.

Plegaus en Đồng Văn ya quasi de nueitz, pillemos un hotel, sin tener guaires opcions y habendo de regatiar una mica con un mesache que no charraba guaire anglés y que miró d'escular-nos, y dimpués de duchar-nos, marchemos t'a plaza d'o centro d'o lugar, bien apatrusquiada y con guariches estilosetz con comida, bebida, ropas y beliquetz. I sopemos y en uno d'ixos puestos charremos con una colla de mesachetz que quereban practicar o suyo inglés. Dimpués, teniemos o cuchiflito de fer-nos un masache, pos bi'n heba un local en una d'as cantonadas d'a replaceta.

Decidius a fer-nos o masache dimpués d'a cena, i prevemos, y cata que en cuentas de fer-nos o masache astí, nos metioron en una furgoneta y nos levarón t'una placichona amagada, alto d'un pueyo que as suyas costeras feban remerenza d'as favelas brasilenyas. En arrivar-ie, a replaceta yera presidida por un karaoke vietnamita con escenario y tot, y animadet, pero ascape nos levoron ta dentro d'un edificio, an que a Marta le facioron o masache en una cambra, y a Miguel y servidor en unatra. Tot muito raro, a verdat, pero o masache fació honra ta espiguardar una mica o cuerpo, y más que más o mío culo, dimpués d'os más de 150 kilometros feitos con a scooter en un diya.

Descansaus, marchemos t'o leito an que cayemos de camín, y a l'atrol diya visitemos o mercau d'a redolada, animau en dominche, y do podiemos veyer o mercau de cochins que teneban, ta dimpués matar y fer carne. En o mercau, a chent local no dubdaba en empetar-te si quereba pasar entadebant, tanto que de cabo quan aganaba de foter bell lapo suelto, pero bueno, son costumbres, cal saber-lo y prou que cal adaptar-se-ne -en Filipinas no yera guaire esferent tampoco. Continemos o camín, y Marta, que ye muito charrabís con totz os espanyols, conoixió a una parella mahisma de Cuenca, ditos Jaime y Kris, y que tamién tienen un blog de viaches. China chana, faciemos a ruta con ells: ells y Miguel con a supermótar, servidor con a scooter, tot por carreteras estricalladas, a rebutir de bardo y piedras, de difícil fer, mesmo con un talle en un paco que nos obligó a pillar una pista alternativa de amplaria de persona, fendo equilibrios ta no esxerbigar-se y estozolar-se.

Ixo sí, si as anvistas en o primer diya yeran esparpallants, en iste segundo diya yeran tan polidas que quasi no se podeban creyer. Faciemos aturadetas chuntos ta fer-nos bella biera y chentar, concretament en Mèo Vac, Mậu Duệ y Du Gia, y finalment plegué en hora ta Hà Giang ta poder pillar o bus a Hanoi y no tener problemas ta treballar a l'atrol diya, luns. Y ixo que en os zaguers kilometros nos pilló una torrumbesca ya de nueitz, con a moto eslisando por dezaga y as chilas no deixando-me veyer. Nunca no he levau garra moto en ixas condicions, asinas que quan torne ta Espanaya charraré con a DGT ta que me den un supercarnet u bella cosa asinas, bien mereixiu.

No conoixeba Hà Giang y me fació asabelo de goyo. Cal decir que ye provincia de Hmong, una etnia que s'estendilla más que más por China, Vietnam y Laos, beluns d'os qualos aduyoron a las potencias occidentals mientras as guerras en a redolada, y que por ixo mesmo fueron levaus ta países occidentals, historia que se fació famosa en a pelicula Gran Torino de Clint Eastwood. Os rasgos fisicos y as ropas tradicionals, raixosas y coloridas que levaban en os lugarichons más amagaus delataban a suya identidat, y si bien en o primer diya, de carretera buena, tot podeba pareixer una mica más turistico y postizo, en o segundo, con carreteras d'o diaple, l'autenticidat yera muito más grant, con muitos ninos querendo chugardiar y saludando a piet de carretera quan i pasábanos, puet-estar que mesmo fuésenos os onicos turistas que pasaban por ixas aldeyas en tot o diya. Y tot ixo a penar de que a ruta ye de fácil trobar por o rete, y que heba d'estar muito más popular antes d'a pandemia. Me fació muito goyo, y más con a companyia de Miguel y Marta, pero dos días me se facioron curtos, asinas que de seguras que i torno, ya no tanto ta pillar bici, sino ta fer bella ruta a piet y visitar bell monumento concreto, como o palacio d'os reis Hmong.

Enta Hanoi: cómo serán as segundas partis?

A pandemia ye pasando, as cosas tornan t'a normalidat y o impás -u no pas impás- de Brasil plegó a la suya fin, ta incorporar-me finalment en o destino que me corresponde, Hanoi, ixa ciudat asiatica en a que i estié dos vegadas y que m'enamoró. Pero, ta qué imos a negar-lo, viengo sin guaires ganas, con atras anvistas de vida, y con una estacha de diez días desastrosa en Zaragoza, que si bien me pasa totz os anyos, ista anyada ye estada encara pior.

Plegué en Hanoi fa una semana, concretament en a residencia d'a ciudat universitaria d'a Universidat de Hanoi (acronimo inglés: HANU), an que o treballo m'heba reservau una cambra-estudio. Yera tan canso y animicament tant baixo, que arrivar en un cuarto viello y sin equipar, que pareixeba más una celda de garchola que atra cosa, remató de deixar-me desmoralizau. Pero facié la d'aquell, en piors situacions m'he visto en a vida, yera -y soi- decidiu a prencipiar una nueva puenda en a vida, evolución natural, y cosa m'ha d'aturar. Asinas que en ixos primers diyas me miré atros tres pisetz y me merqué una moto de segunda man a pre irrisorio, a motomarqui, con a que ya soi vivindo en carnes a folía d'as grants ciudatz asiaticas, folía que t'esiche muitisma enerchía, folía que m'enamoró en Manila, pero folía que agora mesmo ya me vien grant.

No he tardau guaire en parar cuenta de que o puesto que m'ha dau o treballo no ye tant mal: sin rudios, con o equipamiento basico -fresquera, aire acondicionau-, grant en contimparación con o estándar de vida vietnamita -de feito, en una cambra d'as mías gosan de vivir-ie de ueito a diez alumnos-, con buena iluminación, y a dos minutos caminando d'o treballo. Cosas millors, no bi'n ha guaires, y bosar por una chicotisma milloría, no compensa. Asinas que, aproveitando os muitos mercadetz que tiengo arredol d'a universidat, en una semana he meyoequipau o estudio y agora pareix atra cosa. De feito, ye muito millor que os puestos an que vivié en Filipinas y en o prencipio en Brasil! Lo que pasa ye que en Brasil ya m'heba feito a un minimo de equipamiento ta fer fogar, como una cocineta apatrusquiada u una lavadera.

Con moto y con milloras china chana, o mío animo ye iu millorando en istos siet diyas.Tanto que m'he decidiu a escribir aquí dimpués d'un mes sin fer-lo. Aduya tamién que a mía companyera de treballo espanyola, Paloma, m'ha ufierto muitas claus, m'ha dau buenas conversas y tamién me ye presentando chent. D'atra man, tien un noviet y a vegadas pareixe una mica ausente, pero feremos la d'aquell. En o treballo, tot y que as relacions en linia yeran prou viciadas, con buena cosa de carranyos de todas as partis, as cosas presencialment son prencipiando bien con as chefas y as companyeras.

Y ta empentar istas millorías, o mío buen amigo Miguel -d'o que he charrau por aquí varias vegadas- y a suya chirmana Marta, son fendo un tour por Vietnam, y o primer cabo de semana coincidiemos en Hanoi. De buenismo implaz, faciemos turismo por os puestos que ya heba visitau fa quatro anyadas y que comenté aquí (Templo d'a Literatura, Mausoleu de Ho Chi Minh, vías d'o tren, bella pagoda y bella casa historica no centro d'a ciudat, galacho de Hoan Kiem) y nos faciemos tamién bellas bieras, tanto por os propios puestos turisticos como por os puestos universitarios d'arredol d'a universidat. Rematoron d'animar-me en una primera semana que, como soi decindo, yera baixet. 

Y sobre cosas extranyas, d'ixas que tanto goyo me fa comentar, pos puedo decir que en os mercaus a la fin veyé a carne de can, y prou que la tasté: sin estar desagradable, tampoco no yera sucosa... Un cuchiflito sin más. Tamién prebé dos academias de salsa y bachata, una d'ellas un escule, y l'atra buena, pero todas as dos con detalles de sociedat vietnamita muito diferents a la sociedat filipina: siempre preocupaus por os diners y o cobro d'as cosas, te fan sentir incomodo a vegadas, sin mala intención, pero monetizando tot en exceso. O intrés y a desconfianza -y a vergüenya- priman sobre a cercanía humana, igual que quan muitos locals te s'ufren a conversar con a onica intención de millorar o suyo anglés y no pas d'estableixer una relación humana.

Sin animo de fer iste post más luengo ni de detallar cada cosa que he feito, cal decir que no veigo Hanoi igual que lo veyé as dos primeras vegadas que i estié. No sé si ye por o efecto postpandemia, por a baixada d'o turismo por a propia pandemia y os pres d'os vuelos, porque ista sociedat ye prou esferent a la filipina -a mía referencia- u porque o mío propio estau animico fa que veiga as cosas mas grisas y o mío momento de vida fa que tienga atras aspiracions. Mirando d'estar obchetivo, creigo que ye una mica de tot. Agora mesmo, levando nomás una semana y millorando cada diya, creigo que no me lo he de pasar mal ista anyada aquí, que voi a cabidar buena cosa de diners -bella cosa que ya amenistaba- y que no tendré mala vida, pero no creigo que isto de más de sí. A mía cabeza y a mía vida son esferents que quan plegué en Manila, y antimás isto socialment no ye Filipinas.