Inbentau un auto que funziona nomás con augua

A interpresa chaponesa 'genepax' ha ibentau un auto capable de mober-se nomás con augua, estando asinas o primer automóbil que puet endrezar-se t'os puestos con iste liquido meso de moda sin administrar garra atra sustanzia u fuen d'enerchía. Un litro d'augua premite a l'auto prototipo zircular mientras bels 60 menutos a una belozidat d'arredol de 80 km/h. Ni sisquiera ye menester que siga augua destilada y mesmo puet fer-se serbir augua marina.

O diseño ye encara prou primitibo y ye pensau ta trestallar l'hidrocheno de l'augua y emplegar-lo como combustible d'una pila eleutrica. A interpresa no ha dito cómo han conseguiu que l'auto se mueba nomás con augua pero sí afirman que s'alazetan en teunolochías existens y que son capables de fer hidrocheno partido de l'augua en un tiempo muito menor que con cualsiquiera d'as teunolochías existens agora.

A interpresa chaponesa propietaria d'a creyazión y d'a suya patén aspera poder produzir l'auto a escala industrial.

Pareix mentira y no'n ye...

Un onso pardo se ficó en un restaurán rumano acompañau d'as suyas dos crietas. Dimpués de esclatar bellas mesas se posó en un posiello como un clién más.

A terror se fazió en o restaurán y como os onsos no rezibiban berolla, os tres animals s'endrezón ent'a conzina y se sirbión por a suya propia cuenta.

"Estió como estar en 'caragolez d'oro y os tres onsos', pero a'l bies", explicoteo uno d'os presens astí. "Y antiparti ista begada quereban tot o menú, no nomás l'abena de sobras que gosamos de dar-les". Una begada que estión satisfeitos, os tres animals marchón d'o local sin fer garra daño a las personas astí presens.

Minutos dimpués de marchar se fazión presens a polizía y autoridaz d'a bida salbache.

O comportamiento d'os onsos, antiparti d'estar prou curioso, amuestra que paran cuenta d'as autituz y trazas de bida d'o estar umano ta rezibir tamién els l'amenistau ta bibir sin fer serbir os suyos instintos propios.

Troban unicornio en italia

Unicornio, un sarrio con nomás un cuerno en metat d'a suya fren, no tiene que una añada y bibe en o parque d'o zentro d'inbestigazions de prato, lugar a lo canto de florenzia. Naxió allí dimpués de que su mai plegase ferida por a enrestida d'un auto.

L'anomalía chenetica d'iste animal ha feito que siga admirau.

O direutor d'o zentro de zienzias naturals d'italia, o siñor Tozzi, siñala que feitos como iste pueden estar a simién d'o naximiento d'o mito de l'unicornio.

L'unicornio ye presén en leyendas mitolochicas y falordias de toz os tiempos en buena cosa de culturas. Ye bien fázil que enantes s'aigan puesto beyer atras animals como renos, sarrios u crabas con una anomalia parellana.

O raro d'iste animal no ye que nomás tienga un onico cuerno, sino que siga en metat d'a fren. "Por un regular, o cuerno ye a un costau (d'o tozuelo) en cuentas d'o zentro", ha explicoteau o direutor zientifico d'o zoolochico de roma, Fulvio Fraticelli, que crei que a posizión podría deber-se a un traumatismo en entar bibirón.

Os intresaus pueden ir a beyer o estar en persona t'o parque natural, encara que abrán d'asperar y tener pazienzia, pues "l'anima ye conszién d'a suya traza espezial y se deixa beyer bien poco".

"Fieles siempre, sin reblar"

A colla de fútbol Soziedat Esportiba Uesca ha lograu, fa menos d'una ora, a puyada ta segunda dibisión A, en empatar a un gol o partiu contra l'ezija.

O partiu, prou intenso, prenzipió con un ezija que presionó y un uesca que aguantó bien dita presión, sin alticamar-se en garra momento, prou enzertau en esfensa y con un portero sobrebueno que ha permeso a puyada mientras tot o partiu y toda la puenda. Manimenos, iste comportamiento d'aguante, prou esfensibo, fazió que as oportunidaz t'o uesca estasen menimas y con poco pelingro. Ye de dar ista autitut, dimpués d'o 2-0 que teneba a colla uescana a la suya fabor por o partiu d'ida en l'alcoraz.

Ya en a segunda parti os uescanos arriscón más, dominando o partiu y creyando ocasions de gol. Sindembargo, iste feito les costó bellas errors en esfensa, que rematón en o gol de Nolito, por parti de l'ezija.

Allora o partiu se conbirtió en un partiu de resistenzia de raso, con un ezija que escaba o segundo gol que igualase a eliminatoria y un uesca nomás zentrau en esfender y ebitar iste segundo gol. Tot estió asinas dica que una contra en rematar o partiu, plegó en un golaz con control y chut por a escuadra, que metió en o marcador l'empate a 1.

O partiu estió prou furo por parti d'os afizionaus de l'ezija, como yera d'asperar. Asinas, empentón y fotón a bel chugador mientras o partiu, y en rematar blincón t'o campo y mirón de foter de lapos a os miembros d'o uesca, que en salir abión de fer-lo escoltaus.

Ista puyada chunto con a baixada d'o zaragoza premitirá beyer l'añada benién un derbi aragonés, prou intresán.

Conzierto de prau y los draps

Maitín a las 8 d'a tardi, en o zentro zibico unibersidat, carrera biolán d'ungría nº4, se ferá por nomás 5 euros un conzierto con istas dos collas mosicals, que presentarán os suyos nuebos discos pretos.

Os draps tañerán as cantas de "un crit al vent" (un chilo a l'airera), mientras que prau nos lo ferá pasar bien con as pistas de "a fin de l'agüerro", an que se ferán mezclallo os ritmos d'enantes con os nuebos traitos por os nuebos componens d'a colla. O nuebo disco, sobrebueno, ye a consolidazión d'una d'as millors collas de mosica aragonesa, dimpués d'os suyos anteriors treballos "en o rafe d'a fuxaina" y "ye tiempo d'enrestir".

Por atro costau, podez ascuitar una entrebista a prau ista tardi a las 7 en "fendo orella", o programa de raso en aragonés feito en radiotopo, 101.8 FM. Tamién i ficarán belunas d'as nuebas cantas.

Inaugurada a primera linea de tren de redolada

Ayere se inauguró a primera linea d'o rete de redolada de zaragoza, que traslada pasachers dende a gara de casetas, dica miraflores, con un trayeuto de 16 kilometros. Manimenos, encara no ye presta ta fer serbir una d'as garas zentricas, la de l'abenida goya.

Iste tren de redolada tiene 47 frecuenzias diyarias -cada meya ora entre as 6:30 y as 9:30, y entre as 16:30 y as 19:30, y cada ora a resta d'o diya- y cuenta con una prebisión de 1.300 usuarios diyarios, arredol d'os 400.000 por añada.

O pre d'o biache será de 1,20 euros, encara que os usuarios podrán mercar un abono mensual por 34,15, u bien de 10 biaches por 6,70 euros, mientras que as personas mayors con cuenten con una tarcheta oro tamién tendrán descuentos espezials.

Os mainates d'o proyeuto quieren que a numero de biachers creixca a monico, fendo-se cuenta de que funzionarán dos tresn de 469 palzas cadagún. Manimenos endicón que ye "fundamental" por atro costau a implantazión d'una soziabilizazión d'o serbizio ferrobiario como traza de transporte, pues zaragoza no lo teneba. Os chefes piensan que si l'usuario conoixe as balors positibas d'iste proyeuto lo ferá serbir y isto ferá que s'amillore lo propio serbizio.

Por atro costau, o presidén de renfe, José Salgueiro, aseguró que de camín s'anunziará un cambio d'orarios d'os trens abant que achuntan zaragoza y calatayut, y no descartó que s'incremente bella frecuenzia, en respuesta a las creticas d'os zaguers meses.

A Soziedat Esportiba Uesca s'amana a segunda A

O partiu d'a semana pasada, no sobrebueno pero sí onroso, y con o resultau zaguero de 2-0 en el alcoraz, amana a la colla de fútbol d'a capital altoaragonesa a la segunda dibisión A, an que se trobaría con un zaragoza que marcha como faborito ta puyar dimpués d'as inbersions que ye fendo.

Iste partiu, cualos gols estión por penaltis chustos y marcaus por Lalo y Edu Roldán (iste zaguer en o menuto 93) dixan a lo Uesca en o puesto más altero dende l'añada 77.

L'enfrontinamiento estió intermitén por parti d'a colla entrenada por Onesimo, pues estando aimos d'o chuego en a primera metat, perdión iste poder en a segunda, encara estando con un chugador más sobre lo campo, pero a la fin una man platera en l'aria permitió a os uescanos soñar con puyar.

O comportamiento de l'afizión y a colla uescanas estió sobrebueno, como lo treballo d'o trío arbitral que enzertaron de raso. Manimenos no estió tan bueno lo comportamiento d'os chugadors de l'ezija, que estricallón os bestuarios besitans d'o uesca y dixón astí crebazau o tipico plato de zeramica uescana que a Soziedat Esportiba Uesca regala a todas as collas con as que s'enfrontina.

En as gradas s'ascuitaban canticos como "l'añada benién, derbi aragonés", amostrando l'antizaragozismo d'os "fatos", que entre atras cosas no han perdonau que o zaragoza s'en lebase a Manolo Villanoba en a zaguera parti d'o campionato. Manimenos cal dezir que Manolo Villanoba ha feito reyalidat a suya pretensión en prenzipiar a puenda de fútbol 2007-2008: lebar una colla a segunda dibisión.

Agora les toca biachar a ezija y, con suerte, marchar t'a plaza nabarra de uesca ta fer en ista una gran borina por a puyada d'a colla.

Amaral prenzipia conziertos con o suyo nuebo disco preto

O benién diya 12 de chunio a parella zaragozana Amaral será ufrindo un conzierto acustico en zaragoza que prenzipiará a chira de presentazión de mixín negro, dragón royo, os suyos nuebos discos.

Ye por ixo por o que Eva Amaral y Juan Aguirre an dau a lo publico a chanza d'eslechir canta que quieren que s'ascuite en ixe conzierto. Ta ixo, y dende a suya web, a colla mosical ufre a posibilidat de botar por a canta que a chen quiera que suene en ixe conzierto. A lista ye feita de plegará a tronada, a bersión que a clica ha feito d'o tema de Bob Dylan, no sé que fer con a mía bida, eslampar, tardis y a fin.

"A ideya ye ir cambiando en toz os conziertos", comentó Aguirre en relazión a la proposa, adibindo que dixar cosetas en un conzierto puet fer-lo más intresan. Por ixo ban a dixar ixa posibilidat en una autuazión que contará con entre 20 u 25 cantas

O benién chuebes, a parella contará antiparti con dos artistas inbitaus, Copiloto y Dj Sergio Falces, os dos aragoneses, en una trobada en a que seguntes Eva Amaral, quieren que tot siga una nobedat.

Troban nueba tribu

Una d'as zagueras etnias indichenas con as que nunca no eba estableixiu contauto l'ombre moderno estió bista en a selba oczidental de l'amazonas, amán d'a muga con perú, anunzió a Fundazión Indichena Nazional (FUNAI). Os indichenas estión bistos en a reserba ecolochica que se troba en o río envira mientras buelos feitos en o cuasi esconoxiu estau brasileño d'acre.

FUNAI informó que fazió fotografías de guerrers "fuertes y saludables", seis chozas y un gran fener. Pero a tribu yera esconoixida, dezió a fundazión. "Cuatro lugars diferens y isolaus existen en a rechión, en a que somos estaus por 20 años", afirmó Jose Carlos Meirelles.

FUNAI destacó que no estableix contauto con os indichenas y prebiene a inbasión d'as suyas tierras, ta asegurar l'autonomía de raso d'as etinas isoladas. A organizazión de refirme a clicas indichenas, Survival International, informó que os indichenas son en peligro por a tala ilegal en perú, que leba a las comunidaz isoladas a esnabesar a muga y podría orichinar un conflito con os cuasi 500 indichenas que biben a l'atro costau d'a muga. Bi ha más de 100 etnias isoladas en o mundo, y a mayoría se troban en brasil y perú, afirmó a fundazión en a declarazión.

"Istas fotografías son a ebidenzia más esauta de que as etnias isoladas existen reyalmén", declaró o direutor de SI, Stephen Corry. "O mundo amenista rebellar debán isto, y asegurar-nos de que o suyo territorio siga proteixiu d'alcuerdo con as leis internazionals. Si no, luego se prebocará a suya extinzión":

Entre as fotos destacan ixas en as que se bei como os ombres d'a tribu miran d'enrestir con tochos y lanzas a l'elicoptero que las fa.