L'asoziazión cultural nogará demanda a Marzelino Iglesias que omologue os títols de luenga aragonesa

Notizia traduzida de aragondichital

L'asoziazión cultural nogará ha prisentau as solizituz d'os suyos alumnos y sozios ta que s'omologuen os títols de luenga aragonesa. Demanda d'ista traza a lo presidén autonomico Marzelino Ilesias que cumpla a suya promesa eleutoral y aprebe una lei de luengas y prena midas educatibas que refuerzen a presenzia d'o idioma.

Dabi Lahiguera, risponsable de nogará, presenta la solicitut. Zaragoza.- L´asoziazión cultural nogará ha prisentau a las 13.00 oras d'iste chuebes as solizituz d'os sozios y alumnos reibindicando que o presidén d'o gubierno d'aragón cumpla a suya promesa eleutoral de reconoxer a omologazión d'os títols de luenga aragonesa. O risponsable de l'asoziazión, Dabi Lahiguera ha comentau que "agora que prenzipia una nueba lechislatura creyemos que ye o momento conforme ta demandar-le a lo presidén que cumpla a suya promesa eleutoral y se firme una lei de luengas que omologue os títols de luenga aragonesa". Ta Lahiguera, ye menester que ecsista una entidat que s'encargue d'os títols, y "ixa entidat puet-estar l'academia de l'aragonés que cumple agora un año y tiene o respaldo de toz os que lebamos treballando años por ista luenga". Por atro costau, a petizión entregada por nogará incluye que se prenan midas educatibas que potenzien a presenzia de l'aragonés. "O idioma se ye morindo y si prenemos midas que den balura a lo títol d'aragonés lo feremos más atrautibo", ha siñalau o risponsable de l'asoziazión. Ye iu una mica más allá demandando que s'estudie en primaria y secundaria como asignatura optatiba u obligatoria seguntes os territorios y que l'aragonés se estudée en a Escuela Ofizial d'Idiomas".

Un nino de tres añadas, acusau d'apedregar y disparar a la polizía

A polizía india acusa a un nino de tres añadas d'aber enfilau una colla zamboroters y d'aber disparau contra as fuerzas de l'orden o pasau chinero, anunzió iste chuebes o tío d'o chiquet sospeitoso. Antimás, o chiquet supuestamén tamién apedregó a los achens de polizía.

O tiroteo escletó a l'este d'a india, en o estau de bihar, mientres unas barallas d'entre chen d'o lugar y a polizía. Chusto dimpués, Raj Kumar, de tres añadas, estió inculpau por aber chitau piedras y disparar contra la polizía, ecsplicó a la AFP o suyo tío Dhruv Kumar Jha.

Como os pais no respondión a las tres conbocatorias polizials, una colla d'inbestigadors se personó en casa d'els ta ecsichir que se prisentase a las autoridaz. A polizía no aclarexió como un nino de tres añadas podeba estar capable de lebar un arma de fuego y saber-la manullar.

O ninón tiene antimás una coartada contundén: se trobaba en casa d'a suya lola o diya d'as barallas. Manimenos, a polizía asegura tener-lo grazias a las camaras de bichilanzia, encara que prometió berificar ditas zintas por si bi ha bella error, en un pais reputau por a suya burocrazia subreyalista.

As isletas de l'ebro

Prenzipia lo berano, y l'ebro a lo suyo paso por zaragoza ya ha decrexiu, estando tamién minors as reserbas d'augua. As plebias d'os zaguers diyas no son estadas prous ta puyar o ran d'o cabal, que en bellas zonas dexa mesmo beyer parti d'o leito arenoso d'o río, como se beye en a imachen.

Ista ye a notizia ofizial, pero no ye curioso que istas isletas aigan aparexiu antis de tiempo cuan ista añada ha plebiu más? Antimás han aparexiu en puestos an que antis no se trobaban. A ecsplicazión? As obras d'a ecspo: os ecolochistas han denunziau a situazión. Os cheografos Daniel Ballarín y Daniel Mora, defienden que cuan rematen as obras a situazión será la mesma que la inizial.

O tiempo dirá cuala ye a berdadera causa d'o creximiento y aparixión d'as isletas asinas como os efeutos qe tendrán, tamién se diz que as rieras son as risponsables... pero todas as partis lo beyen poco probable.

Aizión de nogará

Maitín chuebes 28 l'asoziazión cultural nogará-religada ferá una aizión en o edifizio pignatelli a las 13:00. Se prisentarán solizituz t'o gubierno d'aragón demandando: a omologazión de títols, a reconoxenzia de l'academia del'aragonés ta fer títols ofizials, a reconoxenzia de l'academia de l'aragonés por parti d'o gubierno d'aragón, a implantazión de l'aragonés en as Escuelas Ofizials d'Idiomas, a preparazión d'o profesorau d'as escuelas y institutos, y a implantazión d'una asignatura optatiba en primaria y secundaria de luenga aragonesa en tot aragón.

PUESTO: Edificio Pignatelli, Paseo María Agustín

DIYA: 28 de Junio de 2007

ORA: 13:00

Será una aizión reibindicatiba, que no durará guaire y que ferá onra ta contrimuestrar a la soziedat que bi ha un mobimiento en defensa de l'aragonés, más agora que o presidén Marzelino Iglesias ha promeso que ferá una lei de luengas en menos d'una añada.

Bidas crebazadas, un buen libro en aragonés ta leyer iste berano

Julio, Aitor, Reyes, Pilar y Maica son diferens personas que naxen de puestos y con condizions sozioeconomicas muito dibersas. Chen oposada a la soziedat franquista, pescadors, omosecsuals naxiús de lugars... son os narradors de chicorronas istorietas en as que se da muita importanzia a las situazions y a l'entorno que aduyan a que o destino faiga o suyo camín en cada persona, dende o suyo naximiento dica la suya muerte.

Todas istas istorias troban o suyo remate con una pasa bien conoxida por toz, a pasa d'o sieglo XX y puet-estar que d'o XXI: a SIDA. No quiere dezir isto que siga una obra pesimista, sino que más bien ye una obra an que as errors se conbierten en dictadoras d'o esbenidero, trobando-se siempre un sentimiento umano en ditas errors: as aizions umanas mobidas por a estructura sozial se disfrazan d'una fatalidat paternalista que permite ecstrayer buenas conclusions y una bisión esperanzadera d'os diferens casos que se i dan.

Ista obra, merexidera d'o premio Arnal Cavero 2007, ye estada feita por Rubén Ramos, una d'as personas que más onra ha feito a l'aragonés. Fa serbir un buen aragonés, no guaire difízil y d'o que se puet ecstrayer un borguil de parolas ta emplegar en o luengache de temas modernos, asinas como una ripa de mazadas y ditos tradizionals que fan onra ta sustituyir a los castellanos, que muitas begadas femos serbir por o desconoximiento d'os aragoneses. Ye escrita antimás t'os lectors que aimamos leuturas achils.

Os diferens casos atrayen a chen de toda mena: prauticamén dende os adoleszens dica las personas más biellas se sentirán en millor u menor mida identificadas con belún d'os personaches que i aparexen.

Ye pues, un buen libro ta leyer iste berano, chitau denzima d'a toballa en a parti de güembra d'a tasca d'a piszina ascuitando mosica y beyendo como a chen ye nadando u chugando a lo frontón u tenis, tan y mientres te fas una cocacola, una biera u bin con gaseosa.

Coleutibos sozials zaragozanos denunzian l'acoso polizial

Una bentena de representans de dibersas asoziazions zaragozanas han prisentau en o maitín d'o miercols 20 de chunio en a DGZ (Delegazión d'o Gubierno de Zaragoza) as alegazions a la incoazión d'o ecspedién sanzionador en mancar comunicazión de una conzentrazión en o aparcamiento d'a garchola de zuera.

Coleutibos politicos, culturals, bezinals y sindicals han entregau un manifiesto titulau "A Delegazión d'o Gubierno en Aragón pune a la marcha ta zuera" chunto con as 3 alegazions a la piñora proposada de 3000 euros a una d'as partizipans en a seisena marcha a la macrogarchola de zuera.

A marcha t'a macrogarchola de zuera, parada por a Iniziatiba Ziudadana contra as Macrogarcholas (ICM) ye una chornada pazifica, ludica y reibindicatiba, en a que unas 250 personas, dende fa 6 añadas, marchan t'os aparcamientos d'a garchola ta zelebrar una serie d'autobidaz de denunzia d'a politica represiba en as garcholas. Nunca no s'ha produziu garra baralla, y siempre se ha respetau o espazio limitau por os efeutibos d'a guardia zibil que, por atra parti, toz os años indentifican a las personas partizipans.

En as alegazions presentadas se plasman una serie de irregularidaz en a traza de prozeder. Por un costau, se denunzia que a personas menazada por una multa de 3000 euros en garra inte estió identificada en a conzentrazión. En o ecspedién se diz que estió grabada por as camaras d'os chendarmas, pero ditas imachens no s'han fazilitau a los abogaus, bediando asinas o dreito de tener copia d'o ecspedién.
Por atro costau, a no comunicazión d'una conzentrazión como la marcha ta zuera, no ha d'estar motibo de comunicazión obligatoria, ya que no se trata d'una zona de transito publico y en garra caso s'atura a entrada u salida de autos u familiars.
A terzera d'as alegazions fa referenzia a la desproporzión d'a multa proposada, de 3000 euros.

Por tot ello, os coleutibos firmans d'o manifiesto han solizitau o archibo d'ista prozedura. S'ha denunziau que ista sucherenzia de sanzión ye atra parti más d'a politica represiba que dende fa muitismos meses ye metendo en prautica Javier Fernández, delegau d'o gubierno en aragón, y os responsables d'a polizía local zaragozana. S'ha solizitau a destruczión d'os archibos polizials con datos d'os autibistas y partizipans de movimientos sozials, por estar ilegal de raso (remero que por fer una mesa informatiba tocán a l'aragonés, bels miembros de l'asoziazión cultural nogará i son).

Identificazions, intimidazions, filmazions d'as conzentrazions, muitisma presenzia polizial en os autos publicos, coaczions, menazas polizials son cada begada más frecuens en as carreras zaragozanas, o cualo suposa una gran enrestida a las libertaz d'asoziazión, manifestazión y ecspresión.

Toz istos motibos han mobiu a la combocatoria d'una desconzentrazión por os dreitos zibils, que se zelebrará o miercols 27 de chunio a las 8 d'a tardi en a plaza d'o pilar de zaragoza. En iste auto se clama a la partizipazión de toda la ziudadanía ta ir-ie con pancartas, pegallos, pasquins... u a desembolicar as tuyas autibidaz faboritas (chugar a fútbol, danzar, pintar, fer-se un guiñote, rezitar poemas, asinas-asinas) en collas de no más de 4 personas, ta que legalmén no siga una conzentrazión.

Ye una desconzentrazión de disueltos e indisolubles contra as piñoras y identificazions.

Vivindo'n cheso: Día d'amistá en lo lugar d'Echo

Ayer sabado 23 se facieron en echo una serie d'autividás, paradas por lo ligallo de fablans y l'asociación bisas de lo subordán, a las que podiemos asistir todos los zaragozanos que marchemos en un bus fletáu por la Universidá Popular de Zaragoza a petición de las asociacions que i facieron cursos tocans a l'aragonés esta añada.

En plegar, a ixo de las 11:30 se facié una visita guiada en cheso por lo lugar a cargo de Marta Marín, conzellera de cultura de lo lugar, y d'un otro mesache que sincusar-me pero no remero lo suyo nombre. Estié pro intresán: nos lebé por los puestos más importans de lo lugar y nos rezenté muitas mazadas y aneudotas de los suyos habitans.

Dimpués, a ixo de las 15:00 se chinté en un puesto de siresa (migas, cordero a la pastora, postre y café) con la colla de teatro chesa trueque teatro amenizando dicha chinta ripresentando chiquetas partis de las obras de Chusé Coarasa y Mariví Nicolás.

A las 18:00 coladas se facié en la biblioteca Rosario Ustáriz, tornando otra vez ta echo, una leutura de textos en aragonés por parti de todos ixos que querieron rezentar-ne (Partiziperon d'entre otros Juanjo Lagraba y Pepe Lera). Se charré tamién de la faina de lo ligallo de fablans por l'aragonés, de la situación autual de la luenga dende una anviesta patrimonial y de l'academia de l'aragonés, lo que ripresenta y lo suyo treballo autual.

Pa rematar, dende las 21:00 hasta las 21:45 Pepe Lera, Juanjo Lagraba y otras dos personas que cuento que son miembros de la colla val d'echo facieron una rondalla de cantas, belunas en cheso.

A las 21:45 marchemos d'echo ta zaragoza con l'impresión d'aber estáus en un buen viache pa conoxer millor l'aragonés, tanto en custions dialeutals como en custions sociolochicas. Estié un viache muito bien paráu, sobresaliendo tamién la participación de belunos patrimonials chesos: todos lis felicitamos.

Un ibón desaparexe de traza misteriosa en o sur de chile

O ibón de meyanas dimensions, situau en a rechión austral de magallanes, feba serbir l'augua d'os chelars regalaus que yeran en a suya redolada, por o que yera común beyer grans chelos flotando en él.

"En marzo cusirábanos a zona y tot yera normal, en abril no podiemos ir-ie y marchemos en mayo y nos trobemos con a sorpresa de que o ibón eba desparexiú de raso" dezió a reuters Juan José Romero, direutor rechional d'a Corporazión Nazional Forestal (Conaf).

"No han quedau que as entostas en o leito xuto d'o ibón y una crepa chigán", adibió.

D'o río que naxeba en o ibón, y que no se podeba esnabesar por a suya amplaria y cabal, ha quedau prauticamén cosa, seguntes o risponsable.

Una d'as bersións que dizen os pobladors d'a rechión ta ecsplicar o feito ye que o fuerte tremolín que sobatió en abril a parti d'aysén, amanada a la de magallanes, formó a crepa que trusquió l'augua d'o ibón.

A Conaf empenzipió a fer un informe que determine qué estió o que pasó y para ello se ye metendo en contauto con cheologos y inbestigadors.

Esaloxan una familia por un forau de 15 metros de fondura

En alcalá d'ebro s'ha ubierto un forau de cuatro metros de luengo por tres d'ancho. Se troba en a carrera d'a estazión, prou amanada a la plaza d'españa an que se troba o conzello, y nomás a cuatro metros d'o barrache que protexe a lo lugar d'o cauz d'o ebro.

Os feitos ocurrión ayere a las 15:00 oras alto u baxo. O alcande ha endicau que en primeras aparexión unas crepas en o asfalto ta dimpués ubrir-se o forau que dixó escubiertas as cañerías d'o augua y d'o desaugüe.

Tecnicos d'a Diputazión Provinzial de Zaragoza y d'a Confederazión Hidrografica d'o Ebro son estudiando as dimensions d'a simera y se prebeye que güe mesmo maquinaria d'a CHE prenzipie a treballar en a carrera afectada ta reponer a estabilidat a lo subsulero y zaboyar o forau.

Seguntes o alcande o suzeso parex grau por o que insistió en que antimás de soluzionar iste forau be de fer-se un estudio completo ta conoxer si bi ha más partis d'o lugar afectadas, más que más fendo cuenta en que ye un lugar d'a marguín d'o ebro que fa pocos meses tenió grans mayencos.

Por o momento, s'ha esaloxau a una familia de cuatro personas en trobar-se a casa suya muito amanada a lo forau. Manimenos no se prebeye que más bezins aigan de dixar as casas suyas.

Gara alazetal ta zaragoza dimpués de muito tiempo

O traslado d'as collas d'autobuses con mayor numero de biachers t'a gara zentral d'autobuses ya s'ha completau cuan a monico son ius arribando toz os autobuses. A la fin todas as collas prebistas son estadas: alta-aratesa, hife, alosa, linecar y tamién conda.

Os conductors plegaban sin saber guaire bien an aparcar pero encara asinas toz els yeran muito contentos d'o cambio, con os nuebos serbizios que se les ufren, tanto a els como a los biachers: cambras d'aspera millor acondizionadas, nuebo mobiliario... Y ye que en o mesmo espazio se cruzarán personas que biachan ta l'almunia, portugal u mesmo rumanía.

Tan y mientras en cada puerta s'ha situau personal d'atenzión a lo clien, ta aduyar a los plegaus orientar-los y dar-les indicazions tocans a lo puesto d'as taquiellas, bars u escusaus, cosas normals de fer en baxar de l'autobús.

A ecspeculazión menaza o ecosistema d'as estepas d'o sureste

O creximiento d'a ziudat, tanto por parti residenzial como por parti industrial, ye repercutindo en os ecosistemas esteparios que carauterizan más que más a la parti sureste. A Soziedat Española d'Ornitolochía (SEO-Aragón), a colla trihacantos y l'Asoziazión Naturalista d'Aragón (Ansar), que leban bellas añadas alertando d'a grau perdida ambietal que se'n ye sofrindo, han denunziau ista situazión que antimás afeuta a l'integridat d'o bestiar reyal de torrero, de titularidat publica autonomica.

Os zinco proyeutos criticaus por os ecolochistas son a permuta de feners pautada d'entre a DChA, o conzello, o Parque Teunolochico de Teziclau López Soriano (PTR) y o ecoabocadero, os parques eolicos solizitaus por ecspoaugua, a carretera ta entrar t'o acampo arpal, a grabera d'acziona amanada a la salada de mediana y o abocadero d'a interpresa sudismin.

En iste zaguer caso, o ballón ye estando encaxonau d'entre lurtes d'enronas namás pasar as bías d'o AVE y o cuarto zinturón y que desnaturaliza o paisache y fa pelingroso o paso de piatons y ziclistas por a fortor de cambions que bi'n ha. O proyeuto d'acziona ye tamién muito pelingroso por l'abridura d'una grabera de 60 ectarias en o acampo d'o moro, chusto a lo canto d'a cabañera reyal en o tramo de laguna salada. Tocán a lo acampo d'arpal o que se cretica ye que a interpresa pavijús quiera fer un esmón ta construyir una carretera ta aczeder a la suya parti por a cabañera mientres que se beye tamién con preocupazión a proposa d'a soziedat chestora d'a ecspo de construyir dos parques eolicos, uno denzima da cabañera mesma y atro en o acampo ospital, amán d'ella.

O aspetuo que agora se troba más candén ye o d'a permuta de feners que se fazió con o acuerdo d'o conzello y a DChA ta desbloqueyar o ecoabocadero, situau dentro d'o PTR. Ixa infraestrutura, feita y chestionada por urbaser y que ye estada inaugurada fa poco, estió bloqueyada por muito tiempo por un pleito d'entre ista interpresa y o PTR. O conzello, que eba achudicau o proyeuto a urbaser en o suyo diya, l'aturó porque entendeba que os feners ent'os que ufría dentro d'o PTR ta construyir o ecoabocadero, 105 ectarias, yeran inferiors en 95 a la proposa inizial.

Urbaser y o PTR rematón pleiteando por ista custión, o que suposaba un serioso pelingro ta poder aczeder t'as aduyas europeas amenistadas ta finanziar a obra. Con ixa premisa, s'alcanzó un alcuerdo a cuatro bandas. Urbaser mercó t'o PTR parti d'o acampo estrén, chunto a lo parque de reziclau y que yera estau mercau en primeras por o mesmo a cuatro particulars ta ufrir-lo a lo conzello dica tenir 200 ectarias que estipula o contrato monizipal.

O problema ta ixa operazión ye que a mayor parti d'o terreno mercau por urbaser ye protechiú como PIC (Puesto d'Intrés Comunitario), o que fa difízil o suyo aproveitamiento. Ixe barrache se resolbió con o alcuerdo de permutar ixe sulero con a DChA a cambio d'una parti d'a cabañera reyal que pasa chusto d'entre o PTR y o acampo d'estrén y que no ye PIC. Por una ectaria d'a cabañera a DChA reculliría 1,5 d'o acampo. L'onico tramite pendién ta trancar a operazión ye o ditamen faborable d'o inaga t'a cambiar o trazau t'a cabañera reyal de torrero que suposaría ixe intercambio de terrenos.

A unibersidat de zaragoza busca lo sobrebueno matematico

Dimpués de cuatro añadas, a unibersidat de zaragoza ha inaugurau iste lunes o nuebo Instituto Unibersitario de Matematicas y Aplicazions (IUMA) con o que no se quiere competir, sino conseguir una sobrebuena ibestigazión matematica. O instituto será formau por 43 profesors y se trobará en a facultat de zienzias (concretamén en o edifizio de matematicas) y será o quinto instituto de ibestigazión propio d'a unibersidat.

O instituto será meso en una lista d'o gubierno d'aragón de nueu que partiziparán en 16 proyeutos d'ibestigazión subenzionaus por conbocatorias nazionals, asinas como en atros proyetos feitos con interpresas locals y nazionals.
A labor tampoco no ye estada difízil, en amenistar ista mena d'autibidat nomás d'ordenadors.

En primeras o IUMA tiene cuatro líneas d'aizión: alchebra y cheometría, analís matematico y numerico, optimizazión y simulazión y sistemas dinamicos. Manimenos, l'ochetibo ye en poco tiempo ixamplar iste treballo ta atras inbestigazions, ya siga promobendo beluna ecsistén en a unibersidat y/u partizipando en proyeutos interdisziplinars.

D'ista traza zaragoza se conbierte en un referén t'os inbestigadors matematicos de toda la peninsula, asperando-se potenziar as matematicas en una tierra de matematicos. Nomás cal remerar que o ganador d'a olimpiada matematica española ye aragonés y que o simbolo d'a radiz cuadrada s'ibentó en zaragoza.

Notizias de l'aragonés

En istos diyas no dixan de fer-se cosas tocans a la luenga aragonesa. Si fa uns diyas estió a misa en aragonés y o conzierto en o güego parau por o ligallo y ayer estió lo conzierto de mallacán en a plaza sas (bico d'a madalena) de baldes, iste cabo semana tamién bi ha autibidaz sobre l'aragonés:

Güe, o programa d'a telebisión autonomica plaza mayor , prisentau por Eugenio Monesma y que s'emite a las 14:45, será dedicau a la luenga aragonesa. I partizipará Fernando Romanos, que charrará de l'academia de l'aragonés y d'a luenga en cheneral, y se retransmitirán trozes d'os documentals d'a galliguera.




Por atra parti o domingo se ferá a presentazión de l'academia de l'aragonés en bielsa, estando ista a segunda por puestos de l'alto aragón, dimpués d'a de panticosa. L'auto será prisentau por l'alcalde de bielsa, Antonio Escalona, a conzellera de cultura, Isabel Irigaray, y o presidén d'a redolada de sobrarbe, Enrique Campo. Antimás d'a presentazión tamién se proyeutarán audiobisuals d'as diferens bariedaz de l'aragonés y s'ascuitará as opinions d'os fablans patrimonials d'a redolada.