Ent'o Mont Hapunang: curseta a man de Manila

Fa tiempos que no escribo en o blog. Y ye que soi muito centrau en rematar a mía carrera de Matematicas, d'a que no me'n queda que dos asignaturas que aspero aprebar en tasament tres semanetas. Y por ixo, pocas cosas en he feitas, antiparti de tornar ta Manila, y de un viachet ta isola de Siquijor d'o que talment escriba una entradeta si me vaga. Pero iste cabo de semana pasau, entre que amenistaba una mica de desconexión y que teneba a companyía de Luzieta, una buena amiga china, pos marchemos a fer una d'as pocas cosas que nunca no'n he feito en os tres anyos que he viviu en a capital Filipina: logar una moto y marchar t'a provincia mugatiza de Rizal, conoixida por tener monts y tamién bella gorga. 

Asinas que vivindo en Makati, logué a marqueta 26 -a 25 la logué ne Siquijor- y con Luzieta -que no me dixa puyar fotos suyas aquí- pos marchemos t'o mont que m'heba mirau bells días d'antis: o Pamitinan. L'hombre d'a moto, un americano, pareixeba eficient en o suyo treballo, encara que le cuacaba de cobrar por cosetas como un casco extra y teneba no pocos pleitos. Me lo trobé en o suyo garache de motos, cerca de casa mía, a las 6 d'o maitín, y a las 6:30 ya yéranos indo ta Montalbán, en a provincia de Rizal, an que se troba a vía ta puyar ixe montet. O trafico yera prou bueno, y aturemos a desayunar-nos en un Jollibee en Rodríguez, lugar de muitos d'os míos alumnos y companyers de treballo en a Universidat de Santo Tomás y que encara no heba visitau. A Luzieta o Jollibee no le fa mica goyo, pero no tenébanos millor opción, t'o mío placer.

En plegar en o barangay de Wawa, o puesto exacto d'o prencipio d'a cursa, paguemos as entradas, tarifas ambientals, y o guida, dito Berni, refitolero y con experiencia en a vida pero buena persona. Chusto antis de pretar a caminar, nos tornemos a desayunar en una carindería o cantineta tipica filipina, pos Luzieta quasi no'n heba minchau cosa en o Jollibee y caleba pillar enerchías. Nos dicioron que o Pamitinan no se podeba fer ixe día, pos l'acceso privau yera trancau, pero tenébanos atras opcions, d'as que a la fin eslichiemos o Hapunang, que en teoría yera o mont más canso d'os tres d'a redolada. O camín prencipiaba por o paisache tipico de barangay filipino, caminando en o lugarcichón entre cans, gallos, y pasando a o costau d'una cancha de baloncesto. Con tot y con ixo, os locals no se nos miraban especialment curiosos, como gosa de pasar en situacions asinas. Y ye que s'apreciaba que en o puesto, ubierto turisticament ta senderismo y escalada dende 2015 seguntes Bernie, os rostros foranos no yeran raros.  

China chana y tras esnavesar un puent colgant, prencipiemos a puyada, no guaire dura pero tampoco no un camín de rosas. Prencipiaba por una selva caduca, con buena uembra, cosa que siempre s'agradeix en Filipinas, encara que ixe sabado l'orache nos sonredió pos feba nublo. Curiosament, bi heba una escuela d'escalada prou gran y bien acotraciada, bella cosa que busqué malas plegar a Filipinas en o 2017 y que no trobé. Atra vegada, os rapedos cambios en iste país se veyen por tot arreu.  

A metat d'a puyada, bi heba un postichón con dos mullers que vendeban augua de coco y bella chorradina más. Astí aturemos a descansar-nos una mica, ta dimpués concarar a parti d'as dura d'a puyada, no pas por inclinación, sino por pedregoso. Rocas afiladas con as que s'heba de parar cuenta ta no nafrar-se, que muitas vegadas s'esnavesaban blincando: un recorriu crebagarras. En a tuca, y antis d'a tuca, aturemos en dos rafes pedregosos de bells 5 a 10 metros d'altaria, an que puyemos y nos fotiemos con o paisache de fundo. A puyada yera d'escalada, no pas tecnica, pero con risque d'una mala caita de bells metros. En ixe momento, con o guida dando-nos aires ta puyar-ie, y con l'adrenalina d'a propia caminata, pos la puyemos. Pero en baixar, y agora veyendo as fotos, ixa escalada libre podeba haber saliu muito mal. Y ye que, como he dito varias vegadas en iste blog, os filipinos se la chugan d'unas trazas que no m'entrefilo en Espanya, lo menos ta turistas. 

A la fin pleguemos en a tuca, de nomás 517 metros d'altaria, prou ta veyer toda la val y o entivo de Wawa, feito en o río Marikina. Encara que no ye a val más polida que uno se puet trobar en Filipinas, no yera fiera, y a caminata, sin estar un 3000, feba honra ta ixoriar-se, estirazar as garras y desintoxicar-se d'os fumos de Manila. Mala fortuna que chusto en plegar en a truca pretó a plever, pero no pas guaire y nomás por bells minutos. Sin estar gran infortunio, l'augua nos fació a baixada entre rocas una mica más embolicada, pos eslisaban, igual que o bardo que s'heba feito en bells trampos. A yo, como de costumbre, me cuesta muito más de baixar que no de puyar, y con as garras muito cargadas, aturemos en o puesto a metat de camín nos faciemos bellas auguas de coco. Ta sorpresa de yo, bi heba chent baixando d'o Pamitinan, o mont que en primeras nos heban dito que no se podeba puyar. Talment estase una cursa privada que heba feito bella mena de reserva, o que a propia tuca teneba un cupo de puyada, quemisió, pero no nos importó guaire, pos o Hapunang nos heba feito vez.

En baixar no tornemos ta Manila, sino que visitemos o entivo de Wawa, feito en 1909 por os americanos y que mientras decadas surtiba d'augua a la capital, y tamién escenario d'una d'as principals barallas entre americanos y chaponeses en a Segunda Guerra Mundial. Bi heba una pasarela por o suyo lateral con anvistas muito polidas, un túnel granizo feito en paralelo, y abaixo en o río, muitas familias locals se ficaban en l'augua baixo a mosica d'os karaokes filipinos. Una espelunga en unas d'as parez de l'atro costau d'o vallón desenrollaba una cascada, y alto en o entivo, bi heba chent recorrendo a presa en as tipicas barquichuelas filipinas o bangkas. Luzieta y yo arrecorriemos ixe caminet y o lugarichón en o que puntabocaba, y dimpués tornemos china chana, rematanando con a poca augua que nos quedaba, y también con a que i merquemos.

En tornar, encara que tiempo y con buen orache fueras de diez minutez que nos esgotarció, aturemos en a Universidat de Filipinas (UP Diliman) y le'n amostré a Luzieta, ta dimpués cenar en a mugatiza carrera Maginhawa, con restaurants de toda mena que surten a la comunidat universitaria, y an que cenemos en un chaponés. Ta yo ye una d'as millors zonas d'a Manila Metropolitana, si no a millor, con un estilo de vida medio y muitismas actividaz culturals y movimiento. Luzieta coincidió en que yera a millor forma de rematar un día perfecto que nos heba feito honra ta desintoxicar-nos fisica y mentalment d'a chungla manilenya.

Obituario: Carlos Callejero, o nuestro Carlos Rias

No le facié goyo quan nos conoixemos por primera vegada en una asambleya de Podemos. Se pensaba que yo yera unatro buscavidas que quereba pillar cacho y emplir o suyo ego en ixa movideta que pareixeba tant prometedera. Y no le faltaba razón, pos en a balanza ego-compromiso, toz en tenemos d'os dos costaus, y en movidetas politicas, pos gosan de pesar muito más os egos. Y digo gosan porque de cabo quan se troban honrosas excepcions, y precisament Carlos en yera. No buscaba puesto, de feito no buscaba cosa personal, talment, como muito, matar o aburrimiento. Pero nunca no posicions ni reconoximientos, y por ixo los mereixe más que no dengún.

Cosas d'a vida, a la fin le rematé cayendo bien. Y encara no sé por qué. Siempre que quedábanos le'n deciba: "te cayeba mal, no confitabas en yo, y agora sí, a qué fin?". El no respondeba, nomás me mandaba a callar. En qualsiquier caso, a suya confitanza estió una d'as más grants honras  d'a experiencia politica. D'atra man, a yo me fascinaba a suya personalidat, y por ixo mesmo l'admitiba o suyo estilo tosco y faltón. No se callaba con dengún, y tampoco no con yo. Muitas personas lo evitaban por as suyas formas; yo tot a'l vies, apreciaba que bella persona me decise de verdat o que pensaba dentro de tanta hipocresía, mesmo que m'insultase si caleba. En meter-me en movidetas politicas, aprendié muito d'a naturaleza humana, dixé a un costau falsas amigas, pero tamién gané amigos: Carlos yera un d'ixos.

Un día de veranos de 2018, yera en a Biblioteca de l'Augua, y salindo a fer una paradeta, me lo trobé en o bar de chinencos d'a carrera Santa Inés. No yera una situación excepcional, de feito, sin querer, nos trobábanos astí lo menos una vegada por semana y fébanos a charradeta con o café. Yo ixe día yera estresau y me demandé una tella, t'a sorpresa de Carlos, que me dició que ixo le'n daba su mai quan yera amolau.

Y astí blinqué, y le'n demandé por a suya infancia y a suya familia, talment porque en Filipinas ye una pregunta muito común. Ya m'heba charrau d'antis d'a suya trayectoria adulta, pero no pas d'a infantil. Carlos aturó y lo veyé emocionau. Ascape le dicié que prou que respondese si quereba, que faltaba más. El sonredió, morgonió, movió a cabeza, y lo trobé quasi faltau por o comentario, pero no pas por a pregunta inicial. Le costaba expresar-se pero quereba, y a la fin, china chana, charremos. D'ixa conversación, nomás diré que l'amor que veyé en as suyas parolas y o suyo rostro charrando de su mai esboldregaba ixa imachen de hombre duro y faltón. Tot a'l vies, yera tot emoción: una vida canalla en una persona sentimental. 

Circunstancias d'a vida han feito que no le dese a despedida que mereixeba un día que íbanos quedar a fer una biereta en L'Almozara. Ya no torné ta Zaragoza, y tampoco no m'he esforzau por mantener os contactos. Con istas noticias, os míos sentimientos y as mías reflexions se fan mezclallo en un repolvín. Pero lo que ye claro que ye o carinyo siempre será astí: o carinyo enta una persona honesta en metat d'o dolent.