En zagueras son muitas as notizias que me trucan o ficazio ta ficar-las-ie: un negro (y digo negro porque dezir de culor me pareix una ipocresía, qui falta ye o sucheto, nunca no l'ocheto) y una muller barallando por estar candidatos t'a presidenzia d'a mayor potenzia mundial, a suspensión d'o 'rally' más famoso y importán d'o mundo, un nino s'apega a man t'o leito ta no ir t'a escuela, a direutora d'una biblioteca forachita t'a basuera 80 toneladas de libros y dimpués diz que se pensaba que yera material ta reziclar... Pero no sé por qué, me pareix intresán ta ficar-ie un anunzio, o zaguer anunzio d'a canal telebisiba 'fox'...
A yo de siempres m'ha pasau que cuasi nunca m'he bisto atrayiu por un anunzio u propaganda (muitos d'els no son que ferramientas jautas a lo serbizio d'o sistema capitalista... y con isto no quiero creticar a publizidat, porque ta yo ye un feito natural, nomás digo que o capitalismo le da muita más importanzia d'a que abría de tener)... belún d'els m'ha puesto fer gracia... pero atrayer-me... rara begada.
O caso ye que fa uns meses aparexió o primer anunzio que nomás en ascuitar-lo en casa mía iba t'a telebisión a beyer-lo, yera o anunzio d'o 50 cabo d'año de TVE, an que i aparexeban imachens d'as zagueras 50 añadas con a mosica de 'muxons en o tozuelo' d'amaral. Ta yo bien feito y bien poliu...
Ayere mientras mi pai beyeba a telebisión ascuité dos begadas a canta 'por qué te'n bas' de Janette, un clasico que me fa goyo. Miré por curiosidat y me trobé con atro anunzio bien feito, iste ya no istorico sino artistico, do feban propaganda d'as series de dita canal... merexeba la pena perder bels segundos ta beyer-lo y asinas lo fazié.
Me quedo agora con una sensazión de que ye posible una publizidat que de plazer... y cuento que ista traza de publizidat ye muito más exitosa que no ixa que mira de meter-nos un producto en o tozuelo.
(He mirau de trobar-lo en youtube pero no bi ye... una penica).
2 comentarios:
yo dende o chicorron m'he plantau deban da tb ta beyer os anunzios, e ixo, que d'antismas yeran fatos fatos. Agora fan unos anunzios que fa muito mas goy beyer-los que os mesmos programas.
A berdat que sí que en i hai que fan goyo de beyer-los, sí! y uf, de cuan yera chicot dica agora cómo ha cambiau tot!
Con tot y con ixo, un buen amigo que fa Publizidat y Comunicazión en Segovia me contaba no fa guaire que a publizidat en zagueras se ye tornando un chuego de copiar y pegar. Os publizistas se miran las canals extrancheras, adaptan l'anunzio y plaf, una nobedat aquí. Sería interesant de pensar dica qué punto ya en ista soziedat global existe la creyazión u cada begada más a refundizión...
Ai, encara m'acuerdo de l'anunzio d'a fabada (creigo) que feba cosas en aragonés! y de l'anunzio de l'apertura de Puerto Venecia tamién en aragonés... sisquiera l'aragonés fuese una luenga de "marqueting" (encara que tal como en ye agora, a suya estetica no l'aduya guaire). Con isto plegaríanos en o problema de: cómo fer que l'aragonés sía bendible?! que sía un PRODUCTO d'a soziedat consumista como lo son fendo atras luengas minorizadas...
Publicar un comentario