Charrada de conzienzia lingüistica iste biernes 2

Tos remero que iste biernes 2 se ferá en l'asoziazión cultural nogará-religada una charrada tocán a la conzienzia lingüistica de l'aragonés, an que podrez trobar una ripa d'argumentos ta contrimostrar a cualsiquiera que l'aragonés ye una luenga y asinas s'ha bista dende la Edat Meya dica güe, por muito que beluns no lo quieran beyer asinas.

A charrada s'ha retrasada meya hora (asinas que se ferá a meya t'as güeito [19:30]). Istas charradas que de cabo cuan fa nogará son sobrebuenas y fan onra ta ixas presonas que han aprendiú aragonés pero encara tienen deseyos de conoxer cosas nuebas tocans a la luenga.

Sincusar que no escriba guaire istos diyas... pero con os desamens ye imposible. Muitos nos trobamos asinas... a beyer si pasa ya y nos baga de fer muitas cosas que queremos fer.

He trobau bellas notizias intresans ta ficar-las-ie, pero no adubo... Ye lo que tiene as puendas de desamens.

Istoria d'a conzienzia lingüistica en Aragón

O procsimo diya 2 de febrero a las 19:00 oradas se ba a fer en l'asoziazión cultural nogara-religada una charrada sobre a conzienzia lingüstica en aragón, an que se charrará d'as trazas que os aragoneses tienen de beyer a luenga aragonesa y d'o prozeso de conzienziazión lingüistica dende l'escomenzipio dica güe.

Ista charrada la ferán Guillén Tomás y Juan José Segura, miembro de l'academia de l'aragonés. Animo a totz os que sigan intresaus en l'aragonés a ir-ie.

Puesto: Asoziazión cultural nogara-religada.
Data: Biernes 2 de febrero a las 19:00 oradas.
Dentrada libre ta totz.

Cursos en a UPZ

Feba ya un tiempo que no escribiba cosa, pero ye que en escomenzipiar chinero, d'a mesma traza que en escomenzipiar setiembre, bi ha a saber-lo quefers.

O zaguer post que escribié charraba d'as creticas que s'eban feito por no plenar os cursos d'a Unibersidat Popular de Zaragoza (UPZ) y se zentraban más que más en os d'a luenga aragonesa.

Pos bien, beluns d'istos cursos se tornan a ufrir , en a ufierta feita t'ista añada:

-Bariedaz dialectals y aragonés residual- chueves 19.30-21.30 -2 meses- 32 euros.

-Letras aragonesas- lunes 19.30-21.30- 2 meses- 32 euros. (puestar que pasase a estar o biernes, por confirmar).

Mancaría concretar os meses en que se impartirían (posiblemén marzo-abril).
Preinscripzión: diyas 24, 25 y 26 de chinero. Siede Universidad Popular.C/Cortesías

Tos animo a que tos apuntez: en cada curso se ferán 8 sesions de 2 oras. Ye sobrebueno t'a ixa chen que ha estudiau aragonés y quiere aprofondar en a luenga, u bien t'os que son en prozeso d'alprendisache.

O PAR fa serbir l'aragonés en a UPZ ta fer creticas

En zaguerías o PAR ha criticau a lo conzello de zaragoza por a suya chestión d'a Unibersidat Popular, pues o numero d'alunos no ha feito que decrexer. en as zagueras añadas O heraldo ye estau lo primer meyo que s'ha feito eco d'iste feito, y a la ora d'ecspresar-lo s'ha alazetau en a suspensión d'os cursos tocans a la luenga aragonesa, que son: tradizión popular aragonesa, mosica, baile e indumentaria aragonesa, cheografía d'a luenga aragonesa, letras aragonesas, bariedatz dialeutals de l'aragonés, l'aragonés repudial de zaragoza, literatura popular en aragonés, y turismo en aragonés.

Bueno, pues en breu se tornarán a ufrir istos cursos, ya tos daré más informazión cuan en tienga, más entadebán. Pero ista begada de seguras que no torna a pasar isto, porque se ferá con más tiempo y con más planificazión.

2006 ta l'aragonés

Foi un breu resumen d'as prenzipals nuebas que han aparexiú tocans a l'aragonés ista añada:

*Escomenzipiamos con una lai de luengas que yera a punto d'aprebar-se, pero que encara ye en os serbizios churidicos, an que sería por nomás una semana alto u baxo.

*Por atro canto, tamién se continaban fendo as reunions mensuals de chuntos por l'aragonés.

*De lais, autobidatz d'as asoziazions que treballan por l'aragonés, libros, concursos y conbocatorias... tot continó normal, sin garra nobedat importán.

*En chulio se fazió lo segundo congreso de l'aragonés: muitas personalidatz d'ambitos politicos y culturals, y representans de luengas minoritarias d'europa bi estión. Tenió una gran presenzia en os meyos y fazió onra ta creyar l'academia de l'aragonés, asinas como a futura catedra de filolochía aragonesa. Dende allora a presenzia en os meyos (RNE) y as charradas en zaragoza sobre lo tema han crexiú.

*Plegamos l'añada con ista autoridat lingüistica y con ganas de continar treballando furo por l'aragonés, pero sin boluntatz politicas, ni mediaticas.

Tot isto me creya contradizión: o futuro ye emboirau... y nusatros prebamos d'esbodregar as boiras pero amenistamos aduyas d'os entes.

L'aragonés y o catalán ofizials

A zaguera enmienda proposada por totz os partiús politicos nazionalistas (encabezaus por ERC y CHA) chunto con cucha unida t'o estatuto d'aragón diz que l'aragonés y o catalán son luengas ofizials d'aragón en a suya respeutiba zona de parla. O PSOE s'ha mostrau a fabor y lo PP no diz cosa encara. Parexe que ista enmienda marcha entabán.

A ran autonomico Marzelino Iglesias encara no s'ha pronunziau, tan y mientras o siñor Biel s'ha mostrau contrario: "no nos parex chusto que se cambee o tecsto aprebau por as corz d'aragón".

A beyer si isto ye berdat... pos puede suposar una salbazión ta l'aragonés.

http://actualidad.terra.es/articulo/1296409.htm

Ecsposizión "Aquaria, augua, territorio y paisache en aragón"

En istos diyas se ye fendo en a lonja y en o palazio de sastago ista ecsposizión.

Ayer la beyé, y puedo dizir que a ran cheneral ye buena, encara que cuan charran d'as bals d'o pirineu podeban aber meso una mica de toponimia aragonesa... porque ye cuasi tot en castellano (Gistaín, Benasque...).

Dentro d'a ecsposizión, que tos recomendo que bisitez, a millor parti se troba en a lonja. A parti d'o palazio de sastago ye más jauta, pero as presentazions, os efeutos y os retratos que tos podez trobar en a lonja son muito buenos. Antimás podez trobar tamién repuis de l'ombre más antigo d'aragón, asinas como una ripa de fosiles, u tamién bideos de contimparazions d'esferens paisaches aragoneses en as cuatro puendas de l'añada. Ye sobrebuena y antimás de baldes.

Por zierto, maitín ye o diya d'o partiú aragón-chile. Ya sé que no soi dizindo cosa nueba, pero estoi que ye importán y que abría-nos d'ir-ie totz.