Rueda de prensa de Nogará

O benién diya biernes 29 d'agosto, a las 11 d'o maitín en a FABZ (Federazión d'Asoziazions de Bicos de Zaragoza), carrera San Bizén de Paúl 26, l'asoziazión cultural Nogará ferá publica a suya bisión d'a reyalidat lingüstica d'aragón y d'a lei de luengas, aportando a suya postura debán d'iste debate, que en as semanas esbenideras se beye prou azeto.

S'anima a toda la chen que se i amane, ta que conoxca de traza zenzera qué ye o que piensa ista asoziazión d'as luengas d'aragón y ta que as propias personas intresada por iste tema pueda ndemandar y debatir, asinas como ta que se beiga debán d'os meyos que l'aragonés ye bibo, ye un tema que intresa a muita chen y que por tanto s'ha de ficar-ie más.

Puesto: FABZ. Carrera San Bizén de Paúl 26.
Calendata: Biernes 29 d'agosto a las 11 d'o maitín.

O zaguer bals

A popular colla mosical, a orella de Van Gogh, torna a l'autualidat d'a mosica en luenga castellana en a suya nueba puenda, con nueba bocalista, Leire Martínez, dimpués de que l'antiga, Amaia Montero, dezidise no continar en a colla, por razons encara no bien explicoteadas.

O nuebo single, prou bueno y que de seguras debenirá en exito comerzial, se tetula 'el último vals'. Por atro costau, luego aparixerá o nuebo single d'o disco preto en solitario d'Amaia Montero.

A nuebo boz ye bien parellana a l'antiga, si bien s'aprezia un matiz una mica más grau. Manimenos isto contrarresta con o feito de que en ista nueba canta la colla torna a lo suyo esprito d'antismás, con un pop más puro y chobenil, deixando a un canto o exceso de romanticismo que fazió que estasen conoixius como una colla masiau pomposa.

Podremos ascuitar o nuebo disco, tetula 'a las cinco en el astoria' lo 2 de setiembre.

Shah plega ta barzelona dimpués de 10 añadas pedaleando

O nepalí Pushkar Shah, que marchó fa diez añadas dende katmandú ta prenzipiar a chiro a lo mundo en bezicleta, ha plegau güe ta barzelona, continando con a suya abentura por 150 estaus, en os que ufre un mensache de paz y reculle una bandera que puyará en o 2010 a la tuca de l'everest.

Pushkar, que prenzipió o suyo recorriu con 100 rupias (alto u baxo un euro), tiene prebisto fer más de 300.000 kilometors sobre a suya bezicleta, meyo de transporte que s'ha bisto obligau a cambiar dos begadas dimpués de dos furtos.

"En nueba zelanda me furtón a bezicleta y allí mesmo sir Edmun Hillary, enterau d'o que m'eba pasau, me fazilitó un atra nueba ta que continase con o mío trayeuto, estió bella cosa muito emozionán, más que más sabendo qui yera Hillary y lo que representaba ta nepal".

"Escomenzipié o mío biache o 29 de nobiembre de 1998 y aspero rematar-lo l'añada benién dimpués de pasar por 150 estaus d'os que, por agora, ya n'he bisitau 122", explicoteó l'esportista en a suya presentazión debán d'o cónsul cheneral de nepal en barzelona, Lluís Belvis.

Pushkar, que ye fendo o suyo biache sin garra patrozinador, ha asegurau que ha preso beroya grazias "a las buenas personas que m'han dau de minchar una begada a lo diya, prou ta continar con o mío sueño".

Rescatada Ingrid Betancourt

A ex-candidata presidenzial de colombia, Ingrid Betancourt, estió rescatada y liberdata ayere chunto a atros 14 apresaus, d'entre os que se troban tres ziudadans de USA que yeran en poder d'as FARC, seguntes informó a tardi d'ayere o ministro d'esfensa de colombia, Juan Manuel Santos.

Betancourt yera en poder d'as FARC dende o 20 de febrero de 2002 y a suya liberazión yera intensamén demandada por autoridaz y personalidaz de tot o mundo. O rescate, feito por l'echerzito colombiano se fazió en a redolada de guaviare.

Así mesmo, Betancourt ya yera dada por muerta dimpués d'una grau malotía que la deixó bien prima y arguellada. O suyo estau fisico, millor que no lo de fa bel par de meses, fa pensar que ha rezibiu tratamiento medico mientras a fin d'o suyo secuestro.

Ya s'ha trobau con os suyos fillos, a los que no beyeba dende fa 6 añadas, y ha agradexiu a cooperazión y aduya d'esferens mandataires internazionals, como os presidens de franzia, venezuela u ecuador.

Inbentau un auto que funziona nomás con augua

A interpresa chaponesa 'genepax' ha ibentau un auto capable de mober-se nomás con augua, estando asinas o primer automóbil que puet endrezar-se t'os puestos con iste liquido meso de moda sin administrar garra atra sustanzia u fuen d'enerchía. Un litro d'augua premite a l'auto prototipo zircular mientras bels 60 menutos a una belozidat d'arredol de 80 km/h. Ni sisquiera ye menester que siga augua destilada y mesmo puet fer-se serbir augua marina.

O diseño ye encara prou primitibo y ye pensau ta trestallar l'hidrocheno de l'augua y emplegar-lo como combustible d'una pila eleutrica. A interpresa no ha dito cómo han conseguiu que l'auto se mueba nomás con augua pero sí afirman que s'alazetan en teunolochías existens y que son capables de fer hidrocheno partido de l'augua en un tiempo muito menor que con cualsiquiera d'as teunolochías existens agora.

A interpresa chaponesa propietaria d'a creyazión y d'a suya patén aspera poder produzir l'auto a escala industrial.

Pareix mentira y no'n ye...

Un onso pardo se ficó en un restaurán rumano acompañau d'as suyas dos crietas. Dimpués de esclatar bellas mesas se posó en un posiello como un clién más.

A terror se fazió en o restaurán y como os onsos no rezibiban berolla, os tres animals s'endrezón ent'a conzina y se sirbión por a suya propia cuenta.

"Estió como estar en 'caragolez d'oro y os tres onsos', pero a'l bies", explicoteo uno d'os presens astí. "Y antiparti ista begada quereban tot o menú, no nomás l'abena de sobras que gosamos de dar-les". Una begada que estión satisfeitos, os tres animals marchón d'o local sin fer garra daño a las personas astí presens.

Minutos dimpués de marchar se fazión presens a polizía y autoridaz d'a bida salbache.

O comportamiento d'os onsos, antiparti d'estar prou curioso, amuestra que paran cuenta d'as autituz y trazas de bida d'o estar umano ta rezibir tamién els l'amenistau ta bibir sin fer serbir os suyos instintos propios.

Troban unicornio en italia

Unicornio, un sarrio con nomás un cuerno en metat d'a suya fren, no tiene que una añada y bibe en o parque d'o zentro d'inbestigazions de prato, lugar a lo canto de florenzia. Naxió allí dimpués de que su mai plegase ferida por a enrestida d'un auto.

L'anomalía chenetica d'iste animal ha feito que siga admirau.

O direutor d'o zentro de zienzias naturals d'italia, o siñor Tozzi, siñala que feitos como iste pueden estar a simién d'o naximiento d'o mito de l'unicornio.

L'unicornio ye presén en leyendas mitolochicas y falordias de toz os tiempos en buena cosa de culturas. Ye bien fázil que enantes s'aigan puesto beyer atras animals como renos, sarrios u crabas con una anomalia parellana.

O raro d'iste animal no ye que nomás tienga un onico cuerno, sino que siga en metat d'a fren. "Por un regular, o cuerno ye a un costau (d'o tozuelo) en cuentas d'o zentro", ha explicoteau o direutor zientifico d'o zoolochico de roma, Fulvio Fraticelli, que crei que a posizión podría deber-se a un traumatismo en entar bibirón.

Os intresaus pueden ir a beyer o estar en persona t'o parque natural, encara que abrán d'asperar y tener pazienzia, pues "l'anima ye conszién d'a suya traza espezial y se deixa beyer bien poco".