As zenas de nadal y os mosicas d'enantes

En istos diyas rara ye a persona que no ha teniu que zelebrar (u sufrir, seguntes o caso) una zena de nadal.

Tot prenzipia estando una zena d'amigos, compañers de treballo, d'estudios, d'asoziazions, asinas-asinas, pero a la fin gosa de conbertir-se en una buena escusa ta fatiar y beyer cómo ixos compañers fan cosas que nunca no t'entrefilarías.

Uno d'os feitos comuns a ixas zelebrazions son as cantas que salen de l'esmo d'os asistens (u bien d'o listau d'o karaoke de turno). Tipicas cantas que en o suya diya te fazión goyo y que, dimpués de bel tiempo, plegués a odiar y agora te parixen ridiclas, pero que en momentos "d'ebasión" bien que se tornan a cantar, a danzar y de paso, s'aprobeita ta fatiar con @ zagalet@ que siempre t'eba trucau una mica o ficazio.

Y aprobeito o post ta dizir as dos cantas que ta yo son as más representatibas d'isto:

Sin comentarios...

Y dimpués, un atra, mitica tamién en toz istos casos:

Ta mayors y chobens... canta que os d'a mía chenerazión gosábanos de danzar con os nuestros chirmans mayors.

Pingüinos omosexuals escarduziaus por furtar un güego

Dentre os pingüinos por un regular se dan condutas omosexuals, o que ya no gosa de pasar guaire ye que istas parellas, debán d'a imposibilidat de tener fillos, se dezidan a furtar güegos a atras parellas. Isto ye o que ha pasau en o zoo de harbin, china.

Dimpués d'estar descubiertos por o suyo cudiador, a parella de pingüinos estió engarcholada en atro puesto isolaus. Y o güego, que ye estau tornau ta sus pais, no ye estau dañau, encara que no se conoix si plegará a estar adulto, pos no ye fázil que a cría se desembolique en cautibidat.

A parella escarduziada fa parti d'una clica de 17 pingüinos que plegó dende l'antartida en 2005 y que s'adaptó prou bien a l'orache de harbin, an que en l'ibierno se prenen os 40 graus baixo zero.

Debiu a que os pingüinos gosan d'estar animals fidels, que remanen con a suya parella mientras toda a suya bida, o zoo ha dezidiu dixar chuntos a os dos masclos.

FLA en Monzón... y colla sobrebuena: Lamatumbá

Iste cabo semana he teniu a suerte d'estar en a Feria d'o Libro d'Aragón de Monzón, en a suya XIV edizión. Yera a primera begada que i yera, y sin dandalo tornaré a estar-ie.

Muitas editorials y asoziazions culturals nos i trobemos, y podiemos ufiertar os nuestros produtos asinas como beyer y mercar os d'a resta. Chen de muitas sensibilidaz en toz os sentius beyó a la resta de compañers y a presenzia de l'aragonés estió graniza, con as prinzipals asoziazios y editorials presens (Xordica, REA, IEA, Nogará, Ligallo, Consello...). A chen de todas istas entidaz fazión charradetas entre els que aduyón a un clima de cooperazión, y más en o delicau momento que tiene a nuestra luenga.

Por atro costau, a presenzia de chen fablán d'aragonés como publico en a feria estió graniza, amanando-se-te-ie directamén en aragonés. A ran personal m'emozionó beyer como una mai con a suya filla de bellas 5 añadas le yera esplanicando en aragonés baixorribagorzano o libro ansotano d'os cuentos trazionals (caperuxeta roya, os tres gorrins...) y ella le respondeba en aragonés.

Ta rematar tamién cal destacar a calidat de bellas collas mosicals que i tañón de nueys. A ran personal me quedo con "Lamatumbá", una colla fiestera de tierras gallegas que sabión dibertir a os que i yéranos con a suya enerchía. Una gran sorpresa mosical de calidat, que luego será bien conoixida y que recomiendo a toz que i beigaz. Por agora, tos dixo con un bideo d'els.

De cabo cuan sueño con a reyalidat

De cabo cuan sueño con a reyalidat
De cabo cuan soi embarucau
De cabo cuan sueño con o mundo salbache
De cabo cuan me trobo solenco

Hey, Bobby Marley
Canta-me bella cosa buena
Iste mundo se torna barrenau
Ye una emerchenzia

Ista nuey sueño con a chirmandat
Ista nuey digo: un diya!
Un diya os míos sueños se ferán reyalidat
Como Bobby me dizió

Hey, Bobby Marley
Canta-me bella cosa buena
Iste mundo se torna barrenau
Ye una emerchenzia

Hey, Bobby Marley
Canta-me bella cosa buena
Iste mundo se torna barrenau
Ye una emerchenzia...

Ista nuey me miro por a mía finestra
Y no puedo beyer luzes
Ista nuey me miro por a mía finestra
Y no puedo beyer dreitos

En conoixer

En conoixer

Te me miro y no te trobo. Te trobo y no te me miro. Os míos güellos fuyen d’os tuyos, as mías orellas no quieren ascuitar o traquiar d’o tuyo corazón y o mío naso ye indiferén a la tuya ulor que conbierte a os zagals en ababols, porque os que de berdat quieren trobar-se con o tuyo cuerpo son os míos labios.

Relato presentau por o blog Estricalla t'a trobada de fabloggers.

Desactiban bomba d'a guerra zibil

Mientras as obras que feba en o suyo alparcamiento, un bezín de morata de tajuña se trobó con un ocheto que, tras confundir-lo con una cañería y mirar-se de tallar-lo con una radial, estió una bomba, por o que remató gritando a la guardia zibil.

Els informón ta sorpresa de l'ombre, que yera menester desactibar de camín o granizo prochectil, de bels 250 kilos, y que probablemén se trobaba astí dende fa más de meyo sieglo.

En as zagueras cuatro añadas ya s'han desactibau 583 explosibos antigos y o zaguer, dita bomba.

Nomás en 2008 se'n trobón 59, entre els una bomba d'abiazión graniza, 12 mengranas de man, 17 mengranas de mortero y 29 prochectils d'artillería. Os espezialistas d'a guardia zibil fan reconoximientos prebentibos en os puestos en os que ye posible trobar ista mena d'estrapaluzios, encara que de cabo cuan son trobaus por ziudadans, bien de traza casual u bien por personas que los escaban ta comerzializar-los u coleczionar-los.

Tornando a prenzipiar

Me ye estau difízil d'escribir en istos zaguers diyas, y güe torno d'a mesma traza a como prenzipié un diya 25 de chunio de 2006 iste blog, fendo-me eco d'atro atentau contra a lingüistica aragonesa feito por o locutor Federico Jiménez Losantos, charrando-ne y sin saber-ne.

O pasau lunes, en o suyo programa maitinal 'O maitín', radiau en a canal cope, charró tocán a la conzentrazión que arredol de 30 personas fazión en o paseyo independenzia manifestando-se contra o siñal d'españa que se ficó debán de Juan de Lanuza, chustiza d'aragón asesinau por os sorches de Felipe II.

Debán d'iste feito politico, a luenga aragonesa no quedó sin escarduzio por parti d'ista persona que no ha estudiau ni ha leito brenca tocán a iste tema. As suyas parolas textuals son as siguiens:

"Llevaban emblemas de la 'chunta', claro si algo que se llama 'chunta' no puede ir bien. Chuntaralá, pero si eso es un pasodoble, en español se ha dicho siempre 'junta', por lo tanto en aragón 'junta'. Se han inventado una fabla, que llaman ahora aragonés. ¿Cómo que aragonés? El aragonés, lo que han hablado siempre en aragón, es castellano. Español mejor dicho porque allí no era castellano, era un reino independiente. En el valle del Ebro antes que en el valle del Tajo, pero díselo a los filólogos estos. Si es una colonia, es una colonia del tripartito. Políticamente aragón es una colonia del tripartito, y a los hechos me remito."

Se torna a fer una identificazión politica d'a luenga y se torna a fer tot o que dende iste blog tanto he criticau. Identificazión partidista u ideolochica, falsedaz istoricas (que me diga o siñor Jiménez Losantos por qué encara dezimos en a bal de l'ebro parolas aragonesas u se conserban feitos toponimicos como valdefierro, valdespartera, malpica...), y a considerazión d'o castellano como onica luenga d'aragón.

Si bien no tot ye malo (u sí). A SER iste maitín ha emitiu un chuizio d'opinión a trabiés de radiozaragoza an que se manifestaba a fabor d'a regulazión d'as luengas d'aragón, encara que en un empentón pancatalanista han endrezau o manifiesto ent'o catalán y nomás han feito una menzión a l'aragonés pero no como luenga, sino como "fablas pirinencas". Tamién cal dizir que en a programazión d'as fiestas d'o pilar meten como mosica de fondo a canta en aragonés "aragón ye ye" d'a colla mosical comando cucaracha, sin ficar a letra.