Breu cronica d'a Manifestación por a Igualdat d'as Tres Luengas

Ayere se fació a primera manifestación de reivindicación d'una millora d'a situación d'as luengas d'Aragón. Feito historico, pues en más de mil anyadas d'existencia de l'aragonés y d'o catalán en Aragón, mai no s'en eban feitas. Y sisquiá que nunca no se tenese que aber feita, pues significaría que os fabladors d'istas luengas tienen os dreitos que les pertocan.

Arredol de mil personas nos achuntemos en Glorieta Sasera y marchemos enta l'Aljafería a traviés d'o Paseyo Pamplona y María Agustín dica plegar ta l'Aljafería, amostrando intrés por iste patrimonio cultural y arroclando-nos internament. Sin duda, un feito significativo.

Dimpués, en o quiosco de l'Aljafería chentemos y brendemos, amenizaus con actuacions ludicas, mosica y a obra de teyatro "o yayo volador", interpretada de traza sobrebuena por a colla de teyatro "Algabenaires".

Sin dandalo, o desembolique d'un acto de traza tan buena por parti de totz, amostrando nomás intrés cultural, fa honra ta saber que pueden fer-se-ne sin garra mena de medrana, y soi seguro de que continarán fendo-se-ne.

A parti negativa: l'electoralismo de CHA

Si bien, siempre ha de haber qui, con actitutz más propias de l'inmadurez, mira de sacar treslau sin importar-le o treballo feito mientras meses. Asinas, ya ayere de tardis, nos plegaban noticias de que Chunta Aragonesista eba feito en paralelo un consello con una rueda de prensa posterior an que o tema alacetal yera una critica por a situación d'as luengas d'Aragón.

Pillan o mesmo diya d'a manifestación ta centrar-se en un tema que rara vegada i tocan, incumplindo uno d'os trataus presos en a zaguera asambleya d'a coordinadera Aragón Trilingue: No se podrán dar ruedas de prensa (...) de temas concernientes a la ley de lenguas para evitar intentos de patrimonialización. Chunta Aragonesista teneba conoxedura de tot isto.

En a mesma tardi yo, Marco Antonio Joven, me amané a o representant de CHA que i yera, Miguel Martínez Tomey (criticau por yo muitas begadas, unas considero que con razón, y atras sin ella), ta demandar-le-ne, decindo-me que si bien eban feito un Consello o mesmo diya, no'n sabeba brenca, custión de difícil creyer. Os videos y a información d'os meyos lo dicen tot, y yo nomás me remitiré a unas poquetas parolas: carnuz, megos, opornunistas que les importa igual o treballo desembolicau por as personas d'a organización, nomás ta sacar treslau y mirar de recuperar bel voto.


Resumindo, he de dezir que, cara ta yo, l'acto estió muito bueno, s'amenistaba, y se veye que puet fer-se ista mena de cosas sin garra problema (a o menos mientras se fa). Asinas que felicidatz a totz os que i asistietz, fueras d'os miembros de Chunta (que pocos en yeran por cierto).

http://www.diariodelaltoaragon.es/NoticiasDetalle.aspx?Id=571348

http://www.aragondigital.es/asp/noticia.asp?notid=60558&secid=9

http://www.que.es/zaragoza/200905161942-sede-cortes-aragon-cientos-personas.html

http://www.europapress.es/aragon/noticia-sede-cortes-aragon-cientos-personas-manifiestan-piden-ley-lenguas-20090516194230.html

http://www.eleconomista.es/flash/noticias/1251176/05/09/Cientos-de-personas-se-manifiestan-en-Zaragoza-y-piden-ante-la-sede-de-las-Cortes-de-Aragon-una-ley-de-Lenguas.html

http://ecodiario.eleconomista.es/flash/noticias/1251176/05/09/Cientos-de-personas-se-manifiestan-en-Zaragoza-y-piden-ante-la-sede-de-las-Cortes-de-Aragon-una-ley-de-Lenguas.html

http://www.gentedigital.es/zaragoza/noticia/59311/cientos-de-personas-se-manifiestan-en-zaragoza-y-piden-ante-la-sede-de-las-cortes-de-aragon-una-ley-de-lenguas/

http://www.heraldo.es/noticias/51f6c_cientos_personas_manifiestan_zaragoza_piden_ante_sede_las_cortes_aragon_una_ley_lenguas.html

http://noticias.terra.es/local/2009/0516/actualidad/cientos-de-personas-se-manifiestan-en-zaragoza-y-piden-ante-la-sede-de-las-cortes-de-aragon-una-ley-de-lenguas.aspx

http://www.radiohuesca.com/Hemeroteca/Noticia.aspx?codigo=453523

Antimás, se troba tamién en RadioEbro, RadioZaragoza, AragónTelevisión, AragónRadio, y iste lunes en l'informativo d'as 8 d'a tardi en ZTV.

O CAI Teruel gana a liga de boleibol

Teruel aparixe en os meyos de comunicazión, bella cosa mesmo rara. O culpable ye a suya colla de boleibol, que si fa bels meses ganó a liga de campions europeya (equibalén en fútbol a la antiga recopa), ayer ganó a liga española de boleibol.

En un partiu de 4 sets y dimpués d'aber-ne ganau os dos primers, o cai teruel ganó a o local Unicaja Almería a eliminatoria d'a final. 300 teruelanos i marchón ta beyer un inte espezial ta teruel y ta l'esporte aragonés.

O cai teruel se conbierte asinas en a terzera colla esportiba aragonesa que gana un torneyo nazional liguero, dimpués d'o ch chaca y o pinturas lepanto.

Carta trista d'Irina

A colla mosical Mallacán, naixida en 1992, ha sacau o bideoclip d'o suyo single Carta trista d'Irina, que ferá parti d'o suyo nuebo disco, Mar de Suenyos, que luego podremos mercar.

Ista canta nos rezenta a istoria d'una mai y d'a suya filla, que troban muitas dificultaz ta bibir y fan o que pueden, dica que a mai a la fin muere. A suya filla, con rasmia, contina luitando en a bida... Asinas, se trata d'una canta que fa un chiro ent'una tematica puramén sozial.

O estilo mosical contina en a línea d'o suyo zaguer treballo, País Zierzo, que tanto exito en tenió. Manimenos, s'aprezia una eboluzión enta un soniu más furo, con mayor importanzia d'os instrumentos electricos. Asperemos que a o menos o biento que tan bien feban serbir en País Zierzo, no dispareixca: de feito, uno d'os millos efectos en ista nueba canta ye o soniu d'as trompas, encara que se troba a faltar una mayor presenzia d'estilos más amanaus a o ska-reggae.
Si bien, no ye que una canta y ye luego ta chuzgar a mena de mosica que tañerán.

En o ran d'aragonés s'aprezia una millora sobrebuena, si bien bi ha bel fallo encara por soluzionar.

Ta rematar, o suyo bideoclip ye muito bueno, plasmando os feitos que as letras rezentan y rodau en diferens puestos que os zaragozetas bien conoixemos. Una gran eboluzión en iste sentiu.

Manifestazión por a Lei de Luengas

O sabado 16 de mayo a las 12:00 am en Glorieta Sasera se ferá a Manifestazión por a Lei de Luengas parada por a plataforma 'Aragón trilingüe'. Continará por os paseyo pamplona, paseyo María Agustín y abenida madrit ta rematar en a carrera d'os diputaus, cara ta l'Aljafería, do se prozederá a leyer a Carta por Lei de Luengas en aragonés, castellano y catalán.

CAL IR-IE! Ye una oportunidat unica ta contrimostrar a la soziedat aragonesa que as luengas importán y asabelo. Cal ir-ie y conbenzer a toz os nuestros binclos personals y asoziatibos ta que i baigan, con ilusión y rasmia.

Os meyos s'han feito eco d'isto:

http://www.kaosenlared.net/noticia/90011/presentacion-manifestacion-16-mayo-favor-ley-lenguas

http://www.aragondigital.es/asp/noticia.asp?notid=59237&secid=3

http://www.elperiodicodearagon.com/noticias/noticia.asp?pkid=491602

http://www.europapress.es/aragon/noticia-coordinadora-aragon-ye-trilingue-manifestara-mayo-igualdad-aragones-catalan-castellano-aragon-20090416143758.html

http://ecodiario.eleconomista.es/espana/noticias/1171104/04/09/La-Coordinadora-Aragon-ye-trilingue-se-manifestara-en-mayo-por-la-igualdad-de-aragones-catalan-y-castellano-en-Aragon.html

http://www.gentedigital.es/zaragoza/noticia/46148/la-coordinadora-aragon-ye-trilingue-se-manifestara-en-mayo-por-la-igualdad-de-aragones-catalan-y-castellano-en-aragon/

http://actualidad.terra.es/provincias/zaragoza/articulo/coordinadora-aragon-aragon-3192238.htm

http://www.radiocatalunya.ca/noticia/el-16-de-maig-manifestacio-a-saragossa-pel-catala

Antismás d'aparixer en RNE, aragón radio y ZTV.

Mientras, Marzelino Iglesias ha tardau un diya en responder, explanicando que "antis de marchar-se, quiere dixar aprobada a Lei de Luengas", cuan en o programa electoral d'o PSOE s'espezificaba en menos d'una añada, y agora ya no da ni a seguridat de que se baiga a fer. Que penica d'ombre...

A millor canasta

Fa bel tiempo ficaba a que yera considerada una d'as millors canastas d'a istoria... Manimenos, rechirando por o rete n'he trobada atra que, encara que no balida, ye millor.

http://marcawas5.recoletos.es/blogs/Controlador?opcion=9&codPost=2665

Ya me fería goi a yo de poner una d'istas en a mía bida...

Luita proletaria animal

O que se fa se bosa. Ixo mesmo debió de pensar un mono d'a isla de samui, que se troba en o pazifico, que o diya 10 de marzo mataba d'un cocotazo a o suyo amo. Seguntes pareix, o muerto obligaba a o macaco a puyar t'as palmeras d'a isla engarrotando a o macaco con un chuzo.

O mono se negaba a puyar os 50 metros d'altaria que feba l'árbol ta conseguir a fruita y debán de tal negatiba, Luelit Janchoom, que asinas se deziba o cudiador, dezidió d'obligar-lo a puyar fotendo-le con un tocho por o que a la fin o mono abió de puyar-ie. Manimenos, bien carrañau, dezidió de lanzar-le un coco a o suyo cudiador con a suerte de cayer-le en o tozuelo y matar-lo.

A notizia ha impactau en toda a isla, seguntes informa o periodico local, y os amos de monos son xorrotaus.

Pesadillas...

Siempre m'he preguntau si ye posible que as pesadillas se repitan, que o mesmo sueño que tiengo yo l'aiga teniu unatra persona en atro lugar d'o planeta unatro diya d'a suya bida... Sería ixo posible? Pos bien, güe he bisto que sí que'n ye: