3.6.14

'Pluralistic ignorance' y as elezions de l'añada benién




Resumen: En iste post se fa una introduzión a o fenomeno d'a Pluralistic Ignorance, chenerau por o cumplimiento de normas en base a falsas espeutazions. Dimpués s'aplica iste chiquet analís a la situazión d'a politica autual en o estau español, esposando a la fin que iste fenomeno puet predezir una puyada muito gran de toz os partius politicos fueras de PP y PSOE en as elezions de 2015. 

Abstract: Here we introduce the Pluralistic Ignorance phenomenon, given by norm compliance depending on false expectations. Then we apply this superficial analysis to the current politic situation in the Spanish State, ultimately exposing that this phenomenon may predict a big rise of every political party except PP and PSOE for 2015 elections.

------------------------------------------------------------------------------------------------------------------------------------

Os teoricos d'a normabitidat (Bicchieri, 2006; Brennan & co., 2013) gosan de parar cuenta d'un fenomeno muito curioso que claman Pluralistic Ignorance (Inoranzia pluralista?). Pillando a definizión d'a primera d'istas teoricas (podría pillar-se-ne cualsiquiera, porque encara que son esferens y dezaga amagan esferens presupuestos filosoficos, ta iste post ixa mena de discusions rai), se tiene que una norma ye un regle conoxiu a libel cheneral tal que:

1. L'achén aguarda que buena cosa d'a resta cumpla ixe regle. 
2. Buena cosa d'a chen aguarda que l'achén particlar cumpla ixe regle. 

Asinas, si pillamos un regle cualsiquiera (por exemplo, no ir zorro aduzindo), tal regle ye una norma si aguardamos que a resta lo cumpla (ye dezir, que a resta no aduguen zorros) y si a resta aguarda que nusatros lo cumplamos (ye dezir, a resta aguarda que no adugamos zorros).

A Pluralistic Ignorance se da cuan ixo que aguardamos ye falso u no troba garra motibo, creyando-se una ilusión en ixa espeutazión. Con tot y con ixo, toz u cuasi toz lo continamos aguardando, y por tanto continamos con ixe regle. En atras parolas, son normas que a la fin denguno no quiere cumplir, y por tanto no tienen guaire u mica sentiu, pero que se cumplen. Meto bels exemplos:

Exemplo 1. Os adoleszens y o costumbre de zorrupiar
:  O sozcheto adoleszén gosa de zorrupiar sin tener o paladar feito a ixa sabor, y asinas a bebida alcolica de turno no le fa goyo. Con tot y con ixo, l'adoleszén aguarda que a resta zorrupie, y a resta d'adoleszens aguarda que él tamién zorrupie, y tot ixo a penar de que a la más gran parti d'els no les fa goyo de zorriar. O motibo de fundo que troba o sozcheto ye a medrana a no estar admeso en a colla, a no festechar, asinas-asinas. En iste caso trobamos pues una norma chenerada por falsas espeutazions (a espeutazión de que a resta zorrupie y a espeutazión de que a resta aguarda de yo que zorrupie), pero con tot y con ixo norma. 

Una d'as cosas curiosas que tienen as normas cheneradas por Pluralistic Ignorance ye que ascape s'escatumban. No cal que una minoría muito chicorrona de sozchetos que autúen contra la norma ta que a resta pare cuenta ascape de l'absurdo y se remate crebando. Unatro exemplo: 

Exemplo 2. A clase embolicada y as demandas: Pensemos en una clase muito embolicada que o profesor u mayestro remata demandando a l'alumnalla si ha entendiu tot, ubrindo un turno de demandas. O más probable ye que debán d'ixe ofrezimiento d'o profesor, garra escolano puye a man. Emplegando a definizión anterior de norma, isto pasa porque: 1. Cada escolano aguarda que a resta lo ha pillau tot, y no demanda por bergüeña a quedar como un fato. 2. A resta aguarda que o escolano en custión lo ha pillau tot, o cualo chenera un bucle que fa que denguno no demande. 
¿Qué pasa cuan bel intrepido escolano puya a man ta demandar un dandalo a risque de quedar como un fato? Luen de quedar asinas, a suya demanda contina con buena cosa d'as mans d'a resta puyadas y fendo-ne atras demandas. A norma inizial de no fer demandas, causada por a falsa creyenzia de que toz han preso a clase, s'esfá. 

A ideya que quiero esfender en iste post ye que a trabiés d'iste fenomeno podemos entrefilar que os botos a os partius esferens de PP y PSOE en as elezions de l'añada benién puyarán, y muito. Por un regular, bi ha abiu una norma que refirmaba o bipartidismo, norma chenerada en zaguera instanzia por a tradizión prebia, por a creyenzia en o ''boto que fa onra'' y por ista mena d'espeutazions:

1. Yo aguardo que a resta de chen bote a o PP u a o PSOE (ista espeutazión se refirma con as correspondiens encuestas).
2. A resta aguarda que yo bote a o PP u a o PSOE (atra begada, a espeutazión se refirma con as encuestas). 

Pero como deziba antis, ista mena de normas guidadas por a Pluralistic Ignorance son muito febles, y malas que bi ha una minoría que las creban (como a man puyada en o turno de demandas), de camín s'esboldregan. 

A mía impresión ye que os resultaus d'as zagueras elezions europeas han crebazau ixa norma de Pluralistic Ignorance que feba que buena cosa d'a chen botase a PP u a PSOE. A fuerte dentrada de Podemos, pero tamién de Ciudadanos, y o creximiento de UPyD y más que más de IU, son estaus os feitos que han aduyau a esborrar as falsas espeutazions que refirmaban o bipartidismo. En atras parolas, son estadas as primeras mans puyadas que han feito demandas a o profesor crebando a tradizión de no fer-ne (a primera de todas ellas, estió a de UPyD fa ya bel tiempo), y agora o crebamiento d'a norma d'o bipartidismo no se puet aturar. 

Prou que en unas elezions o boto pende de muitas fautors, que a crisis y l'agotamiento d'un rechimen de ya 40 añadas ha aduyau ta que surtan nuebas opzions igual que no mans que se'n puyan ta fer demandas, y prou que a situazión puet cambear muito dica una añada, por o que tampoco no quiero fer predizions en iste post, cosa que no sería mica seriosa. Sindembargo, sí que pretendo fer beyer que a propia naturaleza y inerzia de normas cumplidas por falsas espeutazions ye un fautor a parar cuenta, fautor que aduyaría a esplanicar una puyada muito gran d'os nuebos partius en as beniens elezions. 

-----------------------------------------------------------------------------------------------------------------------------------

Referencias


Bicchieri, C. (2006). The grammar of society: The nature and dynamics of social norms. Cambridge University Press.
 
Brennan, G., Eriksson, L., Goodin, R. E., & Southwood, N. (2013). Explaining Norms. Oxford University Press.