29.11.07

Torna 'fendo orella'


O programa de radio en aragonés, que antis se feba os domingos, torna agora dimpués d'una puenda d'aturada con nuebas bozes y nuebas seczions.

O nuebo orario d'emisión ye os biernes dende as 7 d'a tardi dica as 8 y se troba en radiotopo, 101.8 fm. Charrará d'autualidat aragonesa, mosica, cultura y prou que d'as nobedaz d'a luenga aragonesa, y tot en aragonés.

Gran treballo d'ista chen que fa que, pese a os barraches que se i fican, podamos sentir aragonés en as nuestras casas con as nuestras radios, como toda luenga propia mereixe.

Antiparti d'isto, tamién han feito un blog d'o podez trobar toz os comunicaus y as nuebas que i digan: fendoorella.wordpress.com.

No perdaz ista oportunidat d'ascuitar aragonés, y antimás bien fablau.

27.11.07

Zaragoza, ziudat con feria andaluza, y sin feria de cultura aragonesa

Adibo o zaguer comunicau d'a PEA:
Dimpués d'as zagueras declarazions d'a siñora Pilar Alcober, conzellera de cultura y educazión d'o conzello de zaragoza, nos beyemos en a obligazión de esposar as nuestras queixas por a manca de conoxedura y politizazión d'a luenga aragonesa.

Pilar Alcober, debán d'una demanda tocán a la continidat d'a feria d'a educazión y d'a cultura aragonesa "amostranza" respondió que: "o aragonés y a cultura aragonesa son parti d'a demba cheneral d'a cultura española y, comotals, no han d'estar ocheto d'un tratamiento espezifico y esferenziau d'a resta d'as autibidaz culturals que se fan dende o conzello de zaragoza".

Dende a Plataforma d'Esfensa s'a luenga Aragonesa (PEA) queremos expresar, sin dentrar en considerazions politicas u ideolochicas de garra mena que zaragoza, como capital d'aragón, ha de tener un trato espezian ent'a suya propia cultura y a suya luenga.

Somos cansos de beyer cómo no bi ha garra problema en fer una feria d'abril d'una semana y sí por una feria d'a cultura aragonesa d'un cabo semana. Si ixo no estase prou, tamién somos asistindo en os zaguers meses a un gasto presupuestario d'ista conzellería d'o conzello de zaragoza ta sacar una luenga, antimás propia, como ye l'aragonés, sustituyindo toda a retulazión bilingüe aragonés-castellano por una monolingüe en castellano.

Queremos comunicar que a marguinazión d'o nuestro patrimonio cultural nomás nos ferá mal a nusatros mesmos, y animamos tamién a toda a soziedat aragonesa a que ubra a suya mente ante iste riquismo bien, cultural y no politico. Por a nuestra parti continaremos comunicando y queixando-nos de todas ixas situazions inchustas que se faigan ent'a luenga aragonesa.



25.11.07

Creixe o numero de furtos de bezicletas en a unibersidat de zaragoza


En a zaguera semana, ha crexiu o numero de furtos de bezicletas en a unibersidat de zaragoza, tanto en o paraninfo, como en a ziudat unibersitaria y en o CPS.

O numero de casos conoxiu ye estau de 5: 2 en a parti de filosofía y letras (ziudat unibersitaria), atro en o paraninfo y atros 2 en o CPS. Contretamén os furtos estión entre o lunes y o chuebes.
Os suyos dueños las deixón con candau, y cuan tornón a por ellas se trobón que no i yeran, ni sisquiera o candau, con o que ye probable que o crebasen u que se lo lebasen con bezicleta.

Por atra parti, charrando de bezicletas y unibersidat, cal menzionar a campaña de sensibilizazión ecolochica que ye fendo a unibersidat, do si pasas con bezicleta ta fan bel regalo. A semana pasada estión en o paraninfo y en a ziudat unibersitaria, ista semana serán en albeitar y en o CPS. Midas asinas son sobrebuenas, y aduyan a os ziclistas a continar fendo serbir a bezicleta mientres istos furos diyas d'ibierno y zierzera.

Charrando tamién d'o tema gran scala, o siñor Biel se ye luzindo en frases. Si fa dos diyas dizió que yera o millor que l'eba pasau a aragón dende Fernando o catolico, agora diz o siguién: "o cambio climatico lo fan os fumos que salen d'o tozuelo d'os que s'oposan a o proyeuto 'gran scala'". Si siñor, con ganas de dialogo y d'estar una persona ubierta d'esmo ascuitando todas as opinions y os motibos de ditas opinions.

24.11.07

Proyeuto Gran Scala


Iste ye o títol d'o que bellas interpresas canadienses, de USA, franzesas y australianas quieren fer en a redolada de monegros.

O puesto, d'entre madrit, barzelona, franzia, bilbao y balenzia ye estau eslechiú por els por ista situazión cheografica. A ran internazional han eslechiu o estau español y no pas atro por a gran cantidat de turistas que i bienen. Tamién dizen que as infraestruturas feitas t'a expo les han animau a dezidir mirar d'instalar-se aquí.

Seguntes os propios responsables quiere estar "as begas europeas" con una ripa de casinos, puestos d'ozio, espeutaclos y 6 parques tematicos, chenerando 250000 puestos de treballo. No han demandau garra aduya d'as instituzions, encara que bel particular como ibercaixa ya s'ha intresau por dentrar-ie.

Toz os partius politicos, fueras de CU que diz que o impauto ecolochico será muito grau, dizen que cal tener más datos. Encara que por atro costau, o siñor Biel, representán d'o PAR, ha dito que ye o millor que l'ha pasau a aragón dende Fernando o catolico... (u bien quería dezir 'o pior' y no pas 'o millor', u iste ombre torna a amostrar-nos os suyos grans conoximientos tocans a aragón. Remero que dandalió tocán a o significau d'a parola ababol).

Pareix que espelunziecha y pandicosa no yeran que o prinzipio... qué ba a pasar?

19.11.07

A orella de Ban Gogh creba



A popular colla mosical donostiarra, a orella de ban gogh, comunica güe que a suya cantaire, Amaia Montero, deixa de tocar t'a banda. Seguntes pareix, problemas personals entre Pablo Benegas, o guitarrista, y a propia Amaia, han feito que ista dezida no continar con a colla, buscando apoyo ta continar a suya carrera mosical por sí mesma en a discografica sonymusic.

Ista colla prenzipió aduyada por Mikel Erentxun con una mena de mosica pop chobenil y fresco, dile al sol(1998), con un primer disco do encara yeran muito chobens, y dimpués con un segundo disco que ye uno d'os itos d'a mosica, o biache de copperpot (2000), an que dion o millor d'els mesmos, con cantas tan buenas y famosas como a placha u soledat.

Dimpués eboluzionón enta un pop muito más pijauto y recargau, con un paso intermeyo en o que te rezenté cuan te faziés a dormida, y con un paso final en polida, un fracaso en contimparazión con a resta d'os suyos discos. Mientres o peso d'Amaia en a colla yera mayor por a suya boz, o estilio cambio y se conbertión a banda mosical d'os pijautos d'as chambretas de gurú y loreak mediak.

En o suyo blog a colla diz o siguién:

Un post no deseyau...

San Sebastián, a 19 de Nobiembre de 2007


Querébanos rezentar-tos que fa unas semanas Amaia dezidió no continar con nusatros en a orella de ban gogh ta prenzipiar a suya carrera solenca. Dende que emos sabiu d'ista dezisión emos sentiú muita tristura, no nomás por os motibos mosicals ebidens, sino tamién por toz os años y ecsperienzias bibidas y por bibir. Manimenos, y encara que queriésenos que Amaia continase con nusatros, le deseyamos toda a suerte d'o mundo en a nueba pueda que ha dezidiu prener.


Por a nuestra parti, en a orella de ban gogh encara sentimos que nos quedan muitismas cantas por escribir. De feito ya somos componendo, con a pasión de siempre, un nuebo disco que asperamos tener parau en 2008.


Dica allora, un abrazo fortal a toz y más que más a ixes que nos seguís dende siempre.


Pablo, Álvaro, Haritz y Xabi

LA OREJA DE VAN GOGH



Mecano bis... sacando que mecano enduró más y a suya discografía estió más gran.

4.11.07

Plataforma d'Esfensa d'a luenga Aragonesa (PEA)

Fa bien poco s'ha creyau una plataforma con esprito choben y reibindicatibo ta esfender y reindicar l'aragonés asinas como o suyo emplego y a suya dignifcazión, alazetada en apoyos personals de chen con esprito choben y luitador sin afán de personalismo nian "d'asoziazionismo":


A siguién plataforma que aquí presentamos ye creyada por una colla de personas de diferens sensibilidaz y asoziazions embrecadas con a esfensa de l’aragonés. Sin garra afán de personalismo ni protaganismo por parti d’a suya asoziazión ni d’el mesmo. A la fin un mobimiento apolitico y a-ideolochico con l’unico ochetibo de rebindicar a ofizialidat de l’aragonés, a sozializazión y a normalizazión d’o suyo emplego en cualsiquier puesto d’Aragón.
Somos asistindo a la zinquena prebatina por parti d’o Gubierno d’Aragón de redautar y aprebar una lei de luengas que dignifique y faiga tener o dreito d’emplego ta la nuestra luenga, l’Aragonés, y o catalán. Ta nusatros ye o zinqueno intento d’engañar-nos y mantener-nos callaus tanimientres se muere a luenga aragonesa.
Debán d’istas perspeutibas y d’una manca de respuesta sozial, que muitas begadas ye a desincusa d’os politicos aragoneses, creyemos menister formar ista plataforma. Una plataforma ta mirar de fer autos de presenzia dentro d’a soziedat aragonesa, aizions dreitas, espeutaclos, autibidaz… en cheneral aizions bisteras que remeren a la soziedá aragonesa que les son engañando, que les son amagando a reyalidá sozial d’Aragón y que os politicos aragoneses quieren que muera a luenga aragonesa. Muitos exemplos tenemos ta contrimostrar-lo, pero más en zagueras, sabemos que os politicos son en contra de l’aragonés; y no ye pasibidá sacar cartels bilingües ta meter-los monolingües, nian menzionar o nombre d’as dos luengas minoritarias en o nuebo Estatuto d’Aragón, amagar istas dos luengas en a rezién creyada “Televisión Aragonesa” mesmo plegando a aplazar documentals por considerar-los de politicos,…

Si quiers rezibir más información u meter-te en contauto con nusatros fer-nos plegar un e-mail en: esfensadelaragones@gmail.com,

Tamién puez besitar a nuestra pachina web: http://pea.blogdns.net/.
Esta dirección de correo electrónico está protegida contra los robots de spam, necesita tener Javascript activado para poder verla


1.11.07

Eman(z-c)ipa(c-z)ión... what?

Suposo que ya conoxerez una mica a istoria d'o que ha pasau con as campañas culturals y ta chobens dende fa uns meses en o conzello de zaragoza: an esborrau tot l'aragonés que bi'n eba. Ya no se troba a fuella d'o boluntariato, u o programa 12 nueys,12 lunas... agora ya no son que hoja del voluntariado, 12 noches, 12 lunas, asinas-asinas.

O macsimo ecsponén d'isto son estaus os cartels d'a ofizina d'emanzipazión choben, que son en o cipaj. Antis meteba "ofizina d'emanzipazión choben-oficina de emancipación joven" y agora no s'ha quedau que en o segundo "oficina de emancipación joven" (dos posts abaxo tenez as fotos).

Isto no ye que o mesmo de siempre: a identificazión politica d'una luenga, d'un bien cultural. ¿Cuán alprenderez que l'aragonés no ye politica sino cultura y que mesmo bi ha chen en toz os partius politicos intresada por o tema? Ixo rai, a os mainates tanto les ne da... no baigamos a estar uns pelingrosos separatistas que eboluzionemos ent'a biolenzia... ixo ye d'estar fatos, si se quiere creyar biolenzia o primero que s'ha de fer ye amagar y amarginar, como se ye fendo agora con a luenga aragonesa... pero bueno, dexemos-lo y baigamos por do quiero ir.

Ye curioso tamién que en a reunión an que os politicos charrón istos temas, os representans d'ixe partiu que tantismo fa por l'aragonés dezisen que ixo no teneba importanzia, y d'entre els o siñor Martínez Tomey, o cónsul ta l'aragonés d'ixe partiu. ¿Cómo puez ir t'una reunión de fabloggers como uno más d'a mobida y dimpués en a reunión d'os politicos dezir que o tema d'a cartelería en aragonés d'as areas de chobentú (u chobenalla, u mozardalla, a yo rai) y cultura no ye importán? Si ye berdat o que dezibas en a trobada de fabloggers isto lo leyerás, y con tot o respeto d'o mundo me fería goyo que respondeses. En fin...

Manimenos sí que bi ha chen que chila por tot isto, y no nomás en os meyos sino tamién con aizions. Fa bellas semanas ixos cartels y ixas finestras aparexión pintaus con a parola choben por toz os puestos... prou que en poco tiempo los escoscón y los metión más alteros ta que no podese tornar a pasar.

Pues bien, ayere de nueys, a ixo d'as 2 u 3 d'a maitinada, yera fendo una gambada con os amigos y pasé por astí y beyé como ditos cartels yeran estaus tallaus por a metat... de traza que agora mesmo se leye "emancipación" nomás...

Ixo ye o que amenista a luenga aragonesa: emanzipazión politica, emanzipazión ideolochica y rasmia, ixa rasmia d'a que tanto gosamos de presumir y que en berdat pocos en tienen en istas tierras.

Postdata: agora que os cartels en castellano son tallaus que ferán, i meterán atros nuebos en castellano? u i meterán os antigos en castellano y en aragonés?