28.1.18

Enta Baler: o paradís de 'Los últimos de Filipinas'


China chana s'acerca o diya de tornar a treballar, pero no quereba deixar pasar istas vacanzas de nadal sin visitar un puesto que historicament prou que clama: o lugar de Baler, que a suya ilesia fue o puesto d'a famosa historia de 'Los últimos de Filipinas', a clica de sorches espanyols que entre 1898 y 1899 esfendioron a ilesia sin saber -isto ye debatiu- que espanya heba perdiu a colonia filipina a mans d'os estaus unius. Tamién m'heban dito os filipinos que Baler yera un puesto muito conoixiu entre os aficionaus a o surf

Asinas que o chueus pillé o bus nocturno dende Cubao (Manila) enta Baler, y en un trachecto que duró bellas 6-7 horas, astí que me planté. A primera sensación d'o puesto fue muito buena: buen orache, buens monts y placha, relaixación sin polución ni rudios, una mica de surf y turisteo, pero no guaire y más que más local, chent muito amable y pres que, sin estar os más baratos de filipinas, tampoco no yeran os pres occidentals que uno se troba en Boracay u El Nido. 

O primer que facié, ixe mesmo diya, estió fer una visita a os principals monumentos d'o centro historico d'o lugar. Asinas, prencipié por o museu, feito fa pocos anyos, de dos plantas, practicament una d'ellas adedicada de raso a 'Los últimos de Filipinas' con buena cosa de material donau por os museus más patrios patriotismos espanyols -buena cosa d'ell, como redomas de brandi, sin garra relación con a historia en custión. Antiparti d'isto, tamién se i troba una parti homenache a Aurora Quezón, muller d'o segundo president de filipinas, Manuel Quezón, y que da nombre a la provincia, y tamién han dixau bellas seccions d'antropolochía y d'artistas locals. O museu ye en o parque Quezón, presidiu por una estatua adedicada a iste famoso politico filipino. Dimpués d'isto, y por o mesmo pre -bells 60 centimos tot- marché ta casa Aurora Quezón, una reconstrucción d'a casa en a que se crió en o mesmo puesto an que se trobaba a orichinal: ye una visita no guaire atractiva, pero curta y que dentra en o mesmo pre d'a entrada en o museu, que se troba a man d'iste y que fa honra ta conoixer una mica l'arquitectura tradicional ilongote, a tribu guerrera que antismás poblaba ista redolada -agora son occidentalizaus. 

Y dimpué d'isto, marché a lo que yera buscando quasi quasi dende fa meses: a ilesia de San Luis de Tolosa de Baler. Muito refeita u mesmo reconstruita mientras o sieglo XX, a iglesia ye famosa por l'antis dito: o sitio de Baler y 'Los últimos de Filipinas'. L'interior sí que ye más orichinal. Arredol, o colechio, a plaza con un poliu monumento y bell edificio municipal chicot: en cheneral, tot un espacio diafano y ubierto que fa prexinar cómo estió lo sitio de Baler, no nomás arroclau en a ilesia, sino tamién en as antigas cortz d'arredol que hue fan a plaza y as replacetas d'o colechio. Y una vegada astí, podié fer realidat o mío suenio humedo dende fa semanas: fotos en a ilesia de Baler con os míos chandals de venezuela y filipinas! Me las fació un policía muito simpatico que yera cusirando o colechio y que charraba una mica de castellano, y dimpués de fer-me-las, m'animó a rezar dentro d'a ilesia :-)

Visto o centro y os monumentos, me'n fue ent'a Sabang Beach, a placha d'o lugar de Baler,
a rebutir d'hotels y puestos ta surfers, y tamién con bell guariche bien apanyau y buena mosiqueta. Sin estar Boracay, ye un buen puesto ta estar-se-ie: ni masiau tranquilo ni masiau moviu-masificau, con bell occidental surfero, pero más que más con filipinos. Y de pres, pos no ye como a resta de filipinas -u como lo mesmo centro de Baler- pero tampoco no son os pres occidentals que se troban en os puestos más turisticos d'o estau. Trobé un puestet muito digno y a buen pre ta pasar bell par de nueitz y marché t'uno d'os restaurants con terraceta y buena mosiqueta, anque prebé a chentar una cosa que no sabeba o que yera y que a la fin estió o millor peix que mai m'he minchau en a mía vida, y ixo que a yo o peix poco goyo me'n fa!

Y dimpués d'haber chentau y d'haber feito una gambada por a placha, pos pertocaba o segundo plato fuerte d'o viache: pillar a un instructor y fer una horeta de surf. A mía primera vegada! Pero con muitas ganas, ixo sí. A experiencia no la ixuplidaré mai, por o fracaso que en fue: ni una vegada aconsiguié estar-me mas de dos segundos en piet en a tabla, y a os 45 minutos deixé a clase por o baldau y acollonau que en yera. Unas olas que encara me fan ensoniaderas, con una que me se trusquió de tot y me tenió, sin desacherar, bells diez segundos baixo l'augua -dimpués d'ista aturé a clase-, estando a onica persona que yera a ixas horas -alto u baixo as quatre d'a tardi- y con ixas olas fendo surf. No me rindo, y tornaré a fer-ne, pero a venient vegada, m'aseguraré que bi haiga más chent fendo-ne y me los mirare una mica antis ta veyer si ye factible u no. L'anecdota astí queda, ixo sí! 

Y ya ta rematar o diya, con a tardada marché a piet ent'o puent colgant de Zabali: en os arredols de Baler, fa honra ta esnavesar o río y ye de dar visitar-lo, no por o puent en sí, sino por os esparpallants paisaches: a un costau, a desembocadura d'o río y a placha, a l'atro costau, os montanyas de Sierra Madre y en as dos marguins d'o río, selvas de cocoters y felquerals repolidas, con bella vaca -pocos carabaos-, bell tocín y bells gallos, quasi sin casas y sin chent. O prencipio d'a pelicula de 'Los últimos de Filipinas' retrata muito bien istas anvistas, y cal felicitar a o director de fotografía, pos lo clavó!

Y feito tot isto, dimpués d'un diya pleno pleno, torné t'a placha, cené una buena pizza con una biera en un guariche surfero veyendo l'ambient que bi'n heba -ni muito ni poco: a suya mida chusta- y marché a dormir a garrón tirau, cayendo ascape y dormindo quasi diez horas ta concarar as chornadas que m'asperarían os atros dos diyas y que racontaré en o proximo post!

21.1.18

En Boracai dimpués de reis: a Ibiza d'Asia


Dimpués de reis, y con encara diez diyas de vacanzas por metat, decidié pillar un vuelo, o más barato que me levase t'un destino atractivo: y o resultau d'a busqueda en skyscanner estioron os dos aeropuertos de Boracay. Boracay ye una isola conoixida en toda Filipinas por a suya borina y tamién -como a resta de Visayas- por as suyas plachas, tanto que se le diz a 'Ibiza d'Asia'. A yo a verdat que en primeras no me convenceba guaire, pero entre que tot o mundo charra d'ella, que bella vegada heba d'estar-ie y que tampoco no yera custión de levar a contraria a skyscanner -y a o cauquerré- pos a la fin o destino estió Boracay, i arrivando en l'aeropuerto de Caticlan, bien cerqueta d'a isola de Boracay.

O primer de tot, que choca muito, ye a grandaria d'a isla. Y ye que uno pensaría en una
isola de tamanyo medio-gran, pero no, Boracay ye bien chicota, de bells seis kilometros de luengo por dos d'amplaria, y ixo estando chenerosos. Ya en l'aterrizache tamién choca a gran cantidat de kitesurfistas que bi'n ha, asinas como de barcos. Pero no d'edificios y tampoco no de masificación. Y ya en tierra firme, en Caticlan dentro d'a isla muito más gran de Panay, l'aeropuerto ye tan chicot que un bus te leva dende l'avión ent'a terminal esnavesando primero tot o lugar, y a pocos pasos d'a terminal, ye o puerto, anque pillar os barcos que en 10 minutetz te dixan en Boracay.

Arrivau en Boracay ya de tardis, m'adediqué a buscar un hotel pincho y barato, y gracias a o gran amigo internet y a que busqué en una zona calmadeta d'a isla, no m'estió difícil de trobar-lo. Con tot y con ixo, o tratamiento que recibié en l'hotel -que no estió malo, pero no yera a calor tipica filipina y pareixeba más bien un trato 'madrilenyo'- y os pres de tot en a isola -parellanos a os espanyols: no caros, pero no baratos, y en o contexto filipino, caros- ya te fan entrefilar que, como ocurriba en El Nido, yes en una redolada occidentalizada.

Dimpués, en ixa mesma primera nueit, facié una gambada por White Beach, a placha

principal d'a isola, de bells 4 kilometros, y trestallada en tres 'stations'. A primera y a tercera -en ista zaguera se trobaba servidor- son más calmadetas; a segunda, con buena borina a tot estrús y ambient costero en cheneral: restaurants, bieras, mosica y actuacions en a placha, botiguetas y mesmo fuegos artificials. De cabo quan, bell filipino te s'amanaba ta ufrir-te droga, pero no le'n digatz a Durerte, que de seguras que no sabe que os ricos (son os que más) se drogan! Y tamién bella prostituta t'ufriba os suyos servicios, cosa curiosa, pos Filipinas tiene a inchusta fama de paradís sexual, y en realidat a prostitución se troba en as partis occidentals y ricas, y as prostitutas son foranas u filipinas que han renunciau a os suyos orichens. Pero quasi no se troba prostitución entre as clases medias y pobres, en buena mida por o fundo sentimiento relichioso. Con tot y con ixo, tanto de drogas como de prostitución, en Boracay no te'n trobas más d'a que te puetz trobar en Benidorm, asinas que no cal estar inchustos quedando-se con ista ideya -o curioso ye o contraste con as Filipinas de clase media y pobre.

Alparciando prou mientras a nueit, marché t'o leito y a l'atrol diya, dimpués de desayunar-me bien, preté a caminar por a isola. Asinas, l'interior d'a mesma yera a parti d'os filipinos, que i viviban ta treballar y ufrir servicios a o turismo, o cualo se troba más que más en a costa. Por as costas, bellas plachas chicotas -beluna privada u semiprivada, pos l'acceso ye quasi restrichiu a os clients de bells hotels- y quatre grans: a propia White Beach, que ye a principal, y Puka, Ilig-Iligan y Bulabog. Puka ye a 'placha tranquila', ta poder estar-se en auguas turquesas sin o rudio y l'ambient de White Beach, mientras que en Ilig-Iligan y Bulabog se fan os deportes acuaticos -tamién en White Beach-, destacando más que más o kitesurf. Curioso ye que en istos puestos no se troba garra ilesia y quasi no se troban estatuas relichiosas, comuns en cada cantón de Filipinas, y prou que sí, curioso tamién trobar-te con que a metat d'a población ye occidental: cuerpos blanquetz, pels royos, uellos azuls y bikinis por totz os costaus, cosa poco común entre os filipinos, que s'estiman de ficar-se en l'augua con ropa.

De tornada enta White Beach, ta veyer-la de diyas, a uno l'ufren una ripa d'actividatz ta fer en a mar: buceo, surf, kitesurf, windsurf, guiar barcos, asinas asinas. Y tot a un pre caro ta Filipinas -no ta Europa-, pos as mesmas actividatz se pueden fer en atras isolas y por un regular con millor calidat y menos agobio. Servidor se ficó en l'augua, y dimpués d'una ducha, tornó a disfrutar d'a nueit de Boracay, con mosicas y estilos ta totz os gustos: reggae, dance, house, latino... A verdat ye que ye un viache que quasi lo feba obligau, por ixo de decir que i soi estau quan sale o tema de conversación, pero a la fin me cuacó más d'o que m'asperaba, talment por as propias baixas espectativas, por no veyer-la masificada en exceso y porque tamién se troba a faltar de cabo quan estar en un ambient una mica más occidental. As mías conclusions d'iste viache se resumen en dos:

(i) Boracay ye una isola d'ambient y borina. No soi estau en Ibiza, pero l'ambient ye parellano a lo que se troba en Placha d'as Americas en Tenerife, en Salou u Benidorm. Manimenos, no ye de tot artificial, y guarda chent y formas de vida filipinas en o suyo interior, y sobre tot, encara no s'ha masificau de raso. Asinas, no trobas grans edificios que empuerquen o paisache, y mesmo os paseos maritimos son d'arena. No bi iría de propio dende atro puesto d'o mundo, pero si bells amigos vienen ta Filipinas, pos no m'importaría mica d'estar-me-ie bells diyas con ells.

(ii) En Boracay s'aprecia cómo afecta a influencia occidental en a chent filipina: perdida d'a relichiosidat y d'as relacions morals tradicionals, que fan fácil -chunto con o intresau poco control d'as autoridatz en as redoladas occidentals- que negocios mal vistos en a resta de Filipinas aquí s'estendillen, como a prostitución y as drogas. Diners son diners.



15.1.18

Ent'as espelungas de Batu, Kuala Lumpur: una impostura de cartón-piedra


Dentro d'o viache a Kuala Lumpur, mención a parti mereixen as famosas espelungas de Batu, a pocos kilometros a o norte d'o centro d'a capital malaya, puesto relichioso ta hinduistas dende fins d'o sieglo XIX an que se troba a estatua más gran relacionada con ista relichión, en hunor a o dios Murugan: de seguras que bell contacto de tú en Facebook tien bella foto astí con ista famosa estatua!

Arrivar-ie ye prou fácil, pos bi ha una linia de metro-tren que a suya fin ye precisament ixa, y que esnavesa tot o centro de Kuala Lumpur. Tamién se puet ir en buses, en tours privaus y mesmo en taxis, que dicen no son guaire caros. Yo eslichié a opción metro-tren, y malas salir d'a gara, me trobé con bells monos chicotz esforigando en a basuera y barallando-se por os repuis d'una bolseta de mcdonalds. Ya acucutando a silueta d'os templetz, que son por tot arreu, en veyé muitos más, y os correspondients turistas dando-les de minchar. A ista fauna, cal adhibir-le os bars y puestos turisticos a esportons, tot ixo dibuixando y chenerando un ambient postizo y masificau. Mal prencipiaba a cursa. 

En pocos metros arrivé en as escaleras d'a espelunga principal, que enfila t'o templo de Murugan, estando ista escalera presidida por a estatua dorada antis dita. Dimpués de fer-me a correspondient foto con a estatua y de puyar os suyos 272 escalerons, i arrivé en a espelunga, y o que me trobé me decepcionó y mesmo me fació ansias: una espelunga que enantes de seguras yera repolida, con buenas anvistas de Kuala Lumpur, esboldregada y esplanicada ta fer templetz de cartón-piedra -continan fendo-se-ne-ie-, milentas de turistas fendo fotos, rudios y dando biroya a os monos, botigas y focos de luz d'a grandaria d'os que tienen os campos de fútbol. Y o pior de tot, no pocos turistas alternativo-mochilers que parixeban estar trobando o nirvana en ixa rudiosa y fastiosa impostura, d'ixos que m'atrevería a decir nunca no pisarían una ilesia porque son muito progres. 

Con mal cenyo baixé t'a segunda espelunga, que le dicen 'a espelunga fosca' (Dark Cave), puesto natural an que, por fortuna, ta dentrar cal fer una reserva y bi dentras mientras bella media horeta en colla con un guida por a primera sección d'a mesma, pos a fin d'a espelunga no admite visitas en pro d'a preservación d'a suya fauna y d'a propia espelunga. O guida t'explica a fauna d'o puesto -más que más moriciegos, cucos y arainas- asinas como as formacions cheolochicas tipicas d'as espelungas de grepes. No ye mala visita, a verdat, sin estar tampoco una maravilla. En o mío caso, una colla de ninos maleducaus y pais soznormals no nos dixoron disfrutar de tot d'ista espelunga, tot y que a resta bien que les ne diciemos varias vegadas. 

Ya feita ista espelunga, baixé atra vegada os escalerons y abaixo, atras espelungas más chicotas y a o mesmo ran de tierra s'ufriban: a espelunga Villa, o museu d'a espelunga principal antis vista, a espelunga Ramayana y a espelunga Valluver Kottam. Atra vegada, imposturas de cartón-piedra, en teoría relacionadas con a relichión hindú, espelungas esboldregadas y esplanicadas, turistas alternativo-mochilers, y en bell caso, bella bestia que i heban meso t'adornar, como guites, pavos reyals, loros varios y dentro d'una espelunga, engarcholaus, reptils varios, arainas y cullebras. O pre d'as dentradas ta istas espelungas no yera caro, bien se vale. 

Dimpués de veyer todas as espelungas, de mirar-me os monos y a fauna turistica, pillé o tren ta tornar t'o centro de Kuala Lumpur. Si en cheneral a ciudat no m'heba pareixiu acullidera, en o caso d'a espelunga de Batu, a esferra feita en o patrimonio natural, o postizo y plen de mollisca qu'en ye, y l'abundancia d'ixos especimens ditos mochilers ababols que antimás creyen haber trobau a pureza d'a diversidat cultural en un puesto asinas, fació que a mía impresión siga negativa. Ta estar honestos, en a resta de cosas poco se le puet criticar a la ciudat, pero no creigo que Kuala Lumpur siga una alfaya, como en bell puesto han considerau.

10.1.18

Enta Kuala Lumpur: una ciudat una mica fulera


Por cabo d'anyo quereba fer bella cosa especial, y dimpués d'estar-me por muitos puestos naturals y rurals de Filipinas, m'aganaba de marchar ta bella ciudat y experimentar nuevos paisaches y comunidatz urbanas. Asinas que dimpués de mirar-me una mica os pres d'os vuelos t'as ciudatz d'arredol de Filipinas (Singapur, Hong Kong, Kuala Lumpur, Jakarta...) a la fin me decanté por Kuala Lumpur, ciudat con quasi dos millons de personas, con un aria metropolitana de más de siet millons y capital de Malasia, arrivando-ie o 29 y estando-me-ie por cinco diyas.

A primera sensación fue muito positiva: una ciudat an que poder fer-se una gambada tranquilament! Con un trafico moderau, con ceras esclateras y sin guaires agobios! Antimás no guaire gran, relativament escoscada y con un sistema de metros-trens-monorrails prou bueno, que te permite posar-te en qualsiquier puesto d'a ciudat d'una traza rapeda, comoda y a buen pre. Muito menos desigual que Manila, sin -tantas- escenas de pobreza cruda y sin a riqueza bambosa de bellas partis y de bells vicos. Tampoco no yera Zaragoza, pero podeba pasar ta tener o que he trobau a faltar de Manila istos meses. Atras cosas que ascape se notan son as relichions: a sociedat de Kuala Lumpur tamién ye muito relichiosa, pero no pas catolica sino musulmana, como se puet notar en os velos d'as mullers u en as continas oracions d'os altavoces d'as carreras y en as continas mezquitas, y, encara que a mayoría d'a población ye musulmana, tamién s'aprecian minorías mica chicotas de chinencos, hindús y occidentals, os zaguers tanto turistas como de negocios. Isto se refleixa en a gran cantidat de templos -beluns nuevos y atros con más d'un sieglo- de relichions chinencas -china tradicional, budista, taoista...-, hindús y cristianos.

Asinas, m'aloixé en un hostelet en o vico de Titiwangsa, fueras d'o centro d'a ciudat pero no guaire luent, podendo acerca-me-ie a piet. Habié d'asperar-ie una hora ta fer o check-in, pos l'amo yera marchau t'a mezquita. Dimpués de dentrar en a mía cambra-guariche, una d'as primeras cosas que facié fue fer una gambada ent'os puestos d'o centro, esnavesando primero o popular vico de Chow Kit. Iste vico tiens dos partis deseparadas por l'avenida Sultan Ismail: a un costau Lorong Haji Taib, una d'as partis más pobres y conflictivas d'a ciudat con negocios de rastros, drogas y prostitución -pero se podeba fer una gambada por astí sin problemas, o menos de diyas-, y a l'atro costau una parti muito más rica y animada, a rebutir de negocios y centros comercials musulmans -más que más de ropas.

Pasau o Chow Kit, trobamos o que le dicen a parti colonial d'a ciudat -pos Malasia s'independizó d'o Reino Uniu en 1957- con bells edificios y parquetz pinchos en a confluencia d'os ríos Gombak y Klang, sobresalindo d'entre totz ells a mezquita de Jamek, una d'as más antigas d'a ciudat, bien gran y polida, y o edificio Sultan Abdul Samad, siede d'o gubierno britanico y agora mesmo siede d'o Ministerio d'Información, Comunicación y Cultura. En ista redolada se declaró y celebró a citada independencia, y agora mesmo fa un vico piatonal an que disfrutar d'una buena y tranquila gambada urbana. 

Dimpués de veyer a parti colonial, continando ent'o sur a bells pocos metros se troba o prencipio d'o vico chino, con o mercau central de Kuala Lumpur. En istas carreras trobamos o tipico d'un vico chino d'una gran ciudat: choyerías, botigas d'imitacions, restaurants de comida chinenca, supermercaus chinencos, y prou que sí, turistas a brozuecos. Una zona con muita vitalidat, y con buena cosa d'as suyas carreras piatonals, que aporta prou a la ciudat. Como curiosidat, bi ha bells templetz chinencos, y tamién trobamos aquí o Sri Mahamariamman (zaguera foto), o templo hindú más antigo d'a ciudat, prencipiau en 1873, encara que a suya vistera torre data d'o 1968. Ye prou poliu y de dar -y de gufanya- fer-le una visiteta, t'o qualo t'habrás de sacar os calcers.

Tras veyer o vico chino, m'enfilé enta Bukit Bintang, probablement o vico más popular d'a ciudat. Si Chow Kit yera un vico más musulmán, o centro yera colonial y a plego se trobaba o vico chino, personalment diría que Bukit Bintang ye o vico occidental. Pubs, hotels y puestos 'sospeitosos' de masaches a embute, bells rascacielos de negocios arredol, bell graffiti/performance moderneta y tot arredol d'a carrera Alor, an que asabelo de restaurants y de puestetz de carrera ufren biroya y bebidas a os turistas y occidentals de negocios que se i trobaban a boticiegas. Un servidor tornó a fer-se sucos de canya de zucre a palladas, pero no pas con calamansi -pos en Malasia ixe citrico no pareix tan popular- sino con limón u con fruita d'a pasión.

No guaire luent de Bukit Bintang se troba o principal atractivo turistico de Kuala Lumpur: as torres Petronas. Con 452 metros, fuoron os edificios más alters d'o mundo dica o 2004, quan s'inauguró a Torre Taipei 101 -agora en ye o Burj Khalifa de Dubai. Prou que ye de dar fer-les una visita -en a que puyas prou alto, veyes toda a ciudat y a redolada, y en a que tamién te dixan fer una gambada por o puent que achunta as dos torres. Pero no nomás ye de dar visitar as torres, si no tot o que s'ha desenrollau arredol: o esparpallant centro comercial de Suria, un parque con un lago bien pincho, bellas carreras con pubs y restaurants que gosan de frecuentar os occidentals y que le dan muita vida, y l'aquario. Un servidor l'adedicó tot un diya, y tamién i fuo ta celebrar o cabo d'anyo 2017-2018. D'atra man, istas torres son o perfecto simbolo d'o denserrollo economico de Malasia derivau d'a explotación d'o petróleo a traviés d'a interpresa estatal Petronas, bien conoixida por os suyos patrocinios en Formula 1. De feito, ye común trobar en as torres, y por un regular en todas as carreras de Kuala Lumpur, referencias a o equipe de Formula 1 de Mercedes, y o zaguer que i penchoron en as pantallas antis d'a cuenta atrás t'o 2018 fuo un mensache de felicitación de Lewis Hamilton, poco menos que un heroe nacional.
Y entre as cosas a veyer, ta rematar, pos no ye de más fer-se una gambada por os principals parques d'a ciudat, más que más parando cuenta d'os pocos que bi'n ha en Manila. Asinas, o principal parque ye o de Perdana, an que se troban chardins botanicos, un parque con ciervos, atro d'orquideas, estatuas-monumentos y tamién un parque de birabolas y unatro d'aus, istos dos zaguers de pago ixo sí. O puesto ye muito tranquilo, encara que recomiendo visitar-lo un diya que no faiga sol, pos si no, con a calor d'ista ciudat tropical, o que ye una chornadeta tranquila puet a la fin esdevenir literalment en un infierno. Tamién visité o parque de Titiwangsa, pos me quedaba a o costau de l'hostalet an que dormiba: no ye mica turistico, pero ye igualment recomendable, pos ye bien cudiau y dende o suyo lago se pueden acucutar totz os rascacielos d'a ciudat. 

Como conclusión, Kuala Lumpur ye una ciudat muito más occidentalizada que no Manila. En primeras la pillé con muitas ganas, pos o trafico ye aguantable y uno puet andar andar y andar por as suyas carreras -mesmo arrecorrer a piet totz os principals puestos. Manimenos, en o títol d'o post digo que ye una mica fulera: a qué fin? Pos bueno, personalment no me trobé con una chent guaire hospitalaria ni educada: no saber decir 'ola', 'gracias' u 'adios', mirar-se de colar por totz os puestos, foter gargallos por qualsiquier costau d'a carrera fendo rudios que mesmo te permitiban entrefilar si teneban malminchandor en o vedau, foter bell empentón a la minima... A la fin, rematé canso d'a ciudat. A tot isto s'achunta o turismo "guayón" y alternativo-gilipollas que trobas por toda la ciudat, pero d'o que charraré más en a proxima entrada, adedicada a las espelungas de Batu.

Pero tot isto tenió un resultau positivo: valuro -encara más- Manila y Filipinas, pos dimpués de cinco meses ya yera prencipiando a centrar-me masiau en as cosas malas -o trafico y a desigualdat- y ixuplidando as buenas -toda la resta y más que más a suya chent. Tornar ta l'aeropuerto de Manila y trobar-me con un guardia de seguridat u con un taxista que t'aculle con una sonrisa, te prencipia a racontar a suya vida y s'intresa por a tuya, quasi parixendo parti d'a tuya familia, no tien pre.

7.1.18

En Pakil (Laguna) por reis, con os amigos d'a biblioteca d'a UST


Iste cabo de semana os amigos bibliotecarios d'a Universidat de Santo Tomás m'han convidau a fer una cursa de mont y güergas por Pakil, en Laguna, como ya he dito en bell post anterior, no guaire luent de Manila. Y prou que no iba a dixar pasar a oportunidat y menos con tan buena chent!

Asinas, que o viernes de tardis saliemos ent'allí, con a intención de dormir en un puestet
muito pincho, y a l'atrol diya, sabado de maitins, amaitinar ta fer a cursa con prou tiempo y disfrutar-la. Asinas, nos ne puyemos o sabado a ixo d'as 7 d'o maitín, y busquemos un puestet ta desayunar-nos en o lugar de Pakil, anque prencipiaba a cursa. Pero antis d'ixo, marchemos a veyer a ilesia d'o lugar, consagrada a Nuestra Señora de Turumba que as suyas estatua y pintura principal datan d'a puenda colonial y que a leyenda diz que bells pescadors se troboron en Laguna y, por o suyo peso, la dixoron anque a corrient y l'airera les permitió mover a embarcación: Pakil.

Y mientras la yéranos visitando, un mesache muito maho s'ufrió a amostrar-nos a ilesia y
os principals puestos d'o chicot lugar: asinas, nos levó por todas as cambras d'a ilesia, nos explicó a historia d'a mesma, y dimpués, nos levó ent'as piscinas naturals que bi ha en o lugar -muito pinchas y muito baratas- y enta casa o suyo lolo, un pintor conoixido en a redolada -y con buena casa, chunto a la plaza d'o lugar no guaire luent d'a ilesia. Dimpués d'a curseta, que nos levó más d'una hora, marchemos a desayunar-nos, y dimpués d'o desayuno, pillemos un auto y un tricycle ta que nos amanase a o puesto anque prencipiaba a cursa ent'as cascadas de Buntot Palos.


Una vegada en o prencipio d'o camín, pillemos o guida que, como he dito varias vegadas, ye obligación ta fer ista mena de cosas en Filipinas, por seguridat y por lei, y ye una mida que encara que en primeras no pareixca guaire comoda, a la fin tiene muitas más avantallas que no incovenients. Aproveitemos y pillemos tamién bells vechetals y bells peixes -vivos, mesos en un pozal, y los mataban y te los estripaban astí mesmo- como chenta una vegada i arrivásenos y pretemos a caminar, mientras una ruteta que no pareixeba guaire exichent y que as estimacions deciban duraría bellas 2-3 horas.

O caso ye que camín-camín, tot yera embarduquiau y engaronau por totz os costaus.
Foraus a ripas por tot arreu, feitos por as propias corrients d'augua y as pisadas d'os caballos que de contino i pasaban -pos aduyan en as fainas agricolas- y o camín de buro y piedras feba que tot i que no bi hese costeras firmes, o camín fuese asabelo de furo. A la fin, tardemos quatre horas en arrivar-ie, ya baldaus. Pero en plegar-ie, a buena lifara que nos asperaba, con o plato estrela d'o peix feito en un calibo que o guida nos fació, chunto con a esparpallant anvista d'o blinco de Buntot Palos, feba ixuplidar totz os mals. A tot ixo cal adhibir o buen orache que i feba, pos l'augua y estar de contino en o paco d'o mont, feba baixar muito a temperatura y s'i estaba uno muito bien. Y dimpués d'a lifara, beluna mesmo s'atrevió a ficar-se una mica en l'augua!

Pero, tot o bueno tiene o suyo costau malo, y en iste caso, pos yera a tornada. Atra vegada por o mesmo camín, pero por bells motivos u por atros -a tardada, a sudor, etc.- os mosquitos, que por un regular m'han respetau muito en iste país, pretoron a fer d'as suyas, y bells bichos d'a grandaria de birabolas, sin exacherar, me dixoron as garras baldadas a fizons. Tenié suerte, pos a un companyer no le pertocoron mosquitos, sino una fastiosa sangonera en a garra! D'atra man, as nuestras garras y os nuestros cuerpos ya notaban muito a cansera, y se nos fació muito luengo o camín, tanto que i arrivemos ya de nueitz y quasi con medrana. Pero como tot o malo tiene bella cosa buena, podiemos ascuitar bell mono y veyer cuquetas de luz a boticiegas.

Una vegada en tornaus, decidiemos de fer atra nueit en o mesmo puesto, y no de marchar ta Manila, pos yéranos escamallaus. Asinas que nos duchemos, nos descansemos y
marchemos a cenar, y chusto nos trobemos con o nuestro amigo con o que prencipiemos a chornada. Cenemos totz chuntos en un puesto muito pincho en a plaza d'o lugar, con buena mosica, bien decorau y con una cena que sabeba a gloria -por a cansera y por a calidat- y barata. Y celebremos tamién o cabo d'anyo de Diana -que a pobreta yera estricallada por as agulletas! Dimpués, marchemos ta l'hotel, pero antis d'ixo, pillemos lambanog, una bebida alcoholica feita de coco, que sabe a chinebra. Y en ixas que en a cambra, entre lambanog y lambanog, nos animemos, y dimpués d'o lambanog continoron as bieras, y asinas dica quasi as tres d'a maitinada. Bien que lo pasemos! Y atra vegada más, bien maha que ye a chent filipina y más que más toda la chent que m'he trobau en a Universidat de Santo Tomás. Qué carinyo les soi pillando! Tamién aprendié bella paroleta más de tagalo, que entre tanto viache y tanto treballo, no'n soi pillando todas as que me'n fería goyo.

Dimpués, cayemos muertos en os leitos dormindo a garrón tirau, y ya a l'atrol diya, quasi con duelo, chentemos chuntos en un restaurant filipino d'o lugar y pillemos l'auto ta tornar ta Manila, con ganas de descansar-me, pero a la vegada con ganas de más cursetas asinas!

4.1.18

Enta Ilocos Sur y La Unión: rematando lo viache con gorgas


Dimpués d'as chornadetas de playa en o norte y a visita a o faro d'o Cabo Bojeador, baixé china chana enta Manila, o que me costó dos diyas en os que aproveité ta rematar de veyer as zagueras cosas d'Ilocos Sur que m'heba dixau en a ida y tamién ta veyer os puestos principals d'a provincia de La Unión, encara en a rechión d'Ilocos.

Asinas, tras fer una nueit en Vigan, pillar prou suco de canya con calamansi y aproveitar a suya carrera piatonal de Crisologo, a primera parada estió Santa María, lugar d'Ilocos Sur famoso por a suya ilesia de Nuestra Sinyora de l'Asunción, una d'as quatre ilesias barrocas filipinas que son patrimonio d'a humanidat seguntes a UNESCO. Si en a ida heba visitau a de San Agustín de Paoay, agora con ista y a de San Agustín de Manila que ya heba vista, nomás m'en queda a que se troba en a isla d'Iloilo. Tras fer a visiteta, mirar-me a ilesia y o suyo campanario -que por materials, estructuras y motivos feba farchas de mudeixars- pillé un tricycle ta que me levase ent'as cascadas de Pinsal.

A verdat ye que Filipinas ye a rebutir de gorgas, badinas y cascadas esparpallants, a cada qual más polida. Pero de tantas que bi'n ha, ya las heba deixadas ixuplidadas, estimando-me de veyer atras cosas y pensando-me que a man de Manila bi'n ha arrienda ta pasar os cabos de semana sueltos. Y con ixas barucas, a la fin mientras o viache decidié que ya yera prou de dixar-las ixuplidadas y que caleba ir ta Pinsal. Istas cascadas, famosas porque en ellas s'ha rodau bella pelicula filipina, tienen en total 80 metros d'altaria y remeran a las que trobamos pasau o puerto de Santa Barbara: una cascada muito altera y dimpués escaleretas y planos con badinas y banyeretas an que corre l'augua, con una temperatura templada y que son o paradís. Abaixo, en a gorga chigant, bells 20-30 filipinos y turistas asiaticos, alto, tot solenco. En primeras quereba fer una visita rapeda, ficar-me una miquinina en l'augua y prou, pero a la fin me i estié hora y media. De cabo ta quan, me miraba arredol por o risque de cullebras y cocorels, encara que m'heban dito que ixa zona yera prou segura.

Dimpués d'istas cascadas, pillé lo bus enta Bagar-Luna, l'atra parada, an que veyer dos monumentos: a ilesia de Santa Catalina d'Alexandría, d'orichen espanyol, y a torre de
Baluarte, tamién d'orichen colonial, medio espaldada, pero perfectament restaurada y agora reclamo turistico de toda a rechión d'Ilocos, encara que ye chicota, bueda y poco más ufre dillá d'as buenas anvistas ent'a mar de China. Dimpués d'ixo, me miré un puesto ta dormir por astí en o que dicen a Pebble Beach -placha de cantals-, que a la fin estió un resort turistico de clase media filipina, como los que se pueden trobar en a provincia de Laguna, a man de Manila. Istos puestos son curiosos, pos pueden achuntar grans luixos que cuestan una ripa en Europa -quatre piscinas, una con efecto caita-mar y atras dos con hidromasache- y atras cosas que no tendrían ni o pior d'os hostals -ex. mierda humana rebutindo de l'escusau, en proceso de descomposición. En cheneral, por ista mena de puestos, a presencia de jeepneys en a carretera, más tricycles, casas piors, más cans, ninos pior vestius, pior cobertura en o móbil, etc, uno ascape para cuenta que a provincia de La Unión ye más pobre que no as d'Ilocos Sur y Norte, encara que no se puet calificar como "provincia pobre" ni muito menos.

Dimpués de fer a nueit, desayunar-me y disfrutar d'as piscinas -y d'o escusau- d'o resort y
d'a placha de cantos rodaus, en a que se yera a gusto y se veyeba buena cosa de peixes y algas de todas as culors, m'enfilé ent'a nueva y zaguera chornada. En ista, prencipié visitando a galería d'arte Bahay Na Bato, en a Pebble Beach y centrada en a escultura en piedras. A verdat, tampoco no ye un imprescindible, pero ya que yera a o costau, pos qué menos que visitar-la. Y dimpués, facié una parada en Banoctan, ta fer una rapeda visita a la suya ilesia d'orichen colonial de San Miguel L'Arcánchel. Tras isto, marché t'o que sería o zaguer puesto de tot o viache: o lugar de San Fernando

O lugar de San Fernando tien tres cosas principals a visitar: como no podeba estar menos,
a suya ilesia de San Guillermo O Ermitanyo, pero tamién o templo maoista de Ma-Cho y as runias de Pindangan. Asinas, que ya con muita cansera, fuxina firme, jeepneys, tricycles y polución, facié una visiteta rapeda a la ilesia de San Guillermo, d'orichen colonial, espaldada mientras a Segunda Guerra Mundial y dimpués reconstruita por os vecins. Dimpués d'isto, visité o templo maoista de Ma-Cho. A verdat ye que ye un templo curioso, y mesmo se fa raro que no bi'n haiga más estando que a población china historicament ye estada y contina estando prou important en Filipinas. Con tot y con ixo, tot i que ye poliu, se trata d'un templo recient, que tampoco no aporta guaire a o conchunto d'o viache: imos, que ye un Paniello -para cuenta, istos de Ma-Cho no son budistas sino taoistas- y antimás en chicot. Ta rematar as runias de l'antiga ilesia colonial de Pindangan son en un barangay u vico difueras de San Fernando, pero en tricycle no cuesta cosa d'arrivar-ie. A ilesia ye d'o sieglo XVIII y quedó en runias en o tierratremo de 1892, remanindo y endurando dica os nuestros diyas.

Ya ta rematar, y con muita cansera, pillé o bus enta Cubao-Manila, rematando iste viache de 8 diyas por Ilocos Sur, Ilocos Norte y La Unión. De La Unión, cal decir que antimás d'o visitau, ye famosa por o surf que se fa en as suyas plachas, pero no teneba guaires fuerzas ta fer-ne. En ista provincia ya se veye como china chana as vacas dan paso a os carabaos, o panizo a lo roz, y a riqueza a la pobreza, sin estar ista extrema. Bell nino pobre en a carrera, bell can arguellau, pero no guaires. Casas más viellas, pero decents. Resorts menos luixosos, pero buenos ta pasar unas vacanzas. A la finitiva, dende a mía anvista agora mesmo, aquí predominaría una clase media filipina.

1.1.18

Enta Ilocos Norte (ii): Papugpud, arredols y o Cabo Bojeador


Dimpués d'a visita a las tierras marquistas de Laoag y arredols, pillé o bus y marché ent'a punta norte d'a isola de Luzón: Papugpud. Iste lugar ye conoixiu entre os filipinos por as suyas plachas azuls turquesas, a suya tranquilidat y o suyo orache 'fresco'. Sin estar uno d'os puestos turisticos más recomendaus, como Palaway u Boracay, tampoco no ye un completo desconoixiu. 

Encara que Papugdug fa parti d'a provincia d'Ilocos Norte, o trachecto en bus no ye curto: de dos a tres horas. En ell, puetz continar veyendo panizo, vacas y cada vegada menos pobreza. Os jeepneys han dispareixiu, nomás trobas autos privaus, furgonetas, buses y pocos tricycles. No bi ha trafico en as carreteras, ni botiguetas-guariches a piet de calzada y as formas de conducir son prou occidentals. As casas, que ya se veyeban buenas dende Vigan, aquí son encara millors -u a lo menos quasi no se i veyen chabolas u casas malas- y ferían a delicia de qualsiquiera de nusatros. Garra pobre en a carrera, pocos cans y fendo buenas farchas y totz os ninos bien vestius. Y, sorprendentement, iste libel de vida no ye enreligau con turismo occidental, quasi inexistent en a redolada -a lo menos os diyas que i estié.

Atra cosa que choca muito ye l'orache. Y ye que malas que pasas o Cabo Bojeador l'orache
se torna subtropical, pasando d'a fuxina enta un clima suau que fa alcordar-se de Canarias, aforro mientras o diya y con una chaqueteta mientras a nueit. Os zaguers monts de Cordillera, a latitut norte y as corrients marinas tienen a culpa. Tamién me pertocó un diya de plevias, por o que decidié fer en o puesto dos nueitz en cuentas d'una -por ixo, y porque ye un paradís terrenal. 

En Papugdug bi ha dos zonas de placha: Saud -u White Beach- y Blue Lagoon. Seguntes heba leito por o rete, a primera yera una zona 'más marchosa' y a segunda, más tranquileta. Asinas que malas plegar t'o centro d'o lugar, demandé a o tricycle de marchar ent'a segunda, pos quereba tranquilidat. Pero me dicioron que yera prou luent -45 minutos- y ya yera de nueitz, asinas que marché ta Saud, a bells 10 minutos en tricycle. Allí bi ha una ripa de puestos anque aloixar-se, a un pre muito bueno, con calidat decent y sin garra occidental. Asinas que allí que facié as dos nueitz. 

A l'atrol diya, encara que pleveba, veyé a esparpallant placha -repolida, esclatera, azula y sin quasi chent- y tamién marché ta l'atro costau, Blue Lagoon. T'a mía sorpresa, iste atro costau yera muito más edificau y con más chent, con hotels más caros, ninos ricos y malcriaus y bars: imos, que encara que a placha tamién yera repolida, o lugar yera poco menos que un mini-Benidor. Bien contento que me'n facié d'haber-me quedau en Saud. Dimpués, por a costa enta l'este arrecorrié a piet as principals cosas a veyer
por astí a man: a espelunga-arco costero de Bantay -Bantay Abot Cave- y dimpués de caminar una hora, o viaducto maritimo de Patapat (foto alto). Iste no ye una gran cosa y por Europa trobamos muitas construccions asinas. Manimenos, aquí en Filipinas ye una fita d'o desenrollo y a la chent d'aquí les encanta. Contribuye tamién a la imachen desenrollada de Ilocos en cheneral y en especial d'Ilocos Norte. En tornar, encara de diyas, ya feba sol, por o que aproveité ta ficar-me en l'augua fresca d'a preciosa placha de Saud. 

A l'atrol diya, me rebellé tornando-me a ficar en l'augua azula d'a placha entre palmeras,
y desayunando-me una tortiella de trunfas con suco de guanabana y café, ta recargar as pilas. Y dimpués d'ixo, china chana marché de tornada por a costa entre trycicles y a piet, ta veyer os principals atractivos turisticos d'a provincia. O primer estioron os famosos molins d'airera de Bangui a piet de placha. Encara que en 2014 Filipinas nomás teneba 4 parques eolicos y a enerchía eolica no representaba ni 0.2% d'o total produciu, os molins que se troban en a placha (20) y en os monts de toda a costa contribuyen a l'aire moderno y desenrollau d'a rechión, y atra vegada, ye curioso de veyer cómo a chent filipina lo considera un must turistico. Curiosament, andando por ista costa chunto a os molins y pasando por un vico que no se troba en GoogleMaps ni en garra puesto que he consultau, me trobé con as runias d'una ilesia colonial espanyola. Y ye que, como he dito en os posts d'antis, Ilocos ye a rebutir de monumentos colonials. 

Dimpués d'isto, visité as tamién famosas formacions cheolochicas de Kapurpurawan.
Formas curiosas, destacando una roca-mollón, resultau d'a erosión d'a mar con as areniscas, y que fan recordar a las formacions comuns en as isolas de Malta. Con tot y con ixo, o puesto ye chicot y s'arrecorre en 30 minutos u menos. Y ya, como zaguera parti d'as chornadas d'o norte, estió a visita a o faro d'o Cabo Bojeador. Iste faro, con tres partis -corte, pabellón y torre- estió feito por os zaguers espanyols y inaugurau en 1892. A mía historia d'aimor con iste faro viene dada por os documentos historicos que soi treballando sobre Filipinas, pos en os zaguers tiempos d'o colonialismo espanyol y mientras a puenda norteamericana iste faro situau en a punta noroeste d'o país estió clau en as comunicacions maritimas, y de contino ye mencionau y tractau. Asinas que, sin estar una grant cosa a veyer, ta yo de tanto ascuitar-lo y treballar-lo yera una visita obligatoria y ilusionant. Cal decir que por astí ya se prencipiaba a notar a fuxina atra vegada. 


En resumen, contra más puyas ent'o norte en Ilocos más riqueza y fresquet bi ha. O libel de vida d'o norte ye altero, igual que o que trobamos por un regular en Europa, y diría que mesmo con más calidat, con a saber-lo de casas esparpallants y sin as desigualdatz que se troban en a resta d'os puestos. Ye una redolada tranquila, con buen orache y sin atraccions turisticas destacables, pero con un desenrrollo occidental -molins d'airera, viaducto de Patapat, no bi ha jeepneys...- no basau en o turismo que fa un contraste singular con a resta d'o país. De seguras que si uno rasca una miqueta, trobará cosas fieras, pero en primeras, ista provincia pareix un buen espiello an que a resta de Filipinas podría mirar-se-ne.