24.2.08

Imachens d'un meteorito "gran" cayendo t'a tierra



Lo que pareix un meteorito esnabesó o ziel d'USA o pasau martes debuxando un espeutacular faz de lumbre ta estrelar-se en a costa d'o pazifico.

A lumbre y bel tremolar se dexón notar en washington, oregon y idaho, seguntes diz fox news.

Manimenos, dica ista calendata no s'han trobau repuis d'o supuesto meteorito, encara que as imachens captadas en bideo (CNN) amostran un gran ocheto luminioso esnabesando o ziel y cayendo t'o sulero amán de adams county, en o sureste de washington.

"Soi conbenziu de que yera un meteorito, yera a clasica bola de fuego", dizió Geoff Chester, portaboz de l'obserbatorio nabal d'USA.

Chester dizió antimás que abría de tener o tamaño d'una gran balisa y que yera estau orbitando arredol d'o sol mientras milentas d'añadas, antis d'entrar en a orbita d'a Tierra.

18.2.08

Estadisticas


Beniba d'a unibersidat, y yera pensando qué ficar en o blog, que por problemas teunicos feba ya muito que no autualizaba. Por un costau o maltrato a lo ganau por parti d'una multinazional en USA... por atro costau a independenzia de kosovo y as esferens reaczions... cuan en istas gritan a lo telefono de casa. Ni mi pai ni mi mai fan zeño de prener-lo, yo yera más amanau. Lo prenié:

-Buen diya, me digo Dolores, le grito dende l'instituto opina, podemos fer-le una encuesta eleutoral?
-Bueno... por qué no?

-Pos diga-me, edat?
-18

-Treballa u estudea?
-Estudeo... primero de matematicas.

-En una escala de l'uno a lo siete, estado 1 muito de cuchas, y 7 muito de dreitas, cómo se definiría bustet?
-Bueno, reyalmén no considero que siga d'un pensamiento nian de cuchas nian de dreitas dende l'ambiesta autual d'a politica... Ideolochicamén no creigo en garra d'os sistemas politicos y d'estructurazión sozial que proposan os esferens partius y tendenzias que i son dentro d'o sistema...

-U siga, que bustet no botará no?
-No...

-Bueno, pos emos rematau a encuesta, porque.... bueno... no nos fa onra. Que baiga bueno!

Ye platero... ta beluns (y por desgrazia no son pocos y tienen importanzia sozial) si no yes en uno d'os moldes que proposan os partius politicos en a soziedat autual, pareix que no yes miembro d'a soziedat... sino un bicho raro, puet-estar que por pensar una cosa que no t'han amostrau y por tener una tendenzia que tú mesmo t'has creyau a radiz d'a tuya propia reflexión personal.

Como me dizen en a mía familia de cabo cuan... piensas masiau... t'enbarucas muito con a filosofía y todas ixas cosas raras que no te lebarán ta garra cabo... Mesmo como bel amig@ (y d'os buenos, d'os de confianza) me diz: te creis superior por pensar ixas cosas raras?

Bueno, a lo menos me proporzionan una sensazión de mayor libertat, puet-estar que a trabiés d'un engaño interno? No se sabe...

7.2.08

De cómo Pepe Ánchel Saputo miraba de fer amigos balenzianos

Trobaba-se Pepe Ánchel Saputo en una reunión de diners con mainates balenzians cuan salió lo siempre polemico tema de l'augua, tan amenistada y tan escasa en a tierra balenziana y en a tierra do yera naixiú o nuestro protagonista, ixa d'os grans casinos.

Con medrana de que no le pasase como a lo teixidor, a qui enforcón, y beyendo-se sin l'aduya d'os suyos amigos d'o PAR, ixos tan majos que ban con trache de luzes y montera, pensó una soluzión digna d'a suya intelichenzia ta salir d'o problema.

O saputaz, tan espiguardau como de costumbre, ufrió una salida que nomás a el se le podría aber pasau por a mente. 'Prengan l'augua, ixo rai!' Bai... pero allora no podría tornar t'a suya tierra, porque sería astí an que l'enforcarían! 'Pues prengan-la dende a fin d'o río, cuan ya ye mar pero ye dulze encara, asinas no podremos dezir que nos sacan l'augua!'

Bel patantón dizió allora: "Pero siñor Pepe, si ya son 25 kilometros que ha ganau a mar a lo río en os zaguers tiempos!". En estar un pobrichón zarrioso con rastruzons en o pelo no le fazión mica caso, prou que no.

Y asinas ye como Pepe Ánchel Saputo se fue fendo más famoso, grazias a las suyas dezisions de saputo y a grans frases como "gran scala ye o millor que l'ha pasau a aragón dende Fernando el catolico".

4.2.08

Vive la démocratie!

Si siñors... ya sabébanos o que pasa en todas as campañas eleutorals: el uno ufre más que no el atro, dimpués el atro ufre más que no lo primero, que si una ilegalizazión por astí, unatra por aquí, asinas-asinas... dica qué punto íbanos a plegar?
Pues ya lo sabemos: 400 euros si botas a lo PSOE. Si siñor, antiparti, ixo rai si yes pobre u rico, malfedor u 'persona de bien'... 400 euros si me botas y prou. Ye encara pior que a estratechia d'os estaus d'america latina que sacan as reserbas de biroya antis d'as eleczions ta dar a la poblazión una falsa sensazión de bienestar economico.

Uno allora se demanda: ufrirán os atros 500 euros? Bueno, no son caitos tan baxo, a lo menos en iste tema. Pero ixo no significa que no faigan atras cosas sozreyalistas. Se miren bustez:


Pues sí, un mitin t'a chobenalla feito por o PP. Qué millor traza d'atrayer-los que no lebando un par de mullers beroyas a que s'espulleten debán d'els? Por zierto, mullers, masclos no, o que contrimuestra un gran respeto por a igualdat de chenero y todas ixas cosas.

Resulta curioso que ixe partiu, que tanto esfende as baluras tradizionals sexuals y d'a familia, mesmo proposando a creyazión d'un ministerio nomás ta ixo, bienga y quiera educar a la chobenalla en baluras de raso contrarias: sexismo, masclismo, asinas-asinas. No ye que no me faiga goyo de beyer dos mullers espulletas, pero lo sexismo, a ipocresía y a traza de tratar-nos a os chobens como güelletas ye bergüeñosa.

Y ye que yo a ran personal me pienso: qué balura que tiene a chen cuan bota! Botar a una persona que ta endrezar-se enta tú lo fa chilando! Acaso no sabrán que charrando en un tono normal tamién les entendemos. No cal que chilen ta prener-les! Acaso se pensarán que soi un matután u sordo que no les prengo si no me chilan? No siñor no... si quieren que les bote en primeras me traten con respeto, no chilando-me, y dimpués no me ufran cosas sozreyalsitas, que dispierten o mío deseyo sexual u me den diners, nomás ta que les bote mientres a resta d'o tiempo fan o que les peta.

Por atro costau, si no yéranos pocos con isto y con a politizazión de l'asoziazión d'as bictimas d'o terrorismo (que penica que critiquen a un partiu en fabor d'atro aprofitando que bel familiar ye estau asasinau por chen desumanizada que no tiene que beyer cosa con istos partius), agora biene a cherarquía d'a ilesia recuperando o esprito d'antis d'o conzilio baticano II y criticar a lo gubierno.

Debán de tot, els qué dreito tienen a interbenir en a politica (que ye l'autibidat de estructurazión y gubierno d'un estau) cuan nomás son una colla achuntada por un sentimiento relichioso? Me mete nierbudo beyer cómo ixa chen encara crei que tiene bel poder. Pues no siñors, no son más que dengún, y si quieren fer politica, que la faigan dende un partiu politico, u bien reconoxendo publicamén a suya adhesión, u bien creyando-los els (como tiene dreito cualsiquier coleutibo d'a soziedat), pero no tienen garra dreito a manullar a politica d'un estau dende una ambiesta superior que creyen tener, pero que no han de tener, estando en ixo nusatros os que emos de mober ficha, no fendo-les mica caso, sigamos u uno creyens... En fin, autitut poco madura, tornando ta tiempos d'antismás.

Tamién he de dezir que dentro d'a comunidat creyén bi ha toda mena de chen, como pasa en toz os puestos, y que d'a mesma traza que bi ha chen que quiere controlar o que dizes y piensas (que por zierto, con yo no lo conseguirán por muito que se'n mirén, menazando-me), bi ha atros respetuosos que no tienen garra prechuizio por no creyer o mesmo que els. No ye de dar indentificar a toz con ixos cuatros d'a cherarquía que más que mosens son un mezclallo de politicos, economistas y a begadas pedrastas como lo de tenerife.

En fin, millor no adedicar-les más ringleras, porque no las mereixen.

Ista ye a mía imachen d'a campaña eleutoral. Qué ye tot isto? Democrazia? Gubierno d'o pueblo? Pues si gubierno d'o pueblo ye botar cada cuatro añadas ta que dimpués faigan o que les peta, y dimpués cuan tornen as eleczions faigan a cada cual más disparates que te faltan direutamén y s'endrezen enta tú chilando, yo no quiero iste sistema. Cuán seremos nusatros os que tiengamos a capazidat de dezidir direutamén o que queremos en conchunta a trabiés d'una asambleya? Utopía? No! Miren-se o modelo griego antigo de bellas polis u lo modelo maya, u sino, miren-se agora o modelo suizo. Por fabor, eboluzionemos ya, no podemos continar bibindo en iste estau sozreyalista de cuatro megos!

Y ixe cambio no lo ferán os que son en o gubierno, que astí son muito bien acomodaus, l'emos de fer nusatros.

2.2.08

Pau Gasol se'n ba t'os laikers

Drafteau en o 2001, Pau Gasol dexa a las suyas 27 añadas a franquizia en a que s'ha consolidau como un chugador de peso en a millor liga d'o mundo de balonzesto.
Con un promedio de 18'9 puntos y 8'8 rebotes por partiu en a presén puenda, Pau ya eba contrimostrau o suyo descontento a la fin d'a campaña pasada por o baxo rendimiento d'a colla de tennesse, incapable de construyir un proyeuto ilusionán arredol a un chugador, a begadas, prauticamén despreziau.

Rookie en a campaña 2001-2002 y all star en 2006, Gasol teneba un contrato por tres añadas en bigor con os girzzlies por una balura de 49$ millons, d'o que se fa cargo a colla liderada por Kobe Bryant. O de san boi cubrirá o puesto de '5' puro ta plenar o forau que en a colla s'ha feito dende a lesión de chenullo de Andrew Bynum.

Antiparti, os grizzlies han conseguiu os dreitos t'a NBA d'o chirmán meyano de Pau, o píbot de l'akasvayu girona Marc Gasol, que agora queda dentro d'a orbita de influyenzia de memphis. Tamién han conseguiu o traspaso d'atros dos chugadors.

Gasol ya ha dito que le fería goyo de conseguir l'aniello d'oro d'a NBA con ista colla ganadora.