24.6.18

Ent'o volcán Pinatubo: un ibón en Filipinas


Zaguer cabo de semana antis de tornar ta Zaragoza por vacanzas, pero no por ixo m'iba a
quedar quieto. Asinas que decidié de fer una d'ixas cursas que son a man de Manila, que se pueden fer en o diya, quasi parada ta occidentals de negocios que buscan eslampar-ne por poco tiempo, y por tanto, a un pre muito altero y más t'o que ye Filipinas: o volcán Pinatubo, en as montanyas de Zambales, pobladas por as tribus Aetas. Iste volcán se fació famoso en 1991 con a suya zaguera gran erupción, una d'as más destructivas y esparpallants d'o sieglo XX, matando a más de 800 personas, achiquinto o volcán en 300 metros d'altaria, fendo un ibón en a suya tuca y baixando a temperatura global 0.5 graus por as emisions de dioxido de zufre. 

A semana d'antis heba contactau por Facebook con varios organizadors de cursas locals ta mirar de ficar-me en bella colla y puyar-ie, pos si no, son muitos diners. A la fin una colla de tres mesachas y un mesache m'admitioron gracias a la mediación d'istos organizadors -con o mahos que son istos filipinos, isto no ye mica embolicau- y me salió tot o diya por bells 2500 pesos (40 y pico euros: cursa con guidas, chentas y transporte dende Manila). O pre ye prou caro ta Filipinas, sí, pero ye que buena cosa d'as tasas y os permís marchan t'as tribus aetas, pobladoras historicas y propietarias d'ixas montanyas: si ixo ye asinas, argüelloso y contento de bosar-los!

Dito isto, a maitinada d'o viernes ent'o sabado salié de casa a ixo d'as dos coladas en nueit preta, y pillé en Pasay un bus ent'o norte, demandando-le que aturase y me dixase en Carlap Junction, an que os organizadors d'o viache nos yeran asperando a totz. Una vegada en Carlap, nos trobemos totz y, desayunaus y con muitas ganas d'aventura, nos levoron en una furgoneta con buena mosica ent'o puesto de salida d'a cursa, a piet d'a montanya.

En ixe puesto, o segundo paso yera pillar un 4x4 que dimpués d'una gambada firme
intresant por as planas grisas d'abaixo d'o volcán, nos dixaría en o puesto de salida d'o "trekking". O camín yera curioso, de grisas planas d'arena volcanica entre clamors y vallons verdes, esnavesando de cabo ta quan bell arrigachuelo, y tamién s'i veyeban campesinos y familias aetas con os suyos carabaos, carabaos sueltos fendo gambadas, y en bell par d'aturadas, bell guariche an que nos ufriban augua y bella fruita por si nos n'aganaba u nos n'hébanos ixuplidau. Ninos aetas s'i amanaban a ripas, sonrendido, con muito carinyo y abrazando-te: ascape se veyeba por os suyos rasgos corporals, facials y por os suyos pels asaber d'encaragolaus que yeran aetas. Os adultos aetas yeran más reservaus y callaus, más que más si se los contimpara con a resta de filipinos. Cal decir que de siempres s'ha dito que as tribus aetas colaboran u fan parti de New People's Army, a principal guerrilla comunista filipina, y ye cierto que nunca no m'heba trobau tantos controls militars en Filipinas como en ixa país -encara que tamién cal decir que as bases militars norteamericanas tamién son por ixa redolada.

Continando por as planas, cada vegada s'iban fendo más estreitas, y dimpués de bella aturadeta en bella formación cheolochica curiosa, pleguemos a la fin d'o nuestro viache
en 4x4, a siet kilometros d'o crater-tuca d'o Pinatubo. En muitas pachinas web y blogs se diz que a zaguera aturada ye a tres kilometros d'o crater, y que a gambada que cal fer a piet ye fácil y curta. Pero te dixan a tres kilometros nomás si o camín ye en condicions! Y con as zagueras plevias no'n yera, asinas que tampoco no ye tan fácil: catorce kilometros d'arrecorriu, tres horas d'ida y atras tres de tornada, tot por camins y pistas no guaire envolicadas: nomás cal esnavesar  bell arrigachuelo, y de costeras firmes, no se'n troba que en o zaguer kilometro. Antimás, bi ha puestetz d'aetas cada bell par de kilometros por si amenistas augua u birolla, y ixo te priba de carriar masiau peso. Por istas pistas de foces volcanicas -an que no te podebas amanar guaire a os paretz, pos s'esboldregaban y te podeba cayer bell zaborro en o tozuelo-, arrigachuelos naranchas y azulos d'auguas zufrosas regaban canyimos y ruxiaban felqueras tropicals. 

Feito o camín, arrivemos en a tuca-cráter-ibón, y me trobé con una d'ixas cosas que te descoloca en Filipinas: un paisache d'ibón pirinenco. Ya en as fotos que heba visto d'antis, aquello parixeba muito pareixiu a l'ibón de Basa Mora, y en estar-ie, paras cuenta que ye más gran y que se pareix más a bell ibón francés d'a redolada d'Aragnouet. Clavau! O tiempet más fresquet tamién aduyaba a fer ixa sensación. Y lo más important de tot: paz, paz y más paz, tot y que bi hese bell turista. Quasi dengún rudio, aire puro, garra auto ni fumo... Lo que se troba a faltar en Manila. Alto, un mirador con unas anvistas repolidas; abaixo, una placheta an que fer una gambada mullando-te os pietz en as auguas acidas d'o crater con arenas volcanicas -no yera permitiu de nadar. Y en cada cantonada, imachens repolidas. Nos i estiemos quasi dos horas entre un puesto y l'atro, i chenté y  m'i chité ratet en a tasca d'un paco.

Disfrutau l'ibón y feitas milentas de fotos -os companyers de cursa me regaloron una que facioron con una polaroid-, en tornemos, ya con menos enerchía como ye de dar. Pero por fortuna, se nos posó alto una boira que nos escusó o sol tropical. Con tot y con ixo, a o guida aeta no se le veyeba tan contento con ixa boira, y pretó a caminar a tot estrús. Y en faltar un kilometro ta plegar pretó a plever a torres como nunca no he visto en a mía vida. Me capucé y embarduquié de tot, salvé o mío móbil porque levaba por casualidat una fundeta que emplego ta ficar-lo en l'augua en as plachas -atros no tenioron a mesma suerte- y con os calcers, a  cartera y toda la ropa chipiada como si m'hesen chitau en una piscina -tamién a ropa interior- plegué en o lugar de partida, an que nos levoron t'o mercau do pillé ropa y alpargatas -u como dicen ells en tagalo, tsinelas. A maxima talla que teneban t'os balons yera un XXXL, pero yo emplego una talla filipina XXXXXL (en Europa, nomás L y de cabo quan M). De ropa interior, no'n teneban que XL filipina, asinas que no'n prenié.


Meyo ixucaus y con ropa nueva, nos levoron enta Carlap, y antis de pillar o bus de tornada, con a mía nueva ropa talla elfo y sin ropa interior, me despidié d'os organizadors y d'os míos companyers d'aventura, entré en un McDonalds que teneba moscas a ixarramantons an que comié, pos ya me caleba. En salir, pillé o bus, y como denguno no iba enta Pasay, pos pillé o de Cubao, y cucladeta incluita, en Cubao que me clavé a ixo d'as ueito. En Cubao, pillé un Angkas -aplicación tipo Uber pero de motos, que he descubierto fa poco y que ha amillorau a mía vida en Manila dica un punto insospeitau-, pero, alto d'a moto, os míos balons XXXL cedioron y s'ubrió una ralla de bells diez centimetros que, chunto con que no levaba ropa interior, dixoron a mía pixa y a mía collonera a o descubierto, tapando-me-la como bien podeba con a chambreta mientras iba en a moto. Bien se vale que o conductor d'a moto no paró cuenta...

18.6.18

Ent'a Zaragoza de Pangasinan: una Zaragoza con mar!


Rematadas y disfrutadas as cien islas, encara bi heba tiempo ta fer una visiteta a la Zaragoza de Pangasinan: un barangay de Bolinau a plego de do yera, que no ufriba cosa seguntes as guidas, pero que prou que caleba veyer! Ista ye a segunda Zaragoza de Filipinas que visito, dimpués d'a Zaragoza de Nueva Ecija.

Y asinas, dimpués d'una ducha, pillé un bus dirección Bolinau y le dicié que m'aturase en o lugarichón de Sampaloc. Muita sorpresa se levó a persona que mena os buses, pos yera un puesto mica turistico y clarament yo yera forano. Astí en Sampaloc, pillé un tricyle ta que me levase enta Zaragoza, encara que mesmo se podeba ir a piet, pos sería a si fa u no fa un kilometro de distancia. Dentrando en Zaragoza, una curiosa arcada chigant te da la bienvenida: 'Welcome to Zaragoza'.

Con tot y con ixo, fueras d'aturar en o centro d'o barangay, ya que o conductor d'o tricycle se le veyeba maho, le dicié que me dixase en un vico dillá d'o centro, o vico d'a costa. Y astí que me plantó bien maho l'hombre: en o mar de Zaragoza. En o GoogleMaps no se veyeba que una carretereta que remataba astí, pero resulta que bi heba muitas casas-guariches, quasi un lugar a parti, con chent muito humilde y que os suyos retes y capanas en l'augua amostraban a importancia d'a pesca en a economía local

En isto que preta a aganar-me de pixar, pero de tanta casa y tanta chent, no trobaba garra puesto adecuau. Y prou que sí, en estar l'onico occidental que heba pasau por astí ves-te-ne a saber en quánto tiempo, tot o mundo me se yera mirando fito-fito y mesmo saliban de casa suya, con rostros estranios pero quasi totz ells sonredindo-me y saludando-me. En isto que esnaveso tot o vico y aconsigo plegar en un puesto sin chent y con arbres, perfecto ta pixar. Pero... sorpresa, una colla de cinco ninos me yeran seguindo china chana dezaga de yo. Y istos gritoron a os suyos amigos, y en pocos minuto se plantaron vente mesaches seguindo-me a pocos pasos tal qual flautista de Hamelín. Y prou que no yera custión de pixar debant de totz ells...

Uno d'os ninos (chambreta azul fosca en a fotografía) me demandó de do yera, que si yera americano, y le dicié 'Spain'. Y ell tot argüelloso, me repulió: 'Me, Zaragoza!'. Bien zagal,
m'has caito bien: 'Me too, Zaragoza! Zaragoza, Spain'. Y continemos charrando una mica, encara que con o suyo feble anglés y o mío feble tagalo, pos encara nos costó. A cosa teneba a suya gracia, pero a la mía voxica no le'n feba tanta... Asinas que torné y astí me yera asperando o mío conductor d'o tricycle, bien maho ell. Le dicié que me levase ent'o centro. Os ninos zaragozanos s'i quedoron chugando a baloncesto y fendo-se frisels, pos chusto en ixe momento pasó a moto que vendeba chelaus por toda a redolada.

Ta marchar t'o centro d'un lugar en Filipinas ye bien fácil, nomás cal decir 'Poblacion' (prenunciau 'Poblaxión') u church. Y ixo le dicié a l'hombre, que o suyo anglés yera radiu. Y me levó t'a ilesia, que prou que sí, ye consagrada a la virchen d'o Pilar, con unas polidas letras chigants y flors en a suya dentrada, en metat d'un chiquet chardín. L'avenida principal d'o lugar tampoco no podeba tener atro nombre (escrito por ells, Del Pillar), y en o espacio que feba as veces de pabellón d'o barangay, escuela y centro de salut, bell cartel curioso como Fiesta Zaragoza, No drugs in Zaragoza u Zaragoza Health Center. Astí una colla de chovens yeran chugando a baloncesto.

Como me feba ilusión fer-me una foto con as letras que meteban I 💓 Pilar, pos le demandé a favor o a conductor d'o tricycle. Iste me dició que no sabeba fer fotos y que nunca no heba emplegau un smartphone, y le demandó a favor a unas sinyoras que yeran en o chardín d'a ilesia, pero yeran en as mesmas. Asinas que o pobre hombre fació a foto como podió dimpués d'amostrar-le como malament podié, la fació de bitibomba (como se puet veyer) y se metió tot contento. Más contento encara quan le dixé una buena y bien mereixida propineta. 

Vista Zaragoza torné t'o mío aloix en Alaminos a duchar-me unatra vegada, que con a calor o de duchar-se varias vegadas a o diya aquí ye mandamiento. Dimpués ceneta y a dormir, y a l'atro diya, de maitins, marché t'a placha de Tondol, en a isla d'Anda a la que se plega en jeepney esnavesando un poliu puent. Tiene muitas buenas valoracions por o rete entre os filipinos y no fa burro falso: arenas blancas coralinas, auguas turquesas, podendo-se andar mientras cientos de metros sin cubrir l'augua -isto, metendo-me una mica niquitoso, puet-estar un conyazo-, y mesmo se podeba plegar a atra isleta andando bell par de kilometros por auguas y arenas. Antimás, ta estar un cabo de semana, no yera masificada. Feba tanta calor y tanta solana que as auguas cercanas a la costa bulliban -literament, me coceban os pietz y me los dixoron royos. Os ninos filipinos chugaban a pillar as estreletas de mar que saliban d'a suya coda en l'arena quan sentiban as pisadas y a lanzar-las mar adintro a mirar qui las chitaba más luent. Malas cayer, as estreletas se tornaban a amagar ascape baixo l'arena. 

Vista Tondol y ficau en as suyas auguas, encara yera luego y me pensé de marchar t'o cercano lugar de Bolinao. Pero por un costau, bi ha muitas cosas ta fer en iste atro lugar, por o que l'adedicaré atro cabo de semana pleno con más tiempo y con más tranquilidat. Y por atro costau, yera baldau. Asinas que decidié tornar ta Manila bellas horas antis d'o previsto. Ye una d'as primers vegadas que me pasa, pero estoi que a calor veranenca filipina, o viache en bus de 6-7 horas y a propia cursa d'as cien islas o diya d'antes m'heban esquinazau. Y a la fin facié bien, porque plegué en casa quasi a meya nueit y si hese estirazau quatre u cinco horas más fuese muerto.  

11.6.18

Enta '100 islas' paradisiacas


Verano veranet y pos que agana de fer as cosas tipicas de veranos, como fer una visita a bella placha paradisiaca. Y dentro d'istas, m'aganaba de visitar a redolada d'o Parque Nacional d'as Cien Islas, que belunos aquí dicen que ye repolida y atros que no ye tan polida, pero en qualsiquier caso conoixida y visitada más que más por filipinos y no pas por foranos

Asinas, o chueus 24 pillé o bus enta Alaminos, en Pangasinan, an que heba pillau por booking un aloix bueno encara que una mica caro -bell luixo de cabo quan ye de dar- y, arrivando-ie mesmo luego en no tener clase ixe diya, encara aproveité y me acerqué en un tricycle a la placha de Bolo, polida pero tampoco no esparpallant. 

A l'atro diya, bien luego de maitins, pillé un tricycle ta marchar t'o embarcadero de Lucap, an que se pillan os botes y cursas ent'as cien islas. Toda l'actividat turistica d'a redolada ye regulada por a oficina de turismo d'o concello, como pasa en atros puestos de Filipinas, y isto, como bella vegada he dito, ye una avantalla: mesmo pre, seguridat t'o turista, millors condicions laborals t'os filipinos, millor chestión ambiental y economica d'o turismo, asinas-asinas. O pre de toda la cursa d'o diya ta una persona individual, 1500 pesos (bells 25 euros), que ye caro t'os pres de Filipinas, pero por un costau, en colla ixe pre baixa muitismo, y por atro costau, ta que iste país se denserolle y as suyas chents vivan millor, cal que as cosas tiengan istos pres, que mesmo asinas son baratos.

Dito isto, a ixo d'as ueito u meya t'as nueu salié con o bote a visitar as famosas cien islas, que en realidat en son 124, y d'as que se'n visitan no más de 10. As más grans y famosas prenen nombres de presidents de Filipinas, como Quezón u Marcos; d'as formas que fan, como Turtle, u de bella curiosidat que tiengan, como Monkey Island -an que dicen bi ha monos, encara que no los veyé- u a Bat Island, con moriciegos chigants que sí se pueden veyer dormindo en as cocorozas. 

D'istas isolas, Governor's Island y Pilgrimage Island tienen lenaus en as suyas tucas, a
os que se plega dimpués d'esnavesar chicotas selvas y dende do se pueden veyer todas as islas que fan iste Parque Nacional. En o caso de Pilmigrage, mientras puyas y baixas te trobas con as esferents escenas a pasión de cristo, y quan arrivas alto, te trobas una chigant estatua de yisus

Quezon Island ye a más masificada, con bell par de restaurants chicotz y con a posibilidatz de fer kayak, una mena d'escafandra-buceo, montar en moto d'augua u fer 'banana boat', una mena de bote inchable alargau en o que se puyan as personas posadas en ringlera y dimpués con una moto d'augua u bote le foten buenos empentons y arrecorren a redolada d'a isla. Con tot y con ixo, en a mesma isola tamién bi heba puestos ta eslampar-se de tanta chent y nadar u posar-se tranquilament.

Marcos Island
ye una d'as favoritas d'a chent porque tiene un fundracalo-espelunga vertical, que le dicen Imelda Cave y que remata en un blinco ent'o mar: una vegada
blincas y yes en l'augua, cal salir por una espelungueta enta mar ubierto, an que se troba a placha d'auguas turquesas, corals y peixes a plego. A yo me pareixió lo más poliu de toda la cursa, y ya ye decir.

Unatra isla que me fació asabelo de goyo estió Lopez Island, con bell plachón repoliu, y nomás con a companyia de una mesacha forana roya y dos filipinos que yeran astí fendo-se bieras y barbacoa con buena mosica, disfrutando d'o puesto sin tener mica chent arredol (nomás yo). En ista placha me quedé un buen rato en una mena de recodada rocosa a libel de l'augua feita por as propias mareas y as olas mientras tantismas anyadas y que feba una uembra buenisma mientras te posabas en a roca mullando-te as garras.

L'atra isola que tamién m'encantó estió Cuenco Island, con una espelunga que la esnavesaba de tot, entrando-ie por una placha y salindo-ne ent'atra. En a placha de salida, bi heba una plataforma feita con bambús ta blincar enta l'augua, y a poco que sepas nadar, podebas arrivar en unatra isola a bells 100 metros. Yo lo facié, y chiré toda ista atra isola a nado u aproveitando as recodadas que feba ta pillar a uembra y descansar-me una mica. Yera l'onico en ixa isola! Tamién descubrié una chicota glera-espelunga d'un metro d'amplaria con arena por tierra y a rebutir de candreixos en os paretz: con una mica de miedo me i fiqué y descubrié que teneba salida por atro costau fendo una miqueta de buceo: sin parolas que me quedé!

Atras isolas yeran a de Children y a de Romulo: a primera con buena cosa d'actividatz ta ninos y prou que con ninos a boticiegas, y a segunda con plachas polidas pero con masiada chent -yera muito millor a isola de Lopez alavez. Asinas, una vegada feito tot isto, acordé con os míos guidas, que prencipioron estando muito mahos pero a la fin yeran una mica rebordencos -a cursa yera dica as 5:30pm pero ells quereban fer-me hopar a la 1pm-, marchar enta Quezon Island, en tener partis con chent y actividat y partis muito calmas con recodadas costeras polidas an que estar-se tranquilament, an que me estié dica as 3:30pm, que me cansé y torné ta Alaminos entre boiras y bell lampiu que menazaba tronada, pensando en fer una visita a la cercana Zaragoza ;-)

Cal decir que as islas no yeran mal cudiadas si se contimparan con atros muitos puestos parellanos en Filipinas, pero estoi que caldría cudiar-las muito más en estar parque nacional: no guaire basuera, pero bi'n heba, antimás d'a ruidera y os residuos que cheneran os botes y as barcas inchables. D'atra man, a más cudiau, menos posibilidatz de desenrollo turistico y economico, y atra vegada tenemos o mesmo dilema en todas as partis d'o mundo... Como curiosidat, en istas isolas, y más que más en Quezon, veyebas a os pescadors de candreixos con as suyas talegas a rebutir d'istos animaletz vendendo-te-los.

Atra cosa intresant ye que s'ufre a opción de pasar a nueit en una d'as islas en tienda de campanya. Personalment, en haber visto lo más intresant y tener prou dosis de placha paradisiaca, no m'en agabana. Pero no ye mica mala opción si bi vas con a parella, en familia u con amigos, como feban buena cosa d'os filipinos que i yeran.
En a mía opinión, a cursa d'as cien islas ye un imprescindible si se pasa una puenda luenga en Manila. Ye relativament 'a man' (bellas seis-siete horas en bus) y o puesto ye repoliu: ye como El Nido (Palawan), talment no tan poliu, pero a cambio con menos foranos y más puro. Sospeito que bella mala opinión dada por bell filipino se basa más que más en que no ye un puesto guaire masificau ni luixoso, sin botiguetas, karaokes, barbacoas, hoteletz de costa, restaurants, asinas-asinas, si no que, en estar parque nacional, toda ixa actividat ye muito limitada y se troba más que más en a isola de Quezón. Ixo no quiere decir que siga un puesto paradisiaco de tot, pos bi ha chent a ixarramantons: pero de tantas isolas, ye de fácil trobar puestos intimos y repolius, con arenas blancas, auguas turquesas, espelungas, corals y peixes esparpallants.


4.6.18

Enta Macau (iii): Occident ye bien... ta tres diyas

 
Rematadas de veyer as cosas d'a parti continental de Macau, marché de tardis ent'a isla Cotai, antismás dos isolas diferents (Taipa y Coloane), que o suyo principal atractivo, antiparti d'os casinos, ye o vico viello de Taipa. Ta ixo pillé un bus, y encara que en Macau existen linias a ripas, a cosa ye fácil: con pillar un bus que te leve d'a parti continental ent'a Cotai -u a'l vies- ye prou, porque a ciudat ye accesible y no guaire gran, y se puet ir a piet sin problema orientando-se con o GoogleMaps. 

Taipa ye o vico historico-colonial d'a isola de Cotai, y chunto con o Largo do Senado en a parti continental, fan os edificios y os puestos historicos y culturals más importants d'a ciudat. No ye guaire gran, pero tiene encanto. Carreretas y callizos piatonals, edificios d'a primera metat d'o sieglo XX, intercalando bell palacet más antigo, con muitos puestos artesanos-modernos con toques hipster, con botigas de bicis urbanas y bella replaceta an que se fan conciertos y atros espectaclos y bells bars bohemios an que achuntan gastronomía europea y asiatica. Sí, digamos que se pareix a Lo Gancho, pero muito más chicot y turistico, y prou que sí, chentrificau. O nucleo d'iste vico ye a famosa Rua da Cunha, a rebutir de turistas y con muitos puestetz de comida y de venda de beliquetz. Aquí me decidié a prebar as famosas tartas de uego de Macau, inspiradas en os pasteis de nata de Belém (Lisboa) pero sincerament, ta un servidor os orichinals portugueses son muito millors. En os callizos de Taipa, y de tot Macau, tamién ye común de trobar chicotas estatuas con vilas y inciensos, que fan referencia a divinidatz taoistas.

Como yera esquinazau dimpués de tanta gambada, no podié disfrutar Taipa bien, y torné ta l'hotelet a descansar-me. Astí, una vegada duchau, descansau y cenau, marché t'o casino de Lisboa, l'atro gran casino d'a ciudat que se troba en a parti continental. O suyo granizo edificio sobresale en a ciudat pos tiene una curiosa forma de flor de loto. Con tot y con ixo, no ye tan luixoso y bamboso como o Venetian Casino y o Parisian Casino.

Baldau dimpués de dos diyas a tot estrús a piet por toda la ciudat, marché t'o leito y me descansé ta concarar o zaguer diya, quan me decidié por visitar a placha de Hac Sa, en Coloane (sur de Cotai, antiga isla en mesma y dimpués achuntada a Taipa). A placha de Macau ye tranquila, escoscada y ordenadeta, pero en metat una colla de bellas 50 personas desentonaban: más morenos que no a resta d'asiaticos, chugando a voleybol, decindo bella parola en castellano, fendo buena borina con no pocas bieras, amigables, dixando tot puerco y metendo o Despacito y a Gasolina a tot estrús. Efectivament, yeran filipinos: os latinos d'Asia. Por a resta, ye curioso que en Coloane trobas mesmo una selva y que no ye mica masificau, con bella casa que se nota que ye de chent con muitos diners: pareix más bell paisache Mediterráneo que no Macau.

Dimpués, ya que o vuelo me saliba de nueitz, pasé a tardi en Taipa, y lo podié disfrutar más. Visité o Museu Historico de Coloane y Taipa, que sin estar gran cosa ye millor que no o Museu de Macau y ye de gufanya, y marché t'as famosas casas de Taipa, un conchunto de cinco torres verdes colonials en metat d'un parque y cara t'a Praia da Nossa Sra. da Esperanza, un humedal repoliu que a la suya fin son os esparpallants y granizos edificios d'os casinos, y que dicen, ye una d'as anvistas más polidas de China. No sé si ye ta tanto, pero ye poliu un rato, y yera chusto a mena de cosas que buscaba eslampando de Manila (primera foto).

China chana torné ta l'hotel ta pillar a cartera, y astí, encara me vagó de veyer a zaguera cosa que me s'heba pasau, o callizo de Misericordia, chicot callizo a o canto d'o Largo do Senado, polidet pero que tampoco no ufre guaire. Y una vegada visto, pillé o bus enta l'aeropuerto, an que Cebu Airlines me fació asperar atra vegada una hora más d'o previsto.

Macau ye una ciudat intresant, muito más potenciable d'o que en ye, pos no nomás ufre casinos, sino tamién una rica cultura, historia y elementos modernetz-hipsters. Ye moderna pero tranquila, y, en resumen, m'ufriba tot o que buscaba. Agora bien, tres diyas estioron prous, y ya me yera fastiando d'o "correctismo" y de no poder esnavesar una carrera en royo porque te se miraban mal u mesmo t'encarranyaban. O zaguer diya ya trobaba a faltar a la caotica Manila, y malas tornar-ie, la pillé con gusto, tanto que bien contento que he concaré l'atral semana!