27.6.06

Mayor autobidat polizial...


Suposo que toda la chen que bibe en Zaragoza ha puesto beyer un mayor numero d'aizions polizials en istos zaguers meses...

Son asperando amagaus ta apiñorar-te (sincusar o mío malo pensar, pero me pienso que isto ye berdat): no puez ir en bezicleta por o galacho de Juslibol, meten siete "tozineras" en o parque miraflores ta rematar con o "botellón", fan rechistros a presonas que son fendo-se una gambadeta por a carrera, ya saben os diners que han de conseguir apiñorando autos, asinas-asinas.

Con tot isto no quiero espernir a la polizía: cuento que a suya labor ye asabelo importán t'a buena marcha d'a soziedat. Manimenos, ista tendenzia fura d'a polizía zaragozana creigo que no ye guaire efeutiba, pues antimás de creyar malestar dentre os zaragozanos y zaragozanas, no retalinia o berdadero problema: tanto te se'n da que se baiga por o galacho en bezicleta u no (no ye o mesmo t'os automobils, prou que no), o numero de comas etilicos contina estando igual, os camellos continan estando en os mismos puestos y bendendo lo mesmo, y os azidens de trafico en a capital no'n son menos...

Antimás, ista tendenzia d'a soziedat d'amostrar a la chen o que ha de fer, y si no punir-la, cuento que ye prou negatiba: as cosas cuasi no milloran, y gosan d'ir entabaxo (a biolenzia crexe, as ideyas s'estreman, a presona pierde identidat enreligando-se en a "masa"...)

Puestar que siga menester cambear a traza de pensar y d'autuar, china-chana pero con seguridat en cada paso.

3 comentarios:

Anónimo dijo...

"cuento que a suya labor ye asabelo importán t'a buena marcha d'a soziedat"

No sé mozet (u mozeta), pero una soziedá an bi'n aiga polizía ye una soziedá dolenta.
No amenistamos puercos á o serbizio d'o poder, no amenistamos pistolerxs que esfendan á lxs ricxs, no amenistamos chulos de mierda que te intimiden en a carrera porque les agana, no amenistamos basuera que da trucazos á la chen sin que dengún/a se pueda esfender, no amenistamos dixarnos os diners en impuestos ta dar de minchar á qui mos reprime y chusmete, no amenistamos represores ni mañxs ni españolxs.
Qué maderxs, picoletxs, localxs y militarxs se busquen un treballo onrau.
á la femera con os gochos d'o capital!

Choben dijo...

Estoi que tot ixo pende de como pienses que siga a naturaleza d'a presona:

Si cuentas que a presona ye buena por naturaleza prou que no cal a polizía.

Si cuentas que en ye mala, s'amenista muita presenzia de polizía.

Yo pienso que a presona no ye ni buena ni mala por naturaleza. A presona no gosa d'autuar mal, pero de cabo cuan si lo fa. Y si queremos que se mos rispete si que ye menester a presenzia de "bella cosa" que mos asegure ixo.

Prou que os eszesos polizials que se son bibindo en zaragoza no tienen motibo "aparente", pero yo presonalmén creigo que si que s'en amenista.

Anónimo dijo...

Yo, como tú, pienso que as presonas no son, en esenzia, ni buenas ni malas... pero ye posible bibir sin polizía si acotolas as fuens de "delito" que bi'n ha en l'autualidá.
A mayoría de delitos son contra a propiepad privada, asinas que si consigues una soziedá an no esista más propiedá pribada que os ochetos presonals y poco más, acotolas a mayor fuen de "delincuenzia". En o respeutibe á la resta de delitos, y en cheneral, si amuestras que ye millor ta toz y todas o respeto mutuo os reduzirás á una parti chicorrona d'o que agora son.
Y una cosa ye esclatera: no bi'n ha garra cosa pior ta una presona que o refús d'a mayoría d'a soziedá por, por exemplo, aber agrediu á una muller o un ombre por aber-se marchau con atrx.
Ixo ye una fuerza coerzitiba muito mayor que no la polizía, y ni te cal engarcholar á lx culpable ni creyar un cuerpo de chen con poder sobre tú á lxs que no puedes ni toser.
qué baiga bueno!