10.2.07

Por qué sacan os pegallos d'os autos?

Dende que escomenzipié a escribir iste blog, siempre m'he mirau d'estar critico, que no ochetibo. He meso notizias y ecsposizions que pueden fer más u menos goyo dende o punto de bista ideolochico (por exemplo, a ecsposizión de "rex hispaniorum" u lo partiú de fútbol "aragón-chile). Más que más porque me pienso que son cosas culturals u ludicas, y que no han de beyer-se dende a politica.

Manimenos, me ye menester salir-me d'ista traza ta ecspresar o que dimpués d'iste maitín siento:

Como bien deziba charrabís en o chemeco d'as parolas, güe se feba un socalze por l'aragonés en a plaza españa, con o permiso conzediú, prou que sí. Tot yera muito bien: a chen s'intresaba, bel meyo de comunicazión i yera, s'ufriba chocolate a tot ixe que deziba bella parola aragonesa, l'ambién d'entre os aragonesofablans que lo i feban yera chenial...

Un bez pasó a pulizía local debán nuestro y no nos dizión cosa, ya que tenébamos o permiso...
a ixo d'a meya ta una uns nazionals se ficón en a plaza españa, no se sabeba bien por qué. O caso ye que estioron tres cuartaladas si fa u no fa beyendo que pasaba. No bi eba garra problema, pero cuan pasó iste tiempo salión d'os suyos autos y se posón en a plaza españa güellándo-nos direutamén en plan "macarras que se creyen dioses".
Pasau una quartalada se dezidón a benir-ie, y como si estáse-nos fendo bella cosa bedada nos demandón os DNIs. Prou que se les amostró lo permiso, y dimpués de dandaliar una mica, dizión que yera un permiso conzediú por o conzello, y que caleba que o permiso estase conzediú por o delegau d'o gubierno d'Aragón.

Nusatros no yéranos por a labor de sacar ixa autobidat (que ya eba aparexida publicada en "o metro") asinas que nos quedemos, con a menaza ixo sí, de que se demandaría si ixa autibidat tenía permiso... No sé si pensar que yeran ababols u tocagüegos... M'estimo más de pensar o primero. Antimás, se quedón en a plaza españa, por o que a chen, a lo menos en primerías, teneba medrana d'informar-se una mica de l'aragonés... Soi choben, pero me dizen que ixe sentimiento yera más propio feba 40 añadas.

Tot continó lo más normal posible, pero no'n marchón dica que prenzipiamos a plegar... Dende que soi embrecau en l'aragonés ya ye a terzera begada que beigo problemas d'ista mena: a primera con a borina de "chuntos por l'aragonés" (puede pasar), a segunda a ran personal por meter cartels en as paradas d'autobuses (no sabeba que no se podeba fer, pos bi'n ha arrienda de toda mena d'asoziazions), y a terzera ista.

Dimpués de tot isto yo, a ran personal, me pienso:

¿A qué se ye chugando?

¿Qué mal se fa por amostrar y reibindicar o patrimonio cultural tan rico que tenemos?

Libertat de ecspresión sí... pero sin ecspresar o que fa mal.

Democrazia sí... pero sin contar con a boluntat y o pensamiento d'uno mesmo.

¿Qué ye tot isto? ¿En qué mierda de puesto bibimos? Isto ye denunziable, y toz os que somos parti d'o mobimiento d'esfensa d'a luenga aragonesa no lo podemos permitir. Cal denunziar... Ye una pena beyer como toda ista chen (David, Santiago, Juan, David, Lucía...) se mira de luitar por dar a la nuestra luenga o suyo puesto y cómo se nos trata como si de terroristas estásenos.
Siempre he pensau que cal cambiar as cosas d'una traza constructiba... pero si asinas nos salen cuan nos miramos d'ixo, no sé yo cuála ye a millor traza.

3 comentarios:

Anónimo dijo...

Me pareix increyible o que ha pasau iste maitín en a plaza España. Espero que no torne a pasar. No se nos puede abordar asinas. Espantan a la chen y a toz!

Aiiii, qué pena de chen... qué pena de tierra aon por nomás informar d'a tuya cultura t'han de abasallar, identificar y denigrar d'ixas trazas. Isto no pasa en atros puestos seguro.

Qué l'imos a fer... caldrá continar fendo entender a la chen que l'aragonés ni ye politico ni ye perigloso. Tot a tamas de chentota como ista de güe (que no sé qué ordens cumplirían...).

Esparbel Rondador dijo...

me soi meso triste, fa un mes que no m'amanaba por o rete, y o primero que leigo ye o post de choben arredol de l' "autuacion" polizial.

Y como charrabis, me demando que ordens cumpliran...

Anónimo dijo...

saludos

ista nuei en lo pograma de radio -mosica y parolas, en radio mai, 102.8 imos a leyer os buestros articlos (posts) ta denunziar iste auto que no ye menester que atra begada torne a alcurrir

aupa l'aragones!!!