9.4.07

Concurso d'o condado de ribagorza


Güe he bisto ista informazión por terra probinzias:

O plazo ta presentar relatos y poesías t'o concurso literario "condado de Ribagorza" remata o diya 4 d'abril.

A conbocatoria ye ubierta de raso, se puet presentar tot ixe que lo deseye, pero os treballos han d'estar orichinals e ineditos. A tematica d'o concurso ye libre y os concursans podrán presentar dos treballos como muito.

Iste concurso, que premiará as millors obras en aragonés bajorribagorzano, en as modalidaz de relatos curtos y poesías, ye parau por os conzellos de graus, fonz y estadilla. A dotazión d'os premios será de 900 euros t'os relatos y 600 euros t'a modalidat de poesía.

Os relatos abrán de tener una ecstensión no menor a tres pachinas DIN A-4 ni tampoco no mayor a seis, y se presentarán chunto con una copia en suporte informatico, A metrica d'os poemas ye libre y a suya ecstensión abrá d'estar mayor a 30 bersos y menor a 200, podendo-se presentar baxo a traza de poemas sueltos u bien poemarios. D'a mesma traza, s'achuntarán a una copia en suporte informatico.

O churau ferá publico o fallo o lunes 23 d'abril, en o marco dás VI chornadas d'as luengas de Ribagorza. Por a suya parti, a organizazión publicará una selezión d'os treballos presentaus.

Toz os treballos abrán d'incluyir un títol que se ferá mostrar en o ecsterior de un sobre trancau y que su interior meterá o nombre y apellius de l'autor, antimás d'una fotocopia d'o DNI.

Ya sabez, si sabez charrar aragonés ribagorzano, tenez tiempo y querez ganar-tos uns diners, apuntar-tos-ie. Ista mena de concursos han feito y continan fendo muita onra a l'aragonés: nos permiten leyer en dialeutal, l'alazet de l'aragonés, fan publico l'aragonés, contrimostran que tampoco no somos tan pocos lo que lo charramos, emplan bel aparador d'as bibliotecas d'aragonés y nos permiten, en muitas begadas, leyer cosetas de calidat.

Edito: no sé en qué mundo bibo... pero o plazo ya se pasó. Yera dica lo 4 d'abril y agora somos a 9... bai, manimenos podrían i aber-lo ficau antis, porque lo i ficoron o diya 1 d'abril y fer un relato en 3 diyas ya ye difízil si se quiere fer bien.
Bueno, sincusar, t'a benién ya seré más "autualizau".

4 comentarios:

Anónimo dijo...

Como nos abises con tanto tiempo de plazo dica os concursos nos n'oblidaremos!!! :)

Anda, anda, qué abrás preniu.. ista chobentut...

Anónimo dijo...

ummmm esto pude a que o premio ya yera dau...

Que te chugas a que se lo queda belun de SLA?

Anónimo dijo...

anonimo, no i pienses tanto... que no cal. O concurso fa tiempos que yera publico y, amás, lo leyé por tot. De feito, en o mío blog, o 26 de chenero de 2007 ya eba feito a notizia d'a suya combocatoria. Por zierto, con dos comentarios que m'interesaban.

http://chemecos.blogspot.com/2007/01/vi-concurso-condado-de-ribagorza.html

Choben dijo...

ye que fatín fatiando lo trobé por terra y pensé que no eba rematau o plazo encara, mesmo cuan yera transcribindo a notizia, porque encara tiengo a mente en marzo...

Por zierto, m'he pasau por o media mark ta beyer o disco preto de jarabe de palo y no aparexe cosa d'o s'ha feito de nuey. Meso aparexe atro "bonus track" en italiano...

Por agora me lo soi baxando (ye que o presupuesto no me da ta mercar-lo). Cuan l'ascuite ya en diré bella cosa.

En fin, que baiga bueno!