5.4.07

Reportache de ninos que charran aragonés

Comenta Daniel González -una d'as personas más importans d'a comunicazión de l'aragonés estando por exemplo o coordinador de charrando- que o periodista Chorche Romance -conoxiú en o mundet de l'aragonés por, entre atras cosas, estar o fedor de purnas en o zierzo, y que antimás treballa en a telebisión autonomica- ye fendo un reportache t'o programa d'aragón telebisión 60 minutos tocán a los ninos que parlan a nuestra luenga.

Ista semana ya graboron en graus, chistau y saunc chunto con Carmen Castán, y luego se'n irán ta echo ta continar grabando. Antimás tamién i será bel nino u nina charrando belsetán.
Amablemén, Daniel nos ha dau bellas fotos d'as grabazions en saunc.

Ye bueno que bi aiga chen embrecada en l'aragonés que treballen en os meyos autonomicos: toz sabemos que ista mena de reportaches aduyan a fer conoxiu l'aragonés en a soziedat aragonesa, crebando os prechuizios que dende antismás se son ius metendo-ie y que cuesta de quitar-los. Antimás qui sabe... puet-estar que siga un paso ta fer bella coseta en aragonés d'una traza más contina. Lo mesmo si lo beyemos toz y se fan cuenta de que tiene audienzia...

Antimás se fabla d'os ninos, una parti esenzial ta una luenga minoritaria como ye l'aragonés y d'a que muitas begadas no xublidamos.

Asperemos que iste siga o primer d'una serie de reportaches tocans a aspeutos d'a luenga aragonesa: mobimiento de reibindicazión, estudios lingüsticos, istoria d'a luenga... y lo que estoi que sería más importán, uno que charre d'as bisions y ideyas tocans a l'aragonés que tiene a chen aragonesa, trencando os falsos mitos de luenga de fatos u luenga politica y metendo a la nuestra luenga en o puesto que se merexe.

Parex que no, pero cada diya se son fendo más cosas en aragonés y por l'aragonés. Yo, personalmén, no eba bisto tantas dende que prenzipié a intresar-me por o tema.

3 comentarios:

Anónimo dijo...

Chobe, ye una notizia mui mui esperanzadora. Ya ye ora que a nuestra telebisión, a de toz, faiga un documental de l'aragonés. Encara más importán que sía sobre o futuro de l'aragonés, o d'os zagalez.

Dani no sé cómo puede fer tantas cosas, pero ye que Chorche atro que tal baila... Con 10 más como éls se podrían fer mil cosas! jajaja.

Tornando con o tema d'as telebisions, ye una pena que a nuestra telebisión sía en ista etapa con l'aragonés cuan l'asturiana, una autonomica tamién que plega de naixer, ya fa programas en asturiano de mosica y tot.
Bueno, a beyer si os nuestros mosicos, os nuestros periodistas, os nuestros profesors, politicos, conductors, medicos, botiguers y muitos más prenzipian a intresar-se por l'aragonés.

Un atra curiosidat: en el Forum de Barcelona l'aragonés tenió o suyo chicot espazio. ¿Qué pasará en a Expo?

Choben dijo...

En la expo? Nomás digo que ni o nombre más botau t'a mascota ye o nombre que a la fin s'ha eslexiú, y que si miras en o puesto d'a expo en plaza españa a parola "augua" no la trobarás, cuan aparexe en a resta de luengas peninsulars (menos l'asturiano y l'aranés) y en una ripia de luengas d'o mundo.

Anónimo dijo...

ahhhh, pardal!!! que t'adebantas a o mundo! :D:D jeje.

A beyer si ista semana tamién puedo fer bellas fotos cuan grabemos.