En zagueras no he puesto autualizar o blog de traza diyaria como gosaba de fer... y ye que os diyas de berano plegón y agora os quefers crexen asabelo. De todas trazas no ixuplidaré o blog y de cabo cuan (a poder estar un diya par d'atro u uno de cada tres) i ficaré bella cosa.
Qué se puet dizir d'a semana? Tronada fura a d'ayer por a maitinada, turbazions politicas dizindo que tal partiú ye responsable d'o pior atentau terrorista d'o estau español, problemas sozials como l'arribada masiba d'inmigrans...
En o plano indibidual suposo que toz con os nuestros estudeos u triballos, as nuestras familias, amigos, ocupazions...
Pero en bel inte me demando... Cuálo ye o fundo de tot isto? Curiosa demanda... Qui a trobau bella begada a respuesta? Garra presona. Curioso o feito... De cabo cuan pienso que Calderón teneba razón escribindo "A bida ye sueño"...
2 comentarios:
Choben, te tiengo que dizir que, ta yo, o ritmo que lebas de publicazión de posts ye insostenible, no te sepa malamén. No sé cómo adubes a lebar iste ritmo tan rapido.
Por ixo aprezio lo tuyo treballo, porque sé de primera man o que cuesta lebar entadebán una web u un blog. Y cuesta muito. Más encara cuan se preba d'autualizar a sobén. Tu lo sapes millor que yo, pero tenendo que treballar u estudiar, ye difizilismo autualizar un blog tan a ormino como tu lo fas. U siga, que por una parti tien un merito increyible, pero por atra ye una faina muito costosa. Ixa ye a opinión de yo, que disfruto como leutor de tu, pero a o mesmo tiempo pienso que con iste ritmo a lo millor bel día, canso, poderías tomar a dezisión de clausurar o blog... u siga una fosca notizia ta toz, porque se menestan blogs con a calidá d'o tuyo, y ya no digo cosa si están escritos en a fabla más minorizata d'Europa, como ye o caso.
Uno d'os millors blogs que he conoxiu lo lebaba o entrañable Manel Riu, de Rimat/Rimau, y o ritmo de publicazión yera tremendo, más que más tratando-se de poemas, y antimás con posibilidá de sentir-sen. En a bida tot remata, y tot se comprende, pero me dolió dixar de poder leyer a o buen amigo de Rimat/Rimau, perén intelichén e ironico en os suyos sobrebuens escritos.
En relazión a lo que comentas en iste post, yo diziría que os nuestros politicos, que en cheneral no son que un reflexo de toz nusatros, no autúan con "bisión d'Estau" en a inmensa mayoría de situazions. Parixe que ta els bi ha una muga de cuatro años y que cal salir airosos en ixe espazio de tiempo. Pero los problemas no resueltos s'acamatonan, a la fin ban formando una bola de nieu (u de fuego) graniza, que a o cabo d'as añadas pueden estar de muito difízil soluzión. Pero asinas bibimos en ista soziedá nuestra, "a salto de mata", sin prebenir cosa. En castellano, diziríanos: "Dios nos coja confesados".
Choben, norabuena por o tuyo blog y por o tuyo treballo, pero a lo millor sería bueno prebar de publicar más a bonico. Que queremos leyer-te durante muito tiempo, amigo.
Esprisions y entabán con o tuyo amor por l'aragonés, que comparto.
Chuan Chusé Bielsa
www.juanbielsa.com
Como disiempres digo, muitas grazias por as tuyas parolas.
Ye berdat que publicar en o blog demanda un tiempo, pero si fas o blog como reflexo d'o que piensas d'o feito que más t'ha trucau o ficazio no te cansas de escribir cosas. Me pienso que a clau ye fer-lo personal, fer-lo un reflexo d'o esmo.
De todas trazas no puedo autualizar-lo como en o berano: ye curioso estudiar como una d'as causas d'o naximiento d'a filosofía estió o tiempo libre que teneban os ziudadans griegos... cuan tiens tiempo libre t'adube a pensar más sobre as cosas; cuan no se tien, no se dixa tiempo t'a reflecsión...
Publicar un comentario