Como ye de dar en istas calendatas, tos deseyo a toz buen nadal, que pasez uns buens diyas con as buestras familias y en compañía de buena chen, y tos animo tamién a reflexionar sobre, no nomás o que querez estar, sino tamién o que querez que siga ista soziedat en a que bibimos, y en a que cada diya somos deixando d'estar personas ta pasar-nos a estar roboz que no miran que por o suyo intrés propio, marchando dende o treballo dica casa con a familia (cada begada más instrumentalizada) deixando a una marguín tot repui d'implicazión sozial. Ista ye a nuestra berdadera alienazión y contra a que emos de luitar, porque os mesmos que nos dizen "no a la guerra" u "no a la biolenzia de chenero" sin dar-nos argumentos, son os que miran de fer-nos ferramientas d'os suyos intreses.
Con isto o que quiero dezir ye que o berdadero sentiu d'o nadal no cuento que siga o que se nos bende (amor, fraternidat...), ixo abría d'estar asinas toda l'añada, cuento que no ye que una ferramienta más ta fer-nos creyer que podemos tomar dezisions y podemos amillorar o mundo por parti d'os mesmos a los que les intresa que no nos i embrequemos: "a millor traza de manipoliar-les ye fer creyer que no son manipoliaus". Por ixo, aprofitar istos diyas no nomás ta estar de borina u con a familia, sino tamién ta pensar, que cal.
Buen nadal!
2 comentarios:
Pues sí, cal pensar, y amás tú lo fas muit bien. I pensaremos!
Que tiengas un buen Nadal, Choben.
Buen Nadal, Choben.
Ya ba rematando una añada en a que has treballau muito bien y de firme en iste blog. Con más chen como tu l'aragonés tien presén y esdebenidero, as dos cosas de bez.
Tu amuestras a tuya fe en a nuestra fabla charrando, escribindo y treballando.
Yo lo sé porque, anque ya fa tiempo que no dexo dengún comentario en o tuyo blog, te leigo muitas begadas y me cuaca la forma que tiens de tratar os temas d'autualidá, bien fresqueta y sinzera y rigorosa, seguntes lo beigo.
Y tamién son de gran polideza as tuyas prosas curtas, con bella ilustrazión que esliches muito bien.
Como tu bien dizes, istos días, sobre tot debán d'o gran libro en blanco que ye 2008, nos dan una oportunidá ta pensar sobre os camins d'o mundo y os camins que queremos siguir en a nuestra propia bida, ta prebar de fer con ella bella cosa muito polida.
Buen camín, Choben.
Chuan Chusé Bielsa
Publicar un comentario