24.3.08

Se troba o chen d'a fidelidat

Un simple chen puet tornar a un guarán xoriguet de campo en fidel y amoroso mariu, seguntes una colla de zientificos d'a unibersidat de emory, en georgia, USA.








L'infidel

O fidel


Se fica un chen y... se rematón as abenturas
Os inbestigadors fazión serbir un birus ta ficar un chen direutamén en o zerebro d'un xoriguet d'os entibos, prou dau a tener más d'una parella.

O chen fazió lo milagro y o espiguardau xoriguet se tornó tan fidel y amoroso como lo suyo primo, o ratón d'os feners.

Os zientificos d'o proyeuto dizen que iste experimento puet adugar a un mayor entendimiento de cómo os umanos controlan a suya conduta en soziedat.

Ista mesma autibidat ormonal tamién podría chugar un papel es malotías y desordenes como l'autismo, en o que qui lo tiene no tiene abilidaz ta relazionar-se.

Casanobas versus monogamos
Menos d'o 5% d'os mamiferos son monogamos. Os xoriquez de fener (Microtus ochrogaster) son dentro d'ista colla.

Dimpués de trobar parella, os masclos se "enamoran", se quedan con a mesma, la guardan zelosamén y l'aduyan a cudiar as suyas crietas.

Os suyos primos amanaus, os xoriguez d'entibo (Microtus pennsylvanicus), perteneixen a l'atro 95%: se relazionan con barias fembras y no cudian a los suyos fillos.

Cuento que en os umanos os porzentaches pueden estar parellanos...

O chen fa un efeuto casero
Larry Young, unibersidat de emory, en estudios anteriors ya eba trobau que una ormona dita basopresina -tamién conoixida como ormona antidiuretica- aduya a fer fuertes os lazos monogamicos entre os xoriquez de fener.

Co-autor de l'articlo, le dizió a la BBC "lo que creyemos que ocurre ye que, cuan os xoriguez fan foriquetas, a basopresina autiba un zentro de gratificazión neuronal, o que fa que os animals paren cuenta a con qui son fendo zeprén (...) De feito, fa que os xoriguez piensan: cuan soi con ista xorigueta me trobo bien. Y d'astí entabán deseyan pasar más tiempo con ixa compañera en particular"

Aplicazions t'os umanos
Ta qui plegó dica ista parti de l'articlo, les podemos dar una mala (u buena?) notizia: no se sabe si podría funzionar istas teunica en os umanos.

"Somos mirando d'entender a parti d'o zerebro que controla as relazions sozials. ¿Por qué interactuamos con atras personas?¿Qué ocurre en malotías como l'autismo?", explica o profesor Young.

"Qui sufre d'autismo no quiere interautuar con atros. Puet-estar que a basopresina chuegue un papel en as relazions sozials normals".

Manimenos Miranda Lim, atra d'as investigadoras, dizió que espezies de monos promiscuos y monogamos tienen esferens patrons de rezepzión de basopresinas que son parellanos a lo d'os xoriguez.

Allora ye posible que os umanos poligamos y monogamos poseyamos una quimica zerebral que coinzida con as carauteristicas d'as espezies antis ditas.


Asinas que en un futuro... si tenez problemas con as parellas, fer zeprén mientras ficas o chen y problema soluzionau.

Adautau de BBC-News

4 comentarios:

Anónimo dijo...

Leyendo esto m'asalta una duda ortografica:
¿azentuamos este chen pa diferenziar u escribimos chent pa'l que dica aora escribinos como chen?

Plataforma d'esfensa d'a luenga aragonesa dijo...
Este comentario ha sido eliminado por el autor.
Choben dijo...

bueno, yo a ran personal no sé cuasi cosa d'istos temas, por o que foi caso de l'academia que ta ixo ye a instituzión que s'en encarga.

Agora mesmo l'academia diz que s'han de fer serbir os regles d'o primer congreso, y seguntes os regles d'o primer congreso cuento que s'abría d'escribir "chen".

Ya a ran más personal puet-estar que a millor opzión siga continar con a tradizión literaria de l'aragonés, y escribir gen (pronunziau "chen"). Pero ya te digo, no sé cuasi cosa d'isto, y ha de dezidir l'academia, con o tiempo que ameniste pero de traza efeutiba.

Anónimo dijo...

Bueno, se continamos con la tradizión mediebal sería millor escribir gent, pero ixo, a'l menos en uns años, el beigo complicato, perque se la chen no ye alfabetizata en aragonés, ixo de meter una grafía que no represente la "imachen mental" d'el fonema fará que se leiga con /x/ (u sía, la jota). Ixa podría estar una rebisión a fer el improbable día en que i aya una alfabetizazión en aragonés.
A'l menos ixa ye la mía opinión, e que conste que no me fa mica goyo la grafía que femos serbir.