18.4.08

Charrada de Juan Carlos Moreno

Dimpués de bel tiempo de inautibidat torno a escribir ta comentar a sobrebuena charrada feita por Juan Carlos Moreno, catedratico de lingüistica cheneral d'a unibersidat complutense de madrit, en as chornadas sobre as luengas d'aragón, charrando-nos d'a relazión entre politica y luenga a ran cheneral.

A suya charrada siguió l'esquema d'o suyo libro, que tenez bien comentau en o blog chemecos, y se alazetó en a ideya de que a mayor relazión entre politica y lingüistica ye a que se troba en as luengas grans como l'español, l'anglés, u o franzés. Sin dandalo unas ideyas que ferían onra a la soziedat a ran cheneral, y que deixan bien platero cuála ye a intenzión d'as diferens tendenzias que manullan istos temas.

Ya ta rematar deixó un turno de parola an que respondió a todas as demandas que se le fazión como bien podió, a chen que se trobaba tamién comentó os suyos pareixers y se fazió una reflexión funda d'a situazión sozial de l'aragonés , tanto por parti de chen patrimonial, como por parti de chen que leba muitismo tiempo en o mobimiento d'esfensa d'a luenga, y prou que por o propio Juan Carlos Moreno que aconsellaba y daba exemplos a tot lo que se deziba.

En bel momento salió o tema istorico d'aragón y a reibincazión d'o fin d'o "colonialismo de l'estau español" en aragón. Sinzeramén, cuento que istos comentarios contrimuestran que por desgrazia no toz han preso de raso a ideya d'a charrada, que estió a ran cheneral que a identificazión d'o tema lingüistico (zientifico y por tanto ochetibo dica lo que se conoix) con o tema politico (ideolochico y por tanto sozchetibo) fa muito mal a todas as luengas y a la lingüistica a ran cheneral. Prou que o siñor Juan Carlos s'alazetó en o caso castellano, que bien conoixemos toz, pero ye común a todas as luengas, ya sigan chicotas u grans.

Resumindo, estió una charrada culta y reibindicatiba, cualo mensache abría de plegar a todas as soziedaz.

5 comentarios:

Juan Pablo dijo...

Choben, soi mui d'alcuerdo con este post. A charrada fue chenial, igual como o libro. Beyer por escrito u sentir a cretica razonada dende a linguistica de toz ixos argumentos que tantas begadas emos abiu d'escuitar (y que comentabas fa bels posts) ye una gozada.

Y tamién con que tamién cal que nos miremos nusotros mesmos y miremos d'esfender a luenga con criterios linguisticos y no pas politicos.
O que si ye un criterio politico ye a nezesidat d'una lei, de recursos economicos, ezt... y han de tener atros foros ta esfender-los.
Pero a mezcla de linguistica y politica gosa fer más mal que bien como deixó bien esclatero o profesor Moreno Cabrera.

Choben dijo...

Somos d'alcuerdo en cuasi tot, pero me pienso que una lei de luengas y recursos economicos no son "criterios politicos", sino dreitos que una luenga ha de tener ta no estar inferior a la resta...

A politica, como estructurazión d'a soziedat, ha de permitir que todas as personas como miembros alazetals d'a soziedat se puedan expresar en a suya luenga. Pero cuento que no cal confundir isto zaguero con a manipoliazión dende a politica ent'a lingüistica, por ixo me pienso que no son criterios politicos.

Salut!

Charrabís dijo...

choben, enorabuena por o tuyo comentario. Yo tamién soi d'acuerdo en tot o que dezitz. Cuanto a que cuestions como os recursos economicos u a lechislazión que se puede fer sobre una luenga ye u no una cuestión lingüistica; yo creigo no'n ye.

Choben, explica-me una mica más a tuya postura, que no sé si la he entendiu bien...

TV de Plasma dijo...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the TV de Plasma, I hope you enjoy. The address is http://tv-de-plasma.blogspot.com. A hug.

Choben dijo...

Ta yo, a la ora de fer una relazión luenga-politica, bi ha dos bertiens:

Una que respondendo a lo sentiu más puro d'a politica, o sentiu d'estructurazión d'a soziedat, ha de permitir que cada persona pueda fer serbir a suya luenga en toz os ambitos d'a suya bida. Ixo se consigue con una lechislazión adecuada, una politica educatiba correuta, a presenzia en os meyos de comunicazión, asinas-asinas.

Pero tamién bi ha una relazión "fosca" (a lo menos ta yo), que ya que quiere identificar una cultura,y más que más una luenga, con una ideolochía concreta, plegando mesmo a la muga de pensar que no tiene sentiu ta qui no ye d'ixa ideolochía charrar ixa luenga y tener ixa cultura, u bien mentindo tocán a las propiedaz d'ixa luenga ta fer-la más importán (como explicoteó o siñor Juan Carlos Moreno en a charrada con o caso castellano).

En iste post, he entendiu criterios politicos d'ista segunda traza, y por ixo a mía postura.

No sé si ha quedau platero...