Enta Cracovia: flor de primavera

Fa poco yera veyendo Emily en París, una pihautada de serie pero que atrapalla, y facioron una chicota clucada a Cracovia. A yo me chocó, pos no ye una d'as tipicas ciudaz turisticas ni fachendosas europeas, como Roma, Viena y a propia París, pero no le di más importancia. D'atra man, Cracovia ye, chunto con Budapest, una d'as dos ciudaz con cierta importancia y relativament cerca de Kosice, tot parixe indicar que os amigos que i viengan son más intresaus en a capital hungara, y chusto o segundo cabo de semana de noviembres anunciaban un orache alto u baixo bueno, asinas que d'un diya ta l'atro, pillé o bus de cuatro horas Kosice-Cracovia y me planté en a segunda ciudat de Polonia, que por atro costau, ye un país que nunca no heba visitau. 

I arrivé o viernes de nueiz, a ixo d'a meya t'as nueu, y os letres, cartels y pasquins no me dixaban endevinar que yera en unatro país: sino por ixa ele tachada (ł), as parolas se pareixeban muito, y mesmo en fablar, as formulas más comuns y sonoras d'o eslovaco (dobre, curva, dakujem) me pareixeban calcadas en o polaco. A fredor en as carreras y l'arquitectura decimononica austrohungara tampoco no aduyaban a trobar as esferencias, pero un estilo estetico más modernet, más que más en a chent choven, as sonrisas y un conoximiento más amplo d'o anglés ya deixaban entrefilar que sí, que yera en unatro país. Como a ciudat se veyeba bien ta caminar, y encara lo pillo con goyo dimpués de anyos en Asia, an que ye imposible de fer-se una gambada en paz, pos me dio por ir a piet dende a gara de buses dica l'hostalet, en un trachecto de bells 30 minutos que hese estau más amigable sin a rabior. Pero en l'hostal, mesmo con fredo y baldau, quité enerchías ta ir t'o centro historico, a tasament diez minutos, y arrecorrer-lo de nueiz, mesmo mirando de trobar, de baldes, bell puesto mahet de baile latino. 

A l'atrol diya, no me'n puyé guaire luego, diría que serían arredol d'as ueito y meya, pero en salir-ne as carreras yeran encara trancadas. Pareixeba que a ciudat heba teniu muita borina mientras a nueit y amenistaba o maitín ta descansar-se, y a mesma sensación, u mesmo más firme, trobé a l'atrol dominche de maitins.  Pero no tardó guaire en espolar-se, y arrecorrié bien o casco historico u stare miasto, con as fitas d'a torre Rynek Glówny, o mercau d'artesanato de Sukiennice, a basilica de Santa María, a replaceta d'o chicot mercau, an que heban aprestau un comedero benefico, y a barbacana de Cracovia, un d'os zaguers repuis d'os murs meyevals. Iste centro historico ye rodiau por un parque mahet, que arrecorrié dica plegar en o pueyo de Vawel, an que se troba a catedral y o castiello, que visité a l'atrol diya, o dominche. En ixa mesma redolada, en a marguin d'o Vístula, se troba o Smok Vawelsky, estatua en bronce d'un dragón que cada pocos minutos esgargalla una brenqueta de fuego, y que remera milenaria leyenda sobre a existencia d'un rapinoso dragón en ixe pueyo. 

D'astí, marché t'o bico chodigo de Kazimierz, a tasament cinco minutos caminando, y que hue ye o distrito hippie-hipster d'a ciudat. Aquí, entré en a sinagoga historica, que tampoco no ye imprescindible, y arrecorrié as suyas carreras, que invitaban a caminar y caminar, y no deixar-las eslampar, dica que a ixo d'a una colada, esnavesé o puent sobre o río Vistula ta plegar en Podgorze, tamién antiga zona de chodigos do visité a replaceta homenache a las victimas de l'holocausto, con siellas vuedas, y miré por difueras a famosa apotica chodiga Apoteka pod Orlem. Estié por entrar-ie, pero o pre d'a entrada me pareixió masiau caro ta un puesto que por difueras s'alufraba tant chicot. Dimpués, enfilé t'a usina de Oskar Schindler, qui salvó a muitos chodigos y a suya historia ye racontada en a famosa pelicula A Lista de Schindler, pero me trobé una hora de coda. En ixas que me miré en o rete a reserva t'a latro diya, dominche, pero en yeran todas acotoladas por tres días! Facié la d'aquell, y ya en o lusco puyé o lumo Krakus, poyet artificial alto d'un parque que ufre envistas sobrebuenas de toda la ciudat, y o millor de tot, un ambient tranquilo y familiar, con muitas parelletas chugando con os suyos fillez u amorosiando-se, y chovens en colla u pasiando os suyos cans. Y como pleguemos a tener maximas de 10 graus con sol, yo tant contento. 

Ixa nueit la pasé por o bico de Kazimierz, que de diyas heba trobau tant alternativo y buenrollista, pero lo que trobé no me fació goyo. Caminando, vi como un mesache chalanguero polaco miró de charraputiar con una colla de mesaches chovens italianos: o pobre polaco se pensaba, por a luenga, que yeran espanyols, y os atros le repulioron de malas trazas. Poco dimpués, en un callizo muito cerqueta d'a famosa replaceta Plac Novy, dos collas de criallos farutes espanyols pretoron a abatanar-se en metat d'a ruichona. Diría que yeran Erasmus. Y ye que, os polacos en o sentiu d'agresividat borinera y noctura tienen muita mala fama, pero yo o que me trobé fuoron espanyols que no se sabeban comportar. 

Como l'ambient en Kazimierz no yera guaire bueno, torné t'o centro historico, con chent más madura, encara que por cansera y fredor, no enduré guaire. Atra vegada, miré de trobar bellevento de baile latino, pero me quedé con as ganas. Y ye que, istos se gosan d'anunciar por retes socials, y agora que me los he sacaus, pos lo tiengo más embolicau ta trobar-ne. Tamién miré de trobar bella cursa ta Auschwitz en o dominche, pero yeran todas presas y acolotada, y en l'onico puesto an que teneban una vaga en portugués, me quereban cobrar 80 euros. No, no pagaré ixos diners por veyer un campo de concentración, y con tot o dominche de maitins disponible, a la fin me decidié por veyer o castiello de Wavel por dentro, que lo aproveité bien, y no porque fuese realment intresant (lo millor, una exposición de viellas tiendas de campanya turcas), sino por estar un puesto con calefacción: o dominche a temperatura baixó 10 graus y plegó en a muga d'o que o mío cuerpo puet estomacar, tanto que a ixo d'as cuatro d'a tardi prenié l'autobús de tornada enta Kosice firme contento: un puesto calentet y dimpués casa! 

Pero no puedo rematar ista entrada sin charrar d'o millor que trobé en Cracovia, y que hese pasau desapercibiu sino por a recomendación d'o mío companyero de treballo Claudio: os bars de leite, u en polaco, bar mleczny. Son bars que fan una función de comedor social, que prencipioron en o sieglo XIX, que fuoron promovidos por o gubierno socialista, regulando-los y enamplando as suyas ufiertas, y que encara son emplegaus por treballadors, estudiants, y cada vegada más, turistas. Y ye que ufren menús de comida tipica polaca por menos de tres euros: deixan o estilo a o costau, y ufren calidat y buen pre, y o millor de tot, una experiencia verdaderament local. En tasté varios, y o millor de toz estió o Krakus, en Podgórze, an que miché, entre atras cosas, os famosos pierogi u raviolis polacos. En custión de comida, a ideya de fundo d'a comida polaca y d'a eslovaca me pareixió bien parellana, con os kopytka polacos muito parellanos a os haluski eslovacos (gnocchi), y con os pierogi polacos muito parellanos a os pirohy polacos (ravioli). Manimenos, aquí sí que cal decir que os contrapuntos eslovacos son más sucosos que no os polacos, más que más por o formache emplegau. 

D'as ciudaz que he visitadas en ista parti d'o mundo, diría que agora mesmo Cracovia ye a que ufre una millor experiencia turistica. Piatonalidat, accesibilidat, historia, borineta y mesmo bell parque mirador bien pincho. Ciudat perfecta t'un cabo de semana luengo, ye experimentando una primavera de desenrollo, como as sonrisas d'a muita chent choven, disposada a aduyar-te u fotiar-te de buen implaz, contrimuestran. Y asinas lo aproveitan turistas europeyos de clase meya, que fan que por as suyas carreras imperen o anglés con marcau acento britanico, o espanyol, o italiano y o francés. Manimenos, ya experimenté beluna d'as contrapartida d'a masificación turistica: barallas de foranos, codas, y entradas acotoladas ta belunas d'as fitas principals. Y ixo que yera un segundo cabo de semana de noviembres sin festivos especials por Europa! Diría que Cracovia ye agora mesmo una flor de primavera, pero que l'habrán de cudiar bien ta privar que plegue a fuixina que la panse, como ha pasau con tantas atras ciudaz d'o viello continent.