Enta Viena: selecto y masivo son incompatibles

Dos anyos y meyo feba que no veyeba a o mío millor amigo Enrique, de qui he charrau prou en iste blog, y ya en Europa, pos tocaba veyer-se. Y aproveitando o puent de Toz os Santos, quedemos en pasar un día en Bratislava y dos en Viena, encara que tamién prexinemos as opcions de Cracovia y Budapest. 

Asinas, o 31 de maitins Enrique pilló o tren camín ta l’aeropuerto de Barcelona y servidor, quasi a la mesma hora, lo pilló dende Kosice dreito enta Viena, en un trayeuto de seis horas que ya odio dimpués dimpués d’haber-lo feito en quatro viaches, si bien ye verdat que ista vegada me trobé con una alumna maheta de zaguer curso y charrín charrán se nos pasó ascape. Ya plegau en l’aeropuerto de Viena, asperé menos d’una hora t’a quiesta retrobada, y d’astí Enrique y servidor preniemos chuntos o bus ta Bratislava, do pasemos a primera nueit, que ya comentaré en atro post. A l’atrol diya, marchemos ta Viena, ciudat que heba visitau mientras una semana fa ueito u nueu anyos.

I pleguemos de nueiz, pos aproveitemos bien a visita en Bratislava, y feito o check-in en un hotel pincho y no guaire caro, que daba ta ir caminando t’o centro, pretemos a caminar,veyemos o monumento en honor d’os sorches d’a Armada Roya, y dimpués, os principals atractivos d’a ciudat: a opera, a Stephansplatz con a Columna d’a Pasa, as fuens y a catedral de San Esteban, tot chingarriau por botigas de luixo, como Rolex u Cartier, y a rebutir de turistas, más que más inmigrans aspiracionistas, que feban que muitas vegadas mesmo fuese difícil caminar. Sí, Viena quiere vender una imachen selecta ta un publico masivo ta quitar o más gran treslau posible, pero asinas rematará ganando mala fama. Y ye que muito se charra d’o problema d’a masificación turistica en Barcelona u en Venecia, pero Viena no se'n queda curta, y si miramos una mica as noticias, a chentrificación tamién afecta a os vecins de toda la vida.

Como curiosidaz, veyemos o Stock-im-Eisen, un troz d’arbre a rebutir de claus, tradición vienesa d’a puenda meyebal que o suyo motivo se desconoixe, y tamién aturemos en a casa d’a carrera Backerstrasse 12, an que se conserva un trocet de pintura renaixentista, y que permite fer una chicota ideya de cómo a mayoría d’as fronteras d’as casas vienesas en ixa puenda yeran tintadas. En ixa mesma carrera trobemos un bar dito Weinorgel, de muito buen rollo, con collas casuals charraputiando d’as suyas cosas, muitas vegadas mixtas, sin a presencia d’hombres farutes mirando-se fito fito y agresivament a las "fembras" (sí, ixo ye o que me soi trobando muitas vegadas en Eslovaquia). Nos faciemos una biera, u talment dos, y d’astí continemos una mica a caminata ta veyer de nueiz o Ankeruhr, pasache en alto que renuga dos edificios y construito en 1914, presidiu por un repoliu reloch de bronce con motivos astronomicos y relichiosos.

Malas veyer-lo, enfilemos t’o biquet de Stadttempel, encara en o centro y con tasament 10 u 15 barichoz que, sin estar de tot mal, no deixa d’estar a principal zona de borina d’a ciudat: no, Viena no ye ciudat t’a nueit. Cenemos por astí en una cervecería an que nos tractoron muito bien, y dimpués nos faciemos bellas bieras. En ixe poco tiempo, veyemos a un d’os cambrers mahos tricolotiando y forachitando d’o bar a un mesache, y en atro bar, que a suya cambrera yera mahisma de vegada que iba colocada, presenciemos una baralla más fura, que remató con a policía plegando-ie. Y a l’atrol diya, en un mercau tranquilo, en veyemos unatra. Y ye que Viena, si bien teneba más sonrisas que no Eslovaquia, se veyeba de vegada más estresada y agresiva. Ixa nueit la rematemos en una discoteca latina an que m’animé a bailar bella bachata, o que dio ta buenas anecdotas que emplirían unatro post. Con tot y con ixo, por dos bieras de consumición, a entrada y o guardarropas, nos deixemos 25 euros por cabeza. En ixe mesmo bar veyemos como una mesacheta ristolera y espontania latina que tendría poco más de 20 anyos levaba un estuche con rayas blancas prestas t’o consumo: les ne pasó a beluns  d’os suyos amigos, en consumió ella, y atras cayoron por tierra sin pareixer importar-le guaire. O perfil d’a chent en ixe puesto yera muito casual, mica fachendoso, choven, con prous estudians, y sin pareixer-lo, con diners, u a lo menos con prou cauquerré como ta pasar una nueit en ixe puesto.

A l’atrol diya nos costó una miqueta de revellar, y a ixo d’as 10 yéranos salindo de l’hotel ta desayunar-nos y mercar as entradas d’a opera d’ixe mesmo diya, que no’n quedaba que de piet. Las pillemos y pretemos a caminar por o circlo externo d’o centro d’a ciudat, veyendo por difueras os edificios d’o Museu Kunsthistorisches, d’o Museu d’Historia Natural, d’o esparpallant conchunto palaciego de Hofburg, y o parlamento austriaco, no sin deixar de pasar por os parques de Burggarten y Volksgarten. Ixa caminata remató en o no menos poliu concello de Viena, an que meyo amagada se troba a estatua en fusta d’un sorche meyeval empliu de claus, seguindo a tradición d’os arbres que he mencionau antis. En verdat, ista estatua, dita Wehrmann-in-Eisen, ye muito más nueva, pos se fació ta acaptar diners ta mesions derivadas d’a Primera Guerra Mundial.

Feita ixa primera caminata, repasemos con a luz d’o diya os puestos que hébanos vistos o diya d’antis de nueiz, aturemos en un callizo selecto y merquemos bells chicolates an que nos atendió una antiga cantaire d’opera franco-uruguaya, mahisma y que sonyaba con deixarEuropa y tornar ta Uruguay. Dimpués, marchemos t’o mercau de Naschmarkt, puesto una mica más social y a rebutir de botigas de concietos turcos y kurdos, y d’astí, tornemos ta l’hotel a deixar as bolsas y chentar en un puestet turco con valoracions buenas en Google dito Konig, an que me preté un iskender, plato de carne con yogurt que no heba tastau antis y que m’enamoró. Ya en o lusco, andemos dica a casa Hundertwasser, edificio expresionista feito en os 80, y que, en a mía opinión, ye sobrevalurau mediaticament, y dimpués continemos a caminata dica plegar en o parque d’atraccions, an que nos faciemos una foto en a casa Kugelmugel, chicota edificación esferica que un hippie decidió autoproclamar estau independient: l'hombre habió de pasar bells diyas en garchola por a chanada, pero dimpués o gubierno reconoixió a valura d’a casa, y bellas pocas centenas de seguidors encara continan con a chanza d’a republica independient.

En o parque d’atraccions, Enrique decidió luitar contra a suya cerina enta tot trasto que pilla altaria y me proposó de montar-nos en a rota graniza, simbolo d’a ciudat. Nos ne puyemos y mientras el yera posau y nyervudo, trobó o refirme d’una parella griega asabelo de maha, con qui charraputió mientras o recorriu, estoi que t’a desgracia d’a mullereta, que talment hese quiesto un momento una mica más romantico con l’hombre. Cal decir que a rota no fació so que un chiro, y que bosar os 18 euros por ixo, pos como que no fa vez.

Dimpués, marchemos t’a opera, que ixe día pertocaba La Bohème de Puccini. No asperábanos os millors puestos, pos pillemos as entradas más baratas y onicas disponibles, y yeran de pie en o zaguer piso. I pleguemos y efectivament, yéranos a cascar-la, con poca asperanza de veyer bien dende ixe puesto y con tantas cabezas por debant. Manimenos, teniemos suertey encara nos dio ta veyer-la decentement. Yera curioso de veyer cómo en os corridors se feba un mezclallo entre chent con tricot vestida d’evento, y chent casual u mesmo hipiceta, como una parella pincha d’un americano y una colombiana con os que charraputiemos mientras o descanso. Con tot y con ixo, se nota como, mirando de quitar o más grant treslau, atra vegada Viena, en a suya opera, mira d’ufrir un espectaclo selecto y masivo de vegada, quan ixo no ye posible: habrían de quitar ixas entradas y prou, porque a experiencia no remata deixando un buen sabor de boca, más quan belún d'os acomodadors aproveita a más minima ocasión ta chilar-te. Antimás de que, sin animo d’estar un perito en incendios, ixa sección d’o teyatro d’a opera pareixeba una autentica ratonera en caso de fuego. Y d’astí decidiemos tornar ta Stadttempel a cenar y pasar a zaguera nueit, ya con muita menos enerchía, encara que trancando o Weinorgel, ixe barichot con tan buen rollo an que nos faciemos a primera biera.

A l’atrol diya, habendo d’estar en a gara de trens a las 13:30, decidiemos visitar o Museu d’Historia Militar, con asabelo de buenas valuracions, y no guaire luent d’o nuestro hotel. Deciban que amenistaba arredol d’as cuatro horas ta visitar-lo bien, pero nusatros no empleguemos que dos, y no fuemos encorrius. Y ye que o museu no ufre guaires atractivos, fueras d’o edificio en sí y l’auto an que matoron a Franz Ferdinand, hereu d’o Imperio Austrohungaron, que o suyo asasinato en Sarajevo en 1914 desencadenó a Primera Guerra Mundial.

Visto o Museu d’Historia Militar y encara con tiempo, marchemos t’os chardins d’o Palacio de Belvedere, an que o chardinero charranyaba chilando a qualsiquiera que pisase un centimetro de tasca, fendo escenas dantescas con as que nos esmelicábanos. Sí, ista chent vive masiau estresada y ye masiau agresiva, encara que sonriden más que os eslovacos, ixo sí. Caminando por as carreras, as monumentals y repolidas fronteras neorrenacentistas y art-decó alternaban con ceras pavimentadas y endrilladas, igual que as botigas luixosas d’o centro alternaban con catapallas de turistas aspiracionistas, a más gran parti d’ells asiaticos, creyando una grotesca y cutre pedantería chentrificada. Ta estar chustos, Viena no ye o mío estilo, pero mesmo mirando d’estar o más neutral posible, ixa estratechia de mirar d’achuntar o selecto y o masivo, quan son conceptos incompatibles, fa que no se’n consiga ni l’uno ni l’atro, y en o luengo plazo, rematará devaluando a capital austriaca.

Enta Kosice (ii): una alfaya amagada

Quan Joaquín me gritó por telefono ufrindo-me a plaza de Seccions Bilingües de Kosice, ascape pensé en ixa plaza de Radon en Polonia que me ufrioron fa quatro anyos y que refusé por puesto ixauto. De qué coda voi a marchar ta un lugar sin cosa a fer y con una rabior que o mío cuerpo mai no podrá estomacar? O caso ye que lo veyé como oportunidat de hopar de Asia, un continent que m'ha amostrau o que no hese puesto aprender d'atras trazas ni en atros puestos, y que m'ha ufierto movimiento y más movimiento, pero no pas estabilidat. Y tamién remeré as parolas d'os míos amigos Willy y Enrique mientras istos zaguers anyos: o que yes buscando l'has de trobar en Europa más fácilment. Asinas que dende o prencipio dicié que sí, y mirando-me una mica más a ciudat ixa mesma tardi, a l'atrol día confirmé a decisión. 

Y ye que, en metat d'o forau marcau por Cracovia, Bratislava-Viena y Budapest, Kosice no apareixe en garra mapa grant y muito menos en o imachinario d'os europeus. Encara que tres vegadas más chicota, en iste sentiu Kosice remera a Zaragoza: un puesto a metat camín de ciudaz grans y reconoixidas, sin fama, pero con cosetas intresants, como un centro historico repoliu y a rebutir de restaurants y bars, bel par d'academias de baile latino, bels monumentos y museus, y actividaz culturals todas as semanas. L'aeropuerto tien bels vuelos por Europa, encara que ta servidor sería millor si en tenese más, y en a propia ciudat y redolada, o rete de tranvías y buses comunica bien toda a ciudat, que diría se puet arrecorrer caminando de cabo a rabo en poco más d'una hora. Ta yo, o equivalent en Espanya sería León. 

Socialment, de primeras m'ha dau a sensación d'estar una ciudat una mica trancada, como a Zaragoza d'os 2000. Una ciudat sin costumbre d'inmigración, an que no ye difícil de trobar bel comentario negativo d'a creixent comunidat ucraniana y d'a historica comunidat chitana; una ciudat tamién muito relichiosa. Encara que se nota que china chana se va ubrindo, como retrata a creixent comunidat vietnamita (mierda!). Y un país, Eslovaquia, an que o 40% d'a población menor de 25 anyos emigra: encara no conoixco guaire bien a situación d'o país, pero diría que ista emigración se debe más a expectativas vitals que no pas a custions economicas. Y ye que ya he parau cuenta que bels alumnos, d'os más agudos y avantallaus, y que son criticos con a relichión u no son cis, ascape te lo dicen: quieren rematar os suyos estudios secundarios ta eslampar d'un país masiau tradicional. Y yo me los miro con ternura: transmiten o mesmo odio enta Kosice que l'odio que yo he teniu enta Zaragoza dica fa no guaire: ''Ale gurrions! Marchaz de Europa, descubriz mundo, conoixez chents, buquiz, pillaz zorreras, que tos den premios y que tos esculen, tenez movimiento, y plegará un inte en que querrez tornar-ie!''.

Yo, malas plegar en a ciudat y en o mío bico de Nad Jazerum a zaguera semana d'agostos, me trobé con un puesto familiar idilico ta fer gambadas y exercicio, con un lago grant a'l canto casa an que han atrapaciau una atracción d'esquí acuatico y an que a chent se fica en l'augua, y an que he prencipiau a correr con una mica d'asiduidat dimpués d'anyadas sin fer-lo. En o casco historico, marcau por a carrera Hlavna, me trobé con una polida y coqueta catedral gotica, acompanyada d'una capilleta más chicota a un costau, y d'a torre de Sant Urbano a l'atro costau, tot abrazau por una replaceta con una fuent de mosica y colors que ye o nuevo argüello d'a ciudat dende fa tasament un anyo, y que a yo me fació lembranza dende o prencipio d'a fuent d'o parque de Luneta en Manila. En ixe mesmo conchunto se troba un obelisco d'anchels, remeranza d'a peste negra que enristió fuerte en ista redolada, asinas como o museu arqueolochico sozterranio, que visité pero que no me fació mica goyo: y no porque no tenese guaire a amostrar fueras de bella rúa antiga y bel acantarillau, sino porque as explicacions con proyectors no yeran guaire enfocadas ni accesibles ta esferents ritmos de lectura. Con tot y con ixo, pareix que soi fablando de muitas cosas, y de cabo a rabo tot isto s'arrecorre en dos minutos. 

En o extremo norte d'a carrera Hlavna, y pasando por muitas cafeterías y restaurants asabelo de pinchos, se troban dos museus: o de l'Este d'Eslovaquia, y o de Ciencias Naturals. O segundo no ye guaire intresant, y sino por os repuis d'un meteorito caito en 2010, no fa honra que como cursa ta ninos chicoz. O primero ye muito millor y ufre exposicions d'artes y obchetos mientras a historia d'a redolada, más que más dende o romanico dica os nuestros días. Sin estar esparpallant, un mural romanico quitau d'una ilesia d'a redolada y una ilesia griega ortodoxa de fusta fan que a suya visita siga menester. Ista zaguera, construita en 1741 en o lugar de Kozuchovce y adedicada a Sant Nicolás, estió traita t'o suyo puesto actual en 1923, y fa parti d'as ueito ilesias de fusta (dos catolicas, tres protestans y dos griegas ortodoxas) d'os carpatos eslovacos. Ta yo, y dica agora, ye a principal fita cultural a visitar en a ciudat. Tamién en ixa redolada se troba o monumento a la maratón de Kosice, con una estatua d'un maratoniano y os nombres d'os ganadors de todas as edicions, que chusto iste anyo en fan 100, y que dicen ye a más antiga de Europa, a tercera más antiga d'o mundo y que mesmo continó celebrando-se mientras a pasa d'o covid. 

En o extremo sur d'a carrera Hlavna se troba o principal centro comercial d'a ciudat, Aupark, una caparra en contimparación con qualsiquier centro comercial de Filipinas, pero muito bien apanyau. Iste centro comercial se troba presidiu en a suya entrada por una replaceta pincha an que fan mercaus de comidas tipicas toz os cabos de semana, y chusto a'l canto, un molimento a rebutir de fozes y martiellos, muitos d'els vandalizaus: o monumento a os libertadors d'a Armada Roya, construito en 1945 y presidiu por dos columnas conmemorativas. 

No me puedo ixuplidar d'o Parque Mestsky, chusto a o costau d'a gara de trens y autobuses, inaugurau en os 1860 y presidiu en a suya entrada por un puent polidet y por o pintoresco Palacio de Jakab, d'estilo neogotico, construito en 1899 y con reconoixiu tellau verde, pareix quitau d'un cuento de fadas (u de bruixas). O parque cuenta con un restaurant pinchet y con o Kuntshalle, un grant palacio recient restaurau que hue fa vez como espacio d'artes. 

Tamién he visitau o Bastión d'as Execucions, sección de l'antiga muralla que rodiaba a ciudat, una d'as pocas encara conservadas, y que hue aloixa una exposición sobre Fracis II Rakoczi, un líder hungaro que se sublevó contra os austriacos y que marcó buena parti d'o sieglo XVIII en a ciudat. Más que no a historia particlar d'iste personache, o intresant ye veyer cómo Kosice s'ha trobau en o cruz de camins de hungaros y austriacos, recibindo antismás mesmo a invasión mongola, y ya en puenda más recient, a influencia checa. En atra sección d'iste mesmo museu, bi ha una morbosa exhibición, d'ixas que a yo me fan goyo, con os instrumentos que emplegoron os verdugos, más que más espadas, dica o sieglo XVIII. 

Tornando t'o núcleo d'o centro d'a ciudat, a'l canto d'a catedral se troba una campana que fa honra de punto de trobada, como os canyons d'o Corte Inglés de Sagasta antismás. Ixa campana, que data d'o 1557, cayó d'a torre de Sant Urbano (sieglo XVII) mientras o suyo fuego de 1966. Y no me puedo ixuplidar d'o Teyatro Estatal de Kosice, repoliu edificio neobarroco de finals d'o sieglo XIX que aculle asabelo d'operas, balets y teyatros a pres d'entre 15 y 25 euros. Por difueras pareix un edificio vienés, y por dentro no ye menos poliu: una miniopera vienesa, u no tan mini. 

Me sorprende que Kosice siga una desconocida en o mapa turistico d'Europa, pos a ciudat ufre bel par de dietas bien pinchos, más que más de veranos con buen orache. Patrimonio, cultura, bars, restaurants, naturaleza, y arredols repolius que ya iré comentando. Buen rollet y tranquilidat a la vegada. Obviament no ye Roma ni París, y se troba una mica luent de tot, pero sin dubda ye una repolida y animada parada d'un circuito turistico que puet prencipiar en Viena-Bratislaba u en Cracovia, rematando en Budapest, y arrecorrendo Eslovaquia sin deixar de pasar por os Tatras (Carpatos). Y ta vivir, pos ya iré comentando, pero no pinta mal. 

Enta Kosice (i): a estabilidat ye o que más se busca

Mes y meyo levo en Kosice, a segunda ciudat de Eslovaquia, y encara que heba d'haber escrito iste post muito antis, tanto batán he levau, que dica agora no heba puesto. Ya en os zaguers posts de Tailandia y Filipinas heba dau pistas, y agora lo confirmo: torno ta Europa. 

Y ye que, como ya iba escribindo muitas vegadas mientras o zaguer anyo, aquella Asia aventurera que m'atrapalló deixó d'estar un buen tricot ta yo, por o suyo cambio y por o mío cambio. As Filipinas chalangueras y zalagarteras van deixando paso a unas Filipinas desarrollistas, y o Marco aventurero ye iu deixando paso a un Marco que, sin deixar d'estar un tremolet, busca más estabilidat. A mía aventura de meyo anyo en a isola paradisiaca de Bantayan me fació veyer que no foi honra ta vivir en un puesto chicot por muito paradisiaco y turistico que pueda estar, que amenisto más ferrete, menos alparceyos y más posibilidaz de conoixer chent diversa. A mía segunda aventura en Manila estió una confirmación de que as segundas partis no gosan d'estar tant buenas como as primeras. Y mientras pasaban os meses, os míos amigos Willy y Enrique me lo deixaban entrefilar: "o que agora mesmo yes buscando lo trobarás en Europa". 

O desenganyo en VISA, interpresa en a que treballé por pocos meses dica que veyé cómo esculaban con sonrisas, estió a confirmación: cal hopar, cal tornar ta Europa, y en chunio prenié a decisión definitiva. Tenié suerte y en o prencipio d'agosto recibié un trucazo d'a Embaixada de Espanya en Eslovaquia ufrindo-me una vacant en a Sección Bilingüe d'instituto en Kosice, a segunda ciudat de Eslovaquia. No teneba mica ideya d'a ciudat, y de Eslovaquia, nomás heba visitau Bratislava por bellas horas fa quasi una decada. No lo dubdé, y en o mesmo trucazo respondié que sí, que sin dubda. En verdat, dicié que sí pero prou que no lo teneba de tot claro. De qué coda marchar ta una ciudat d'a que nunca no he sentiu fablar y antimás en un país de chelo? O caso ye que me la miré una mica ixa tardi por o rete, veyé que teneba bel par de academias de baile latino y me dicié: "con ixo y un buen chambergo, vas apanyau". 

Previo paso por Tailandia, arrivé en a republica eslava o zaguer domingo d'agostos, y con una mica de desorden, me planté o lunes en o mío nuevo treballo, en o Gymnazium Park Mladeze, ta prencipiar a dar clases de Matematicas y Fisica, por primera vegada en a mía vida, a l'atral semana. Tot muito rapedo y chandro, no pas por a mía parti, sino por a local. Pero a honestidat cheneral d'a chent, primera vegada que la trobo en siet anyos, compensaba tot. D'atra man, ixa mesma semana conoixié a Fer, companyer de treballo, y ascape faciemos buena pacha, y en tres días entré en a mía nueva casa, un apartamento de bells 50 metros cuadraus muito bien apanyadet y modernet, que estoi que ye o millor puesto en o que he viviu. Se troba en Nad Jazerum, un bico en a redolada d'a ciudat y luent d'o colechio, pero lo mahico que ye l'aloix, a zona residencial familiar con muitos parques, monts, dos lagos grants y o paseyo d'o río, compensan a distancia, que d'atra man, son 15 minutos d'o centro d'a ciudat en tranvía y 35 d'a parada cerqueta d'o colechio. 

En ixas primeras dos semanas me trobé una mica de choque. Os vecins no saludaban, as primeras clases de Fisica no estioron facils, teneba muitas fainas ta fer y o trato d'as personas yera de cabo quan dreito y duro, masiau cuadriculau. Pero malas pasar ixas dos semanas, dimpués de bel charrazo y de chugardiar con os cans d'os vecins, istos y companyers de treballos pasoron a tratar-me como familia, y os alumnos pasoron a confitar más en yo, u ixo creigo. Tamién m'apunté ascape a bailar salsa y bachata, y a primera vegada que marché t'un baile social a conoixer chent, as tres mesachas a las que ufrié de danzar me refusoron como sotas. Yo me quedé atronzau, con ganas de fuyir ta Brasil, pero ixo estió asinas nomás una semana, dimpués se ubrioron, y ahiere mesmo lo charraba entre risas con una d'as mesachas d'a colla de baile. Sí, ista chent de primeras ye dura y desconfitada, pero quan te conoixen, son sols, u lo menos, ixo me pareix agora mesmo. 

Tamién me feba miedo que Kosice fuese muito chicota, yo que soi can de ciudat gran y movimiento, pero ta cosa. De nueiz, tendrá bells 15 puestos de borineta, y de tardis muitas más cafeterías y cervecerías. Bi ha botigas y mercaus, y actividaz culturals que, sin plegar a las que se pueden trobar en una capital, fan que no te aburras si no quiers: operas u ballets cada semana u cada dos semanas, certamens latinos, de jazz, teyatros y atras movidetas. Una vegada por semana salgo con Fer a chafardiar una mica, y quan no, pos con a colla de baile, encara que he d'aprender eslovaco, pos aquí anglés no charran que os menors de 30. Tamién bi ha una fuerte comunidat espanyola y latina, alimentada más que más por os Erasmus que vienen a fer, sobre tot, Medecina y Albeitaría. A biera ye sobrebuena y barata, a resta d'alcol tien un pre normal, y ixo sí, o café ye a pré d'oro, no baixando d'os 2,30 €. 

O treballo en o centro ye repoliu, pos os alumnos son sols que achuntan respeto y alegría chugardiza, y os companyers, tanto eslovacos como espanyols, femos una familia. Antimás, os mesaches, de 15 a 19 anyadas, son más ubiertos con os profesors espanyols, más chalanguers que no os profesors eslovacos. Con dos d'os eslovacos, Tomas y Robo, de cabo quan salimos a la cantina "d'hombres" a fer-nos bels churrumpadez: cantina d'a puenda socialista, con a fusta enrobinada y macerada d'alcol mientras decadas, y con a perén presencia d'os zorros d'o bico, dende que ubren a las seis d'o maitín, dica que trancan a las siet-ueito d'a tardi. Ixo sí, os chupitos d'aquí me matan, no por zorrera ni resaca, sino porque enristen dreito en o mío estomaco. Y tornando t'o colechio, en Eslovaquia s'ufre a posibilidat de descambiar horas extras, feitas por extraescolars u atras historietas, por días libres, y a yo ya m'han dixau ufrir una extraescolar de bachata que por agora ye estando tot un exito. 

Trobaba a faltar educación, y a experiencia en VISA estió a puntilla ta tornar ta ella y no deixar-la nunca más, u a lo menos, ixo digo agora. D'atra man, as condicions d'o treballo son sobrebuenas. Y Enrique y Willy teneban razón: amenistaba Europa, u a lo menos, ixo digo agora. Sobre Kosice y os suyos atractivos, que no'n son pocos, ya iré escribindo-ne. Y tamién he de decir que istas semanas he recuperau o reloch de mi pai y he mostrau firmeza y autoridat cara ta bellas personas que m'han feito muito mal. Sí, dimpués de bel par de anyos malos minchando mierda, pareixe que reviscolo y agora me toca minchar miel, u a lo menos, la he minchada mientras iste zaguer mes y meyo. Veyeremos quan plegue a fredor... 

Obituario: José Alberto León León

Tendría arredol de 12 u 13 anyos quan le dicié a o mío vecino Juan Antonio de descargar-se o Kalgan, plataforma de chuegos online de Marca, que yo emplegaba ta chugar a os escaques. Fendo una partideta con él, le dicié por o chat de salir a la finestra y saludar-nos, y pretemos a fer-lo. A machia d'a comunicación a l'inte escrita por una pantalla, machia que quedó imprentada en a mía ment, y que anyos dimpués se veyería magnificada con o Messenger, dimpués retes socials, y finalmente Whatsapp. 

Pero puede o virtual creyar amistaz? Cata que soi d'os primers que s'ha criau entre maquinetas, tenendo o mío primer ordenador con tasament 8 anyos -u talment 7-, un MSDos en o que caleba introducir bella programación basica ta executar bel chuego arcade alzau en disquettes de 5 1/4, pero mesmo asinas soi estau masiau tradicional como ta pensar que sí, que se pueden fer amigos virtuals. 

Dica que plegó un día en que recibié un correu electronico preguntando-me por as solucions d'un manual d'aragonés que publiqué en Zaguán, o repositorio virtual d'a Universidad de Zaragoza. Un hombre dito José Alberto León León me las pediba, y yo, que heba feito ixe manual con tot l'amor d'o mundo, pos m'heba ixublidau de treballar as respuestas. Le proposé de ir fendo os exercicios y yo le'n iba correchindo, aproveitando ixe treballo mutuo ta puyar en o rete un archivo de solucions a nombre d'os dos. Y asinas prencipiemos a tener contacto quasi semanal. 

José Alberto remató de fer os exercicios, pero luent d'aturar a suya pasión por l'aragonés, decidió d'escribir textos d'as suyas cursas y vivencias, y fer cantas. Textos y cantas que me ninviaba, alto u baixo cada mes, y que íbanos comentando. Y entre ixas linias, entrefilé un hombre humilde y bondadoso, chalanguero y con muita vitalidat, a qui le fue pillando carinyo, igual que se le pilla carinyo a personaches d'un buen libro, por muito que nunca no los haigas vistos en persona. 

Y ista relación en linia remanió mientras anyos dica que un día de veranos de 2018 decidié trencar a virtualidat y conoixer-lo en persona. José Alberto estió nombrau pregonero d'as fiestas de Valfonda, y astí que, tornau por vacanzas de Filipinas, pillé l'auto y me planté en ixe lugar de Monegros, an que tenié a suerte de compartir bellas horas con él, con a suya muller Teresa y con o suyo fillo Aznar. Dimpués, continemos con o contacto virtual dica fa tasament tres semanas, veyendo tamién por o camín os suyos videos en Youtube y o suyo programa en Charrín Charrán, baixo a perén ideya de fer-le una visiteta en Logronyo quan i tornase. 

No sé si debo considerar-me u no amigo de José Alberto, pero sí que puedo decir que le pillé muito carinyo a ixe hombre, igual que se le pilla a un personache d'un buen libro: José Alberto, sin buscar-lo, se convirtió en o protagonista d'o suyo libro, un libro que querió compartir con yo, t'a mía fortuna. 

Enta Hua Hin: a tranquilidat ye o que más se busca

Cata que a mía estacha por Tailandia ye de dos semanas, o 1 de setiembre prencipio a treballar en Kosice (spoiler!), y con tanto bochar d’un puesto ta l’atro, y con o estrés de rematar y prencipiar una nueva vida unatra vegada, o mío cuerpo se trobaba más y más baldau. Asinas que con varios días encara por devant en Tailandia, y sin garra intrés especial por os atractivos de Bangkok, ya visitaus, decidié d’ir t’un puesto de placha ta relaixar-me. En primeras pensé en Pattaya, famosa ciudat tailandesa d’a que muito se´n fabla pero que nunca no he visitau. Sindembargo, a fama de movida y con trafico, mena Bangkok, a suya reputación de prostitución, y os propios aloixes, hotels grans y apartamentos mica intimos, facioron que pensanse en atrás alternativas.

En istas que Luzieta me charró de Hua Hin, ciudat turistica más chicota en l’atro extremo d’o golfo de Tailandia. Me la miré una mica por o rete y feba muitas buenas farchas, tranquileta pero con bells restaurantez, mercau de nueiz y atras comodidaz occidentals, y os pres d’os hotels yeran muito más baratos, estando tamién aloixes más chicoz y intimos, millor ta relaixar-se. Asinas que o dominche malas puyar y no con guaires enerchías, pillé a mototaxi ta gara de microbuses de l’este, cerqueta de casa mía, y pillé un microbús ta Hua Hin sin garra complicación. Mientras asperaba, me miré por booking un hotelet spa con una piscineta que feba buenas farchas, y en menos de cuatre horas astí me planté.

I estié dos nueiz, y como digo, más que más ta relaixar-me y chitar-me en a tombadera d’a piscina, ficando-me-ie de cabo quan ta calmar a calorina. Marché tamién t’a famosa placha d’a ciudat, an que bi heba bares y restaurans y tamién ufriban actividaz como montar a caballo, pero no plegué a ficar-me en l’augua, pos yera porquiza. Se veyeba verde, y en os bardo d’a marguín se’n criaba asabelo de molsa y algas, o que chunto con a bruma d’as olas en l’arena, delataba asabelo de contaminación, que mesmo se podeba ixulufrar. Feremos la d’aquell, lo menos tiengo a piscineta de l’hotel bien maheta.

D’atractivos turisticos, nomás en visité o mont d’os monos u Khao Takiap, un penyón a la fin d’a placha de Hua Hin que ufriba envistas esparpallants, un mercau de peixes y mariscos, presidiu en a tuca por una pagoda, y a rebutir de monos, os cualos me fan respeto dimpuésde que una d’ixas bestias me se metese faruca en Da Nang, Vietnam, fa cinco anyadas. O puesto no ye imprescindible, pero no ye mal ta visitar si yes aburriu, cosa que no ye difícil si pasas más de tres días en Hua Hin. Yo i puyé, facié as tipicas fotos, y charré con Luzieta que chusto en ixe momento me gritaba por telefono. O caso ye que entreteniu en a conversa, un d’os macacos s’i amanó sin yo parar cuenta y prencipió a esforigar a cartera an que teneba as gafas ta capuzar-me-ne, os diners y a toballa. Bien que m'ixorrontó! Y o bicho no quereba soltar-la, asinas que l’habié de chipiar con a redoma d’augua que levaba alto. Por fortura, no se metió agresivo y astí quedó l'anecdota, pero lo dito, no confito yo en ixos animals. A placha de Khao Takiap yera muito más escoscada y cuasi me´n i fico, pero en no haber uembra, y sobre tot, en tener a os monos que en cualsiquier momento me podeban furtar as mías cosas, a la fin m’estimé más de continar emplegando a piscineta de l’hotel.

Dillá d’o mont d’os macacos, de nueiz visité o mercau nocturno, no pas por fer turismo, sino ta sopar bella lifara d’as muitas que’n ufriban. Y fueras d’ixo, tamién visité a gara de trens centenaria, muito polida y seguindo o estilo tipico tailandés t’as garas, que achunta o tradicional tai con o cosmopolitano-industrial anglés de sieglo XIX, y en a que me despidié de Hoa Hin, pos bi torné en tren, muito más barato y ufrindo de vez os repolius paisaches tailandeses, que de cabo quan, con pueyos ixarramaus por planas, me pareixeban vietnamitas. Ixo sí, sin d’aire acondicionau, i torné a sudar litros y litros.

Hoa Hin no ye un puesto imprescidible, pero me fació honra t’o que quereba: tranquilidat. Y me fació honra porque la yera buscando, pos tampoco no ye un puesto excesivament tranquilo, trobando-me asabelo de prostitución, cosa que no m’asperaba dimpués de leyer as experiencias de turistas en o rete. Si ixo yera asinas en Hoa Hin, nian quiero contar o que se trobará en Pattaya. A yo, os dos dietas en un hotelet chicot pero acullient me facioron honra ta recargar una mica as baterías, pos en una semana me planto en Europa y en dos prencipio una nueva aventura laboral, y siento que voy con enerchías baixas dimpués de tanto trachín emocional y fisico.

Enta Ayutthaya: a capital historica tailandesa

Ayutthaya ye o nombre d’o reino que se corresponde a l’actual Tailandia entre os anyos 1351 y 1767. Con una potencia militar radida, entre os reinos de Borneo y Khmer, a estratechia d’os monarcas Ayutthaya t’a suya supervivencia estió a d’a una apertura externa, con potencias asiaticas y occidentals ficando-ie bases comercials y fendo acuerdos con os gobernans locals, recurrindo istos a unos u atros si belún se’n saliba d’o tiesto y miraba de pillar o poder. Y con iste feble equilibrio, as sublevacions de nobles locals aduyaus más que más por o reino de Borneo yeran continas, o que precisament levó a la fin de Ayutthaya en 1767, y a l’estableiximiento de l’actual monarquía en 1782, monarquía que seguindo a mesma filosofía, aconsiguió evitar a colonización dreita d’o país.

Y Ayutthaya tamién ye o nombre d’a capital d’iste reino, a tasament 64 kilometros de Bangkok enta l’interior, ta privar enrestidas foranas por mar, pero encara bien comunicada gracias a o río Chao Phraya. Y ista ciudat, encara que deixase d’estar a capital d’o país fa cuasi 250 anyos, encara ye gran y alberga una d’as alfayas tailandesa: os templos d’Ayutthaya. Seguindo as modas d’o sudeste asiatico, fendo un mezclallo de politica y relichión, cada monarca mandaba fer o suyo propio templo como sinyal de poder divino. Y, sin rubor a reconoixer-lo, lo feban seguindo a estetica y a filosofía de Angkor en Camboya.

Canso de Bangkok y con una afición bien gran por l’arqueolochía, marché t’a gara de trens de maitins ta prener-ne o que leva ta Ayutthaya. Manimenos, cuan i arrivé cata que o tren yera pleno, y caleba asperar hora y meya a o proximo. No teneba guaires opcions, asinas que i asperé lo que a la fin serían dos horas, porque plegó rezagau. No yera precisament l’onico turista incomodau por a situación. Yo quereba fer a cursa en un diya, y mal prencipiaba, encara que tamién teneba en o tozuelo fer una nueit en bell hotelet d’a ciudat si o puesto mereixeba. Preso o tren y arrivau en Ayutthaya ya en o meyodiya, paro cuenta que m’he ixuplidau d’o pasaporte, y sin ell no se puet logar moto ta arrecorrer os templos. D’atra man, a opción de bicicleta no me convenceba, pos a fuixina y a solarenca yeran matadoras, y m’estimaba más d’ir a piet con un chapero explorador recién mercau a un viellet mahet que miró d’amostrar-me bellas parolas de tai.

Resignau por o retraso acumulau, pillé una mototaxi que m’amproximase t’os templos, y preté a caminar y a veyer os templos que me dese tiempo, sin prisas pos poco se puet fer contra o tiempo. A la fin, visité Ratcha Burana, Maha That, Thammikarat, Phra Si Sanphet, Lokkayasutha, Phra Ram, Signharam, Som, Ubosot, y rematé o lusco en Luang Chi Krut. Nomás caminando y pillando una mototaxi de Lokkayasutha ta Som, y unatra dimpués ta tornar t’a gara de tren, aconsiguié fer tot o que quereba en seis horas, chusto a tiempo ta prener un d’os zaguers trens ta Bangkok, pos a ciudat moderna tampoco d'Ayutthaya no pareixeba ufrir garra cosa especial mientras a nuei. Ixo sí, rematé con as garras baldadas y perdendo litros d’augua. Como fita especial, en Maha That se troba o tozuelo d’un buda entrascada entre as rides d’un arbre: en primeras dita capeza yera baixo tierra, apedacada en una d’as barallas entre Ayutthaya y Borneo, y con o paso d’o tiempo, mientras as rides saliban d’a tierra, apareixió o famoso tozuelo entreligau entre ellas. En belún d’os templos tamién ufriban paseyos en olifant. Pero a yo o que más goyo me fació estioron os chicoz templez a’l canto d’a escuela local, un d’ells piramidal de tot, an que os criallos chugardiaban y s’encorreban trepuciando por os suyos parez. M’i posé bells minutos, los veyé chugar, me facié un suco, y alivié ixa Asia que tanto m’enamoró cuan i arrivé fa siet anyos y que tiengo a sensación que ye dispareixendo.

O puesto yera bien apanyau, con muitos parques aprestaus arredol d’os templos, que más chicoz que no os camboyanos, imitaban o suyo estilo. Arrivar-ie yera complicau y o puesto no ye especialment vendiu como reclamo turistico, pero ixo fa bien, pos evita a masificación. O conchunto monumental yera gran, d’o tamanyo d’una ciudat chicota, pero nano si lo contimparamos con o conchunto de Angkor, una autentica provincia. Si os templos tailandeses son entre parques bien aprestaus, os camboyanos son tresbatius en metat de chunglas, y si en Tailandia ye difícil trobar uembras, sucos y biroya, en Camboya ye tot millor aprestau t’o turismo, tamién a ciudat moderna ta fer bella cosa mientras a nueit. Sí, Ayutthaya no ye Angkor, pero ye que Angkor ye muito Angkor, y asinas mesmo lo reconoixen os guidas y os letreros turiscos ayutayanos: admiten sin rubor que antismás y tamién agora buscan a imitación de Angkor, estando que Angkor ye incomparable. Y precisament ista humildat en a explicación d’o suyo patrimonio fa que Ayutthaya, que de por sí ye una alfaya, encara tienga una valura extra.

Tornando ta Bangkok: Asia ye cambiando u soi yo?

Despediu de Filipinas o primer viernes d’agosto, Luzieta y servidor aproveitemos ta pasar bells diyas en Bangkok, a capital tailandesa. En primeras no yera o nuestro destino favorito, pos Luzieta ya i heba estau dos vegadas antis y servidor una, pero por pre d’o vuelo, y tamién por a facilidat t’o proximo viache ta Kosice (spoiler!), a la fin triguemos a capital tailandesa. Antimás, a primera vegada que i estié me fació asabelo de goyo, en Asia as cosas cambean ascape, y Bangkok yera una d’as dos opcions que teneba en prencipiar o periplo asiatico allá por 2017, asinas que no bi heba traza más simbolica de rematar ista aventura de siet anyadas.

Como Luzieta no podeba estar que o cabo de semana, no triguemos que tres puestos ta visitar: a pagoda dorada (wat sa ket ratchaworamahawihan), que me fació muito goyo no pas por o edificio en sí, sino por o trachecto ta plegar-ie en o barco-bus local; o mercau flotant de Taling Chan, que sin deixar d’estar una turistada, a yo m’heba feito goyo cuan lo visité y Luzieta nunca no bi yera estada, y o macabro museu de Siriraj con cadabres y calois, que estió o que más m’impactó a primera vegada que visité Bangkok.

Podiemos disfrutar d’os dos primers puestos sin problemas, veyendo un lusco repoliu en a primera pagoda, que alto d’un mont, ufriba bellas envistas bien romaticas de buena cosa d’a ciudat, y fendo a curseta en barquet en Taling Chan, asabelo de pincha y an que encara no m’explico cómo as familias que viven en os casichones sobre as canals y galachos encara sonriden y saludan a toz os turistas que pasan en canoas cada cinco u diez minutos toz os días. Paranoico yo, estoi que les habrán de pagar por ixos, y no poco, pos ye un conyazo saludar y saludar de contino cada día. Ixo, u son verdaderament felices, a saber. A o museu macabro de Siriraj no pleguemos a tiempo, pero no nos n’importó guaire, pos os dos ya lo hébanos visitau enantis, y por contra, nos vagó d’ir de nueiz t’a carrera Khao San, mercau de nueiz turistico y rudioso, pero entreteniu y sin prostitución. Ixo sí, nos cobroron cinco euros a cadagún por un chupito de tequila, y bella cosa parellana nos pasó a l’altral nueit en un bar macabro-barroco muito bien decorau a man d’o nuestro airbnb. Sí, Bangkok teneba puestos muito pinchos, pero os pres son puyaus muito muitismo dende a zaguera vegada que la visité.

O dominche Luzieta habió de hopar ta Manila, o yo aproveité ixa semana ta mirar de prener-le o pulso a la capital siamesa. No pas ta fer as tipicas turistadas de palacios y pagodas que ya veyé fa cinco anyadas, sino ta caminar por partis más locals. Asinas, en os arredols d’ometro Siam, en o centro, m’i fiqué por biquez y callizos, d’o poco humilde que encara en queda en a redolada, y se notaba que, sin estar rico, heban apanyau a más grant parti d’as fronteras mientras istos zaguers anyos. Un d’ixos biquez ufriba una replaceta, bells callizos y un antigo edificio en ruinas toz ells con grafittis, dando-le un toque urbano-moderno: yera Chaloemla. Y atro día visité os parques de Benchatti y de Lumphini, no pas por turismo, sino porque o mío cuerpo yera esboldregau de tanto movimiento y estrés, y amenistaba puestos an que aliviar aire puro (u millor dito, una mica más escoscau) y tener menos rudio. Tamién visité o bico chinenco de Talat Noi y caminé por a canal de Ong Ang, un mercau de trastes y biroyas, dica arrivar en o fuerte de Mahakan, que no ufriba garra cosa especial fueras d’un parquichuelo bien acotraciau. Tot ixo baixo una fuixina que me feba cacegar augua a canals, y que rempliba con auguas de coco tailandés (chicot y una delicia), de fruita d’a pasión y de canya de zucre.

Atro diya, más por aburrimiento que por pasión, visité o museu Erawan, que a suya linia de metro yera a mesma d’a de casa. En verdat, yera una mena de parque con referencias a la relichión hindú y con una colección d’estatuas hinduistas que iban dende o sieglo IX dica o sieglo XVIII, en una capilleta alto d’o edificio principal. O simbolo d’ixe atractivo turistico yera una estatua chigant d’un olifant de tres tozuelos, pero en verdat, no ye una fita imprescindible, y menos ta servidor, que s’ha cansau de veyer ilesias, pagodas y edificios relichiosos de toda mena mientras istas zagueras siet anyadas. O que sí que me fació más goyo estió o mercau nocturno de Srinagarindra, no guaire luent de casa, ubierto en 2015, y que, describindo-lo rapidament, ye como si mirasen de fer un Candem Town de Londra en o parking norte d’a Expo de Zaragoza: un mercau alternativo con ropas raixosas, antigüedaz, biroya, buens bars ta fer una biera relaixau, y mosiquetas tanto animadas como relaxants. Buen rollete local, no pas turistico.

Como podez veyer, en iste post no m’he centrau tanto en a descripción d’os puestos, pos muitos d’ells ya los describié a primera vegada que los visité, y os que no, pos tampoco no fan vez. Sobre sensacions, m’he trobau con una Bangkok muito esferent a la que visité fa cinco anyos, con muitismos más foranos en os puestos no turisticos, seguntes me dicióLuzieta, por l’apertura d’o país ent’os teletreballadors. Cuasi no veyé mosens budistas, y no sé si porque a relichión ye baixada muito, u porque a primera vegada que visité a capital me centré muito más en os puestos turisticos. Atra d’as novedaz ye a excesiva presencia de locals de venda y consumo de mariguana, legal ta emplego recreativo en o país dende chunio de 2022, y a disminución d’a prostitución. M’he trobau con un turismo muito más profesional, deixando as falsas sonrisas a un costau y ufrindo buen fer, y en as dos semanas que i estié, dengún no me miró d’escular. Y ye que, en iste sentiu, se nota que levan una decada u más d’avantalla a atros países como Vietnam. Y prou que sí, os pres son puyaus muito, estando difícil de trobar una redometa de biera por menos de dos euros. Isto zaguer, que tamién m’he trobau en Manila, me tien una mica desconcertau, porque trobo os pres mesmo más caros que no en muitos puestos de Espanya, pero claro, somos charrando d’a Espanya de fa siet anyos, y a lo millor si contimparamos os pres de Asia y Espanya en o present, encara contina habendo una esferencia clara entre os dos puestos, u no. No lo sé, pero lo sabré en breus.