30.9.06

¿Raspa?

A soziedat estatal expoagua dio a conoxer ayer a raspa, o nuebo compañero de fluvi en a promozión d'a expo d'o 2008 (no no, raspa no ye o siñor d'o retrato, ya me fería goyo a yo. O siñor ye un terrorista que ye en prozeso de dialogo con l'alcalde).

Se prisentó ayer, durante l'auto de presentazión d'as fiestas d'o pilar (en a carpa que ye dezaga d'a ofizina d'informazión y turismo d'a plaza d'o pilar), an que tamién se dizió que en o pregón, fluvi tendría una carroza ta ella. Pero no s'han feito cuenta encara de que fluvi ye secuestrada!?

Seguntes os promotors raspa ye un "rega", un ser d'augua puerca que "le fa goyo chugar y sobresale por a suya inozenzia y bondat". Me demando si se puet-estar más pijauto...

Agora bien, iste nombre tendrá bella relazión con l'aragonés (d'estar que si a rispuesta, podrían haber eslechiú un nombre más aragonés como... ¿majico?) Por qué no s'ha botau un nombre ta iste atro enchendro?... Cada diya me refirmo más en a ideya de que feremos a risa debán de tot lo mundo.

A lo menos cal dizir que bi ha cosas buenas. Abremos aragonés en as fiestas y en o pregón d'Amaral. Cuan sigaz, ez d'ascuitar a zaguera frase. De seguras que a muitos de busatros tos ferá goyo.

27.9.06

Pilars 2006


Ya podez beyer en a pachina web d'o conzello de zaragoza a programazión d'os pilars.

Iste año, destacan os sobrebuenos conziertos gratuitos que se ban a fer en toda zaragoza, como lo d'a colla mosical "a orella de Ban Gogh" en o paseyo independenzia o diya 11. Tamién bi ha conciertos de pagos sobrebueno, como o tributo que se ba a fer a ixo rai. No tos los perdaz.

Tamién se ferán autibidatz tradizionals d'as fiestas como son chigans y cabezudos, danzes tradizionals, a ofrenda floral (d'o pior que bi'n ha, ixo de gastar-se una ripa de diners por meter bella a un birchen que d'ecsistir pensaría que millor os diners d'as flors t'as chens que no tienen cosa...), baquetas...

No dixez d'aprofitar istas fiestas, con as carreras emplas de chen, con os ninos dibirtindo-se y con a chobenalla tamién, prou que sí. Pero tot con considerazión y uso de razón... ixo que en ixos diyas gosa de mancar-mos.

25.9.06

Primer foro internazional sobre a guerra d'a independenzia


En istos diyas se ye fendo, grazias a l'apoyo d'a unibersidat de zaragoza y d'o ministerio d'esfensa iste foro ta tratar d'a guerra que tenió lugar dentre 1808 y 1814 contra os franzeses. En istas chornadas que escomenzipian güe y plegarán o miércols serán espertos sobre o tema prozedens de francia, italia u mesmo polonia.

As charradas y trobadas se ferán en puestos unibersitarios (güe maitín en a biblioteca María Moliner) y a zaguera o miércols en l'antigua capitanía cheneral d'aragón.

Os zaguers diyas escribo como si o blogs se tratase de telegramas, pero tampoco no adubo ta más...

24.9.06

S'ubre a ziudat zeltiberica de segueda

Güe ista ziudat zeltiberica que se troba amán d'o lugar de mara ha ubierto as suyas pueras en o programa "bibe a istoria". Ta poder amostrar-la s'ha triballau en os meses de chulio, agosto y setiembre con o patrozinio d'a DPZ, o INAEM y a direzión cheneral de patrimonio cultural d'o gubierno d'aragón.

Destaca en o puesto arqueolochico o buen emplego d'o cheso. Toda l'esposizión tendrá fuellas y mesas informatibas t'o correuto entendimiento por parti d'a chen.

23.9.06

Fuga d'azido sulfurico en l'almozara


Un tren de mercanzías que beniba de d'asturia y con plegada en tarragona tenió una fuga d'azido sulfurico, sustanzia prou peligrosa, en a estazión de mercanzías de l'almozara.

Os bombers marchón de traza rapeda ta embozar a fuga: o feito estió ayere a als 13:45 y plegón de embozar-la a las 15:15 con toda seguridat. Dimpuesas, o tren continó o suyo biache enta tarragona sin garra problema. Concretamén s'encaminaba ent'a refinería de repsol.

Fa uns diyas charrabís en o chemeco d'as parolas charró d'a creyazión de nuebos blogs: o fardacho asasino, cordón trenzau, acrataire y remenches los he mesos en faboritos y tos los recomiendo por a suya curiosa informazión y cutiana autualizazión. S'adiben asinas a lo propio chemecos, amelia y esparbel rondador. Sobrebuena a creyazión de blogs d'autualizazión diyaria y con temas tan intresans en totz els.

No quedan diyas de berano...


En zagueras no he puesto autualizar o blog de traza diyaria como gosaba de fer... y ye que os diyas de berano plegón y agora os quefers crexen asabelo. De todas trazas no ixuplidaré o blog y de cabo cuan (a poder estar un diya par d'atro u uno de cada tres) i ficaré bella cosa.

Qué se puet dizir d'a semana? Tronada fura a d'ayer por a maitinada, turbazions politicas dizindo que tal partiú ye responsable d'o pior atentau terrorista d'o estau español, problemas sozials como l'arribada masiba d'inmigrans...

En o plano indibidual suposo que toz con os nuestros estudeos u triballos, as nuestras familias, amigos, ocupazions...

Pero en bel inte me demando... Cuálo ye o fundo de tot isto? Curiosa demanda... Qui a trobau bella begada a respuesta? Garra presona. Curioso o feito... De cabo cuan pienso que Calderón teneba razón escribindo "A bida ye sueño"...

19.9.06

A carrera d'o gancho


Beigo en as carreras de zaragoza uns cartels bien feitos con as parolas "la carrera del gancho" y debaxo aparexe a traduzión d'ista frase a tres luengas: arabe, aragonés y unatra que no se bien cuála ye pero que estoi que puet-estar caló. Ya nomás por o detalle de ficar-lo-ie en aragonés merixe que escriba isto y que si podemos mos bi amanemos.

Por o cartel me pensaba que yera una mena de borina en as carreras d'iste bico de zaragoza, y güellando en a suya pachina web beigo que asinas ye. Ista ye a segunda añada que se fa (no conoxeba que l'añada pasada s'eba feito) y seguntes els ye "una proposa artistica de dinaminzazión y partizipazión sozial d'o gancho de l'area d'azión sozial y educazión d'o conzello de zaragoza con a direzón artistica de pingalirana coordinada por cadeneta". En o fundo de tot isto se troba a fundazión Federico Ozanam.

Dita carrera será iste sabado en as carreras d'o bico: as prenzipals autuazión serán en a plaza santo domingo encara que se a muitas d'ellas pasarán por todas as carreras d'o bico. Se ferán conziertos, malabares, payasos, danzes, chigans y cabezudos, esculturas, mimetica...

Fa goyo de beyer como se fan istas cosas que fan que en puestos de chen pobre se trobe más bida que no en atros... Disiempres que beigo bella cosa asinas digo o mesmo: a beyer si se contina asinas!

18.9.06

Aparixe un linze en o patio d'una casa d'andújar

O feito ocurrió o pasau diya 14. A las 11 d'o maitín o SEPRONA rezibió una gritada telefonica d'un siñor alarmau por a presenzia en o patio d'a suya casa d'o que parixeba un linze, a cuala ye en o norte d'a ziudat pero en l'area urbana. Cuan os miembros d'o SEPRONA marchón ta casa d'iste siñor beyoron que no mentiba, y que de berdat bi eba una cría de linze de 4 meses.

Cuan lo pillón lo dioron a los teunicos d'o ministerio de meyo ambién, os cualos lo lebón enta o zentro de cautibidat de linzes d'azebuche. As prebas que se le fizión dictón que o estau de l'animal yera bueno, pero tampoco no se espezificó más.

O siñor que gritó t'o SEPRONA ha rezibiú as grazias d'os cuerpos y organimos que han partizipau en o prozeso. A guardia zibil ha anunziau o escomenzipio d'una imbestigazión ta ecsplicar as causas d'o feito.

17.9.06

¿Ye a represión a soluzión?


A ministra de sanidat y consumo ha dezidiú meter-se fura y aturar os "botellons" d'a chobenalla en meter-ie una nueba lai que probablemén será operatiba a metat de l'añada benién. Tot isto lo fa en tratar-se d'un problema de salut publica con consecuenzias no conoxidas encara en o esbenidero.

Seguntes ista lai a piñora t'os pais si o suyos fillos son bebendo en a carrera u en cualsiquier puesto publico (bars, discotecas, peñas...) será de 600 euros. Os adultos tamién se beyen afectaus por ista lai, pues no se podrá bender bebidas alcoholicas de garra mena en garra puesto dende as 10 d'a nuei dica las 8 d'o maitín.

Atra mena de puestos an que se i bende alcohol pero con atras funzions u finalidatz (como pueden estar establezimientos etnolochicos) abrán de tener una lizenzia espezial y tampoco no podrán bender cosa t'os menors de edat. Tampoco no se podrá beber ni bender alcohol en puestos esportibos cuan bi aiga ninos u chobens.

Agora bien, tocando-me o tema prou, encara que a lai no me afeutará... en caso de que se faiga a lai como parex estar... ¿se cumplirá? ¿u será una chanada como l'autual lai anti-tabaco? Ye berdat que o botellón causa muitos problemas de salut y tamién fa fastio dentre as chens que biben amanadas t'os puestos an que se i fa (güello, a chen que gosa de dixar emporcau tot son ninos de 13-15 añadas, a chobenalla más mayor empuerca, pero no pas como lo fan ixe atro estrauto d'edat), ¿pero ye soluzión a mano dura? No creigo... Puet-estar que a soluzión no siga mirar-se de que os menors no beban sino más bien ufrir atras alternatibos d'ozio, sin bedar-les beber, pero fendo que lo faigan con considerazión... y parando puestos ta que no faiga fastio dentre a chen que i biba.

Que os menors beban no ye nuebo (totz emos sentiú a los nuestros mayors charrar d'as suyas borinas cuan teneban 15-18 añadas u menos)... o que sí que ye nuebo ye que se faiga tanto y con tan poco rispeto como agora. Bella begada parex que bel choben no bibe que ta beber: astí ye an que yo beigo lo problema...

En fin, ya beyeremos en qué para ista lai... pero ya digo que me pa que será bella chanada parellana a la lai anti-tabaco...

16.9.06

Sabadet... por fin!

Arriba o sabado, dimpués d'istos puercos diyas d'escomenzipio de treballo u estudio plenos de plebia y fuellas marrons en a zera y que mos siñalan que o prenzipio d'os diyas fredos acucuta con siñals como ixa fridor que dentra por os pietz y contina por a esquena y o peito ta plegar t'o gargachón cuan o zierzo bufa...

Bueno, a lo menos parixe que l'orache ye estau fachendoso y que iste cabo de semana mos rispetará, dixándo-nos disfrutar de bellas cosas más propias d'o estiú, como fer una gambadeta sin gambeto... lastima no que bi aiga más diyas de piszina. A lo menos disiempres ye o consuelo de que os pilars son astí y que o ibierno tamién tiene as suyas cosas buenas: a beyer si ista añada ubren luego as pistas d'esquí.

Disfrutar iste cabo de semana de buen orache y no guaire estudio u de triballo, uno d'os pocos que estoi que quedará en a resta de l'añada.

15.9.06

A penchincha zebra plega ta zaragoza

Ista mena de penchincha, conoxida por aparixer muitas begadas en os meyos autonomicos, ye estada deteutada en o meandro de ranillas. Ya dende fa añadas creya problemas en os entibos como lo de mequinenza y menaza con estendillar-se por tot l'ebro y, a pesar de que as administrazions s'en han feito t'aturar-la os resultaus no son estaus guaire buenos. Iste ye o primer bez que se troban auguas alto de mequinenza y ribarroja, donde ya ecsisten amplas rechions d'iste animal en estau adulto.

Ante iste feito, a confederazión idrografica de l'ebro (CHE) ha combocau una trobada ascape d'a colla de triballo teunico d'a penchinca zebra con ripresentans d'a CHE, d'o gubierno d'aragón, d'a lleneralitat catalana y d'a lleneralitat balenziana.

14.9.06

Una siñora mallor mira de furtar un banco

O feito estió en a ziudat de chicago: a siñora de 79 añadas, que bestiba un gambeto negro y con una bisera an que i meteba "princess", drentó o biernes en dito puesto con una pistola de platico y mirando-se de fer miedo en os treballadors d'a sucursal, os cuálos nunca no s'amedrentón y creyón estar parti d'una chanada.

Cuan drentó y charró con o primer triballador que beyó, dizió no poder charrar guaire bien porque eba tornau d'o dentista, pero ascape se metió fura demandando 30000 dolars amoninico.

O siñor gritó por alarma sin rudio a lo guardia, o cuálo aturó a la muller. Ista no enristió y dixó lebar-se t'a garchola sin ufrir resistenzia. Agora mesmo se troba en libertat porque a suya filla ha bosau a piñora de 4500 dolars.

Manimenos, si a siñora ye dita culpable abrá d'estar en garchola 20 añadas.

13.9.06

Naxe en zaragoza un nuebo puesto ta l'arte choben

Dito "corner" (bien podían aber eslexiú un nombre en aragonés) ye un proyeuto feito ya en atras ziudatz como barzelona y con muito ecsito. Os chóbens creyadors ferán as suyas obras en un puesto esferén y ubierto. L'auto d'escomenzipie será güe a las 7 oradas d'a tardi en o "puesto ta l'arte de zaragoza" en plaza aragón numero 4. O proyeuto, chestionau por a "obra sozial caxa madrit" deseya estar una aduya t'os chóbens y o suyo arte en a comunidat aragonesa.

Ta beyer-lo no cal drentar t'una cambra d'ecsposizions, sino que tot lo que pase por astí podrá beyer-lo, amanar-se y obserbar esferens interpretazions qu'os artistas ban a reyalizar dende güe dica chunio de 2007.

Os primers siet artistas que ban a triballar en iste puesto con un proyeuto dito "O güello que tot lo beye" son David Israel, Vicky Méndiz, María Enfedaque, Fernando Martín Godoy, Raquel Muñoz y Cristina Silván.

Se agradex que se faigan ista mena de cosas, mos cuaquen o no, y prou que caldrá beyer-las. Sisquiera se continase asinas a ormino.
Aprofitar tamién a leyer as nuebas tocans a l'academia de l'aragonés en o chemeco d'as parolas.

12.9.06

Prenzipia o VI congreso iberoamericano de zienzia, tecnolochía y chenero


A unibersidat de zaragoza ye parando iste congreso que dende o diya 11 dica o diya 15 chuntará a 235 ecspertos d'a peninsula y latinoamerica. Ista añada o problema alazetal que se planteyará será a situazión d'os inbestigadors en istas rechions y más que más d'as mullers, que nunca no puyan por denzima d'o 14% de chen que s'adedica a istas labors con fama de catén, encara que muitas begadas no tiene por qué estar asinas.

L'ochetibo d'iste congreso, que en zaragoza cumple a suya seisena edizión, ye empentar a partizipazión y reconoximiento d'as mullers en as zienzias en cheneral. Se quiere amostrar de traza bisible a suya situazión, empentando una imbestigazión que risponda a las suyas necesidatz y fendo recomendazions a cada país ta fer que ellas tiengan o puesto que se merixen.

Por desgrazia no ye estau un congreso muito publizitau... pero tamién ye berdat que bel cartel s'ha puesto beyer en paseyo independenzia y que no ye un congreso dibulgatibo, sino espezializatibo.
Manimenos, siempre ye bueno que se faigan ista mena de cosas en a nuestra ziudat.

11.9.06

Güe fa zinco añadas...


Como totz sabemos (u si no, ya mos lo remerarán en os meyos) güe fa zinco añadas d'o pior atentau terrorista que s'ha feito por agora. Totz remeramos que mils de presonas morión, muitas quedón seriosamén feridas y que as laquias continan estando en a as parentallas y amigos d'os muertos y en a soziedat oczidental en cheneral.

Muitos son os ditos que s'han creyau dende allora tocans a isto: Nostradamus, OBNIs, mensaches secretos en a biblia u en o corán... y prou que totz falsos (u millor dito, sin garra fuerza ochetiba).
Manimenos bi ha bel feito curioso: as autoridatz norteamericanas trobón a zinta de bideo an que se i beyeban os terroristas en nomás 5 oras (cuan ixo gosa de tardar diyas), as caxas negras nunca no se son trobadas, o primero que se trobó drente o chandrío estió o pasaporte de Mohamed Atta (bella cosa que me pa imposible, pues dimpués d'una ecsplosión asinas o papel de seguras que se crema), a contimparazión con o "maine" por parti d'un senador que poco dimpuesas aparexió asasinau...

Dixando difueras istos feitos, o que tiengo platero ye que o primero que femos ye carrañar-mos cuan pasa bella cosa asinas: pero (y suposando qui aigan estau ixos a los que se diz culpables) ¿nusatros no tenemos garra culpa? Puet-estar que ixas presonas fazión o que fazión ye porque se les han acotolau a parentalla con bombas, se les ha espleitau triballando en condizions infra-umanas nomás ta que nusatros tiengamos muito d'o que tenemos, se les ha faltau, se les culpa de tot...

Agora bien, ¿nusatros que podemos fer? De primeras y sin pensar guaire me se ocurre, por exemplo, gastar más diners en paliar a fambre en o terzer mundo que no en dar de minchar a las nuestras mascotas. Pienso que ye muito fázil quexar-se d'as cosas y no fer cosa... (y o primero que fa ixo he de reconoxer que soi yo)

10.9.06

Un terzio d'os planetas conoxiús difueras d'o sistema solar podría tener bida

Istos son planetas parexiús a la Tierra, con profundos y granizos ozeanos y con muitas posibilidatz de tener bida, seguntes dizen as unibersidatz de colorado y pensilvania en o zaguer numero d'a rebista "science".

Iste estudio s'endreza enta os planetas ditos "jupiter caliente"(que son un terzio d'os conoxiús en cheneral) por as suyas granizas midas y por estar muito amanau t'a suya estrela (más encara que mercurio a lo sol).

Seguntes istas unibersidatz, os contrastes de temperaturas y de fuerzas grabitatorias que se i dan, orichinan granizas turbulenzias y mobimientos que ferían posible fenomenos de l'orache prou parellanos a los de nuestro planeta, como plebias d'agua u tronadas, creyando ozeanos an que ye muito posible a presenzia de bida.

8.9.06

Una fosalero queda apedecau en una fuesa que yera fendo


O protagonista, de 62 añadas, yera triballando en o fosal de zwolle en olanda.

En parixer, cuan yera fendo una fuesa a carreta con que triballlaba s'esbulcó con a tierra, y o fosalero, qui yera esfonsando drento d'a fuesa, quedó apedecau con o tozuelo protexiú por a propia carreta.

Ascape atro triballador d'o fosal se fizo cuenta d'o que eba pasau y aduyó a lo suyo compañero. Le quitó d'o tozuelo a carreta y a tierra ta que podiese respirar. Desenronar l'ombre lebó una ora y meya, pero a la fin quitó d'a fuesa con nomás un bueño.

Aprofito tamién que ez de beyer os nuebos bideos tocans a l'aragonés d'agüero de charrandotb tal y como diz charrabís en o suyo blog chemecos d'as parolas. Tampoco no tos podez perder as nuebas sobre l'academia de l'aragonés tamién ditas en ixe blog.

7.9.06

As mayusclas

Bellas presonas m'han demandau por o emplego que foi d'as mayusclas, pues parex que las i fico cuan me peta.

Yo, presonalmén, considero que no bi'n ha cosa más importán en o mundo que o ser umano, y por ixo dezido no i meter que en mayusclas os nombres d'as presonas. Asinas, os azidens fisicos como "pirineo" u "ebro", as creyazions politicas e/u istoricas como "españa" u "aragón", as localidatz u os entes cuya ecsistenzia no ye demostrada de traza empirica como "dios" dezido meter-los-ie en minusclas, pues ta yo no tienen a importanzia que ye menester.

También foi serbir as mayusclas t'as siglas, ya no por custión ideolochica, sino más bien por custions prauticas.

Ta rematar, demando sincusas porque de cabo cuan no cumplo isto que digo, pues me soi feito a emplegar-las con os regles que a totz se mos han amostrau.

6.9.06

Prenzipia a puenda tiatral en zaragoza


Tos aimans d'o tiatro ayer se prisentó a nueba puenda añal, a cuala prenzipiará en o prinzipal maitín chuebes, con o segundo ziclo d'operas y zarzuelas. A lirica ye asinas l'apuesta más importán d'ista begada, encara que tampoco no mancan compañías aragonesas, an que se'n dan as folcloricas.

Ista añada o tiatro escomenzipiará más que más con zarzuelas ta continar con atras tres obras d'opera. José María Damunt, direutor d'o tiatro lirico de barzelona y os 26 miembros d'a suya orquesta, será l'encargau d'endrezar o biernes y o sabado "marina", que tien l'aduya espezial d'o tenor Ignazio Enzinas. O domingo se meterá en escena "a canta d'o xublíu".

A lirica continará dica otubre: "don pasquale" de euroszena, "o rai que enrabió" de opera2001, "o güespede d'o sebillano" y "o barbero de sebilla" d'a compañía d'opera romantica, y "o dúo de l'africana" de conzertoXXI.

5.9.06

¿Qui ye o esculabolsas?

L'Achencia Catalana de Consumo (ACC) ubrió ayere un ecspedién informatibo a ryanair dimpués de que se faziesen 150 piñoras por parti de presonas que deziban aber-se sentiú embelecadas por a polemica publizidat qu'ista compañía aérea de baxos pres fazió en Barcelona.

Una ripia de presonas marchó t'a plaza Cataluña d'a capital catalana ta conseguir uno d'os billetz d'abión que prometeban regalar t'os que lebaban pegallos y pancartas an que se metiese en buen puesto ista interpresa y en mal puesto a ibera. A la fin a compañía s'esbarrancó y muitas presonas se quedón sin o suyo billet.

150 presonas dezidión ir t'a siede d'a ACC ta prisentar una piñora. Ryanair s'ha desincusau y ha dito que ufrirá atros 1000 billetz gratis t'as primeras mil presonas que nimbien t'a els un correu eleutronico con os suyos nombres y adrezas. Poco dimpuesas, els mesmos reconoxión que no teneba garra manera de beyer a chustizia en o prozeso con respeuto a las presonas que de primeras se quedón sin billet.

4.9.06

Agassi s'en ba

O tenista Andre Agassi dexó a profesión ayere, con 36 añadas, cuan perdió con Benjami Becker en o torneu d'a suya tierra. Encara que intentó endurar tot lo posible, no podió continar más por dulors y por o suyo estau fisico, prou tocau dimpués de 21 añadas adedicau a lo suyo treballo.

Agassi rezibió l'almirazión de compañers d'el, como Rafael Nadal u Roger Federer. Antimás se le fazió una obazión de 5 minutos por parti d'as 23000 presonas que i marchón a beyer-lo. Sin dandalo, una gran despedida t'una presona que lo ha feito tot en iste esporte.

Tos recomiendo tamién que leigaz o chemeco d'as parolas, con notizias sobrebuenas e intresans como a creyazión d'as "galescolas" u o concurso de relatos curtos que ye fendo l'asoziazión a enrestida.

3.9.06

Os malalzaus crexen en zaragoza

O sozdelegau d'o gubierno de zaragoza, Juan José Rubio, dizió que o numero de malalzaus en a capital no ha crexiú en l'añada en contimparazión con as puendas anteriors, pero tamién rezentó que os zaguers "se carauterizan por una espezial agresibidat", como contrimostran as 3 muertes biolentas de un choben de 22 añadas en "a zona", una muller de 53 en a suya casa y unatro forano en a carrera conde aranda en as zagueras dos semanas.

Os numeros rezentan que os delitos y barallas no han crexiú: dende chinero dica agosto d'ista añada s'han feito 8 asasinatos, os mesmos que en añada 2005. As estorbaduras en ista añadan son estadas 171, tan y mientras que l'añada pasada estión 180. As faltas minors tamién son baxadas en contimparazión con l'añada pasada, dende 823 dica 807.

Seguntes o siñor Rubio se ferá una nueba estretachia, considerando como clau a binculazión d'esferens menas de presonas y partis d'a soziedat.

Ye curioso que antismás as faltas se feban cuan no bi eba chen beyendo-las.
Manimenos en os zaguers tiempos se'n son fendo en puestos con muita chen (remero bel caso en o coso, a lo canto de plaza españa) y garra presona no fa cosa. Ye curioso tamién que a primera reazión d'ixas presonas ye dizir: "si ye que manca más polizía... si ye que a culpa de tot la tien o gubierno... asinas-asinas".
Ye una d'as cosas que más me carraña: ye muito fázil chemecar y romanziar y no fer cosa. Agora bien, si no aduyamos cuan beyemos a bella presona en una situazión asinas, ¿qui mos aduyará o diya de maitín a nusatros si mos toca? Y no ye que ixo, tamién somos contrimostrando-le a lo malfedor que puet fer o que le pete, porque nusatros, a soziedat, no ba a fer cosa. Bueno no, m'entiboco, si que'n feremos... de chemecos, ploros y romanzes.

2.9.06

L'aragonés en a morisma de l'aínsa


Leigo en a ziber-rufierta un mensache que fa un enrastre a lo diyario de l'alto aragón. Aparixe una nueba de fa 2 diyas sobrebuena ta l'aragonés tocán a las fiestas d'a morisma en l'aínsa:

"O direutor artistico d'o ebén, José Miguel Chéliz, dizió ayer, durante a suya presentazión en o palazio de l'aljafería de zaragoza, que os mils de besitans mobiús dica o lugar beyerán una ripia de sorpresas ista añada, y una de ellas ye un nuebo presonache que ripresenta a fabla y que será intepretau por un siñor de 80 añadas de bielsa (error d'o diyario de l'alto aragón en dizir que yera de biescas), Chesús Garcés, qui ha parlau a luenga aragonesa toda a suya bida"

Muito bien por l'aínsa y agora o que mos cal ye prener exemplo. A beyer si istas fiestas d'o pilar se puet beyer bella cosa en aragonés (si no caldrá proposar-lo t'as añadas beniens).


1.9.06

"A orella de Ban Gogh" estió ayer en as fiestas d'ejea d'os caballers

A popular colla mosical de pop (una d'as millors que ecsisten) tañió ayer en as fiestas d'a virchen d'a oliba en a plaza de toros d'a localidat aragonesa. O conzierto escomenzipió a las 23:30 y, más que más, tocón as cantas d'o suyo zaguer disco chunto con bel d'os suyos ecsitos pasaus.
Ista autuazión estió a parti prinzipal d'as fiestas d'ejea, as cualas plegan iste domingo.

T'os que, como yo, queríanos ir-ie pero no podiemos, encara tenemos una oportunidat d'ascuitar-los luego, en as fiestas d'o pilar: ferán o conzierto gran en o paseyo independenzia o diya 12 (ixo seguntes o nuestro alcalde y os meyos, porque a pachina web d'a colla diz que en ixe diya ferán un conzierto en avila).

Atras autuazions d'as fiestas son estadas a comparsa de chigans y cabezudos, os titeres ta ninons (y no tan ninons) u concursos de danza. A totz os ejeanos que espleiten a borina!