23.10.18

Enta Rio Hondo y Taluksangay: zonas musulmanas y badjaos


Filipinas ye un país diverso, y encara que o catolicismo ye a relichión dominant -y no nomás una relichión sino tamién una forma de vida- atras relichions tamién son presents. Entre ellas, o islamismo, que suposa arredol d'o 10% de toda a población. En Mindanao iste porcentache puya asabelo, y en concreto en Zamboanga City se diz que arredol d'o 35% d'a población ye musulmana mientras que un 60% ye cristiana. Prou que dentro d'os cristianos y d'os musulmans bi ha esferents brencas. Y tanto en Zamboanga como en a resta de Filipinas tamién se tienen minorías d'atras relichions con firme presencia historica, como o taoismo, o budismo y o sikismo, sin ixuplidar a presencia y pervivencia de relichions prehispanicas y premusulmanas. 

Si pasamos a un ambito más etnico, en Zamboanga se tienen badjaos -bayaos u bajaus en castellano-, asinas como atras tribus y pueblos tamién ixamenaus por l'archipielago Sulu, como os Yakan, os Tuasug y os Samal, que bella vegada mesmo arrivan a Malasia y Indonesia. Sobre as esferencias entre istos pueblos y qué población ye más orichinaria d'a ciudat bi ha muito debat, y como no soi experto ni tampoco no ye o mío obchetivo esclareixer-lo, no i dentraré más. Nomás diré que en as cronicas historicas, se les gosaba de decir chenericament moros en estar a más grant parti musulmans, pero tamién bi'n ha que refirman as relichions tradicionals previas u que s'han feito cristianos. D'atra man, mesmo a mayoría musulmana preserva ritos y costumbres d'antismás.

Antiparti de tot isto, prou que cal mencionar o mayoritario mestizache zamboanguenyo, con elementos espanyols y hispanoamericanos, y que o suyo elemento más vistero ye a luenga criolla, o chabacano -a isto adedicaré unatro post, probablement en o mío blog academico. Y prou que sí, en iste puzzle d'etnias, relichions y luengas no cal ixublidar a atros pueblos filipinos que i son y fan comunidatz, como visayas y tagalos. Por un regular, tanto zamboanguenyos como atros filipinos gosan d'estar cristianos, encara que no faltan musulmanes. 

Sobre luengas, antiparti d'o chabacano, se tienen as luengas propias d'as tribus y pueblos d'a rechión -Tuasug, Sinama, Subanon-, l'anglés y o tagalo como luengas nacionals y francas, l'arabe, y atras luengas filipinas como o cebuano por migracions. 

Introducida a esparpallant diversidat d'a rechión -dentro d'unas isolas ya de por sí diversas-, prencipiaré charrando una mica d'os badjaos, uno d'os principals problemas d'o espanyols quan i yeran, y encara uno d'os pueblos más rebeldes de Filipinas. Como dicié en o post anterior, una chicota comunidat ye con as suyas embarcacions visteras y tradicionals -vintas- en o Paseo del Mar de Zamboanga. Son astí mientras o diya, demandando diners de malas trazas a totz -y a yo, en estar l'onico turista forano, pos encara más- y marchando de nueitz en as suyas vintas t'o vico de difueras an que viven -y aproveitando tanimientres ta pedir diners de malas trazas a tot o mundo. Antiparti d'as vintas, tamién son conoixius por os suyos rituals funerarios, o suyo nomadismo maritimo y as suyas ropas antigas se troban en museus de tot o país. Se les ha conoixiu historicament y encara se les conoix como os chitanos d'o mar, y sin animo de cayer en ni alimentar estereotipos racistas, a relación ye de fácil prener. Ista anyada son estaus famosos porque en ells s'ha descubierto una adaptación chenetica ta bucear -a primer vegada en o estar humano- y ye curioso que quan son en o Paseo del Mar a tradición ye que a chent chite monedas a l'augua ta que ells buceyen, las busquen y las pillen.

O sabado de maitins, dimpués de visitar o fuerte d'o Pilar, marché ta Río Hondo y Mariqui, dos vicos con fama de problematicos y pobres, de mayoría musulmana y que se troban difueras d'a ciudat en una zona engaronada de marismas.  Mientras o sitio a Zamboanga en septiembre de 2013 por parti d'o Frent Moro de Liberación Nacional istos vicos sufrioron asabelo, pos estioron a base d'operacions d'o frent moro, os principals puestos enrestius por as fuerzas armadas filipinas y población local estió emplegada d'escudos humanos. S'espaldoron muitas casas en un vico ya de por sí pobre.

Dimpués de pasar o control militar con edificos an que os alambres d'espino feban prexinar o que heba pasau astí, i dentré con una mica de respeto, pero me trobé una chent amistosa, a la que no pareixeba fer-le goyo que fese fotos y grabase, pero que malas que amagaba o mobil me charraba y s'ufriba a amostrar-me o puesto de buen implaz. En concreto, un sinyor viello me charró d'o mal que heba feito a baralla de 2013, ideya que me repetiban tamién en atros puestos d'a ciudat, pos muita chent heba emigrau, s'heban perdiu muitos treballos y o turismo heba dispareixiu de tot. De feito, de cabo quan mesmo me sentiba una asperanza ta ells y m'animaban a que charrase bien d'a ciudat y a que trayese a os míos amigos, encara que de vegada me deciban que parase cuenta y me demandaban si no me feba miedo ir solenco por ixos puestos.

As casas yeran puyadas con pilars de fusta -u as más modernas con cimientos d'hormigón- sobre a marisma, y muitas se veyeban nuevas y relativament buenas -a lo menos, millor que no as d'atras zonas pobres ixamenadas por tot o estau. Os camins-puents que dibuixaban carreras y callizos en altaria yeran relativament buenos y aparentement nuevos, y me los arrecorrié mientras me se cruzaba bella gallina, bella craba y bell nino sorprendiu y sonredindo -uno d'ells con a chambreta cuatribarrada d'o Barcelona de fa bellas anyadas. De cabo quan, bell solar con bella casa esboldregada y tamién bellas obras fendo nuevas casas y edificios publicos, como un poliesportivo. Chocaba porque asperaba trobar-me atra cosa, más pobre -encara que pobre en yera. Dimpués m'enteré que bi ha un fondo economico publico ta reviscolar toda ixa area. Y ye chusto, no nomás porque se minchoron tot o problema, sino tamién como compensación a la estigmatización que a comunidat musulmana, a más perchudicada por tot iste problema, vive en Filipinas.

Dimpués de fer una gambada mientras bellas dos horetas por o puesto en salié, no sin bell problema en o control militar pos no sabeban guaire bien quálas yeran as mías intencions astí. Y a l'atrol diya pillé un jeepney en o centro de ciudat ta marchar t'o lugar de Taluksangay, an que se troba a mezquita más antiga d'a redolada y una d'as más antigas de Filipinas, feita en 1885. Ya nomás puyar-me en ixe jeepney estió una experiencia, pos mientras meya horeta a chent no dixaba de mirar-me fito-fito, sensanción que ya heba teniu mientras tot o cabo de semana, pero astí encara muito más descarau. Yo con o móbil fendo que no m'enteraba de cosa, pero acollonau yera un rato y a punto de baixar-me y dixar-lo. A la fin, l'aduyant d'o conductor y una sinyora me prencipioron a charrar y de buen implaz me demandoron qué feba astí. Les comenté que yera de turismo, intresau por a redolada en cheneral, muito por o chabacano y que me fería goyo de veyer a mezquita. Ascape estioron muito amables con yo, me charroron en chabacano y me dicioron do baixar-me. Tamién m'animoron a que veyese tot o lugar y me comentoron que no tendría garra problema en ixe puesto -se conoixeban totz- pero que parase cuenta en cheneral, que no ye bien ir t'ixos puestos estando forano y sin dengún conoixiu.

En baixar-me facié bella foteta a la mezquita por difueras, que pareixeba trancada. Y en o chardinet d'arredol un hombre viello, escaixalau, encargau d'a mezquita y muito maho s'ufrió a fer-me una visita por o templo, dixando-me entrar en todas as partis, mesmo en o suyo fosal, y fer fotos por tot arreu. Yera una mezquita muito gran, toda blanca con espacios diafanos, un poliu minbar, y por difueras dos minaretes y una cupula, todas ellas royas. Y en ixas que venió unatro hombre con una chambreta d'Archentina, sobrino d'o mainate d'a mezquita y m'en explicó una mica más, remarcando que yera una d'as mezquitas más antigas de toda Filipinas y, o más sorprendent de tot, debant d'o suyo fillet me dio as gracias por "atrever-me a visitar o puesto".

Vista a mezquita, me facié una gambada por o lugar, baixo a mirada de tot o mundo. Curiosament, tamién yera un lugar puyau en una marisma. En a parti d'o puerto, polidas vistas y ninos chugando -bueno, ninos bi'n heba por totz os costaus, como de costumbre. Tamién teneban una escuela polida con totz os cartels y murals en chabacano -encara que no ye a luenga propia d'a comunidat- y as ninas iban con ropas musulmanas verdes. Podié veyer a traviés d'a finestra d'a escuela a una mayestra con una bara y charrando firme. En as carreras, os tipicos guariches Sari-Sari an que venden una mica de tot o que ye menester en o diya a diya. En a replaceta d'o lugar, asabelo de ninos chugando y chent en comunidat. Tamién heban ficau flors polidas en esferents puestos y se veyeba a chent ficada en l'augua pescando con rete: o lugar humilde teneba un encanto. A l'hombre d'a mezquita l'heba dixau una mereixida propina y a bells ninos en o puerto tamién -qué menos con os nulos turistas que recibe ista humilde chent!-, pero dimpués en a plaza, a resta de ninos, en saber que'n heba dixau, pretoron a demandar-me en una situación incomoda que d'atra man se puet dar en qualsiquier puesto. En ixas que l'hombre d'a chambreta d'Archentina paró cuenta y ascape les carranyó, de vegada que me tornaba a dar as gracias por visitar o puesto y m'animaba a charrar bien d'ells.

Vista a mezquita y o lugar, torné ta Zamboanga curiosament en o mesmo jeepney que me levó. Agora ya no me se miraban tanto y a cosa yera más comoda. O mesache, encara que una mica serioso, yera muito amable y lo ascuité charrar en chabacano con yo y con muitos pasachers -atras vegadas charraba en a suya luenga tribal que no sé quála de todas en sería. En ixas, un chicot carranyo -amable- con una pasachera que se'n queixaba d'a puyada d'o pre d'o pasahe.

En resumen, istas dos experiencias estioron muito positivas y productivas. A población musulmana estigmatizada ye a que más sufre o conflicto en o sur de Filipinas y prou que no lo mereix. En primeras tot o mundo en a ciudat, y ells encara más, te se miran fito fito como turista en un mezclallo de desconfitanza, sorpresa, asperanza y mesmo preocupación por tu. Tampoco no son tan amigos d'as camaras como en a resta d'o país, lo menos en primeras quan no te conoixen, pero, dentro d'o suyo sufrimiento y d'una seriedat que se fa rara en o país -de no estar que vaigas ta bellas zonas d'a montanya d'o norte d'o Luzón- son muito amables, nobles y os suyos puestos tienen encanto. Con as correspondients precaucions -como en totz os puestos- y contradecindo as recomendacions de l'Ambaixada d'Espanya en Filipinas, sin estar o millor puesto de Filipinas, recomiendo a visita

15.10.18

Enta Zamboanga (i): por as fiestas d'o Pilar


O diya 11 tenié a recepción anyal en a Ambaixada d'Espanya por motivo d'a "fiesta nacional". Y ya se sabe lo que gosa de pasar en istas borinas: postureo y comportamientos inesperaus de personas de "relevancia" quan l'alcohol fa d'as suyas y rebella as pulsions internas. Pero a yo rai: bi heba magra d'a buena -da que pocas vegadas en mincho mesmo quan soi en Zaragoza- y barra libre de buen vin, biera y licors. Asinas que con a buena companyía d'atros profesors universitarios convidaus, aproveitemos a lifara, y tanto que mesmo empalmé con o vuelo que o diya 12 me saliba a las 5 d'a maitinada enta Zamboanga. 

Y a qué fin me da por ir ta Zamboanga iste cabo de semana en cuentas de dormir a resaca y estomacar o exceso de magra? Pos porque astí se fan una d'as celebracions y festivals más importants de toda Filipinas: as Fiestas del Pilar! Tamién ditas astí Hermosa Festival.  Zamboanga yera tamién uno d'os puestos que teneba sinyalaus, en estar o principal puesto an que se charra chabacano -luenga criolla castellana-, en tener una placha d'arena rosa, o fuerte espanyol d'o Pilar y un mezclallo de culturas cristianas y musulmanas, con o elemento cristiano criollo repui d'a presencia espanyola, atros cristianos, os badjaos musulmans, atros musulmans y mesmo una chicota comunidat chinenca -y quan digo mezclallo de culturas, no me refiero a os tipicos bicos de postureo que se troban en as principals ciudatz d'o mundo y an que bi ha turistas a ixarramantons, sino que de verdat se vive en multiculturalidat. No bi heba marchau antis en estar zona conflictiva y querer asegurar-me una mica de cómo ir-ie y qué poder fer.

Malas plegar ta l'aeropuerto a ixo d'as ueito, un cartel chigant decindo Bienvenidos! ya feba entrefilar lo que me trobaría en a ciudat. Dentro de l'aeropuerto, una colla de ninos con pinchos vestius feban danzas tradicionals. Me las miré una mica y encara que en primeras iba a pillar un tricycle ta ir ta l'hotel, m'aganó d'ir-ie a piet pos encara no feba fuixina. Por o camín, cartels en chabacano de fácil entender. Y en plegar ta l'hotel, como encara yera luego, no podié fer o check-in, asinas que dixé a muchila y preté a caminar por a ciudat. Una d'as primeras cosas que me trobé estió una canal que no apareix comentada en garra web y que ye asabelo de polida. A canal marcaba una carrera estreita y luenga, con chicotas ceras en dos costaus, pintorescas casas, flors y matas repolidas, y chent posada en comunidat en os puents que conectaban as dos ceras. Mica trafico y ninos chungando. Yera o tipico puesto a o que tot hipster meyo hippie turista aspira, pero prou que sí, sacando-le a gilipollez. Me fació tanto goyo y yera tan a man de l'hotel, que i pasé totz os diyas y o zaguer diya -anque facié un video que pencharé en breus- ya totz me saludaban en chabacano. 

Arrecorrida a canal, marché t'o centro d'a ciudat, a bells 5 minutos a piet. Arrivé en a Plaza
Pershing, una replaceta tringular polida an que en ixos diyas d'o Pilar feban una feria de productos d'a huerta de Zamboanga, dita Cosecha Zamboanga 2018. Y bien cerqueta yera a plaza Rizal, con a correspondient estatua de l'heroi nacional, a carrera Zaragosa a un costau, y a l'atro costau o repoliu concello de Zamboanga, que ixos diyas yera presidiu por una Virchen d'o Pilar con un manto de flors blancas. Entre Zaragoza y a Virchen d'o Pilar, a un costau, yera a Universidad de Zamboanga, y a l'atro, unatra replaceta con o monumento a os veteranos. Polida gambada, encara que unatra vegada más, a piatonalización d'ixe espacio le vendría de bitibomba -pos no yera peatonalizada que a carrera d'o concello. 

Visto isto, marché t'o Paseo del Mar, una plaza tranquileta an que se
fan totz quasi totz os eventos d'a ciudat y que de vegada ye paseyo maritimo. Allí me trobé con as famosas vintas, chicotas embarcacions visteras que emplegaban os badjaos  y os moros ta luitar contra os espanyols y que s'han convertiu en un símbol d'a ciudat, d'a rechión y quasi de toda Filipinas. En bells blogs he visto que a chent se podeba montar en ellas, pero pareix estar que dimpués d'o sitio a Zamboanga en 2013 por parti de collas terroristas musulmanas, muitas cosas han cambiau y agora no se puede. Cal decir que me trobé con una chent amable en primeras pero bellas cosas feban notar bella cosa rara en l'ambient. Os onicos que yeran una mica más borches -más que más demandando diners de malas trazas de cotino- yeran os ninos badjaos d'o Paseo del Mar. Pero a tot isto adedicaré atro post!

En un costau d'o Paseo del Mar se troba o puertet ta pillar un barco t'a Isla Grande de Santa Cruz. Se trata de una isla cercana a Zamboanga, en o camín enta Basilan, unatra d'as islas
conflictivas de Filipinas. Ista isola ye estada habitada tradicionalment por badjaos, y mesmo en bella parti se troban fuesas antigas d'iste pueblo, con estatuas de fusta -monyacos y chicotas vintas- en homenache a os difuntos. Tamién be de tener bell manglar curioso, y a'l canto ye a Isla Pequeña de Santa Cruz. Con tot y con ixo, dende a baralla de 2013, a dentrada t'istos puestos ye restrinchida, muitos s'han convertiu en zonas d'entrenamiento militar, y agora mesmo no se puet visitar que a famosa placha d'arena rosa en a Isla Grande de Santa Cruz, siempre baixo a companyia de dos policías militarizaus, con buenos fusils y metralletas, pero muito amables y dispuestos a fer-te todas as fotos que quieras t'o postureo d'o Facebook. Sobre a placha d'arena rosa, en reyalidat diría más bien que ye una placha d'arena rosada, pos l'arena blanca se mezcla con coral royo esboldregau. Pero a culor rosa no se veye que en parti humeda de l'arena quan as olas i plegan y se'n van -asinas que quasi diría que ye más mito que atra cosa. 

O barco cuesta 1000 pesos -bells 17 euros- y por un regular lo pillan collas que pasan o diya en a isla. Yo, como fastioso rico -aquí en Filipinas, no pas en España-, me pillé un barco ta yo mesmo, pos os barcos yeran totz plenos mientras o cabo de semana, no bi heba garra barco a compartir ixe viernes y no quereba perder-me o puesto. A verdat ye que facié bien, pos asinas no pendié d'atra chent ta poder mover-me como quereba y poder tornar ta Zambaonga quan m'aganase -pos en reyalidat ista placha, encara que polida, no ye que ta estar una u dos horetas si yes solenco. O pre puet pareixer caro, y más ta Filipinas. Pero si somos contando que tiens a dos personas guidando o barco ta tu y a atros dos policías militarizaus ta que sigas seguro en una zona conflictiva, y que puetz estar-te tot o tiempo que quieras, pos unatra vegada, ye bella cosa regalada. M'heba dixau a muchila en l'hotel y dentro d'ella o banyador: pos a ficar-se en l'augua en calconciellos y prou! Antiparti, ficar-me en l'augua con a zorrera-resaca que levaba me fació buenismo prebo.

Visto tot isto, marché a piet t'o fuerte d'o Pilar, antigo monumento espanyol. Pero yera trancau en estar o diya d'o Pilar, y o guardia amablement me dició que tornase a l'atro diya,
o sabado. Sin problemas. Y chusto en uno d'os murs d'o fuerte, en a suya parti externa, se trobaba o parque-plaza-capilleta a l'aire libre en homenache a o Pilar, con bell par d'estatuas en hunor a la virchen y una plaqueta en hunor a Zaragoza. Mientras tot o diya, ríos de chent iban y tornaban, como si fuese Interpeñas u a Plaza d'o Pilar mientras a ofrenda de flors. Pero aquí, as onicas actuacions mientras o diya yeran as misas en hunor a la virchen d'o Pilar, una cada hora. Y prou que sí, t'ixa chent cal ir-ne a varias, con nomás una misa no feba honra!

A cansera ya prencipiaba a fer d'as suyas, o sol ecuatorial d'o sur de Filipinas yera encara
pior que no o de Manila y como teneba tot un cabo de semana por debant, marché ta l'hotel y facié a la fin o check-in. Dimpués, una ducheta ta quitar-me a sal d'a piel y una siesta de dos horas. M'en puyé ya quasi de nueitz y me facié una gambada por os mesmos puestos an que yera estau de diyas: o paseo del Mar, que yera a rebutir de chent en as suyas terrazas, fendo-se bella biera, cenando, con locals bien mahos con mosica en vivo, con una repolida vista d'o mar y con una fuent que feba espectaclos de luz y culors baixo as mosicas más horteras y molonas que uno puet entrefilar mientras os ninos danzaban y feban momos. Tamién me facié una gambada por a Plaza Rizal presidida por o concello y a Virchen d'o Pilar iluminada de blanco, y a carrera d'o concello -carrera Valderosa- bien decorada con luces repolidas y trafico restrinchiu, y prous edificios colonials y repolius. En ixe momento pensé que si piatonalizasen tot ixo y cudiasen bell edificio, podrían fer unatro Vigan astí!

A primera impresión de Zamboanga ye que ye una ciudat con muitas potencialidatz. Con una multiculturalidat espontania y no postiza, y con muitos atractivos. A chent ye maha, pero se nota que han teniu baralla fa poco y que o conflicto ye present en a vida cutiana. Pero de tot isto charraré más entabant!
 

9.10.18

Enta Singapur (iii): recorriu por a suya historia y que vaiga bueno


O zaguer diya d'ista visiteta de tres diyas a Singapur lo adediqué más a la suya historia y, sin dixar a un costau a multiculturalidat y l'orden d'a ciudat, ya escruixinau dimpués de dormir poco y caminar muito mientras dos diyas, marché t'o vico musulmán d'a ciudat-estau. 

O vico musulmán ye fuertement enradigau con a comunidat malaya, con a que ye historicament enreligada. Y ye que arredol d'o 13% d'a población ye etnicament malaya y, por relichions, os musulmanes fan o 14% d'o total d'a población -con un 33% de budistas, un 19% de cristianos, un 19% d'ateos, un 10% de taoistas y un 5% d'hunduistas. De feito, a ciudat-estau fació parti d'a Malasia dende 1963 - achuntando-se as colonias anglesas independients dende 1957- dica que estió forachitada en 1965 en una curiosa historia de esferencias economicas, politicas, etnicas y socials. A diya de hue, pareix que o modelo de vida esfendiu por Singapur s'ha contrimostrau millor -y no pas por lobar a Singapur, si no ye que Malasia, como ya dicié, me pareix fulera. En o caso de Singapur, se presume d'una completa asunción y normalidat d'a diversidat racial, relichiosa y lingüistica. D'atra man, as relacions entre istos dos estaus pareixen buenas.

Asinas, previo paso por o centro Malay Heritage Center, arrivé en a mezquita de Masjid Sultan, o centro d'o vico musulmán. Repolida, con quasi cien anyos d'historia, tot o mundo
podeba entrar-ie, sin distinción de relichión u sexo, con a onica condición de tener os uembros y as garras tapadas -asinas que dengún tirante, pantalons curtos u faldas. En a entrada, un mesache te deixaba amablement bells balons bombachos u bell perrecallo -poliu y oriental, tot cal decir-lo- por si no cumplibas os requisitos. Dentro d'a mezquita, un aria yera reservada ta l'oración, encara que o puesto diafano permitiba veyer tot dende totz os costaus, y se podeban fer todas as fotos que quereses. O templo musulmán, simplo en lineas pero poliu igualment, contrastaba con o recargau d'os templos chinencos y hindús. 

Vista Masjid Sultan, me facié una gambada por o a resta d'o vico musulmán, an que bi heba bella estatua pincha en referencia a la relichión musulmana, portaladas que sinyalaban as mugas d'o vico, bella atra mezquiteta más, botigas de ropa 'moda musulmana', restaurants halal, y unatro d'os puestos top a visitar en Singapur: o callizo de Bali Lane. Por describir-lo breument, sería o centro de chentrificación d'a ciudat: un callizo estreito pero luengo an que china chana s'han iu clavando l'arte alternativo y as culors, y prou que sí, tot bien caro. Turistas no'n faltaban, mesmo quan ye una cosa que os que no i pasan que un diya u dos se dixan a un costau en no adubir. Fronteras de culors y grafitis simpaticos s'alternaban con restaurants multietnicos y barberías hipster. A la fin, como m'ocurrió con os vicos chinenco y hindú, me i estié más tiempo d'o que en primeras m'asperaba, encara que o vico musulmán, con a Bali Lane incluita, ye más chicot que no os primers.

Dimpués d'istas primeras visitas, continé a mía gambada historica, pillé un metro y me planté en o Fort Canning, an que se troban as runias d'una antiga fortificación britanica. Y ye que os angleses estioron en Singapur dende 1819 y cuaranta anyadas más tardi facioron o fuerte, encara que en o poyet an que se troba heban ficau casas senyorials y edificios gubernamentals d'antis. Agora ye un parque, y en a tuca d'ixe lumo -esplanicada por os britanicos- se troban os repuis d'o fuerte, con a suya portalada, bell par de canyons y tamién una reserva d'augua potable. O parque tien un recorriu de puyada con esferents aturadetas y cartels an que s'explica perfectament as fitas más importants d'a historia de Singapur, dende a prehistoria y as leyendas, l'antigo reino de Singapur, a colonización britanica y o Singapur d'as zagueras cincuanta anyadas. Como curiosidat, en un cantonet d'o parque bi ha una chicota excavación arqueolochica, pos se creye que as fuesas d'os reis de l'antigo reino de Singapur son astí, encara que mai no s'han trobadas. A verdat ye que ixa excavación feba farchas d'estar un reclamo turistico más que no atra cosa, pero ye curioso tamién veyer un chicot templet adedicau a o primer d'istos reis, Sang Nila Utama. See diz que iste reino naixió en 1299 y remató en 1398, parixe estar por as continas barallas que se feban en un puesto tan estratechico. 

Visto iste fuerte, y ya amolau, pillé un metro ta marchar t'os chardins botanicos de Singapur, atro d'os reclamos d'a ciudat. Pero, antis que no entrar-ie, aturé en un 7/11 ta prener una mica de biroya y fer-me un suco. Con as pilas cargadas, concaré istos chigants chardins, que a decir verdat, tampoco no yeran gran cosa. Parques y chardins polius y bien disenyaus sí, con un repoliu auditorio a l'aire libre ta fer conciertos y poder veyer-los dende as costeras entre flors y plantas bien cudiadas, pero cosa más. Sin querer fer-me a bamba, o parque de l'agua de Zaragoza mica engrucia l'ha de tener. Talment aduyase a ista valoración negativa a calor que en feba y o solaz que heba saliu, y que facioron d'a mía gambada por o puesto un suplicio, tot y que aturaba cada cinco u diez minutetz y me feba buenas galetadas d'augua. Dentro d'istos chardins, i dentré en o famoso National Orchid Garden, an que cal bosar 5 dolars de Singapur, encara que yo no'n bosé que 1 en estar profesor universitario. Unatra vegada más, o puesto yera poliu, pero no feba vez o pre -que tampoco no yera guaire- y a caminata: os mesmos Gardens By The Bay yeran muitismo millors y de gufanya!

Baldau, pillé o metro an que l'aire acondicionau m'esbolligó y marché a veyer a famosa noria de Singapur -The Flyer- y a o suyo costau, os boxes d'a corrida urbana de Formula 1.
Antiparti d'ixas dos cosas y a polida puesta de sol, en ixa redolada poco caleba fer, encara que en ixas venió una muller hindú muito amable a fer-me una encuesta sobre o que me pareixeba Singapur, y más que más, sobre as facilidatz d'emplego d'as nuevas tecnolochías t'un turista astí -tarchetas SIM y os suyos pres, disponibilidat de Wi-Fi, asinas-asinas. Le'n respondié y dimpués me regaló un clavero y un boligrafo, y yo encara más contento con a ciudat con istas fateretas. Asinas que dimpués d'a encuesta y d'as correspondients fotos, mientras baixaba o sol m'arrecorrié a bahía de Marina en sentiu inverso a como lo heba feito os zaguers dos diyas dica arrivar en os Gardens By the Bay, an que unatra vegada prebaría de puyar t'a pasarela d'os arbols chigants.

Ista vegada arrivé en tiempo y sin plevia, asinas que pintaba bien, dica que me trobé con
una cola de más d'una hora y meya. Definitivament, pareixeba que ixa maldada pasarela s'heba tricolotiau y enfrontinau a yo y no quereba que puyase. Pos cosa, no i puyo! Pos prou que no soi disposau a perder más d'una hora y meya en puyar a una pasarela mientras 10 minutos... Pero lo que no m'heba de peder yera o espectaclo de luz y culors d'os arbres chigants! Asinas que dimpués de cenar en bells guariches que heban apanyau en un corridor d'o parque, tastando todas as comidas asiaticas que bi'n heba, y más que más dimpués de fer-me un suco de canya de zucre -que en bella atra cursa ya heba experimentau que ye sobrebueno y o millor ta rebilcar d'a cansera- me chité en a tasca y con a mía mochila fendo d'almada, asperé una cuartalada radida dica que prencipió o espectaclo. Sin dubda, una d'as cosas más recomendables de Singapur! Cata si veyé d'istos espectablos en a Expo2008, y cata si tamién en soi veyendo aquí en Manila -pos a os orientals les encantan- pero si ye bueno, no me'n canso. Y ixo que fa bells anyos no me trucaban guaire... Atra vegada pienso, será que me soi fendo viello?

Visto iste espectaclo y feita una chicota gambada por o parque, marché a fer a zaguera gambada por Marina Bay y as suyas luces de nueitz, dica pillar o metro en a gara de Raffles que me levaría directament enta l'aeropuerto, do lo vuelo d'a 1 d'a maitinada m'asperaba, ta plegar en Manila a las 5 y fer clase ixe mesmo diya. Una matada, pero fació honra. He visto varias vegadas como en Filipinas presumen d'haber alcanzau o mesmo PIB que Singapur, pero claro, Singapur no tiene que 5 millons d'hitants debant d'os 100 millons que en tiene Filipinas, y Filipinas ye un archipielago más de cuatrocientas vegadas más grant que no Singapur. No bi ha culor, y pasar d'un puesto ta l'atro ye como pasar d'o blanco a lo negro. Con tot y con ixo, l'amabilidat ye present en os dos puestos, y atras cosas muito orientals, como l'aimor por Disney, as luces y as culors. Me quedo de Singapur con que ye un puesto ideyal ta pasar una vida familiar relaixada y entretenida de vez, pero malas tornar-ie unatra vegada paré cuenta de que Manila tiene una sapia especial y que cada vegada me trobo más a gusto en ista ciudat con totz os suyos problemas.

1.10.18

Enta Singapur (ii): d'estrela a estrela


Dimpués d'a visita a o zoo a zaguera nueit, a l'atrol diya me costó una mica de puyar-me-ne. Pero dimpués dimpués d'o desayuno, ya me'n rebellé. Y o primer que facié estió pillar o
metro ta marchar a la famosa Orchid Road, uno d'os principals centros neuralchicos de Singapur con buena cosa d'as principals botigas y bancos de tot o mundo, prou que con firme presencia d'Inditex. Si por si un caso no m'alcordaba d'a impresión d'orden y limpieza d'a ciudat, ista rúa y os suyos arredols me la remeroron. Y lo bueno que teneba ye que si te cansabas d'a calor en a carrera, podebas dentrar en belún d'os muitos macrocentros comercials acristalaus con un aire acondicionau meso a buena temperatura, y astí reviscolabas. En a carrera y en istos centros comercials, chents de todas as razas y relichions bi yeran a embute, emplegando l'anglés como luenga franca, encara que se notaba en prous d'ells que no yera a suya luenga materna. 

Vista Orchid Road, prenié atro metro ta marchar ta China Town. De vicos chinencos, en he vistos ya prous, pero nunca no ye de más fer-ie una chicota gambada. Y o que prencipió estando una chicota gambada, a la fin s'alargó mientras bellas horas, como me pasó con Little India. Muitas botigas de ropa, y restaurants y bars chinencos, con un ambient más oriental que no o d'as atras partis d'a ciudat, pero guardando limpieza y orden. Y en iste caso, se notaba más turistificau que no Little India. Templos budistas y taoistas a boticiegas, totz repolius, destacando o Buddha Tooth Relic Temple y o Thian Hock Keng Temple. O primer, un esparpallant y luixoso edificio feito en 2002, alza o que diz que ye un dient de Buda, mientras que o segundo, menos luixoso pero más amplo en extensión, data d'o sieglo XIX. Tanto en China Town como en Little India y en atros puestos d'a ciudat, as casas yeran pintadetas de todas as culors, baixas -no más de tres pisos y por un regular dos- y emplegando arquitectura colonial. O contraste d'istas casas con os rascacielos ye poliu. 

Una vegada pasau o maitín en istos puestos, chenté y torné ta l'aloix an que me descansé un poquet antis de concarar a etapa d'a tardi: a visita a Sentosa.  Sentosa ye una chicota isla en o sur de Singapur, d'a que han feito una d'as principals arias d'ocio d'a ciudat-estau. Y si somos charrando d'orden, limpieza y diners, ya tos podetz entrefilar cómo yera l'ocio en ista isola. Ta ir-ie, pillé un metro dende l'aloix dica a gara de Harbour Front, an que sales en o centro comercial de Vivo City -a famosa aquí y cada vegada más poderosa companyia de telefonos mobils, que'n fa a buen pre y sobrebuenos. D'astí, cal pillar un monorrail dica Sentosa, que cuesta 4 dolars de Singapur ir y tornar. Y ye que, como ye de dar en Singapur, vaigas como vaigas ta Sentosa, cal bosar.

Iste monorrail tiene quatre garas: a de salida en a Vivo City; una an que son os parques acuaticos y tematicos, o principal d'ells de Universal Studios y que por as fotos o por os comentarios pareix calcau a Port Aventura; l'atra, un aria más bien de botigas, resorts y casinos, y a zaguera de todas, an que me quedé, l'aria d'as plachas. En l'aria de placha, en heban apanyadas tres: Siloso, Palawan y Tanjong. De placha a placha se podeba ir a piet en bells 10 minutos, y todas ellas tenaban siempre o mesmo esquema, con chicotas isoletas a bells 30 metros d'a placha que yeran crebaolas pero que de vez feban de calas en a suya parti cara ta Sentosa y de mirador ta l'Asia insular en a suya parti externa. Chusto quan i plegaba, pretó a espuniar: Copón bendito! Qué mala suerte yo que heba pillau o banyador! Pero en un cuartet d'hora u asinas escampó, y en meya hora salió un sol bien firme, asinas que bien que aproveité o banyador en as plachas de Siloso y Palawan.

Mientras me ficaba en l'augua, paraba cuenta que heban apachau bien a vechetación y o propio paisache ecuatorial, con selvetas, palmeras y mesmo bi heba monos que de cabo
quan acucutaban dende as cocorozas d'as palmeras. En a placha, guariches, bars y restaurants propios de placha. Con toda a naturaleza urbana de Singapur, o paisache yera o propio d'una placha de ricos en Filipinas, como Palawan. D'atra man, cada placha y as suyas seccions yeran adedicadas a esferents collas d'edatz: una más familiar con muitas actividatz ta ninos, unatra más ta chovens con orquestas, conciertos y alcohol, unatra más de pubs guiris y unatra más rollet chill-out. En ixe momento, m'entró una crisi existencial: que m'aganase más d'estar-me en a placha d'o rollo chill-out en cuentas d'a d'o concierto u d'a d'os pubs me fació pensar que me soi fendo masiau viello ya... En cheneral, istas plachas ufriban toda mena d'actividatz ta toda la chent: actividatz aquaticas como kayak, banana boat o paddle surfing, u tamién puenting u surf en olas artificials, sin faltar os clasicos voley-placha u futbol-placha. Tamién bi ha asabelo de resorts privaus y bells campos de golf, y como curiosidat, una plaqueta de una d'as isolas-crebaolas diz que ye o punto más meridional de l'Asia continental, pero sabendo que Singapur ye una isola, que Sentosa ye una isola a o sur de Singapur, u que ista isola-crebaolas a la que se plega por un puent colgant ye tamién una isola, no sé por qué pero me da que ye masiau pillau con pinzas. Mesmo si un se mira o mapa, bell punto de Masalia pareix más a o sur que no ixe... Asinas que me da que, mesmo en ista Suiza ordenada, agradable y escoscada d'Asia, tamién se puet trobar una miquitineta de chovinismo.

Unatra vegada más, pensaba quedar-me-ie bell par de horetas que a la fin estioron toda a tardi. Asinas que aproveité a cenar astí en o puesto más barato que trobé, un pollo con
arroz que encara asinas salió caret, y d'astí marché dreito ent'os Gardens by the Bay, pos quereba veyer-los de nueitz con o suyo espectaclo de luces y culors y, si se terciaba, puyar t'a pasarela. I facié tardi, asinas que podié veyer o parque iluminau, pero no o espectaclo. A pasarela ya yera trancada, asinas que decidié de tornar a l'atrol diya y aproveitar ixa nueit ta veyer Marina Bay de nueitz. Y fació honra: si de diyas ye poliu, de nueitz ye esparpallant. A gambada por a bahía ye pinchisma, y la rematé en a famosa estatua de Merlion, l'animal con capeza de lion y cuerpo de peix, simbolo de Singapur: o peix fa referencia a la tradición pesquera d'a ciudat-estau, mientras que o lion ye relacionau con o nombre de Singapur, que significa 'ciudat d'o lion' -pos San Nila Utama, primer rei de Singapur en 1299, dició haber-ne-ie visto un.

Y dimpués de tanto trachín, ista vegada de meyanueitz, pillé a tiempo uno d'os zaguers metros ta tornar ta l'alberde. Lo pillé en a gara de City Hall, esnavesando os chardíns de Esplanade y pasando a'l canto d'os polius edificios d'a National Gallery, d'a seu de Saint Andrew's, d'o teyatro Victoria y d'o museo d'as civilizacions d'Asia, veyendo a la vegada parti d'o circuito urbano de Formula 1, que encara teneba as cletas en haber-se feito chusto a semana d'antis.

Si ya con o diya d'antis m'heba quedau claro que Singapur achuntaba progreso y diversidat, orden y amabilidat, con iste diya ya l'heban meso a guinda a o pastel: plachas tropicals-ecuatorials en un conchunto d'ocio sobrebien chestionau, con comodidatz, guardando en a mida d'as posibilidatz a naturaleza propia y con una gran ufierta d'ocio pero sin estar casposo u masificau: Sentosa.