Enta Macau (ii): a China d'os casinos con Céline Dion, a Torre Eiffel, gondolas y un teyatro romano

Dimpués d'o primer diya de dondiar por o centro historico d'a parti continental de Macau, pertocaba, ya de nueitz, marchar ent'a isla de Cotai (Taipa-Coloane), an que se troban a más gran parti d'os famosos casinos d'a ciudat, os onicos permitius en toda China y que l'han dau a fama d'estar 'Las Vegas d'Asia'. Nunca no soi estau en Las Vegas, pero lo que me trobé astí ye esparpallant, muito más gran y luixoso que no Monaco, por eixemplo. Os casinos tienen cadagún a suya tematica y no nomás son casinos, sino tamién hotels, cambras de cine y conciertos, centros comercials de luixo, y cadagún tien o suyo propio distintivo. Dentrar-ie ye de gufanya, encara que t'os reservaus cal tener muitismos diners -ixas apuestas millonarias son as que empentan a economía d'a ciudat-, os más importants son en a mesma redolada, y mesmo son conectaus por corridors sozterráneos, asinas que son de fácil veyer. 

O primer que visité, y an que pasé más tiempo, estió o Venetian Casino, pos ye o más recomendau por o rete. O suyo plato fuerte, una canal graniza que te permite d'arrecorrer en gondola toda la suya primera planta, con gondolers occidentals, que be d'estar que os pobrichons orientals no le dan tanto caché. A planta carrera, tanto en iste casino como en a resta, ye reservada t'o chuego. Y dentro d'os chuegos, o principal son as cartas. Servidor, que quan se mete en istas cosas no chuga que a ruleta (y poco cauquerré), cabidó buena cosa de diners, pos de ruletas, bi'n heba bien pocas, y antiparti, nomás deixaban cambiar fichas con dolars de Hong Kong, quan no heba quitau que patacas de Macau en o caixero automatico. Como curiosidat, en o teyatro d'o casino, con capacidat ta bellas milentas de personas, cantaba ixe diya Céline Dion, y a l'atral semana pertocaba Ricky Martin, pero garra barafunda, pos ixas actuacions astí pareixen estar o más normal.

Unas d'as millors experiencias en os casinos, y en cheneral de tot o viache a Macau, estió cagar en os suyos escusaus. Luixo de marbre y doraus, amplaria d'os retretes, temperatura adecuada -picando una mica l'aire acondicionau, ta trobar más comodidat y sensación d'hichiene-, escoscaus a conciencia, ulor a ambientador d'o caro, sensación d'intimidat en haber-ne muitismos  y en estar granizos achuntado-se-ie poca chent... Bueno, que estoi que tornaré a Macau nomás ta cagar en os suyos casinos. Sin dubda, bella cosa que cal fer bella vegada en a vida.

A o canto d'o Venetian Casino ye o Parisian Casino, que mica engrucia ha de tener d'o primero. Ista vegada, o plato fuerte no yera mica canal, sino una replica d'a Torre Eiffel, a la que podebas puyar, pero por un pre masiau caro: 100 patacas. Si a decoración d'o primer se basaba en Venecia, iste, pos prou que sí, se basaba en París, con replicas d'obras d'arte d'o Louvre y mesmo de bella carrera de Montmartre. Totz os dos casinos simulaban estar de diyas en o suyo teito d'una traza muito realista. Y aquí tamién botigas y restaurants caros -y bell McDonalds- s'alternaban dende a primera planta ent'alto. Dimpués d'iste casino marché t'o casino d'o Studio City Macau, que a suya tematica yera o cine de Hollywood. Más d'o mesmo: luixo esparpallant, mica engrucia d'os atros dos y escusaus sobrebuenos. Y ya, baldau dimpués de horas y horas fendo gambadas por tanto luixo, pillé un bus urbano t'o mío hotelet en a parti continental de Macau, que prou que no yera denguno d'os hotels d'ixos casinos :-)

A l'atrol diya, me'n puyé con a intención d'arrecorrer os zaguers puestos qu'heba de veyer en a parti continental de Macau. Asinas, prencipié en a casa d'o Mandarín, un palacete de 4000 metros cuadraus en o centro de Macau, mandau a fer por o intelectual chinenco Zheng Guanying en o sieglo XIX, con una arquitectura chinenca d'ixa puenda an que sobresale a fusta, y con bells corridors y carreretas internas que ufren fotos repolidas. Estió una d'as visitas que más goyo me fació. No guaire luent d'a casa d'o Mandarín ye l'edificio dito Moorish Barracks (Cuartel Morisco), edificio d'o sieglo XX feito con motivacions arabes, muito poliu pero sin garra cosa a ufrir por dentro, pos ye un edificio administrativo sin más. Y no guaire luent d'o Moorish Barracks se troba o templo chinenco de A-Má, en un lumo, an que s'achuntan esferents divinidatz taoistas y beluna budista, y an que se pueden veyer muitos locals posando vilas y inciensos, fendo reverencias y ceremonias relichiosas y tanyendo o gong. Visto iste templo y con una aturadeta en a estatua marina y placheta de Kun Iam, me pillé un bus ta que m'acercase a la zaguera coseta que me quedaba de visitar por a parti continental de Macau: o Macau Fisherman's Wharf, unatro conchunto de casino-hotel-centro comercial-atraccions, iste enfilau a Roma. Asinas, se teneba a replica d'un teatro romano an que feban actuacions, restaurants italianos y botigas caras, y prou que escusaus de cinco estrelas. A esferencia d'iste con os anteriors ye que aquí a más gran parti d'as cosas yeran ubiertas a l'aire libre, y se notaba tamién una mica en decadencia: prou cudiau, pero con muitos locals y puestos vuedos y con poca chent. 

Enta Macau (i): ciudat colonial a descubrir

Uno d'os destinos que más yera remugando, más que más ta descansar-me d'a caotica Manila, yera Macau, y t'astí que marché o 10 de mayo ta pasar tres diyetas. Antiparti d'un ambient urbano ordenau, Macau de siempres m'ha trucau a ficancia en estar a zaguera colonia Portuguesa y Europea en Asia, dica o 1999, quan pasó a mans de China. Y sincerament, ista visiteta no fació burro falso. 

Entre que pillé o vuelo de nueitz, y que antiparti habié de sufrir os tipicos retrasos de Cebu Airlines -con cambio d'avión incluito-, pos a la fin i arrivé a la una d'a maitinada, pero a ciudat feba tan buenas farchas y l'hotelet yera tan bien situau que decidié de fer una primera gambada por a parti piational d'o Largo do Senado, as carreras historicas d'a parti continental de Macau. Curioso sin dubda trobar-te con toda la rotulación de carreras, transportes u negocios -y por un regular, de todas as cosas- en dos luengas: chino y portugués.

Dimpués de dondiar por o centro, de dormir y de desayunar-me, ye decir, dimpués de reviscolar, marché a veyer y conoixer os principals puestos historicos d'a parti continental de Macau, a piet, aproveitando que feba muito buen orache, que o trafico yera adecuau, que bi heba ceras prou amplas y muitas carreras y callizos piatonals. O primer de tot, prou que sí, estió arrecorrer o Largo do Senado, plaza y carreras piationals con as tipicas botigas d'os centros d'a ciudatz -con firme presencia d'Inditex-, prous turistas y bells edificios historicos, sobresalindo o Instituto t'os Asuntos Publicos y Municipals por un costau y a Ilesia de Santo Domingo por l'atro costau, asinas como bellas casas privadas colonials repolidas. No guaire luent de tot isto yera o Teatro de Pedro V, tamién feito por os portugueses -se diz que ye o primer teatro d'arquitectura occidental en Asia- y que, sin estar gran cosa, pos tampoco no ye de más fer-le una gambadeta. 

Visitadas ista cosetas, marché ent'as runias d'a ilesia de San Pablo, que basicament son a suya frontera, pos un tifón la esboldregó en 1835. Ye un d'os iconos de Macau, y como muitas atras cosas, estioron restauradas y potenciadas mientras as zagueras anyadas d'a presencia portuguesa. Dimpués de puyar a costera y os escalerones, y de fer-me a tipica foto, marché ent'a parti de dezaga d'a ilesia, an que se troba un chiquet monumento u pantión con os uesos de sorches d'esferents guerras y que parixen una mica trigaus a la fortuna. Si te fan goyo os crapacins y as cosas macabras, de seguras que t'encanta ixe puestet :-)

Y a plego d'istas runias, se troba o fuerte de Macau, alto d'un lumo. Tiene unas anvistas sobrebuenas de toda la parti continental d'a ciudat, y mesmo se pueden fer fotos curiosas con os canyons apuntando a os esparpallants edificios d'os casinos. Tot ye piational y verde, y prou que aproveité ta fer-me as gambadas que no me puedo fer en Manila. A o canto de Macau se troba o museu d'a ciudat: estió a onica actividat que me costó diners -a resta de puestos son de gufanya-, pero no ye guaire caro (15 patacas, arredol de 1,5 euros), encara que sincerament, no fa vez en no tener cosas guaire intresants.

Vistas istas historietas y feitas as correspondients fotos millenials, baixé o lumo y encara me trobé con bells edificios colonials curiosos, como lo d'a biblioteca de Macau, a casa chardín u o fosal historico protestant. Quitando treslau d'a enerchía d'o primer diya, encara me decidié a puyar l'atro lumo d'a ciudat, en o que se troba o Faro da Guía, poliu faro blanco portugués que feba honra ta orientar a os mariners. En ixe mont tamién bi ha una chicota fortaleza que, igual que o fuerte antis dito, fació honra ta esfender a ciudat d'as enrestidas holandesas de 1622 y d'as enrestidas de piratas. Entre 1996 y 1998 s'escoscoron y restauroron bells frescos en a suya capilla, feitos mientras o sieglo XVII y muito intresants en achuntar motivos orientals y occidentals.

Dimpués de visitau o mont de Guia, y de fer-me un descanset en una replaceta abaixo con

buen wifi publico, preté a tornar, aproveitando o camín ta dentrar en a casa de Lou Kau, un curioso palacet d'un mainate chinenco d'o sieglo XIX, con polius adornos en fusta. Tamién i dentré en l'interior d'o Instituto t'os Asuntos Publicos y Municipals, en Largo do Senado, con una luna curiosa. Y toda ista tornada rodiau por os edificios colonials d'ixe vico, que le daban cierto encanto, de vez que as suyas botigas y a piationalización d'as carreras le feban unas farchas muito occidentals.

Ista primera impresión de Macau estió muito positiva. Sin estar una gran cosa u un puesto que haigas de visitar bella vegada en a tuya vida sí u sí, Macau ufre sensacions prou occidentals y una cultura colonial pincha. Tranquilidat con trafico bien chestionau, gambadas en carreras piationals, cultura, historia y gastronomía variadas, tot sincretismo portugués-chinenco fueras d'a luenga, an que por muito que apareixca tot rotulau en portugués, a onica que se charra en a carrera ye o chinenco, y seguntes dicen, cada vegada más mandarín y menos cantonés -servidor no podió parar cuenta d'isto.

Enta Baguio (ii): Tam-awan, bell church, mines view y atros

O segundo diya en Baguio prencipiaba una mica esferent. Y ye que, ya en sabado, se notaba cómo iba venindo chent de Manila a pasar o cabo de semana y a tranquilidat d'o viernes se convertiba en movimiento, rudio y contaminación.

Con tot y con ixo, a primera actividat que facié encara la podié disfrutar: a visita a o lugar "de nativos" de Tam-awan, una d'as principals actividatz recomendadas en a ciudat. Pos bien, ixo de nativo... no'n teneba mica! En reyalidat ye una gambada por un troz de mont con esferents aturadetas an que han ficau recreacions de construccions de nativos -beluna autentica- con bell par de museus y mesmo con un atrapasuenios chigant, elemento orichinario d'a tribu norteamericana Ojibwe... En a más gran parti d'as construccions, pinturas y esculturas feitas por os descendients d'os nativos en estilo hipster-bohemio -y con os correspondients pres hipsters-bohemios por si querebas mercar-ne. Con tot y con ixo, con un pre d'entrada prou baixo -menos d'un euro- pos ye de dar dentrar en Tam-awan y fer a gambada, sin asperar, ixo sí, garra cosa autentica. 

De Tam-awan, pillé un taxi ent'a 'Bell church', que por muito que se diga 'church', ye un templo chinenco en una costera d'un mont a man d'a val de culors que heba visitau o diya d'antis. De feito, o viernes m'i acerqué, pero istos chinencos levan unos horarios una mica raros y o puesto yera trancau. D'atra man, tornar-ie fació firme honra, pos o templo ye curioso y pincho. Una mena de Paniello en chicot, presidiu en a suya dentrada por una campana -d'astí o suyo nombre-, igualment nuevo pero poliu. 
  Visitadas istas dos cosetas, marché ent'o centro en un jeepney y astí, dimpués de descansar-me una mica por o parque Burnham, facié firmes gambadas ent'a parti que encara no heba visitau d'a ciudat -pos heba trigau Baguio ta poder fer gambadas y disfrutar-las, cosa que no puedo fer en Manila-, aturando y dentrando en o museu de Baguio. O museu no ye gran cosa, pero permite conoixer d'una traza rapeda a cheografía y l'antropolochía d'as provincias que fan a rechión de Cordillera, bella cosa que a yo m'apasiona y que soi tractando en documentos historicos d'o norte de Luzón d'a Universidat de Santo Tomás. Cal adhibir que aturar una mica en un puesto trancau a la uembra, con tanta chent, auto y fumo venindo de Manila, s'agradeixeba.

Dimpués d'o museu, estricallau y sin guaires ganas de continar caminando por o estresant que se yera metendo Baguio en sabados, quité fuerzas y marché en un jeepney t'atra d'as atraccions recomendadas d'a ciudat: Mines View, l'alto d'un pueyo an que puet veyer-se buena cosa d'as montanyas de Cordillera y a ciudat de Baguio. Pos bien, malas plegar-ie, si ya me yera queixando d'a cantidat de chent que yera arrivando en a ciudat, astí trobé l'infierno: pior que no o primer diya d'interpenyas en Pilars. Chent, chent y más chent, empentons, locals disfrazaus de nativos que de contino t'ufren fotos con ells y as suyas falsas vestimentas ta quitar cauquerré, bell caballo putiau que ufriban ta fer-se fotos y tot ta poder plegar en l'alto d'o montet, sin poder disfrutar d'as anvistas entre tanta chent y luitando ta poder fer una foto decent. Probablement o puesto siga muito poliu entre semana u en cheneral sin tanta chent, pero con tanta chent recomiendo no ir-ie.

Tras ista mala experiencia, y ya con ganas de poca cosa, encara marché t'o parque Wright, a poca distancia d'o mirador de Mines View y marchando ent'abaixo. Ye un parque más chicot que no o parque Burnham pero igualment pincho, an que no se podeban logar bicis ni cars a pedals pero sí caballos putiaus, y con bells escalerons que en puyar-los s'arriva en The Mansion, a residencia oficial d'o president de Filipinas de veranos. No se puet pisar que a suya dentrada, pero se puet apreciar a grandaria y o estilo, que fa alcordanza a la casa blanca estadounidense: grans chardins t'a la fin arrivar en un gran edificio blanco capitolino.

Y dimpués de vista The Mansion, baldau de raso, pillé un taxi ta que me levase ent'a gara de buses, an que pillé o primer bus enta Pasay-Manila. Sincerament, o sabado no lo disfruté tanto, por a cantidat de chent y autos que i plegaban, que estresaba tot, feba más fumos y ruidera, y diría que mesmo calor. Con tot y con ixo, encara que Baguio no ufre cosas esparpallants, tiene detalles y puestos pinchos, y ye un puesto bueno ta descansar-se d'o ritmo filipino bells diyas en un ambient fresco y fendo gambadas tranquilo, siempre que no bi haiga guaires turistas. A chent ye muito simpatica, igual que en a resta de Filipinas, pero más calladeta u timideta y de cabo quan mesmo s'agradeix. Antimás, Baguio ye o puesto de salida ta puyar una ripa de monts y tucas d'arredol, entre ellas o Mont Pulag, a montanya más altera de Luzón y a tercera de Filipinas. Asinas que i tornaré de seguras!

Enta Baguio (i): gambadas, yankees y fragas

A pasada semana ya se sufriba en Manila a suya fuixina de veranos. En muitos puestos se charra d'ella, pero quan pertoca, ye indescriptible. Asinas que con ixas envueltas, y asperando-me buena cosa de treballo t'ista semana, decidié pillar un bus enta Baguio, ciudat d'a a montanya d'o norte de Luzón con un orache muito más fresco, ta pillar enerchía y horiar-me una mica. Baguio estió oficialment fundada en o 1909 por os estadounidenses, que mesmo la veyeban como una futurible capital d'o país. Se basoron en un estudio de tres incheniers espanyols a la fin d'o sieglo XIX que veyeban astí un buen puesto ta fer un lugar termal y de descanso por o suyo orache fresco. O urbanismo norteamericano, con grans parques y ceras amplas, encara s'entrefila. A diya de hue, se considera a 'capital de verano' de Filipinas, ye a residencia de veranos d'os presidents -con bella excepción de belún que s'estimaba de veraniar en a rechión más hispanica d'Ilocos- y tiene muita popularidat entre os filipinos.

I arrivé o chueus de nueitz, y a primera impresión que me causó ye que se pareixeba muito a Ovieu: no guaire trafico, bell guariche bueno ta boriniar, curvas y costeras, fresquet -mesmo una chaqueteta no iba mal-, parques y ceras. Con tot y con ixo, iba baldau, asinas que no aproveité guaire ixa primera nueit, sino que marché enta l'hotel, me facié una ducha y ent'o leito. 

A primera visita que facié o viernes de maitins estió a que más goyo me'n fació. No sé si en estar a primera y ir-ie con más rasmia, u porque de verdat yera a millor: as runias de the old diplomat hotel. Una antiga torre graniza de tres plantas alto d'un pueyo que data de principios d'o sieglo XIX, que en a suya historia ha feito tanto d'hotel de luixo como de convento relichioso, y que ye viella y enronada por a molsa, con un toque hipster-colonial que atraye, y con muitos pocos turistas dondiando-ie. Leva fama de casa encantanda... y encara que ya se sabe cómo son istas cosas -mito y estratechias ta potenciar turisticament o puesto- lo cierto ye que ista casa fa honra ta fer peliculas de terror. No guaire luent se troba a gruta de Lourdes, alto d'un pueyo en a entrada d'una chiqueta espelunga u glera, an que a prencipios d'o sieglo XX mosens chesuitas espanyols con permís norteamericano i ficoron una estatua d'a virchen de Lourdes que a chent ascape prencipió a venerar.

Dimpués d'isto, tot andando, marché ent'o centro d'a ciudat, y tras visitar o suyo concello feito por os americans en estilo capitolino, arrivé en o parque Burnham, dito asinas en hunor d'o urbanista que empentó a ciudat actual. Iste parque ye o puesto favorito d'a chent local y de muitos foranos que i van, pos con buen orache uno puede fer-se una gambada tranquila, sin fumos ni guaires rudios, u bien pillar bicicletas y "cars a pedals", u mesmo logar una barquichuela an que arrecorrer o lago interior. Tamién bi ha buena cosa de puestos y guariches de birolla, sucos y ropa. Se puet decir que iste parque se pareix asabelo, en ideya y ambient, a o parque gran de Zaragoza. En os arredols, bi heba buenas instalacions esportivas d'atletismo, tenis, fútbol y atros esportes, y bi chugaban  adultos y ninos que contrimostraban un libel sobrebueno. Y ye que Baguio ye tamién o "centro d'alto rendimiento" d'os esportistas filipinos, por as suyas condicions d'orache y altaria. 

Dimpués de fer una gambada por o parque, y descansar-me fendo-me un suco, continé a mía gambada ent'a catedral de Baguio -prou recient, mica especial- pasando por a Session  Road, una d'as principals avenidas d'a ciudat, con muita actividat pero una mica estresant y con masiau trafico t'o mío gusto. Continando o camín, facié una aturadeta por a casa-museu d'Emilio Aguinaldo, controvertiu lider de Filipinas que luitó contra os espanyols y os americanos, pero que tamién asasinó a o que fue o principal mainate d'a independencia Filipina chunto con Rizal, José Bonifacio. Como no se podeba dentrar que en collas de cinco personas ta ixe museo -lo que me pareix una esculada- y ya que tampoco no m'intresaba especialment, no i dentré, continé o mío camín y a la fin arrivé en o convento d'as Pink Sisters, un pueso intresant pos en estar pintau tot de rosa -mesmo as monchas levaban habitos rosas- pareixeba más una atracción de DisneyLand que no un convento. Ixo sí, as monchas de clausura no permitiban garra rudio ni mobils en l'interior, y nomás se podeba visitar una miquineta d'a ilesia, prou que sin fer fotos.

A man d'iste convento se troba a casa de Laperal, antiga casa que dicen encantada y que por dentro tien exposicions d'arte, encara que as opinions por o rete sobre isto zaguero son malas. Por desgracia yera trancada, no la veyé que por difueras y cal decir que bien podrían rodar astí capitols de American Horror History por as farchas que'n fa. Como he de tornar más vegadas ta ista ciudat, de seguras que la visitaré por dentro, no tanto por l'arte, sino por a suya arquitectura. Y dimpués d'isto, tornando atra vegada ent'o centro, me facié una gambadeta por o mercau, mica especial y prou parellano a qualsiquier mercau popular filipino, encara que astí s'aprenciaba un millor libel de vida, as cosas yeran más ordenadas, l'ambient más escoscau, no feba tanta calor y, lo más curioso, bi heba buena cosa de productos que no se troban a ormino a en a resta d'o país: cafés de todas menas -con ulors esparpallants-, fragas, naranchas... y en cheneral muitos vechetals y productos más "europeus" que se cultivan y fan astí en tener un orache que lo permite.

Esquinazau de tanta gambada, chenté, me facié un suco y pillé un taxi que me levaría enta Stobosa u a val d'as culors, en a redolada de Baguio. Stobosa ye una vallón an que todas as suyas casas son estadas tintadas con esferents culors, parellano a como muitos lugars de pescadors han feito arredol d'o mundo. O paisache coloriu urbano en metat d'o mont verde ye repoliu, y antimás servidor levaba una chambreta tie-dye ideyal ta camuflar-se en ixe vico! Ixo sí, cal fer escalerons a ixarramantons t'arrecorrer-lo, y ixo ya me dixó escamallau. U quasi, pos encara yera con sinobia ta concarar a puesta d'o sol en os campos de fragas de La Trinidad, no guaire luent de Stobosa, a piet d'o mont, con hivernaders, y tamién con botigas a ripas que vendeban toda mena de productos derivaus d'as fragas: mermeladas, licors, sucos, asinas-asinas.

Y dimpués d'isto, ya de nueitz, pillé un jeepney -cal decir que en Baguio he visto os jeepneys más polius y "comodos" de toda Filipinas- que me levaría ent'o parque Burnham, an que me facié una gambada con a suya polida iluminación, cené en os suyos puestetz, y ya marché ta l'hotel an que dormiría con una manteta -cosa rara en Filipinas- dica l'atrol diya. En iste primer diya en Baguio, a mía impresión ye que ye una ciudat muito comoda ta vivir-ie, relaixant, con buen orache y con un libel de vida superior a la meya filipina -tamién con pres más caros. O herencio y planificación norteamericanas son presents, uno puet fer gambadas y más gambadas de traza relativament comoda, o numero de jeepneys ye adecuau, son bien cudiaus, y no se permiten tricycles, sino que no bi ha que taxis. Sin perder de tot a pureza y a identidat filipinas, pareix que Baguio ye un buen espiello an que a resta d'o país puet mirar-se ent'o suyo desenrollo. 

Enta Cebú (ii): Candaguit, Carcar y aventura en moto

Dimpués d'a nueit en Dalaguete, ya muito baixos d'enerchías y con ganas de pillar un leito y una ducha en condicions dimpués de más d'una semana 'mochiliando', nos desayunemos tranquilament y pillemos un bus ta concarar a tornada ent'a ciudat de Cebú fendo bella paradeta turistica por metat. En primeras íbanos a fer una nueit más por a isola, pero yéranos tan cansos, que decidiemos pillar un avión t'ixa mesma nueit dende Cebú enta Manila.

O primer puesto an que querébanos aturar yera Carcar, lugar con bells edificios y monumentos colonials que caleba veyer. Pero mientras enfilábanos t'astí, Ana mirando-se por o GoogleMaps nos convenció t'aturar antis en Tubigan, Candaguit, an que pareixeba haber bella atracción acuatica no guaire explicada en o rete. Como no tenébanos cosa a perder, pos astí que aturemos. Garra sinyal, garra chent, un camín de bardo y cuatro guariches-chavolas no yeran buen augurio... En isto que un hombre d'una d'ixas casas nos dició que caleba continar por o camín ent'abaixo ta trobar o que buscábanos, y pos como no tenébanos garra atra alternativa, ixo que faciemos.
 
  En menos de cinco minutos i arrivemos, y veyemos una badineta con una ripa de chent y ninos ficaus en l'augua. A un costau, un caminet que enfilaba enta bells manglars y a placha de fundo, con un entrant d'augua a l'atro costau. Feba buena farcha. En ixas, que a la fin d'o caminet yeran fendo una lifara, y a chent local nos convidó. Resulta que yera o 'cabeza de Barangay' (concellero de vico) celebrando que heban adecuau una mica más o camín. Y ye que quereban aprestar o puesto ta fer-lo una atracción turistica decent, y a verdat que de 'materia prima', en tienen. Toda la chent se nos miraba de contino y s'alegroron muito, pos resulta que yéranos os primers turistas foranos que visitábanos o puesto! Como premio, nos convidoron a chentar birolla cebuana -con un plato feito de masa de panizo que nunca no heba tastau- y dimpués en bellas barquichuelas nos levoron t'una chicota isola ya en o mar, aprestada con un telladet y cadieras, an que se podeba disfrutar d'auguas turquesas y transparents, mirando-se totz os manglars y os pueyos d'a isola de Cebú. Puesto repoliu, sin garra turista, puro filipino y, ta forro de bota, i trayoron una barquichuela a motor que nos fació, uno a uno, una gambada por os manglars! Cal decir que Silvia y Ana tenioron más suerte y a suya gambada estió millor... be d'estar que o conductor d'a barquichuela no yera tan intresau en servidor y a yo bien radida que me la fació... :-) Sin dubda, ista paradeta estió tot un encierto d'Ana!

Dimpués de ficar-nos en l'augua, disfrutar d'o puesto, tornar ta tierra firme, cambiar-nos y estar-nos un ratet con ells, s'ufrioron a levar-nos enta Carcar, ta veyer os suyos edificios historicos y colonials. En a plaza d'o lugar, an que se'n troban quasi totz, entremos primero en o palacio siede de l'archivo parroquial -u diocesano? Agora no me'n alcuerdo- y en poco tiempo i salió una muller, en primeras ta espantar-nos, pero en veyer que yéranos turistas, s'ufrió a fer-nos una visita por o edificio. Nos lo amostró y bien pincho que en yera! Me fació alcordanza d'as casas colonials de Vigan. Nos faciemos buena cosa de fotos, con a presencia d'a muller, que yera a versión d'un mosen viello resabiau pero en femenino, encara que cal decir que en reyalidat estió muito maha con nusatros. A la fin recomendó a Silvia y Ana que trobasen un buen mariu, y les dició que ella conoixeba buenos partius filipinos y que en ixa ilesia de Carcar las casarían encantadas. De yo, pasó.

Dimpués d'ista visiteta y de veyer y fer fotos a esferents palacios y casas colonials, repolidas pero beluna meyo espaldada, pillemos o bus ta marchar ta Cebú, pensando ya ir directament ta l'aeropuerto. Tot iba bien... dica que o bus arrivó en o lugar de Naga, ya en a redolada de Cebú ciudat. Astí, nos asperaba a entrascada de tornada de vacanzas de semana santa en un autobus a rebutir de chent y sin aire acondicionau. Mientras quasi una hora avancemos menos d'un kilometro, y en l'atro carril d'a carretera bi heba un cambión de tocins que churaría iban millor que no nusatros. A la fin, con o nuestro vuelo peligrando, baixemos d'o bus y busquemos bellas motos que nos i levasen. Toda una odisea trobar-las, dica que a la fin trobemos ya de nueitz bellas motos que se ufriban a pasar a entrascada dica plegar en o vico-lugar de Talisay, an que pillar un taxi. Sabendo que íbanos radius, as nuestras tres motos pretoron marcha mesmo indo por o carril contrario, enguiliando y esquivando atras motos y autos que veniban de frent. Mientras cuatro kilometros a mía culor yera blanca, y tot isto negociando pres con o mío conductor, pos no bi heba garra taxi por as garas. En o mío caso, en un trachecto de cinco kilometros, a mía moto indo a 80 km/h por o carril contrario, se desapegó d'as motos de Silvia y Ana, y istas i plegoron cinco minutos más tardi. Ixo sí, dimpués bien que nos esculoron...

Dimpués d'iste particlar Gran Premio de Motorland, un taxi nos levó ta l'aeropuerto, an que i arrivemos mesmo con tiempo. Allí, dentre os tipicos puestetz t'asperar o vuelo en a terminal, bi heba un de sucos de tubo! O que le dicen tubo, que en aragonés ye canya de zucre, ye una delicia si la mezclas con calamansi u atros citricos u fruitas acidas. Nusatros nos faciemos vasos bien grans de tubo con calamansi y con fruita d'a pasión. Yera chusto lo que amenistábanos dimpués de tanta cansera y tanta tensión! Cenemos tamién en o Jollibee de l'aeropuerto, y dimpués vuelo y taxi enta casa nuestra en Manila!