28.8.18

Ent'as guargas de Dampalit, Los Baños: A tranquilidat ye o que más se busca


Ista vegada sí que sí, heba de hopar de Manila. Tres semanetas sin salir d'ista ciudat ye masiau, encara que ye verdat que siempre trobaba buenas escusas ta quedar-me-ie. Asinas que ahiere lunes, aproveitando que yera a fiesta d'os herois nacionals, decidié de pillar un bus y plantar-me en Laguna, provincia a man de Manila anque te trobas buenas pozas, selvas y monts, y mica turistica. En concreto, decidié d'ir a las guargas de Dampalit, en o vico de Lalakay poco antis de plegar en a ciudat de Los Baños, en os lumos d'o mont Makiling y que seguntes o GoogleMaps, son as guargas más proximas a la capital y mica conoixidas. Ya fa bells meses miré d'ir-ie, pero en o camín cacegué as claus de casa y habié de tornar-ne sin poder arrivar-ie.

Pillé o bus en a gara de Buendia por 100 pesos (euro y piquet), a man de casa mía, y me planté allí en poco rato. Tanto que, dimpués de mirar-me o paisache de carretera por una horeta, me metié os auriculars y en ascuitar nomás quatro cantas ya i plegué: mesmo quasi me paso! Andé un poquet y ascape trobé o río, y en isto un nino bien maho me charra y me diz que o camín que levaba no yera o millor, y s'ufre a levar-me ent'as badinetas por o millor camín, a las que arrivemos a piet en menos de 20 minutos. Iste zagal de 12 anyadas se deciba Jobert, y sería o mío amigo y companyero de cursa. 

Mientras i puyábanos, Jobert me comentaba que a suya familia feba parti d'a Iglesia Ni Cristo -una polemica confesión con más de dos millons de fidels en o país y que os suyos visters edificios neogoticos se'n veyen por totz os costaus en Filipinas-, que su mai viviba en Manila y que ell viviba con su pai astí, que ixe diya no heba de marchar t'a escuela en estar festivo nacional, y que fa muito tiempo ixas guargas yeran muito famosas, pero que en 2006 un baguio -tronada tropical, monzón- cambió a cheografía d'ixa val, d'as guargas y tamién fació que as auguas se metesen burencas. Dende alavez ixas guargas heban perdiu muita popularidat. Charraba d'a montanya como the woman, probablement referindo-se a Maria Makiling, o personache d'a mitolochía tagala que habita en ixe mont, dimpués cristianizau. Sobre bichos, me dició que caleba parar cuenta con as cobras que se trobaban en a parti alta d'o mont, pero no abaixo do yéranos, y que en tiempos bi heba cocorels, pero ya no. As auguas d'abaixo antimás yeran emporcadas porque as mullers escoscaban as ropas en os arroyos d'a redolada, y a verdat, mientras yéranos puyando, las veyeba tan puercas que ya contaba con que no m'i ficaría. 

I arrivemos y en a dentrada una familia chestionaba a 'dentrada ambiental' (20 pesos), asinas que me pensé que igual teneba suerte y as guargas encara yeran operativas. Y asinas estió, me trobé con un puesto an que se notaba por as rocas que bell tifón heba pasau fa tiempos, pero encara yera poliu y nomás con una familia pasando o diya. As guargas yeran chicotas, pero prou t'o que quereba. Antiparti, en metat d'a selva, con una pincha cascadeta y con poca chent y dengún turista: de bitibomba! Me i estié una horeta en l'augua y baixo a cascada, y encara que animé a Jorbert a chugar con o suyos amigos y aproveitar o diya de fiesta, ell quereba quedar-se-ie con yo. Yo encantau, mesmo quan en primeras quereba una mica de soledat y ir a la mía bola. Dimpués d'a horeta, pretó a espurniar y poco dimpués pretó a plever, por o que marchemos ta bells guariches ta protecher-nos, chunto con l'atra familia que i yera. Astí, como buenos filipinos, m'ufrioron pincha conversación, biera San Miguel, birolla filipina, y una d'as mullers, de Manila, me deciba que yera a segunda vegada que yera astí, que lo heba descubierto gracias a la suya amiga d'a redolada chusto a semana pasada y que le feba firme goyo. 

Pasada la plevia, torné t'a carretera con a intención de marchar ta Los Baños, ista vegada por unatro camín que m'indicó Jorbert, o camín que esnavesaba o lugarichón en metat d'a selva, an que s'alternaban callizos de tierra, folluda vechetación con yerbas y arbols tropicals, bell arroyo, casichonas humildes, gallos, cans, ninos, karaokes casers y musica tecno-hortera. Arrivaus en a carretera, o mío amigo Jorbert y yo nos despidiemos, no sin antis dar-le una mereixida propineta -y no por fer-me de guida sino porque o mesache ye un sol. En pillar o jeepney dirección Los Baños, Jorbert me despediba con a man dica que o jeepney pilló a curva y ya nos dixemos de veyer. En Los Baños, a bells tres kilometros, chenté en un Jollibee tras pasar a famosa entrascada d'iste lugar, y dimpués, i dentré en o campus que a Universidat Publica de Filipinas tien astí.

Y ye que dende iste campus especializau en Sciencias Forestals sale un camín que te permite ir por a selva tropical d'o mont Makiling y mesmo puyar dica a suya tuca. Pero en arrivar-ie, me trobé con que a dentrada ye dica as 2pm, y ya yeran as quatro coladas. O guardia, muito amable, me dició que ya no se podeba pasar, pero que yeran ubiertos totz os diyas d'a semana dende as 6am dica as 2pm. Asinas que me apunto a cursa t'atro diya, pos o volcan Makiling tiene más de 1000 metros d'altaria, estió o primer parque nacional de Filipinas y dicen que ufre muito buenas anvistas de toda la redolada de Laguna y o centro de Luzón. Miré d'ir ent'o chardín bonatico especializau en as especies d'o mont Makiling, pero trancaba a las quatro y mesmo me pensé d'ir ent'a casa natal de José Rizal en Calamba, pero en estar fiesta nacional, yera tamién trancada. Asinas que facié una gambada por o poliu campus d'a Universidat Publica en Los Baños, con bells arbols chigants repolius, chent choven chugando a futbol y baloncesto, y china chana torné ta Manila, con clucadeta en o bus incluita! 

 

21.8.18

Unatra de Manila: peleas de gallos, fiestas de barangay y o memorial de Quezón


Nota
: en iste post charraré d'as peleas de gallos, por o intrés social que teneba por ellas y prou que no por disfrutar d'o maltracto animal. Con tot y con ixo, si tiens a piel fina ya puetz hopar d'aquí y totz contentos. 

12.8.18

Tornando ta Manila: o forniguero paradisiaco


Dimpués de bellas semanas por Zaragoza, bien que m'aganaba ya de tornar ta Manila, a que considero casa mía! Y pos a la fin, fa bell par de semanetas, i arrivé de nuevo con firme goyo. Me trobé con una Manila una mica más occidental, u ixo me pareixeba: y ye que agora respetan os semaforos que han meso fa menos d'una anyada, y ixo ha feito amillorar una mica o trafico. U ixo, u ye que ya soi feito a muitas cosas que en primeras me chocaban pero que agora ya veigo cutianas y normals. U talment una mica d'as dos. 

O cierto ye que por istas tierras m'asperaban buena cosa d'afers: cambiar de piso (condo como dicen aquí, que son chicotz estudios con unas instalacions comuns prou luixosas), pillar o Internet en o nuevo piso, parar as primeras clases, asistir a las reunions de departamento, facultat y universidat, asinas asinas. Y por ixo mesmo no he puesto fer guaires cursas ni escribir en o blog dica hue. 

Pero de cabo quan, y más que más de tardis, pos bien que he aprofitau ta fer-me bella gambada por Manila, tanto por puestos que conoixeba y que me fan goyo, como por atros que me sonaban pero que encara no heba visitau l'anyada pasada. En primeras no pensaba escribir sobre isto, pero remugando una mica, he pensau que ye una inchusticia que adedique tanta letra a la resta de país y quasi no diga cosa de Manila, que a la fin ye an que vivo. Talment, o vicio d'o cutiano fa que le trobe menos intrés a Manila, encara que ta un forano de seguras que en tiene. Asinas que sirva iste post -y bell atro más que i plegará- ta compensar ista 'inchusticia'. 

Si tres cosas he de destacar ista semana, ixas son: cenar una empanada ilocana con un suco de guyabano, visitar o parque forestal d'Arroceros y visitar o casino Okada, con a suya famosa fuent.

Asinas, una d'as primeras nueitz marché t'o millor puesto que conoixco en Manila ta fer-se
una empanada ilocana. Os exteriors de Market-Market, en BGC, an que bi ha una ripa de guariches a l'aire libre, bien acotraciaus, con bancos y mesas comuns arredol y en do se puet minchar os platos d'as esferents rechions de Filipinas. Cal decir que BGC (Bonifacio Global City) ye uno d'os vicos ricos de Metro Manila y ye esparpallant: en Espanya nunca no he trobau garra puesto tan luixoso, con botigas de Rolex y concesionarios con ferraris. Como curiosidat, a chent rica d'istos vicos gosan de tener huskies y atros cans de fredor, agora tan de moda por series como Chuego de Tronos, y os pobrichons mal que lo pasan con a fuxina que'n fa. Pero Market-Market ye precisament a parti más humilde y ''reservada'' t'os filipinos dentro d'iste vico. Astí, en un ambient que encara ye filipino, uno puet disfrutar con comodidat d'a gastronomía y d'os costumbres de todas as partis de Filipinas, prou que a un buen pre. Ta forro de bota, acompanyé ista sucosa -y fartiza- empanada con un suco de guanabana -guyabano- que pillé dentro d'o centro comercial de Market-Market, en un puestet especializau nomás en ista fruita -ye l'onico puesto especializau de raso en guanabana que conoixco en toda Manila.

Pocos diyas dimpués, aprofitando un descanset, marché t'o parque forestal d'Arroceros,
en o corazón de Manila, en o vico d'Ermita y en a marguín d'o río Pasig. Pareix estar que por especulación urbanistica lo quieren espaldar, y seguntes dicen ye o zaguer parque forestal d'a ciudat de Manila -no pas d'a rechión de Metro Manila. A tiro de jeepney de casa mía, pos astí que me planté, y sorpresa que me trobé. Ixe 'parque forestal' tiene una extensión menor a la plaza d'a Seo: chicorrichón. Ya en o GoogleMaps a suya planta me pareixeba chicota, y o GoogleMaps en iste caso -no pas en atros aquí en Filipinas- no falló. Se puet arrecorrer de cabo a rabo en menos de cinco minutos, si bien cal decir que ixa parceleta ye selvatica de tot y mesmo se troba bell muixón, bella cosa extranya en Manila. Por uno d'os suyos costaus, se podeba disfrutar d'una gambada por un chicot paseo fluvial a o canto d'o puerco río Pasig, mirando-se a l'atro costau d'o río o vico de Quiapo, probablement o más pintoresco d'a ciudat.  No ye un parque ta correr, pero sí ta levar-se un libro y disfrutar leyendo-lo.

Y a zaguera d'as cosetas nuevas vistas y a comentar en iste post ye o Casino d'Okada, en Parañaque, un vico que son construyindo agora a o canto de l'aeropuerto y que ye destinau a estar o nuevo rico vico d'a ciudat. Si BGC y o Venice Mall -a o canto de BGC- ya me pareixeban sorprendents aberracions en una ciudat tan desigual, o Casino d'Okada se leva o premio gordo. Ubierto en 2016, iste casino ye un chicot Macau plen de luixos y que o suyo plato fuerte ye una fuent ubierta en 2017 que dicen fa cada hora o espectaclo acuatico de luz, culors y mosica más grant de tot o mundo (nota: en reyalidat le supera a fuent d'o Burj Khalifa en Dubai). Atra vegada más, o forniguero de Manila ufre a os suyos habitants a posibilidat de pasar en 100 metros de carreras de ninos espullaus dormindo entre ratas a luixos insospeitaus de primera categoría mundial. 

Talmién cal adhibir o descubrimiento de l'Angkas (en tagalo, moto), una app mena Uber pero de motos. Y ye que o desplazamiento en moto te permite mover-te de buenas trazas y a buen pre por iste formigal de ninos, autos, cans, mixins, cucarachas, ratas y agora mesmo carreras engaronadas por o monzón que somos pasando (l'atra opción ye amprar helicopteros, pero astí o 'buen pre' ya s'eslampa). Ya charré d'ista aplicación en o zaguer post quan tornaba d'o volcán Pinatubo, y ciertament a amillorau a mía vida en Manila y o principal problema que teneba. Antimás, permite mirar-se y disfrutar d'a ciudat dende atra anvista. O suyo punto negativo? Que nunca no sabes si plegarás vivo.

Ista semaneta me vienen dos buenos amigos, Chuan y Gemma, y fendo-les de guida por os principals puestos d'a ciudat (Luneta, Intramuros, Quiapo, etc.) de seguras que pillaré buenas ideyas ta continar escribindo sobre Manila!