24.11.19

Enta Negros Oriental: rural y urbano filipino, tot en uno


Totz os Santos y a Nueit d'Almetas ye una d'ixas festividatz importants en o calandario filipino, chunto con a Semana Santa y o Nadal. Y por ixo mesmo en a más grant parti d'as universidatz nos dan toda a semana de vacanzas. Y prou que aproveito ista vaca ta fer una visiteta por o país. Ista vegada me decidié por a isola de Negros, una d'as importants sin estar a más important. A qué fin? Pos porque ye a plego de Siquijor, una d'ixas isolas chicotas pero con cosas a fer en moto, parellana a Camiguín, Siargau, Bantayán u Busuanga, perfectas ta relaixar-se d'o treballo. No podié aproveitar os diez diyas seguius, pos o primer cabo de semana tenié seminarios y chornadas en a Universidat de Santo Tomás y en a Universidat de Filipinas, asinas que o dominche de maitinadas malas rematar con istas fainas y o compromís social d'a correspondient cena, pillé o vuelo de Manila enta Dumaguete, an que m'asperaba un sinyor con una motocicleta que heba logada por internet, a Marqueta 7!

Con más enerchía que no me pensaba marché t'as espelungas de Bulwang, no guaire luent d'a ciudat de Bais. Por o camín, aturé en Bais y veyé o suyo mercau. Me chocó a inmensa planta d'enerchía solar que teneban en salir d'o lugar, a más grant que he vista en a mía vida, con eras y  más eras. Y mientras me la miraba y feba as tipicas fotos, miré por o rete que Negros ye una isola que quasi se furne de tot d'enerchías renovables: a fuent más important ye a cheotermica, y ista se complementa recientment con a solar.

Plegau ent'o centro de recepción y información t'as espelungas de Bulwang, me lo trobé zombi de tot. Bell par de casas que feban farchas d'haber estau puestos d'información y que
de vegada pareixeban haber viviu millors tiempos. Dengún en o puesto fueras d'as muitas arainas que yeran teixendo os suyos retes. Y en istas, que un rudio en un arbre m'ixorronta: yera un hombre que yera podando-lo. Le demandé por as espelungas y baixó d'as brencas y se metió en a caseta. Allí me dio un papelet an que teneban as esferents opcions. Bi heba muitas espelungas, diría que seis u siet, y se podeba fer dos conchuntos que demandaban arredol de meyo diya: uno facilet con as tres espelungas prestas t'o publico y unatro más envolicau, con espelungas sin aprestar pero encara asinas aptas ta totz os publicos que quieran dar-le una mica de ferrete a o cuerpo, y con un pre muito más caro. En primeras pensaba fer un recorriu, pero o buen hombre me dició que con as horas que yeran, a una coladas, heba de trigar-ne nomás una. Me recomendó a Espelunga de Cristal, una d'as faciletas y que seguntes ell yera a más polida. En veras heba visto os mesmos comentarios por o rete, asinas que no dubdé y facié con ell de guida ixa espelunga, a rebutir de palangas y sin garra dificultat, pero polida, ixo sí, y millor vista con o buen hombre que me explicó as rocas muito bien. Una d'ellas, que pareixeba cuarzo, feba unas colors y formas repolidas quan se posaba a luz d'a lanterna en ella. Nunca no en heba vistas asinas!

Vista a espelunga, y encara con bellas horas por debant, me miré o mapa que m'heba feito enantis y marché t'as guergas de Pulangbato en Valencia. Puyín puyán por una carretera
repolida que te meteba por a sierra interior d'a isola y as suyas selvas, s'i arriva malas pasar con a moto una clamor que truca o ficacio, pos chumia una buena zorrera zufrosa volcanica. Prou que i aturé ta fer-me a foto, como feban no pocas personas alavez. As guergas de Pulangbato son de fácil plegar, pos se troban a o costau d'a fin d'a carretera y tiene un guariche bien aprestau an que chentar y fer-se un café. Bi'n ha varias, encara que una con una cascada cabaluda sobresale: normal que salga en as fotos! Me pensé ficar-me-ie, pero no m'aganaba guaire y la trobé masiau freda. Asinas que dimpués de fer una gambada y bellas fotos, me movié ent'as badinas de Red Rock Hot Spring, a pocos metros y presas por un resort que ufre tamién una cafetería y un restaurant en un buen ambient. Istas badinetas son dos piscinetas chicotas d'auguas de color bardosa pero calients, pos a fuent mana dreitament d'o manantial volcanico: astí sí que me fiqué dica que se fació de nueitz!

Dimpués d'istas guergas, bien relaixadet, cansadet y con muitas ganas de dormir, marché ta Bais, do teneba o puesto an que dormir ixa nueit. Por fortuna, ixe pueto, dito Melania's y ficau en un lugar cruce camíns dito Tanjay, teneba una cambra adecuada y mesmo un chardinet con una piscineta repolius, pero no los aproveité guaire pos quereba veyer contra
más cosas millor. A l'atrol diya, dispierto y desayunau, marché con a Marqueta 7 t'o Parque Natural d'os Lagos Chemelucos de Balinsasayao (Balisasanyao Twin Lakes Natural Park). Unatra vegada, ixas carreteras de Negros que se meten dende a concurrida carretera nacional costera ent'a sierra interior son goyo puro ta fer en moto. En plegar-ie, me trobé con que yera a onica personas que bi heba plegau ixe diya, encara que en tornar-ie ya bi'n heba bellas pocas más. En primeras me pensaba estar-ie una horeta, pero a la fin me'n estié tres u más: me facié una ruta circular crebagarras que t'amostraba os dos lagos, pasando por metat d'a selva filipina. Antiparti, decidié puyar tamién t'un mirador alto d'un pueyo y ta bell atro esbarre chicot. L'adediqué tiempo sí, y me dixó baldau, pero ye que o puesto mereixeba a pena y antiparti yera yo solenco. Como curiosidat, en metat d'a ruta circular, dimpués de caminar una horeta si fa u no fa, me trobé con una caseta-escusau que yera menos hichienico que a selva en sí... Pero si yera asinas sería porque lo emplegarían... Bell diya l'adedicaré un post a os curiosos costumbres hichienicos y escatolochicos asiaticos -que, ya abanzo, en primeras pareixen poco hichienicos y raros pero que si lo piensas bien en son más que no os nuestros.

Dimpués de veyer iste parque chenté en Dumaguete y de tardis marché t'as guergas de
Casaroro, no guaire luent d'a capital pero que atra vegada demandaban una carretera que t'enfilaba enta l'interior d'ista isola larguera. Ista vegada l'aproximación yera más envolicada, con buenas costeras y camins eslabatos por metat d'a selva que te levaban enta un graniza cascada con augua fredisma, y por ixo mesmo no m'i fiqué. Ixo sí, por o camín veyé as selvas de bambú más grants que mai he vistas. Dimpués d'estar-me-ie una mica, torné t'a Marqueta 7 y marché ta Dumaguete, an que fería unatra nueit antis de marchar ta Apo Island, puesto a o que l'adedicaré o venient post. Trobé un buenizo puesto ta dormir dito Bethel, que pareixeba un hespital reconvertiu en hotel. Buen pre y muita buena calidat! Cosa que no ye siempre fácil de trobar en Filipinas... Por desgracia, a l'atrol diya yera pleno y ixa tercera nueit l'habié de fer en unatro puesto, más caro y con caparras...

En istos dos diyas, Negros Oriental me transmitió a sensación d'achuntar l'ambient rural filipino -maravillas naturals de toda mena: selvas, espelungas, guergas, zonas volcanicas- y
as caracteristicas d'as urbes filipinas -servicios de toda mena, movimiento, pobreza, contaminación y masificación. A carretera costera arredol d'a isola y a capital Dumaguete teneban muito rudio, trafico y con a moto se trusquiba fumos arriendas. Tamién s'apreciaba desigualdat pero no pas tanta como en Manila. Pero malas que pillabas una pista enta l'interior d'a laguera isola, en bell par de kilometros yeras en os paradisos rurals filipinos, con chent mesmo más amable. Con tot y con ixo, ni os suyos puestos naturals yeran os más polius de tot o país, ni Dumaguete y a zona más urbana ufriban as mesmas posibilidatz que Manila. Tampoco as desigualdatz, a masificación, o trafico y o fumo yeran tan grieus como en Manila. Por todas istas posibilidatz y caracteristicas, estoi que si vivise toda a mía vida en Filipinas trigaría un puesto asinas, y sin estar un puesto turistico, no yera raro de veyer foranos -más que más guiris- fendo vida allí. Ya sé que muitos dirán que s'estiman d'as maravillas naturals y turisticas, pero soi seguro de que ixo en bellas semanas cansa y aburre. 

17.11.19

Ent'a badía de Halong: un postizo paradís natural


Si un d'os míos destinos t'a cursa por o norte de Vietnam yera Hanoi, l'atro yera o paradís natural de Halong. Por un regular, quan salgo de Filipinas busco ambients urbanos, porque de naturaleza, en tenemos a millor en as "isolas magallanicas"! Pero a badía de Halong, con as suyas isoletas esparricadas en metat d'a mar, ye un reclamo turistico a libel internacional y no podeba perder a oportunidat. Decidié pillar-me un crucero de dos nueitz y tres diyas por todas istas isoletas, pos en conchunto en son tantas que fan o tamanyo d'una provincia. As cursas son prestas dende Hanoi, an que te recullen y te dixan en tornar, pero yo quereba ir una mica más a la mía bola y decidié d'ir dende Hanoi a Halong en un bus vietnamita y fer una nueit en Halong. Por diners y tiempo, no'n saliba a cuenta. Por ficar-se una miqueta más en a sociedat vietnamita y fuyir d'o posticeo turistico, sí.

Arrivé o domingo en a polvorenca ciudat de Halong. Y digo polvorenca porque yera a meyo fer. Una futura ciudat que podrá aloixar a millons de personas s'i ye desenrollando. Con tot y con ixo, s'aprencian muitos hotels y restaurants que ya tendrán bellas decadas: o puesto ye
estau un reclamo turistico mientras as zagueras decadas, pero agora ye petando de tot. Dicen que a masificación tailandesa ye transportando o turismo enta Vietnam, que ya fa visos de tener tamién problemas de masificación. En o caso de Halong, una macrobenidorm en construcción, con paseus maritimos pinchos, un parque d'atraccions, un teleferico chigant conectando este y oeste d'a ciudat, fuents repolidas y un macropuent luminoso, son claros eixemplos. L'urbanismo con o que se piensa ista nueva ciudat, fulero: no dixa espacio a la tradicional vida en carrera vietnamita, si bien ye verdat que en as partis más antigas d'a ciudat sí que'n ye, y que mesmo en as nuevas as chents ocupan os espacios publicos como pueden y fan a suya vida ancestral, con comida tailandesa, cafés sobrebuenos y sucos de canya de zucre.

Dimpués d'ista gambada intresant por a ciudat, marché a dormir y descansar-me ta pillar o crucero de tres diyas a l'atro maitín. Quedemos en o puerto y bi heba decenas de
companyias pillando a os suyos clients. Todas con una calidat y un pre parellanos, mesmo diría que por dezaga de tot serían as mesmas poquetas interpresas. A yo me quereban fer bosar por internet por meyos no contrastaus y me negué: si quieren que bose antis, lo feré a través de booking.com, que ye como pillé o crucero. Ells rebloron y bosé en o puesto malas dentrar-ie. Pero en estar l'onico que pillaba dos nueitz y tres diyas -a resta d'os que yeran en o crucero, atras siet personas, heban pillau una nueit y dos diyas- me dicioron que, u me l'anulaban, u me cambiaban de crucero a l'atrol diya. Tot isto lo sabeban d'antis y me lo dicioron malas bosar. Mal. Y bella cosa asinas m'heban mirau de fer en puestos turisticos os diyas previos en Hanoi: cambiar-me d'hotel, cobrar-me de más en zonas turisticas, o taxi dende l'aeropuerto dica a ciudat tamién me miró d'escular, habié d'anular a nueit d'hotel en Halong porque o propietario me quereba cobrar más d'o estipulau en booking, asinas asinas. Ye verdat que isto nomás me pasó en zonas turisticas, pero en iste sentiu Vietnam ye o pior país que he visitau. Ixo sí, malas que te'n queixabas, si tenebas razón, tot lo apanyaban ascape y bien. Timar no sería a parola exacta... pero si vas ta Vietnam, para cuenta.

Una vegada en o crucero, o más barato que bi'n heba con una cambra bien apanyadeta con una finestra grant cara t'a badía, nos levoron t'a isola de Ti Top (Titov), dita asinas en hunor a o segundo austronauta sovietico en orbitar arredol d'a tierra. A isola teneba un pueyo que se puyaba en 400 escalerons y alto teneba una replaceta-mirador que ufriba anvistas repolidas de toda a badía. O puesto yera chicot y bien se vale que yéranos en puenda baixa, pos de veranos de seguras que puyar-ie y fer-se a tipica foto sería quasi misión imposible. Sin dubda, aquello yera un paradís natural. Disfruté d'as anvistas y me facié as tipicas fotos, ta dimpués baixar y ficar-me en l'augua d'a placheta con as isolas de fundo. L'augua yera una mica puerca y contaminada con tanto crucero y turista. D'atra man, as suyas arenas no yeran coralinas y no teneban as culors espectaculars de Filipinas. Pero bueno, con as ganas que teneba de capuzar-me, feba honra.

Dimpués nos levoron a fer kayak en un d'os lugarichons aquaticos que bi ha. Y ye que, dende antismás, a chent d'a badía ha aprestau plataformas de fusta y bambú t'a
cridanza d'almehas, y alto d'istas plataformas, os suyos casichons. A la fin, de tantos que bi'n heba en as zonas más proteichidas d'as torrumbescas, s'i han desenrollau autenticos lugars sobre o mar. En i visité tres, uno cada diya d'o crucero, y en totz facié kayak. Tamién minché d'ixas almehas en o barco-crucero, que las aprestaban con una salseta sucosa y sobrebuena, y ixo que a yo no me gosan de fer goyo as almehas.  Con tot y con ixo, as millors posibilidatz que da o turismo en a ciudat fa que muita d'ixa chent que literalment vive sobre as auguas d'a mar siga emigrando y istos lugars de cridanza d'almehas son en risque de dispareixer. A yo me chocó muito a grant cantidat de placas solars que bi'n heba: totz os casichons quitaban asinas a electricidat, sin garra chenerador. Feito o kayak, tornemos t'o barco y ya de nueitz nos facioron un mini-curso de cocina vietnamita an que nos amostroron a cocinar rolletz aprestaus en masas ixuta de roz farsidas con esferents ingredients que tradicionalment representaban os cinco elementos y as cinco virtutz d'o confucionismo. Ya de nueitz me facié bell cubata con os companyers de crucero y marché luego a dormir, porque a l'atrol diya m'en heba de dispiertar bien luego ta cambiar-me de crucero.

Dispiertau, cambiau de crucero, con nuevos companyers, desayunau en o nuevo crucero, -exactament igual que l'atro- y transportau de nuevas ent'un tercer barco an que pasaría o
diya, precipié ista segunda chornada marchando ent'a isola principal d'a badía: Cat Ba. Allí nos dioron una bicicleta ta fer una ruta de bellas horas por ixa maravilla natural. Dentre que os atros yeran una mica febles fisicament y que a yo m'agaba d'ir una mica a la mía bola, me perdié y marché solenco dica a fin d'a pista, que remataba en o lugar de Viet Hai. O camín no yera guaire luengo y a pista yera bien engudronada, teneba bell par de costeras duras y ufriba anvistas repolidas, con guas asiaticos, caballos y chent treballando o campo de trazas tradicionals. Tamién bell río y entivet, y monts selvaticos y planas esparpallants. O lugar no yera mica grant y pareixeba un barangay rural filipino: me trobaba como en casa! A chent, tot y que son feitos a muitos turistas, yera muito maha, pura y agradable. Y en bella casa y bell guarichet-restaurant s'ascuitaban karaokes y mosica maquineta a tot estrús, que tanto goyo les fa a os asiaticos. De totz os tres diyas por Halong, si con bella cosa m'he de quedar, ye con iste lugarichón tipico! Como plato fuerte, nos levoron t'un casichón tradicional an que aprestaban os licors propios d'o norte de Vietnam y nos amostroron cómo se feban. O más representativo y curioso d'istos licors ye o licor de serpients: yera en un pote de veire grant y a rebutir de serpients muertas. Nos dixoron tastar-lo y sabeba como a un tequila suau. Tamién teneban atros licors menos sorprendents, como o de banana y o de fusta. Y ya ta rematar o lugar, antis de tornar t'o barco, nos levoron t'a escuela, bien aprestada recientement, do estudiaban os ninos d'o lugar y tamién d'os lugars acuativos que se veyeban por a badía. En total, seguntes nos dició o guida, arredol de 250.

En tornar t'o barco, chentemos sobrebuena comida vietnamita y marchemos t'unatro lugar acuatico, an que torné a fer kayak. Dimpués nos levoron ta Lan Ha Bay, an que posoron o barco a plego d'una placheta. Servidor blincó dende alto d'o barco -bells cinco metro- y
marchó a nado ent'a placheta, que yera tranquila. Encara que unatra vegada, as auguas no yeran tan polidas ni tant escoscadas como sería deseyable. Dimpués d'isto, nos levoron t'o barco-crucero inicial, an que nos facioron atro curso de comida vietnamita. Ista vegada, no me quedé a charrar con os nuevos companyers de crucero: dentre o canso que iba, o poco autentico que me pareixeba o formato y o cambio contino de chent y de companyers, no yera yo guaire charrabis. A l'atrol diya nos levoron t'un tercer lugar acuatico a fer kayak y yo'n facié porque me fa goyo, pero me pareixeba ya excesivo. Con tot y con ixo, pretó a tronar y cayó una torrumbesca que me dixó mullau de tot mientras os diez minutos que me costó tornar dende a mar dica o puesto d'os kayaks. A chent local no adubiba ta ayudar a totz os turistas que i yéranos. Y d'astí, ya tornemos t'o puerto de Tuan Chau a plego de Halong ciudat, an que pillé o buset d'o propio crucero ta marchar ta Hanoi do sería bellas horas.

A badía de Halong ye un paradís esparpallant y decir o contrario sería mentir. Con tot y con
ixo, no me convenció. O puesto natural en sí ye repoliu y más grant que no os puestos parellanos que se pueden trobar en Filipinas -Corón, El Nido, 100 Islas, Caramoan, asinas asinas. As formacions rocosas y as isoletas son más grants y esparpallants, pero por contra as auguas no son coralinas y son más contaminadas -encara que en beluns d'os puestos filipinos, tamién en son. O feito de que Halong siga tan grant te priva de sensacions d'agobio, pero a traza d'explotar turisticament a redolada ye masiau postiza: ferris que podrían estar en o mediterráneo sulcando ixas auguas, familias con ninos occidentals catens, programas d'actividatz internos en os ferris y una ciudat costera en construcción que promete estar un Benidorm multiplicau por cinco u diez. Pureza, poca u nula. Postizo, masiau. O exceso de turismo no nomás afecta a la naturaleza, sino tamién a la sociedat: malos comportamientos de turistas ent'os treballadors y ganas d'escular a o turista ababol por parti d'a población local son por tot arreu. No ye un puesto ta mochilers con ganas de descubrir bellezas naturals y dentrar en contacto autentico con a población local, pero reconoixco que en bell momento d'a mía vida, quan no tienga tanta enerchía y siga con familieta, talment m'agane de fer ista mena de turismo más comodo. Ixo no quiere decir que tot Vietnam siga asinas: fa farchas de que si te pillas una moto y eslampas ent'a costa u ent'as montanyas, trobarás autenticas maravillas. Y o truco ye o mesmo de siempre, si ixo ye o que te fa goyo, no faigas caso a las guidas.

10.11.19

Enta Hanoi (iii): nacionalismo, Ho Chi Minh y a vida de nueitz


O segundo diya de Hanoi me'n puyé bien contento y dimpués de desayunar-me un bahn mi y un café con leit condensada vietnamita, marché ta l'achencia an que saliban os tours a piet por a ciudat ta fer-ne o segundo, adedicau más que más a Ho Chi Minh. Ye una suerte que l'achencia i estase a bells 3 minutos de l'hotel!

Ixe diya me pertocó una guida mahisma que se clamaba Hong Gam, encara que t'os turistas feba servir o nombre anglés Doris. Chusto nomás yo heba pillau o tour y estió una cursa privada. Se notaba que a pobreta yera una mica foriconera pero ascape faciemos pacha. Me comentó que yera estudiant de zaguero de carrera y que ixas yeran as suyas practicas, charraba un anglés perfecto que heba aprendiu en nomás quatre anyadas sin garra estancia difueras y teneba muitas inquietutz intelectuals, siempre contrimostrando un aimor absoluto y de vegada humilde por o suyo país. Encara que no yera incluito en a cursa, me pasó por as cercanas vías d'o tren, que en un troz heban aprestau con bars, graffiti y fronteras bien adornadetas, con cafeterías estilosas y bars arrienda que as suyas mesas ocupaban as vías. Tot pinchismo... fueras d'o detalle de que o tren encara pasaba de cabo quan por astí! Y quan ixo se daba, a chent pretaba a correr y quitar todas as mesas, sillas y resta de trastes. O puesto me fació muito goyo, bi repitié y mesmo en tornar de Halong, en as zagueras horas antis de pillar o vuelo ta Manila, lo torné a visitar. Y chusto dos diyas dimpués de tornar-ie -maitin, seguntes soi escribindo istas lineas- lo trancoron por inseguro! Unatra atracción turistica que dispareix pocos diyas dimpués d'estar-ie yo, como pasó con o Azure Window de Malta.

D'astí, china chana marchemos a piet t'un d'os platos fuertes d'a mía visita en Hanoi: o mausoleu de Ho Chi Minh, an que se troba a momia d'o líder nacional y comunista
vietnamita. Feito con aduya tecnica sovietica, en buena mida copia o mausoleu de Lenin en Moscú, encara que adaptau en bells detalles a la historia y o estilo vietnamitas. O edificio fa parti d'una plaza graniza, con yerba bien cudiada y edificios gubernamentals arredol: ta dentrar-ie a coda yera inmensa, pero avanzaba ascape. Muerto en 1969, a biografía de Ho Chi Minh ye curiosa: conoixeba poco d'iste hombre, y resulta que con pocos medios y muito treballo aconsiguió viachar y veyer muito mundo, aprender luengas y autoformar-se, mientras trenta anyadas. En Francia dentró en contacto con o comunismo, y fundaría o Partiu Comunista de Vietnam. Dimpués luitó contra os franceses y a resta de potencias que mientras a suya vida miroron d'ocupar o país (norte y sur): chaponeses, chinencos, angleses y americanos. Hong Gam me lo explicó tot asabelo de bien sin dentrar en custions ideolochicas, pero tanto me fascinó que en a aspera de l'avión en tornar-ne, me veyé un documental de Ho Chi Minh y unatro d'a guerra de Vietnam, tant nombrada y tant desconoixida ta yo.

Faciemos a coda, a ratos con firme sol a ratos con a uembra que nos daba bella boira y que s'agradeixeba, y ella me contaba cosetas d'a vida d'o "tío Ho", como encara le gosan decir
pos no tenió familia en adedicar a suya vida a Vietnam. A mesacha teneba muita gracia y mientras nos acercábanos a l'edificio y m'explicaba cosas, un guardia serioso i venió y le carranyó: no entiendo vietnamita, pero por o tono y a cantidat de vegadas que repetiba "Vietnam" creigo que le sería decindo que guardase respeto por a suya patria y o suyo heroi nacional. A pobreta se quedó callada bells cinco minutos, avergonyada... y a verdat que no lo mereixeba, menos quan atros turistas charraban en o mesmo tono u mesmo más alto. En dentrar-ie, bi heba un edificio en marbre de linias simplas con bell lema revolucionario vietnamita, escaleras ent'alto, dos ringleras de turistas desfilando y a la fin, en o piso d'alto, fendo o rolde a la cambra que en o suyo meyo teneba o feretro chigant en veire y a momia en trache de Ho Chi Mihn, dreitament cusirada por quatre guardias formando a os que cal sumar as decenas que bi'n heba en os corridos. Yo adopté a postura más respetuosa que consideré: mans dezaga d'a esquena, quasi como un lolo fendo una gambada pero erecto. Pos bien, a un guardia no le fació goyo y me dició que os brazos en os costaus, modo militar. No ye por picar-me, pero atros turistas teneban posturas piors... Anecdotas a parti, tot o turistico d'o puesto no aconseguiba contrarrestar o esparpallant d'o suyo silencio y o respeto que s'ixulufraba, refleixando en verdat o respeto y admiración por ista persona que tien a más grant parti d'a población vietnamita.

Salius d'o mausoleu, marchemos t'os chardins d'a casa presidencial orichinal, a quala bordiemos. A casa no se podeba visitar, agora ye un edificio de recepción y hostalache de
visitas importants, pero dende difueras se veye a suya arquitectura: un palacio en estilo francés de prencipios de sieglo XX tintau d'un amariello intenso. Antis de plegar t'os chardins, pasemos por o que mientras bellas anyadas estió a casa de Ho Chi Minh, unas humildes dependencias a o costau d'o lago, pos tío Ho no consideraba adecuau vivir en as luixosas cambras d'un antigo palacio colonial. A cambra, o comedor y o despacho de Ho Chi Minh mientras ixas anyadas se conservan intactos, y en bella atra cambra s'ha aprestau bella exposición, como a d'os tres autos oficials -y no especialment luixosos- que tío Ho teneba. Y camín caminán por os chardins, se plega en a que estió a segunda y zaguera casa presidencial de Ho Chi Minh, una humilde edificación que seguiba l'arquitectura tradicional d'o lugar de procedencia de Ho, regalo d'o partiu comunista en 1958 por o suyo cabo d'anyo. Ye curioso veyer as radios que se conservan en as dos residencias, pos a Ho Chi Minh le feba goyo d'ascuitar a chent mientras a nueit y ell yera solenco.

En salir d'as dependencias presidencials, marchemos t'a famosa
Chùa Một Cột, una pagoda budista de quasi mil anyadas alto d'un pilar sobre un entivet. A leyenda diz que aduyó a o emperador -y agora a qui vaiga- a tener fillos si se tien problemas. Por agora no quiero tener fillos, encara que en un esdevenidero sí... asinas que si me veigo en mala situación, talment i torne! Y d'a pagoda, fatín fatián marchemos t'o famoso Templo d'a Literatura, antiga universidat fundada en 1070 baixo os preceptos d'o confucionismo: con cinco patios representando os cinco elementos d'ista relichión: tierra, fusta, fuego, metal y augua, que de vegada tienen correlations en cinco virtutz. Hong m'explicó toda a simbolochía, que en parti ya heba repasada o diya d'antis, asinas como as curiosas lapidas alto de tortugas de piedra en hunor d'os alumnos más avantallaus, que tamién fuoron listaus en o interior d'o templo principal. Tocar ixas tortugas daba suerte a os alumnos, pero belún -y bell turista- se pasaba de listo y mesmo se posaba en as capezas, perchudicando graument istas estatuas con cientos d'anyadas, por o que agora son delimitadas y ye viedau de tocar-las. Encara que se'n conserva buena cosa d'o templo orichinal, una parti grant dispareixió mientras a guerra de Vietnam. Y astí remató a cursa con Hong Gam, con a que quedé dimpués de nueitz.

Ya solenco, marché t'a ciudadela imperial de Hanoi, patrimonio d'a humanidat dende 2010, inicialment data d'o 1010 encara que a suya más gran parti estió esplanicada mientras o
sieglo XIX. Buena parti d'a ciudadela ye agora un parque publico an que fan exposicions con puestetz de comida y bebida, an que aproveité ta chentar. En o centro, un escenario an que tanyeban, cantaban y danzaban folclore vietnamita, de vegada que de cabo quan meteban o himno nacional. Dimpués d'una muralla an que cal bosar una entradeta barateta, se troba a parti más historica, con repuis d'as murallas antigas y con o edificio d'o mando d'operacions comunista mientras a guerra, con un búnker asabelo de curioso y pincho, y muitos mapas que t'explican como o Vietnam comunista d'o norte iba enrestindo china chana un Vietnam d'o sur trestallau internament. A o costau d'a ciudadela, y historicament parti d'a mesma, se trobaba o museu militar, con buena cosa d'avions y tanques emplegaus u capturaus mientras a guerra de Vietnam, atamás d'armas de toda mena, dende antigas y modernas piezas d'artillería dica fustas con punchos que emplegaban os nativos en as suyas enrestidas. Curioso pero no pas imprescindible, si no fuese por a famosa Torre d'a Bandera, feita en puenda d'a dinastía Nguyen -prencipios de sieglo XVIII- antis d'a conquista francesa, transformada dimpués en puesto de vichía y a la fin un simbolo nacional do perén s'alza a bandera vietnamita.

No sin antis pasar por a plaza de Lenin, con una estatua d'o líder comunista que dicen ye a más grant difueras d'os territorios de l'antiga URSS, pillé un grab ta marchar t'a prisión
francesa de Hoa Lo. No gosa d'estar en o común d'os trachectos turisticos de Hanoi, pero la veyé en bella guida y dimpués d'haber-me feito tanto goyo a visita a o museu-prisión malayo de Malacca, le die a oportunidat. Hoa Lo no m'impactó pero tampoco no me fació burro falso. L'antiga prisión, fundada en 1899, estió emplegada dica os 90, estando testiga d'os abusos d'o gubierno colonial francés y dimpués d'as historietas de presos capturaus mientras a guerra de Vietnam. De vegada que amostraban abusos, as foscas cambras, os instrumentos de castigo y mesmo una guillotina d'eixecución, adedicaban una parti a la paz y reconciliación, con fotos y testimonios franceses, norteamericanos y vietnamitas. Sin dubda, a visita casaba con o que yera veyendo en o diya, y dimpués, baldau y con ganas d'esquiricar ta conoixer una mica millor a nueit vietnamita, pillé una moto-grab que me dixaría en l'hotel, an que me facié una ducha y una siesta luenga.

De nueitz quedé con Hong Gam y a suya amiga Hoang Lan, que tamién yera guida. En
primeras me levoron t'un puesto de carrera an que cenemos un d'os suyos platos vientamitas favoritos posaus en ixas banquetas que quasi van a ran de tierra. O plato se deciba Pho An, una sopa de fideus de roz con ternera que diría levaba una salseta d'almendras que le daba muito buen sabor. A ración pareixeba chicota, pero fartaba y no me la podié rematar. O pre baratismo. Y d'astí marchemos t'una terraceta en un primer piso en o centro neuralchico -a redolada se deciba Beer Street-, bien tranquila, se i yera de bitibomba. Dos ambients de raso esferents pero que me feban goyo y an que ixas mesachas se moveban de bitibomba. En a terraceta charremos muitismo, y si m'he de quedar con dos ideyas, ixas serían: o cosmopolitismo d'a chent en Hanoi tot y que no sigan en una sociedat rica ni occidental, y l'aimor por o suyo país.

A l'atrol diya marché t'a badía de Halong, a o que l'adedicaré unatro post. Pero en tornar tenié bellas horetas en a ciudat antis de pillar o vuelo de maitinadas. Las aproveité ta fer una gambada por o centro historico, disfrutar d'as agora tancadas terracetas en as vías d'o tren y esnavesar o puent Cau Long Bien sobre o Río Royo. Lo facié con medrana, pos no
pareixeba estar en buenas condicions, yera altismo y luengizo, pero me sorprendió veyer parelletas arrienda que iban en moto, la dixaban en metat aparcada y se quedaban veyendo a puesta de sol y a nueit amorosiando-se. O puent no yera d'acceso que ta motos en os suyos dos carrils, trestallaus en metat por a vía d'o tren que encara i pasaba. En esnavesar-lo pasé por os bicos de Ngoc Lam, Gia Lam y Gia Thuy, zonas mica turisticas an que a chent local yera en as ceras cenando y bebendo de nueitz, fendo comunidat y se quedaban una mica extranyadas de que un forano ise por astí. Todas istas redoladas no me pareixioron mica pobres y sin estar bambosas, yeran parellanas a bellas carreras de Delicias u As Fuents en Zaragoza. En istas que aturé a fer-me un entropán bahn mi y poco dimpués un suco de canya de zucre, que me sirvió un hombre bien maho que no fablaba mica anglés. Yera fumarriando en una pipa vietnamita y me lo miré con curiosidat... Y ascapé me dixó prevar-ne! O fumo se meteba dica o fundo d'o libiano. Pocos metros dimpués, en un chicot parque, yeran bellas personas chovens y de meyana edat danzando... y alternaban cantas vietnamitas tradicionals con bachatas!

3.11.19

Enta Hanoi (ii): a perfecta combinación d'orient y occident


Rematada a primera cursa por o centro historico de Hanoi, de meyodiyas decidié visitar a puerta de
O Quan Chuong, a onica que queda de l'antiga ciudadela de Hanoi: en primeras databa d'o sieglo XVIII, pero estió reconstruita en 1817. En metat d'una carrera popular d'a ciudat, por ella pasaban y pasan motos, autos y piatons. En un d'os suyos costaus, bella chent local pintando-la mientras se feban bell suco.

Y a'l canto d'e O Quan Chuong se troba o mural de mosaicos de seis kilometros y meyo feito entre 2007 y 2010 con o ocasión d'os mil anyos d'a capitalidat de Hanoi, que estió corte y
capital de Vietnam en 1010. A ideya no ye mica mala, o mural ye poliu pero se troba en una carretera con ceras estreitas u inexistents, muitas ratas y an que mesmo me trobé una charinga por tierra. A la finitiva ye de bien veyer nomás dende l'auto u dende a moto. Y precisament una moto-grab me pillé ta marchar t'un muralet chicot que no conectaba con o cuerpo principal, pero que yera adedicau a Venezuela, que como bella vegada he dito, ye a tierra de mai y bi vivié bell tiempo de chicot. Lo veyé dende o taxi de l'aeropuerto t'a ciudat de nueitz y me fació ilusión. M'apunté a localización y no tardé ni un diya en ir a veyer-lo, sin dubdar en meter-me en metat d'a carretera y parar o trafico -ya de por si conchestionau- ta fer-me a foto postureo que dimpués fació asabelo de goyo dentre a mía familia venezolana.

Con atra moto-grab marché d'o mural venezolano ent'a pagoda de Tran Quoc, en o lago Ho Tay, granizo entivo an que yera fácil de veyer a chent fendo futin. A pagoda de Tran Quoc
ye o templo budista más antigo d'a ciudat, datando orichinalment d'o sieglo seiseno. A verdat ye que en he vistos masiadas y plega un inte en que quasi carecen d'intrés, pero ista pagoda ufriba buenas anvistas d'o lago. No guaire luent yera o templo taoista de Quan Thanh, que a leyenda diz que data d'o sieglo XI pero a suya construcción actual ye d'o XIX. Ya que pasaba por astí, i dentré y me lo miré, pero sin guaires ilusions. Y d'astí, marché t'o Chardín Botanico de Hanoi, buen puesto ta relaixar-se y fer una gambada, encara que as terrazas ta fer-se un café no i abundaban. A chent bi yera fendo esportes varios -badminton, tai-chi, correr, asinas-asinas- y tamién me trobé bella colla chugando a cờ tướng, una mena d'escaques tradicionals que en China se conoixen como xiangqi. Con o aficionau que soi yo a os escaques, yera quasi por demandar-les que m'amostrasen... Pero se les veyeba masiau concentraus!

Y d'o chardín botanico, china chana marché ent'o mausoleo de Ho Chi Minh que veyería bien
a l'atrol diya. Dende astí prenié unatra moto-grab que me dixaría en o teyatro de marionetas acuaticas de Thang Long. Astí pillé una entrada y como encara quedaba una hora, marché t'a seo de San Chusé, feita por os franceses en o sieglo XIX en estilo neogotico, astí le dicen a chiqueta Notre Damme. Trobar-se una ilesia asinas en una ciudat asiatica ye curioso, pero o más curioso yera l'ambient y o urbanismo d'a replaceta y as carreras d'arredol d'a ilesia: si o bico francés feba alcordanza a os enamples urbanos napoleonicos que se troban en Francia, ista replaceta pareixeba quitada d'o casco historico de qualsiquier ciudat sureuropea.

Vista a replaceta y dimpués d'haber-me feito un sobrebuen café en ella que de vez me fació honra ta escabortar, marché a la fin t'as
marionetas acuaticas. En primeras no yera un destino que tenese en ment, pero yera baldau dimpués de tanto andar y tant poco dormir y veyer ixe espectaclo d'una horeta colada en un recinto comodo me vendría bien de vegada que no perdería tiempo. As marionetas acuaticas yeran un espectaclo popular que feban más que más ta ninos en o Río Royo antismás. Partindo d'ixa antiga tradición, o espectaclo s'ha profesionalizau y se vende ta turistas. Os marioneters son dezaga d'una curtina en una piscineta, y as marionetas por debant d'a curtina son maneyadas con palos. A os costaus y visibles a o publico, bellas cantaires femeninas y bells instrumentos tradicionals vietnamitas de cuerda, percusión y viento. As marionetas en as suyas escenas describiban os feitos historicos y as leyendas más importants d'o norte de Vietnam. Personalment me fació alcordanza d'o espectaclo de marionetas tailandesas en Bangkok, encara que istas zagueras no yeran acuaticas.

Visto o espectaclo ta turistas y habendo-me descansau una mica, ya de nueitz cené bells quantos Bahn Mi, con ixe pan que pareix quitau d'una panadería francesa gourmet, y emplius de carnes varias, verdín y tortilletas. Redios qué delicia! Y más dimpués de bell par de meses sin tastar buen pan. Tot y que yera escamallau, aproveité a nueit d'o centro
historico de Hanoi, an que trancaban carreras y montaban mercadetz. Mesmo me vagó de marchar t'o mercau de Dong Xuan, marcau en bella guida ta mercar ropas y trastes electronicos. No teneba guaires intencions de visitar-lo, pos en Manila bi'n ha arrienda, pero cal decir que l'ambient en a replaceta y os callizos d'arredol yera pinchismo, con vietnamistas posaus en as suyas sillas bien baixetas -quasi yes posau por tierra- cenando y fendo-se bella biera, charrando animablement y transmitindo un ambient social sano y envidiable. Iste ambient lo trobé en Dong Xuan, pero en verdat lo trobé por totz os costaus tanto en Hanoi como en Halong ciudat. En as zonas más turisticas, como a carrera d'a biera -Beer Street- l'ambient no yera tant puro, pero encara asinas aprestaban en a carrera conciertetz de mosicas tradicionals con os mosicaires vestindo ropas vietnamitas y tanyendo os instrumentos tipios, asinas como teyatretz vietnamitas.

Sin dubda, Hanoi me yera encantando. Tanto como para escribir dos post ta describir menos de 24 horas. Si en o post anterior deciba que yera bella cosa asinas como una Manila
amillorada, agora me centraría más en o mestizache perfecto que s'ha dau en a cultura vietnamita. Yo m'asperaba una cultura asiatica pura, pero me trobe firmes influyencias francesas que fueras de desvirtuar a cultura y os contextos, aportaban y daban puntos extras. O Bahn Mi, entropán de baguette sobrebuena farsiu de productos asiaticos, yera o claro eixemplo. Pero tamién o suyo café sobrebueno, en un continent de té. L'urbanismo d'una ciudat con una parti d'enamples franceses decimononicos y una catedral gotica en o contexto d'un casco historico sureuropeu. Pero tot ixo sin dixar o roz, os fideus asiaticos y as suyas sopas, tot ta disfrutar en carreras populars de raso opuestas a o fachendoso y elitista. Tamién en a sociedat se notaba: sociedat que ha albandonau as normas relichiosas sin sentiu en os suyos comportamientos morals y ideolochicos, chent que no adedican o suyo tiempo libre a ir ta misa y que no tienen mica problema en fer-se una biera de nueitz, cosas que pueden interpretar-se dende a ilustración francesa u dende o comunismo de Ho Chi Mihn. Como he dito bella vegada por aquí, d'Europa m'encanta Francia. Y de por sí m'encanta Asia. Hanoi ye a combinación perfecta con o bueno d'os dos costaus.