26.3.08

Cuan te trobas sin querer con l'aragonés

En a biblioteca de l'augua (paseyo Echegaray y Caballero), mirando-me libros por curiosidat trobé uno que se diz: "Aves en Aragón" (añada de publicazión, 1998).

Güellando-lo, cuasi por curiosidat me fazié cuenta d'un chiquet detalle, y ye que debaixo d'o nombre en gran en castellano d'os muxons apareixeba iste en latín y tamién al canto en aragonés, y en todas as espezies.

No apareixeba garra referenzia a l'aragonés en a presentazión ni en as pautas d'estudio (tamién ye berdat que lo miré por alto, porque o libro en sí teneba 600 pachinas y no yera custión de leyer-se-las todas buscando nomás a explicazión de que i ficasen o nombre en aragonés), pero o feito de trobar os nombres de todas as abes d'aragón en aragonés y antiparti sin estar buscando-lo ye reseñable. Un poliu detalle.

24.3.08

Se troba o chen d'a fidelidat

Un simple chen puet tornar a un guarán xoriguet de campo en fidel y amoroso mariu, seguntes una colla de zientificos d'a unibersidat de emory, en georgia, USA.








L'infidel

O fidel


Se fica un chen y... se rematón as abenturas
Os inbestigadors fazión serbir un birus ta ficar un chen direutamén en o zerebro d'un xoriguet d'os entibos, prou dau a tener más d'una parella.

O chen fazió lo milagro y o espiguardau xoriguet se tornó tan fidel y amoroso como lo suyo primo, o ratón d'os feners.

Os zientificos d'o proyeuto dizen que iste experimento puet adugar a un mayor entendimiento de cómo os umanos controlan a suya conduta en soziedat.

Ista mesma autibidat ormonal tamién podría chugar un papel es malotías y desordenes como l'autismo, en o que qui lo tiene no tiene abilidaz ta relazionar-se.

Casanobas versus monogamos
Menos d'o 5% d'os mamiferos son monogamos. Os xoriquez de fener (Microtus ochrogaster) son dentro d'ista colla.

Dimpués de trobar parella, os masclos se "enamoran", se quedan con a mesma, la guardan zelosamén y l'aduyan a cudiar as suyas crietas.

Os suyos primos amanaus, os xoriguez d'entibo (Microtus pennsylvanicus), perteneixen a l'atro 95%: se relazionan con barias fembras y no cudian a los suyos fillos.

Cuento que en os umanos os porzentaches pueden estar parellanos...

O chen fa un efeuto casero
Larry Young, unibersidat de emory, en estudios anteriors ya eba trobau que una ormona dita basopresina -tamién conoixida como ormona antidiuretica- aduya a fer fuertes os lazos monogamicos entre os xoriquez de fener.

Co-autor de l'articlo, le dizió a la BBC "lo que creyemos que ocurre ye que, cuan os xoriguez fan foriquetas, a basopresina autiba un zentro de gratificazión neuronal, o que fa que os animals paren cuenta a con qui son fendo zeprén (...) De feito, fa que os xoriguez piensan: cuan soi con ista xorigueta me trobo bien. Y d'astí entabán deseyan pasar más tiempo con ixa compañera en particular"

Aplicazions t'os umanos
Ta qui plegó dica ista parti de l'articlo, les podemos dar una mala (u buena?) notizia: no se sabe si podría funzionar istas teunica en os umanos.

"Somos mirando d'entender a parti d'o zerebro que controla as relazions sozials. ¿Por qué interactuamos con atras personas?¿Qué ocurre en malotías como l'autismo?", explica o profesor Young.

"Qui sufre d'autismo no quiere interautuar con atros. Puet-estar que a basopresina chuegue un papel en as relazions sozials normals".

Manimenos Miranda Lim, atra d'as investigadoras, dizió que espezies de monos promiscuos y monogamos tienen esferens patrons de rezepzión de basopresinas que son parellanos a lo d'os xoriguez.

Allora ye posible que os umanos poligamos y monogamos poseyamos una quimica zerebral que coinzida con as carauteristicas d'as espezies antis ditas.


Asinas que en un futuro... si tenez problemas con as parellas, fer zeprén mientras ficas o chen y problema soluzionau.

Adautau de BBC-News

23.3.08

Plega la primabera

As crietas de pardal se fican en a fuenteta en a que bebebas augua de zagalet, mientras una chobena chuega con una piloteta con o suyo cocho. Una paloma con un gran papolar encorre a un atra más chicorrona que mira d'eslampar, mientras una parella de tortolas son fendo-se morisquetas en o tubo d'o esbarizaculos y aparixen bolando bels loros indo ent'a palmera an que son os bibirons (de chicorrón no'n beyebas, nian de loros, nian de palmeras). Uns pais chobens fan una gambada con os suyos fillos con a bezicleta, mientras uns maziellos de 15 añadas piropean a unas mesachas d'alto u baxo a mesma edat, que se meten royas y se los miran con una timidez y inozenzia aparentadas.

Una parella de enamoraus son tombaus en a tasca enreligando-se apasionadamén, deixando a un canto os libros que en teoría s'en eban lebaus ta estudiar, y a bels metros un par de chobenastros ascuitando rap y fumarriando bels porros, mientras un biello roñoso con rostro carrañau se los mira a toz (si Franco puyase o tozal!!)...

A primabera plega sin fer más rudio que lo que fan os loros y pareix que a bida umana rebiscola en toz. Lo buen orache anima l'esmo y lo cuerpo (lo buen orache fueras d'o zierzo, prou que sí, que sin él l'ebro no sería l'ebro), a beluns con amor, y a atros sin él (ya plegará, si ha de plegar bel diya, piensas). Por a cantonada apareix o berano, y os plans que tiens pensaus fer, encara que te piensas que encara ye luego: disfruta d'a primabera.

Cuan uno se tranca o tozuelo...

De siempres charrando de l'aragonés m'he trobau con chen que ye en contra, sin ni sisquiera saber-ne brenca, y ye que en istas tierras somos muito daus a estar tozolas y negar y trancar-nos en una postura sin planteyar-nos sisquiera a ideya d'ascuitar, y charrando nomás con a intinzión de crebar os argumentos de l'atro y no de razonar-los.

Un esquema d'a situazión que te puez trobar en iste sentiu cuan charras de l'aragonés ye o siguién, alazetau en 7 pasos, con soluzions no zientificas pero sí efeutibas:

1.No existe. Ye común que digan que ye un ibento y que ixo no existe, que mai no lo ha ascuitau.
Soluzión: amostranza de testos en aragonés. Libros, rebistas... Bella cosa existe.

2.Ye un ibento. Le'n amostras y ascape te diz que ye un ibento, que ixo no ye reyal.
Soluzión: amostranza de bel testo istorico do se charra de l'aragonés (Montesquieu ye uno bueno, por exemplo).

3.Ya no se charra: Admite allora que istoricamén podió existir, pero diz que agora ya no se parla.
Soluzión: Bueno... le dizes que tú mesmo lo charras y le dizes bella frase, u l'amotras bel bideo de charrandotb.

4.Ye un castellano malfablau, u un dialeuto d'o castellano:
Soluzión: Un bideo majo de charrandotb, por exemplo o bideo d'o belsetán chan charra d'o queso en as capannas... No prene lo que diz... allora ye castellano malfablau u dialeuto d'o castellano?

5.No bi ha unidat: Agora, ixa persona que te deziba que no existiba te ba d'experta y te diz: pero ye que no ye que una luenga, en son muitas, no bi ha unidat, no existe l'aragonés en sí mesmo sino muitas luengas esferens.
Soluzión: tornamos con textos istoricos do se diz "aragonés" (u aragonais, si recurrimos a Montesquieu, exemplo que a yo personalmén me fa muito goyo), y mesmo le dizes que charrando estandarizau has puesto comunicar-te con chen de todas as bariedaz charrando els en a suya bariedat. Atra: bariedaz en l'aragonés? Pues sí, y en o castellano? benezuela, archentina, mexico, cuba, andaluzía u madrit charran igual?

6.Politizazión: Biene lo paso an que te diz que l'aragonés nomás fa onra como ferrallo politico u ideolochico.
Soluzión: Le dizes que una luenga no ye politica sino cultura, y que mesmo a mayor colla de ultradreitas de zaragoza, Ligallo de fútbol, tiene o nombre en aragonés. Le dizes casos de chen de toz os partius politicos que son intresaus y treballan por l'aragonés.

7.No tiene sentiu: No tiene sentiu destinar diners a una luenga que se fabla poco cuan toz nos podemos entener en castellano.
Soluzión: un mundo globalizau de raso nos fería perder os nuestros siñals d'identidat, y en o caso indibidual, buena cosa d'a nuestra personalidat, no seríanos que robots dentro d'una estructura y prou.

Le bufa la pocha y se'n ba... no ha puesto crebar os tuyos argumentos. Pero ixo sí, ni sisquiera ha prebau de pensar-los. Iba como un cocho rabioso a estricallar o tuyo pensamiento y no ha puesto. Globalizazión y perder a nuestra personalidat y identidat? Barucas de royos...

17.3.08

PEA: rueda de prensa por a situazión de l'aragonés en a Expo

PLATAFORMA EN ESFENSA D’A LUENGA ARAGONESA (P.E.A.)

CONBOCATORIA DE PRENSA

A Plataforma en Esfensa d’a Luenga aragonesa comboya a reuda de prensa ta informar tocán a la discriminazión ent'a luenga que se biene fendo en a Exposizión Internazional 2008 de Zaragoza.

Bels miembors de dita plataforma explicarán o benién biernes 28 de Marzo, dende as 11:30h, en a FABZ os esferens puntos en os que os fablans y esfensors d'a luenga aragonesa se troban discrimianus debán d'a zelebrazión d'a Exposizión Internazional 2008 prezisamén en Zaragoza y Aragón. A la torbada tamién asistirán dibersos miembors d'asoziazions d'esfensa y amostranza de l'aragonés.
A P.E.A. ye formada por una clica de personas d'esferens sensibilidaz y asoziazions compromesas con a esfensa de l'aragonés. Sin garra animo de personalismo ni protagonismo por parti d'asoziazions ni d'él mesmo. Un mobimiento apolitico y a-ideolochico con l'onico ochetibo de reibindicar a ofizialidat de l'aragonés, a sozializazión y a normalizazión d'o suyoe emplego en cualsiquier puesto d'Aragón.

Mientras a explicazión se ferá leutura d'o manifiesto, consensuau y redautau por toz os suyos miembros y dibersas asoziazions, tamién se tratarán os dibersos puntos por os que s'esfa a ideya de que l'aragonés ye una luenga muerta, tal y como se respondió dende Expoagua a unos d'os fablans d'aragonés. Tamién se realizará una proyeczión de powerpoint con os dibersos suzesos, queixas y respuestas ante itos feitos y se desembolicará un "argumentario" de l'aragonés an que se da explicazión debán de todas ixos dandalos y falsas afirmazions que chenera a luenga aragonesa.

.Cobertura informatiba

A reunión tendrá cobertura ta meyos graficos y audiobisuals, y a las 11.30h se zelebrará una rueda de prensa.

Diya: Biernes, 29 de marzo

Hora: 11:00: Gráficos

11:30: Rueda de prensa

Lugar: Federazión de Asoziazions de Bico de Zaragoza

C / San Vicente de Paúl, 26

Zaragoza 50001

29 de marzo de 2008

Correo eleutronico: esfensadelaragones@gmail.com
Contauto: Dabi Anquela 676800494, Marco Joven 651115755

14.3.08

Día d'o riñón


ALCER zelebra o diya d'o riñón y demanda aduya y solidaridat ziudadana ta reduzir a lista d'aspera de trasplantes, con bellas milentas de personas.

Con una meya de más de mil afeutaus, 600 en aspera urchén d'un riñón y un chilo esgarrador ta demandar a la soziedat comprensión, solidaridat y donazión d'organos, l'asoziazión ALCER zelebró ayere o diya mundial d'o riñon.

ALCER treballa dende fa 25 añadas por os intreses d'os enfermos d'o riñón, y ta conzienziar a la soziedat de que "os afeutuas crexen en 5000 cada añada que pasa y atros 5000 entre en emodialisis cada añada, lo que suposa un gasto de 200 euros por sesión a la sanidat, d'as tres por semana que amenistan ista mena d'enfermos cronicos, un gasto que podría fazilmen rebaxar-se si a poblazión entendese que donar un riñón en morir salba la bida d'una persona", seguntes declaró ayere o bizepresidén de l'asoziazión, Juan Pedro Baños.

A ran personal, fer-se o carnet de donante no cuesta cosa, y puet salbar muitas bidas. Tamién ye muito importán a faina de conzienziazión, porque bi ha buena cosa de chen que encara creye que ixo de donar partis tuyas no ye bueno u ye antirelichioso, y mesmo en bella mesa de conzienziazión mesa en l'alcampo bi abió bel problema fa un par d'años porque beluna d'istas personas faltó y desprezió a los boluntarios, que antimás yeran en aspera d'un riñón.

A toz nos puet tocar: http://www.alcer.org/forms/haztedonante

9.3.08

A democrazia mola mogollón


Ayere se telebisó en TVE a gala ta eslechir a lo representán d'o estau español en eurobisión. Dentre os 10 posibles representans yeran collas de mosica alto u baxo ecleptica, como a casa azul, atras de pachangueo (as que más), bella imitazión d'a mosica de Malú u Merche, y Rodolfo Chiquilicuatre, l'apuesta d'a sexta que salió d'o programa de Buenafuente, con un "freaketon" con muita umor dito "chiqui chiqui".

A eleczión se fazió por botos SMS y gritadas telefonicas, contando lo 20% os que s'en eban rezibiu mientras a semana y o 80% mientras a gala. En ambas botazions o ganador estió claramén Rodolfo Chiquilicuatre.Asinas, o representán en o festibal será o Chiquichiqui. Os fans d'a resta de partizipans se i queixón chilando, cosa comprensible dende la mía ambiesta, encara que no las comparto: ye platero, a democrazia mola mogollón. De todas trazas ista tensión metió nierbudo a lo cantaire, que en cantar por zaguera begada s'entibocó.

Así, s'achunta iste personache a atros elementos bien raros que i serán, como un pabo u una colla que soltará una pirina.
Pase lo que pase, me pienso que si fa bels años lordi ganó lo festibal, soi seguro de que si lurte i estase, de seguras que lo ganaría.

8.3.08

A canasta mesa dende más luen

A colla de albanay high school parexeba que teneba o partiu perdiu. con o relch prauticamén a zero, falta a tasamén un segundo, a colla ribal teneba dos tiros libres. Enziertan o primero (43-41) pero no lo segundo y pasó o milagro. Un chugador d'albany prene o rebote y dende a suya canasta fa un triple imposible sobre a bozina. Ta beyer-lo.

6.3.08

Nuebas cosetas de l'aragonés

Fa pocos diyas Charrabís ha creyau un argumentario de l'aragonés sobrebueno, que chusto da en as claus d'a situazión d'a luenga aragonesa, y que cuento que ye chusto o que cal estendillar por a soziedat aragonesa. Si iste argumentario plegase a todas as personas soi seguro que a situazión d'a luenga aragonesa cambiaría:



Por atro costau, tamién cal destacar o naximiento fa poco d'un nuebo blog en aragonés: onsera, que nos charra de naturaleza pirinenca, istoria d'a luenga aragonesa, lugars d'o pirineu... Soberbueno o ran que ye tenendo os blogs en aragonés d'ista tematica con iste nuebo blog, loiras y sarrios y fendo huellos.

Ya ta rematar iste sabado se ferá a borina por l'aragonés, dende ligallo y nogará, an que s'achuntará chen que charra aragonés en a capital. Si iste sabado tos trobaz en zaragoza no dandaleez en ir-ie.

5.3.08

Se suspende a zincomarzada por l'airera

O conzello de zaragoza y a Federazión d'Asoziazions de Bicos de Zaragoza (FABZ) han dezidiu suspender a fiesta popular d'a zincomarzada por razons de seguridat, debiu a lo zierzo.
O conzello ya autibó ayere o Plan Monizipal de Proteczión Zibil (PMPC) debán d'o risco de fuerte airera, que seguntes l'Instituto Nazional de Meteorolochía (INM) podría plegar dica os 90 km/h, y que, como ya dizió o consistorio, podría fer suspender a fiesta d'a zincomarzada.

A zincomarzada, que ye o segundo año que se fa en o parque d'oriente de zaragoza, ye una fiesta tradizional feita por a FABZ, que en ista ocasión reibindica un aragón sostenible, sin trasbases, sin bases d'a OTAN y sin macroproyeutos insostenibles con o territorio y basaus en o chuego y as autibidaz terziarias nomás.

Ista festibidat remera a esfensa popular d'a capital aragonesa en a nuey d'o 5 de marzo de 1838, cuan entrón as tropas d'o cheneral carlista Cabañero.

Fa dos añadas, una muller de 40 años murió por as feridas sufridas por a caita de barios arbols en a zincomarzada, y dezigüeito personas estión feridas de dibersa considerazión, debiu a lo fuerte zierzo que se rechistró ixe diya en o parque d'o Tío Jorge, an que se feba dica allora a borina.

Por agora a FABZ ha proposau de lebar a borina t'o 1 de mayo, pero nomás como mida ta ista añada, remanindo con a calendata tradizional d'o 5 de marzo ta añadas posteriors.

Edito: A la fin a FABZ y o conzello de zaragoza han plegau a un acuerdo ta fer a fiesta o diya 23 d'abril.

4.3.08

De cómo se fa un artista


Ayere a las 11 d'a nuey a colla mosical amaral fazió un conzierto sorpresa en a plaza españa de zaragoza, tañendo mientras una mica menos d'una ora debán d'a chen que eba puesto enterar-se-ne (yo una ora y meya antis grazias a barrenau, y ascape grité a una amiga que le fa muito goyo ixa colla, como a yo).

Os que i fuemos, trobemos a una cantaire y un guitarrista entregaus con a chen, de contino agradexendo l'aceutazión d'a colla, que güe probablemén siga a más importán de pop en luenga castellana (u a lo menos de pop de calidat).

No ye a primera begada que amaral fan bella cosa parellana: fa bel par d'años ya tañón en san balero con dos conziertos improbisaus, uno no pas guaire pues s'eba anunziau con un par de diyas d'antelazión y que se fazió tamién en o mesmo puesto, a plaza españa en a cantonada d'a diputazión probinzial, y l'atro sorpresa de berdat, en l'antiga entrada prinzipal d'o teyatro (agora l'entrada d'actors).

Os que estiemos dondiando por astí una mica dimpués d'o conzierto (cuatro mixins) tamién teniemos a posibilidat de fer-nos fotos con Juan Aguirre que salió en rematar d'atender a los meyos. No pas asinas Eva Amaral, que en que remató de atender a los meyos desparexió.

¿Entrega con o suyo publico u estratechia publizitaria?

Iste conzierto coinzidiba con a benda d'entradas d'o conzierto que ferán en chunio (as cualas por zierto s'acolotón en nomás 1 ora). Allora uno puet pensar que o conzierto d'ayere en plaza españa lo fazión como estratechia...

O caso ye que, si yera por entrega a lo suyo publico mereixen un 10, pues antimás en o conzierto estión simpaticos y fazión dialogo con a chen. Y si ye estratechia publizitaria tamién mereixen lo 10, pues de seguras que ista mena de cosas plegan muito más a lo publico que no as tipicas campañas de marketing con as carreras plenas de pasquins, as radioformulas repetindo de contino o mensache y as telebisions metendo una ripa d'anunzios.

Conclusión: ufrión una buena nuey a la chen que marchemos a beyer-los.

3.3.08

Condenau a mercar a la suya muller 124000 rosas royas

Una muller iraní ha lograu que un tribunal condene a lo suyo mariu a mercar-le 124.000 rosas royas, cualo pre ye d'alto u baxo uns 133.000 euros, informó iste luns o periodico etemad. A muller le denunzió porque, seguntes ella, yera farta d'a suya tacañería dimpués de 10 añadas de aber-se acomodau.

"Nos acomodemos fa 10 añadas, pero luego me fazié cuenta de que Shahin yera un preto. Cuan imos t'un restaurán, mesmo refusa a bosar-me o café", explicoteaba Hengameh, seguntes o diario citau. Por ixo, dezidió reclamar istas rosas ta punir-le.

L'ombre alegó debán d'o tribunal que nomás puet mercar zinco flors por diya y acusó de malmeter en o feito a las amistaz d'a suya muller. "As suyas amigas millonarias son as que l'han meso ixa ideya en o tozuelo", dizió Shahin, a qui o tribunal ha requisau un apartamento con una balura de 600 millons de rials (si fa u no fa 42.600 euros) mientras no merque as 124.000 rosas.

Seguntes a lei iraní, una muller puet reclamar a suya dote mientras o matrimonio y o mariu ye obligau a dar-le-ne. En os zaguers años, muitas mullers iraníes han exichiu dotes granizas t'ixe estau, mesmo de milentas de millons d'euros.