Eman(z-c)ipa(c-z)ión... what?

Suposo que ya conoxerez una mica a istoria d'o que ha pasau con as campañas culturals y ta chobens dende fa uns meses en o conzello de zaragoza: an esborrau tot l'aragonés que bi'n eba. Ya no se troba a fuella d'o boluntariato, u o programa 12 nueys,12 lunas... agora ya no son que hoja del voluntariado, 12 noches, 12 lunas, asinas-asinas.

O macsimo ecsponén d'isto son estaus os cartels d'a ofizina d'emanzipazión choben, que son en o cipaj. Antis meteba "ofizina d'emanzipazión choben-oficina de emancipación joven" y agora no s'ha quedau que en o segundo "oficina de emancipación joven" (dos posts abaxo tenez as fotos).

Isto no ye que o mesmo de siempre: a identificazión politica d'una luenga, d'un bien cultural. ¿Cuán alprenderez que l'aragonés no ye politica sino cultura y que mesmo bi ha chen en toz os partius politicos intresada por o tema? Ixo rai, a os mainates tanto les ne da... no baigamos a estar uns pelingrosos separatistas que eboluzionemos ent'a biolenzia... ixo ye d'estar fatos, si se quiere creyar biolenzia o primero que s'ha de fer ye amagar y amarginar, como se ye fendo agora con a luenga aragonesa... pero bueno, dexemos-lo y baigamos por do quiero ir.

Ye curioso tamién que en a reunión an que os politicos charrón istos temas, os representans d'ixe partiu que tantismo fa por l'aragonés dezisen que ixo no teneba importanzia, y d'entre els o siñor Martínez Tomey, o cónsul ta l'aragonés d'ixe partiu. ¿Cómo puez ir t'una reunión de fabloggers como uno más d'a mobida y dimpués en a reunión d'os politicos dezir que o tema d'a cartelería en aragonés d'as areas de chobentú (u chobenalla, u mozardalla, a yo rai) y cultura no ye importán? Si ye berdat o que dezibas en a trobada de fabloggers isto lo leyerás, y con tot o respeto d'o mundo me fería goyo que respondeses. En fin...

Manimenos sí que bi ha chen que chila por tot isto, y no nomás en os meyos sino tamién con aizions. Fa bellas semanas ixos cartels y ixas finestras aparexión pintaus con a parola choben por toz os puestos... prou que en poco tiempo los escoscón y los metión más alteros ta que no podese tornar a pasar.

Pues bien, ayere de nueys, a ixo d'as 2 u 3 d'a maitinada, yera fendo una gambada con os amigos y pasé por astí y beyé como ditos cartels yeran estaus tallaus por a metat... de traza que agora mesmo se leye "emancipación" nomás...

Ixo ye o que amenista a luenga aragonesa: emanzipazión politica, emanzipazión ideolochica y rasmia, ixa rasmia d'a que tanto gosamos de presumir y que en berdat pocos en tienen en istas tierras.

Postdata: agora que os cartels en castellano son tallaus que ferán, i meterán atros nuebos en castellano? u i meterán os antigos en castellano y en aragonés?

Isto no ha muerto

En os zaguers diyas cuasi no he escrito. Sinzeramén, tampoco no he puesto escribir-ne. De todas trazas isto no ha muerto. Soi embrecau en muitas cosas, pero tocán a l'aragonés tamién bi abrá nobedaz, y buenas.

Por agora tos remero que iste sabado ye o conzierto de l'aragonés en a carrera, que para a federazión de ligallos de fablans de l'aragonés en o güego (dende as 8 d'a tardi dica as 2 d'a maitinada). Tañerán dechusbán, biella nuey, lurte, prau, la orquestina del fabirol y la ronda de boltaña. Tos animo a ir-ie, as dentradas son 10 euros y las podez trobar en os caxers d'a CAI, en a siede d'o ligallo de fablans en zaragoza (plaza san miguel) y en o bar "dispierta fierro" (carrera d'os estudios).

Emanzipazión choben!!

Debán d'istas dos fotografías, d'un mismo puesto, una antis y atra dimpués d'as eleuzions ta o conzello de Zaragoza

Yo, como fedor d'o blog estricalla, quiero fer manifiesto o siguién:

1. Que a presenzia testimonial de l'aragonés en a cartelería d'o Conzello no fa mal a dengún y que mesmo ripresenta a dibersidat lingüística y cultural d'a ziudat
2. Que o nuebo conzello de Zaragoza, no nomás no adedica diners ta l'espardimiento d'a dibersidat cultural sino que mesmo gasta diners en borrar o rastro d'a luenga aragonesa
3. Que a nueba corporazión monezipal fa a mesma errada que atros muitos fendo identificazión de l'aragonés con una opzión politica y por ixo han gastato diners de l'erario publico ta borrar l'aragonés d'a cartelería
4. Remeramos que o Conzello de Zaragoza por unanimidat dezidió fa dos años refirmar o proyeuto "Chuntos por l'aragonés" que lebó enta o II Congreso de l'Aragonés y que ista dezisión de cambear os cartels no ye que un refús d'as suyas propias dezisions ta refirmar os triballos por l'aragonés y l'espardimiento d'ista luenga
5. Reibindicamos que sobre tot en as areas de Chobentú y Cultura se faiga serbir a retolazión bilingüe aragonés/castellano como s'ha feito en as zagueras añadas
6. Demandamos, amás, una esplicazión d'o gasto que suposa cambear una carteleria nomás ta borrar una luenga

Si querez nimbiar a buestra quexa ta o Conzello de Zaragoza podez fer-lo a trabiés d'iste buzón de soxerenzias y tamién a l'adreza de correyo eleutronico jefjuventud@zaragoza.esEsta dirección de correo electrónico está protegida contra los robots de spam, necesita tener Javascript activado para poder verla que ye a d'o serbizio de Chobentú d'o Conzello. Tamién podez escribir a la conzellera delegada de l'area de Chobentú Isabel López.

En os zaguers diyas bella personas ha pintau os nuebos cartels ta que l'aragonés contine en els. Luego meteré as fotos.

Ista mena d'aizions ya son menester. Deixemos a nuestra medrana a una marguín y tiengamos ixa rasmia d'a que tanto nos amostramos argüellosos os aragoneses.

Gran ecsito d'a I trobada de fabloggers

O pasau biernes 28 de setiembre se fazió a I trobada de fabloggers en o bar A gramola que contó con a presenzia de 18 personas, treballadors de l'aragonés, y a mayoría chen que desembolica parti d'a suya faina en o rete.

As personas que astí nos achuntamos nos conoixemos y charramos d'inquietuz comuns, tocans a la luenga aragonesa y d'atras custions en cheneral, presentando proposas e ideyas, y fendo fisico o contauto que durante tot iste tiempo emos iu tenendo por o rete, leyendo y escribindo.

Tamién se dizión os resultaus d'as encuestas feitas en http://trobada.blogdns.net/ an que o millor blog de calidat lingüistica estió o chemeco d'as parolas; o millor meyo de comunicazión por o rete estió charrando; a millor notizia, a creyazión de l'academia de l'aragonés y o millor blog en bariedat dialeutal, una mica de tot.

O premio a o millor blog estió ta toz por o treballo feito durante iste tiempo.

Ta continar con ista buena ecsperienzia, que tan buen sabor de boca nos dixó a toz os que i estiemos, s'ha creyau un foro an que bi aiga zierta coordinazión en o conoiximiento de feitos tocans a l'aragonés, bi aiga un mobimiento birtual que responda a toz os ataques que se faigan contra l'aragonés y se faigan proyeutos en común. S'aceutan todas as proposas, y a pertenenzia no suposa garra obligazión.

L'adreza ye: http://porlaragones.mforos.com/ (bersión portal)

Encara que l'adreza más direuta ye: http://porlaragones.mforos.com/forums/

Trobada de fabloggers

O proyeuto que leba mensachero zereño ye fendo-se reyalidat grazias a la suya buena faina, asinas ya s'anunzia a 1ª edizión d'a trobada de fabloggers:

O biernes 28 de setiembre en o bar "a gramola", carrera conzepzión arenal 10 (zona unibersidat) a las 20:00 d'a tardi.

En ista os fedors de bloggers nos achuntaremos y nos conoxeremos... y qui sabe si s'empenta bel proyeuto. Sin duda, una buena aizión. Si soz d'os que fez blogs y d'os que se muebe por l'aragonés en o rete en cheneral, no dandaleez en ir-ie.

Si queremos que a luenga aragonesa tienga futuro, emos de fer-la presén en toz os puestos, prou que tamién en os birtuals.

Toda a informazión en http://trobada.blogdns.net/

Poliu tecsto

Leyendo conoximiento y libertat de Noam Chomsky trobo una zita de Bertrand Rusell que de tanto goyo que me'n ha feito, no puedo menos que meter-ie. De comentarios posteriors, no'n amenista:

"Ixes cualas bidas son fecundas t'els mesmos, t'os suyos amigos u t'o mundo son inspiraus por a esperanza y sostenius por o goyo: els perziben con a suya imachinazión as cosas posibles y a traza de meter-las en prautica. En a suyas relazions pribadas no troban ansias por temor a perder o afeuto y o respeto qu'en tienen: miran de dar libremén o suyo afeuto y respeto, y a recompensa les biene por sí mesma sin escar-la. En o suyo treballo no les mete en pezquizia a enbidia por os suyos competidors, sino que se'n fan sin más por a faina que cal fer. En politica, no fan serbir o suyo tiempo y a suya pasión en defender privilechios inchustos d'a suya clase u nazión, sino que miran de fer qu'o mundo en o suyo conchunto siga más feliz, menos cruel, con menos barallas dentre ambizions ribals y con un mayor numero d'estars umanos qu'o suyo creximiento no se beiga achicau y aturau por a opresión"

Muere Luziano Pavarotti

Luziano Pavarotti, leyenda d'a opera, considerau un d'os más grans tenors d'o sieglo XX, murió en casa suya, en o norte d'italia, con 71 añadas, dimpués d'una baralla contra un malminchador pancreatico. Fa 14 meses que se le descubrió a malotía.

Terri Robson, representán d'o cantaire, informó que Pavarotti murió a maitinada d'iste chuebes en a ziudat italiana de modena.

Mientras se fan omenaches en tot o mundo, a opera de biena puyó una bandera negra en siñal de dulor.

O famoso tenor Plazido Domingo ecspresó que de siempres eba admirau y quiesto a Pavarotti, a qui se le debe lebar a opera t'a chen que nunca no eba bisto u ascuitau denguna, en cantar en parques y estadios debán de muitisma chen, bella begada mesmo meyo millón de personas.

Encara que ya yera conoxiú en o mundo d'a opera, Luziano Pavarotti se fizo famoso cuan él, Plazido Domingo y Carreras cantón chuntos, baxo o nombre "d'os tres tenors" mientras a copa mundial de fútbol d'italia en 1990.