4.11.07

Plataforma d'Esfensa d'a luenga Aragonesa (PEA)

Fa bien poco s'ha creyau una plataforma con esprito choben y reibindicatibo ta esfender y reindicar l'aragonés asinas como o suyo emplego y a suya dignifcazión, alazetada en apoyos personals de chen con esprito choben y luitador sin afán de personalismo nian "d'asoziazionismo":


A siguién plataforma que aquí presentamos ye creyada por una colla de personas de diferens sensibilidaz y asoziazions embrecadas con a esfensa de l’aragonés. Sin garra afán de personalismo ni protaganismo por parti d’a suya asoziazión ni d’el mesmo. A la fin un mobimiento apolitico y a-ideolochico con l’unico ochetibo de rebindicar a ofizialidat de l’aragonés, a sozializazión y a normalizazión d’o suyo emplego en cualsiquier puesto d’Aragón.
Somos asistindo a la zinquena prebatina por parti d’o Gubierno d’Aragón de redautar y aprebar una lei de luengas que dignifique y faiga tener o dreito d’emplego ta la nuestra luenga, l’Aragonés, y o catalán. Ta nusatros ye o zinqueno intento d’engañar-nos y mantener-nos callaus tanimientres se muere a luenga aragonesa.
Debán d’istas perspeutibas y d’una manca de respuesta sozial, que muitas begadas ye a desincusa d’os politicos aragoneses, creyemos menister formar ista plataforma. Una plataforma ta mirar de fer autos de presenzia dentro d’a soziedat aragonesa, aizions dreitas, espeutaclos, autibidaz… en cheneral aizions bisteras que remeren a la soziedá aragonesa que les son engañando, que les son amagando a reyalidá sozial d’Aragón y que os politicos aragoneses quieren que muera a luenga aragonesa. Muitos exemplos tenemos ta contrimostrar-lo, pero más en zagueras, sabemos que os politicos son en contra de l’aragonés; y no ye pasibidá sacar cartels bilingües ta meter-los monolingües, nian menzionar o nombre d’as dos luengas minoritarias en o nuebo Estatuto d’Aragón, amagar istas dos luengas en a rezién creyada “Televisión Aragonesa” mesmo plegando a aplazar documentals por considerar-los de politicos,…

Si quiers rezibir más información u meter-te en contauto con nusatros fer-nos plegar un e-mail en: esfensadelaragones@gmail.com,

Tamién puez besitar a nuestra pachina web: http://pea.blogdns.net/.
Esta dirección de correo electrónico está protegida contra los robots de spam, necesita tener Javascript activado para poder verla


8 comentarios:

Anónimo dijo...

Ola Choben. Antis con antis, grazias por a tuya iniziatiba e opinions, e por a tuya imbitazión á que m'esplique sobre unos comentarios que dizes que he feito.
Bien, pues quereba dizir que yo no he dito ixo ni sé á qué reunión de politicos te refieres. Que yo pueda remerar, no he charrato d'a custión d'as luengas en istas zagueras semanas difuera d'o mío partiu. Pero igual m'entiboco, no sé, ya me'n dirás, pues no das más datos sobre qué reunión u debate yera ixe.
Pero bueno, lo fundamental ye que tu e toz saban que no ye ixa a mía opinión, que ye chusto o contrario: ista dezisión e atras que afeutan á l'aragonés e que ha preso lo nuebo equipe de gubierno monezipal son importans. Lo son porque dixan bien claro cómo s'ha quiesto borrar o paso de CHA por o gubierno d'a ziudá de Zaragoza desmontando, como en fan con atrás cosas, lo prenzipio d’una politica d’uso e dinnificazión de l’aragonés dende as instituzions. Ya me pena dizir isto, pero dengún atro partiu, fueras de CHA, fa cosas por l'aragonés astí do puede fer-las. Nos ese cuacau que ixos cartels e totas as demás cosas que emos feito en aragonés, con l'aragonés e por l'aragonés ya fuesen en o Conzello antis d'aber plegato nusatros. Y ye malo que no fuese asinas, pero lo pior ye que, ya feitas, e no alconformando-sen con no'n fer atras nuebas, s'afanen autibamén á fer-las desaparixer.
Como te digo, no recuerdo aber feito ixos comentarios. Pero si en relazión con isto, publicamén u pribata, as mías afirmazions podesen aber estatas malentrepitatas (d'estar asinas, de seguras, por culpa mía), quiero con istas linias dixar-lo bien esclatero:
A retirata d'os cartels e testos en aragonés d'o Conzello de Zaragoza son un feito grieu e lamentable. E lo son porque ebidenzia una autitú, un treballo autibo, una intinzionalidá e tota una melitanzia que s'esmera en atacar l'aragonés dica lo suyo acotolamiento. Ixa faina d'acotolamiento la fan en Zaragoza y en tot Aragón.
Emos d'estar consziens de que ixa fuerza esiste e que cal contestar-la, cosa que ya emos enzetato á fer nusatros en a demba d'a politica monezipal, pero que cal fer tamién dende as presonas y entidaz que treballan por l'aragonés.
Tamién imos á enquirir sobre a cuasi segura muerte d'a feria d'a educazión e a cultura aragonesa, "Amostranza", d'a que no emos garra notizia dende l'equipe de gubierno, asinas como sobre as programazions d'a Unibersidá Popular e as linias de colaborazión que estatuezimos con LFA e Nogará ta l'amostranza de l'aragonés e a suya dinamizazión.
Quiero aprobeitar istas ringleras ta dizir que estió una colaborazión sin de prezedens entre o Conzello de Zaragoza e as asoziazions d'a ziudá que tradizionalmén más han treballato con e por l'aragonés, pero tamién quiero dizir que se teneba que aber estato por parti nuestra más angluziosos en a mesa á desposizión de meyos economicos ta empentar ixa colaborazión. En a nuestra primer esperenzia de gubierno querebanos estar prudens en una politica que eba de construyir-se progresibamén, pero aprendimos (e cal aplicar ixa amostranza sin dandalos en o esdebenidero) que as creticas politicas por adedicar un fuerte cabal finanziero dende o primer momento e de traza bistera á las asoziazions tienen más reutos ta ra causa que no tantas perdugas eticas como creyebanos. Confito e aspero que tornaremos á estar en situazión de mostrar-nos más deziditos en futuros programas de refirme á l'aragonés á trabiés d'as asoziazions.
Ta rematar, Choben (e toz los que leigaz isto), quiero dizir que yo enzeté á treballar por l'aragonés, dende as mías modestar posibilidaz, dende fa ya 25 añadas, e que, igual como he feito perén, continaré acudindo e partezipando en tot lo que pueda que tienga que bier con l'aragonés. Agora coordino a Colla de Politica Lingüistica de CHA, e no beigo por qué no eba d'estar en una reunión de bloggers, como bi ese estato en atrás zercunstanzias. Chusto o contrario, agora con más razón tiengo que estar-ie. Con tot e con ixo, i partezipé como uno más, ya lo sapes, e aspero continar fendo-lo sempre que tu e los atros me tratez como lo faziez ixe diya, como uno más que quiere arrimar o güembro en a mida d'as suyas posibilidaz, como fan toz os que bi son.
Quedo á ra tuya desposizión, e á ra de totas e toz los que queraz saper más cosas u otener aclarazions sobre quí soi, qué foi, qué opino e, si tos intresa, lo que prebamos de fer por l’aragonés (muito u poco, bien enfilau u esbarrau, con enzierte u no) en CHA.
Muitas grazias. Dica bien luego

(Por si tos intresa, tos dixo o enrastre d'un nuebo blog de CHA en el Ayuntamiento de Zaragoza: http://chazaragoza.worldpress.com)

Choben dijo...

En primeras muitas grazias por mirar-te d'aclarar o tema respondendo debán de tot o que quiera leyer isto, asinas pues, de traza 'publica'.

Cuan digo reunión, no me refiero a una reunión de representans d'esferens paritus politicos, sino a una reunión interna d'a corporazión de CHA en o conzello de zaragoza: en ixa reunión an que s'acordón as ringleras de CHA debán d'esferens temas tocans a o gubierno de zaragoza se prenión muitas midas... pero qué por l'aragonés? cosa. Ye más, cuan salió de pasada o tema d'a carteleria y retulazión cambeada, se dizió que no yera un tema importán, y como amostranza d'ixo queda que a colla monizipal de CHA en zaragoza no ha meso garra queixa publica nian ha demandau explicazions por ixe cambeo, por o malfurrie de diners nomás en sacar una luenga. A ixo ye a o que me referiba, y encara no conoixo por qué ez autuau asinas.

Atras cosetas:

"pero tamién quiero dizir que se teneba que aber estato por parti nuestra más angluziosos en a mesa á desposizión de meyos economicos ta empentar ixa colaborazión."

Prou que sí! y por qué no se fazió asinas? bueno, o tema de que cal ir a monico ye muito debatible y puet-estar que os dos pleguemos ta unas conclusions esferens con argumentos y ideyas esferens. Rai. Pero, atras cosetas muito más chicorronas que soz en mans de CHA, ¿por qué no se fan? ¿por qué no se fan "meetings" puliticos en aragonés? ¿por qué no toz os conzellos d'o CHA teneba representazión, y mesmo gubernaba, no refirmón o manifiesto de Chuntos por l'aragonés? (ya sé que o partiu sí... pero por conzellos bi ha buena cosa que yeran allora de CHA y no lo refirmón) ¿por qué no se fazió una queixa de CHA por o tema chisla? ye más, allora yera CHA en o conzello...
Deixando o pasau y charrando d'o presén:
Agora mesmo, l'asoziazión cultural nogará ufre charradas y seminarios a buen pre ta lugars de tot Aragón, por qué os alcaldes y conzelleros de CHA no proposan fer serbir una chicorrona parti d'o presupuesto ta materias culturals contratando beluna d'istas charradas? Ya no digo cursos... charradas d'informazión cheneral d'unas oras!

"no beigo por qué no eba d'estar en una reunión de bloggers, como bi ese estato en atrás zercunstanzias"

l'aragonés amenista unidat de toz ixes que o esfenden, en garra inte he criticau a tuya presenzia, sino o poco que faziés en una reunión interna de CHA, estando tan meso en o tema.
Sabes muito bien que nusatros podemos (y de feito lo femos) nimbiar e-mails y cartas t'os meyos, pero no nos ban a fer cuasi caso. A busatros sí que tos ne fan: a critica que faigaz la i sacarán, ya siga en un meyo u en atro, ya siga en letras más grans y chicorronas, pero la i sacarán. ¿Por qué no aprofitas ixo?

Choben dijo...

"Que yo pueda remerar, no he charrato d'a custión d'as luengas en istas zagueras semanas difuera d'o mío partiu. Pero igual m'entiboco, no sé, ya me'n dirás"

Ya te'n dito... aspero respuesta de tot.

Anónimo dijo...

Mui bien, Choben, iremos por partes:

1. Mira-te quí t'informa sobre as "reunions internas", porque u s'entiboca u te miente. Lo que opino d'iste afer e lo que opinaba en que m'enteré d'o d'os cartels lo he dixato escrito en a mía primer respuesta, sin amagar-me baxo garra seudonimo (nick). Te lo grabo en bidio e lo pencho de Youtube?

2. As azions d'o grupo monezipal sobre ixe particular: aquí tamién te falta un poco d'informazión que, de buen implaz, te (tos) contaré. Como ya espliqué en a mía respuesta anterior, en o grupo monezipal consideremos que as azions interpresas por l'equipe de gubierno ta esborrar l'aragonés d'o Conzello de Zaragoza enzetaban con cartels e publicazions pero que, chino-chano, eban d'abastar más aspeutos fundamentals. Antezipando lo que yera pasando, mandemos un primer zeño d'abiso á o gubierno con una iniziatiba preguntando á la Conzellera de Cultura y Educazión sobre o respeto á la dibersidá lingüistica aragonesa y en concreto l'aragonés, fendo lo siguién prenunziamiento literal:
"En la anterior Corporación, el Excmo. Ayuntamiento de Zaragoza en Pleno, y por unanimidad, decidió apoyar el proyecto de “Chuntos por l’aragonés” y el aragonés empezó a tener una tímida y testimonial presencia en folletos y cartelería municipal en determinadas áreas. En esa línea en noviembre se realizaba, con notable éxito, la Feria Amostranza, que sirvió para dar a conocer la pluralidad cultural (y no sólo lingüística) de Aragón, entendiéndola como un valor en sí misma."
"La actual Corporación PSOE-Par ha eliminado tal presencia, que no hacía mal a nadie y suponía un reconocimiento a una minoría que se expresa en esa lengua nuestra. Por tanto, no sólo no dedica recursos para respetar la diversidad lingüística sino que trata de borrar cualquier rastro de nuestra lengua."
Isto se presentó o pasato mes d'otubre, e se dibulgó á os meyos de comunicazión e á ras entidaz culturals e d'esfensa de l'aragonés de Zaragoza. Que no se'n aigan feito eco, como gosa pasar con o "establishment" que impera, ya prexinarás que no ye culpa de CHA.
Pero, como digo, ixe ye estato un primer abiso. Encara tiene que pasar bella cosa más ta completar o nuestro "casus belli", e ixo arribará á no guaire tardar. Nusatros feremos alabez nuebas iniziatibas politicas e publicas, aspero que con más eco, pero nusatros no semos os amos d'os meyos de comunicazión, anque a tu te parixca que nos sacan tot lo que dizimos e nos meten guapos (t'has enterato d'a campaña cheneral d'acoso e derribo meyatico cuentra CHA d'istas zagueras cuatro añadas, e que contina?). Ixo sí: m'encargaré presonalmén de que plegue á iste e á toz os atros blogs de l'aragonés.

3. O tema d'o balanze d'o paso de CHA por o gubierno monezipal en lo que pertoca á l'aragonés lo metí yo en iste entrecambeo d'opinions. Lo fazié ta alantar-me á atras preguntas que gosan fer-sen sobre lo que fan os politicos con l'aragonés, e porque quereba fer publicamén una autocretica que ye de dar en istos tiempos d'esbiellamiento en CHA. Me parixe bien que quieras comentar-lo e mesmo saper más sobre a custión, pero preguntas por as causas de que no aigamos feito muito más cuan ya las t'he datas en o mío escrito. Las he ditas y he dau a mía opinión, que comparto con cada bez más chen en CHA: cal estar más dezidito y embrecato en fer azions positibas con l'aragonés. E lo te diz lo unico melitán d'iste partiu que ha feito (e piensa seguir fendo) mitins en aragonés. Me lo puez glosar como quieras, pero no lo ferás más gordo de lo que yo lo he descrito, porque será ta esformar-lo u porque te yes dando á costa d'as mías reflesions una desincusa ta "quedar-te á gusto" abatanando-nos. Azeuto lo que me digas de buena fe, pero si no te anima un buen proposito, me trobarás en fren tuyo amostrando-te os catirons, e bien aluziatos.
Más cosas: en a pasata lechislatura, cuan faziemos zercular a iniziatiba de "Chuntos por l'aragonés" nomás yeranos en un par de zarpaus d'alcaldías por tot lo país. Dende CHA s'animó á os nuestros conzellers -en gubierno y en oposizión- á presentar u refirmar ista iniziatiba, e buena cosa d'els lo fazió, asobén sin poder contar con pros refirmes en os atros partius ta ra suya aprebazión. No toz lo fizioron u l'aconsiguiron. E qué? Nos contimparamos con atros partius? Qué fizioron os atros? No te parixe que ye muito inchusto que interpeles en tono tan cretico á os unicos que semos fendo cosas por l'aragonés?
En atras cosas tamién podeba-nos aber feito más cosas: ¿por qué no faziemos cuatro partius de fúrbol d'a selezión nazional d'Aragón en cuenta d'uno solo (feba añadas que a DChA no en feba e lo faziemos nusatros dende o Conzello)? ¿por qué no empentemos de traza dezidita os chuegos tradizionals aragoneses? ¿por qué no faziemos una politica de chobentú de cuchas, solidaria e aragonesista, como caleba? ¿por qué sólo rematemos con o 80 % d'a lista d'aspera d'asistenzia domiziliaria á ras presonas mayors? ¿por qué sólo faziemos 10.000 bibiendas protechitas en Zaragoza (anque ixo nos fazió a ziudá con más BPO de l'Estau) e no, por exemplo, 30.000? E te puedo dizir muito más.

4. Me foi contento de que te parixca bien que seiga en os foros e á piet de calle. Yo tamién, porque puedo fer-lo, como particular e como melitán de CHA, argüelloso e motibato ta continar luitando e, como tal, puedo contestar direutamén á tot e á toz, mirando á la cara.

Nomás que unas zagueras parolas más sobre isto: te aseguro que cuan me chuzgo, me da corambre, pero cuan me contimparo, amigo... ¡Que biengan, que biengan por ugas! ¡Que se manifieste o partiu que pueda presentar una fuella de serbizions en fabor de l'aragonés como a d'o mío! Piensa-lo, que no quiero tener que dizir atra bez ixo de "á cubierto, que bienen os míos!" (en fin, que soy farto de que sempre li demos palos á qui nos aduya e no á qui nos ataca).
No te trafuques, pues. Lo dizió pro bien fa bellas añadas una famosa cantante irlandesa con a enchaquia d'a SIDA en Africa e a desastrosa posizión d'o Papa:
"Fight the real ennemy" (Luita cuentra o berdadero enemigo).

Choben dijo...
Este comentario ha sido eliminado por el autor.
Choben dijo...

A la fin, cuan he dito no i meteré más temas, me refiero a temas de conbersa (o tema aquí ye l'aragonés). Prou que si respondes, responderé si cal.

Anónimo dijo...

Choben, no tiens remeyo. A tuya autitú represienta tot lo que s'ha quiesto rematar con "Chuntos por l'aragonés" dimpués de 30 añadas d'andar toz zarpa á la greña: o cainismo irrazional, sin de cuartel ni conzesions, en lo que tan fazilmén cayen no pocos d'os que son en isto de l'aragonés. He biesto en istos zaguers 25 años muitos como tu, e no han feito cosa d'onra dica que no s'han sacau ixa carga con un exerzizio de diszernimiento, reyalismo e umildá.
Lo siento. No te satisferá garra respuesta que te dé, nunca, diga lo que diga, faiga lo que faiga, nunca, nunca. Sempre será poco e malo. Ta tu sempre estaremos condenatos toz os que baigamos bel poco dillá d'as parolas ta faxar-nos en as asprezas de l'azión e d'os feitos.
Sempre darás oyitos á qui quiera fablar mal d'o que fan os pocos que fan de berdá bella cosa.
Charrar en os bars ye a unica autibidá que se salba d'a cretica d'una autitú como ixa, pues en ixe plano lo compromís se queda en a rufierta e no se beye meso á preba por os imponderables de l'azión positiba.
No, Choben, no boi á perder más tiempo prebando de combenzer á qui ya dezidió antis sisquiera d'enzetar á preguntar que no iba á dar balgua á garra respuesta. De chen como tu quedé fandito fa ya bente añadas. Prefiero contestar á qui busca bella cosa. Pero tu no buscas cosa en lo que yo te diga. As berdaz que buscas se troban en atro puesto lueñes, mui lueñes d'aquí.
Dica atra Marco Antonio. Charraremos en aragonés, pero de literatura, d'esportes, de l'orache, d'a bida... De politica, e de politica de l'aragonés, talmén nunca, á mayor benefizio d'a nuestra luenga e d'a suya causa.
Buena nuei e que tos baiga bueno á toz!

Choben dijo...

"Choben, no tiens remeyo. A tuya autitú represienta tot lo que s'ha quiesto rematar con "Chuntos por l'aragonés" dimpués de 30 añadas d'andar toz zarpa á la greña: o cainismo irrazional, sin de cuartel ni conzesions, en lo que tan fazilmén cayen no pocos d'os que son en isto de l'aragonés. He biesto en istos zaguers 25 años muitos como tu, e no han feito cosa d'onra dica que no s'han sacau ixa carga con un exerzizio de diszernimiento, reyalismo e umildá."

Mira, no t'entiboques ni mires d'entibocar... a mía luita ye l'aragonés y a mía queixa que o mal que fa un partiu como o buestro, que fa de l'aragonés una d'as suyas banderas debán d'a soziedat aragonesa pero que fa cosa por a luenga en contimparazión con atros partius nazionalistas d'o estau español. Yo no esfendo denguna postura dentro de l'aragonés, esfendo l'aragonés y prou, no mires de dizir que soi d'ixos que por custions "x" quieren crebar tot o bueno que s'aiga feito por l'aragonés. No siñor, no ye asinas. Yo luito por l'aragonés y me queixo por l'aragonés, pero nunca no opino mal de bella cosa que s'aiga feito en bien de l'aragonés. Ez feito? No puedo negar que cuatro miajadetas sí, pero no son que ixo en contimparazión con o que podríaz aber feito y agora mesmo podez fer astí do i soz.
Si miras, charro bien platero: me he queixau (prenzipiando por una nueba que tiengo d'un conoxiu de muita confianza), he dito as mías demandas bien plateras y t'he respondiu a tot bien platero. Os nuestros estilos d'expresión son pues bien diferens, pero d'astí dica que d'ixes entrefilar que soi d'ixos que por manca d'umildat foi mal a l'aragonés ye una tautica demagochica. Amuestra-me bella falca d'ixo.
Dimpués d'isto y d'o zaguer debate lingüistico an que no deixabas charrar a bel oponén no sé yo qui ye a qui le manca umildat.



"Sempre será poco e malo. Ta tu sempre estaremos condenatos toz os que baigamos bel poco dillá d'as parolas ta faxar-nos en as asprezas de l'azión e d'os feitos.
Sempre darás oyitos á qui quiera fablar mal d'o que fan os pocos que fan de berdá bella cosa.
Charrar en os bars ye a unica autibidá que se salba d'a cretica d'una autitú como ixa, pues en ixe plano lo compromís se queda en a rufierta e no se beye meso á preba por os imponderables de l'azión positiba."

Atra begada mirando d'entibocar... an he dito que o poco que ez feito por l'aragonés ye mal? Digo poco, pero no malo. Y si charras d'o que foi por l'aragonés he de dezir-te que ye rara a begada que podrás trobar-me por os bars ixos que tu dizes. Ye muito más fázil trobando-me fendo queixas por l'aragonés, escribindo iste blog u amostrando aragonés.



"No, Choben, no boi á perder más tiempo prebando de combenzer á qui ya dezidió antis sisquiera d'enzetar á preguntar que no iba á dar balgua á garra respuesta. De chen como tu quedé fandito fa ya bente añadas. Prefiero contestar á qui busca bella cosa. Pero tu no buscas cosa en lo que yo te diga."

Busco más compromís por parti d'ixos que lo tienen muito más fázil por fer cosas por l'aragonés que no nusatros. Compromís que no s'ha plasmau en aczions puntuals que baigaz a fer, a lo menos no'n has dito en ista conbersazión.
Tamién busco una explicazión d'o poco treballo que ez feito por l'aragonés en contimparazión con o que podríaz y podez fer. Y si bi eba bel dandalo, he meso bels eixemplos prou plateros, a los que no has respondiu (chisla, campaña de sensabilizazión astí an que se pueda...)u respondiés fuyindo (manifiesto de chuntos, por qué no apareixe a queixa que teoricamén ez feito por o tema d'a caretelería en a buestra web y en o buestro blog, asinas-asinas).

En fin... cada diya soi más contrariau con o mundo que s'ha formau arredol l'aragonés. Y cada diya soi más conbenziu de que si queremos salbar a luenga cal desbincular-la de raso d'a politica.