15.7.06

Galizia-Aragón: un camín de zien añadas

En o glorioso diya de güe, s'ha constituyiú l'academia de l'aragonés como totz sabemos (por muito que bellas presonas digan que ixo no puede estar asinas, totz sabemos que as cosas o se fan por parti d'os que aman a luenga aragonesa, o no se fan). Güe plega, por tanto, o ziclo de formazión d'as instituzions lingüisticas que se miren d'a normatibizazión d'as luengas minoritarias d'o estau español:

1906 > Real Academia Galega

1907 > Institut d'Estudis Catalans

1919 > Euskaltzaindia

1945 > Institut d'Estudis Occitans

1980 > Academia de la Llingua Asturiana

2006 > Academia de l'Aragonés

O diya de güe escomenzipió de traza normal, con una charrada d'o prestichioso filologo Michael Metzeltin (charró d'a situazión de l'aragonés en cheneral).

Tras isto se continó con a botazión d'os academicos, dimpués d'un debate intresán:
105 botos a fabor (79%)
23 botos en contra (17%)
4 botos buedos y un boto nulo (4%)

Antis d'isto a muller d'o siñor Francho Nagore "dio la nota" faltando de mala traza a Fernando Sánchez, dizindo-le que o siñor Nagore triballaba tot lo diya por l'aragonés y que no se merexeba isto: ye bergüeñoso, patetico y triste que diga ixo cuan lo congreso ye estau o más consensuau posible, cuan Nagore a puesto seguir y dar a suya opinión en tot lo prozeso y cuan soi seguro de que Fernando Sánchez ye una d'as personas (si no a que más) que pior l'ha pasau con os zaguers problemas y cuan ha triballau muitas oras por a reyalizazión d'iste sueño de totz.

Dimpués, una ripia d'asoziazions de luengas minoritarias europeas (como lo sardo, occitano, asturiano, gallego, catalán, basco...) charrón a trabés de representans. Cal dizir que, encara que as charradas no yeran guaire luengas, estión en total 19.

Se continó con una chicota charrada d'o sozconzellero de cultura d'o gubierno d'aragón (dizió alto u baxo o mesmo que a l'escomenzipio d'o congreso) y dimpués charró Felipe Pétriz, reutor d'a unibersidat de zaragoza, o cualo dizió una cosa prou intresán: a formazión d'una catedra de filolochía aragonesa... Ya que estiese berdat.

A la finitiba totz minchemos un ternasco suculoso (a lo menos se feba suculoso dimpués de tantas oras d'asperar a chentar).

Y... ya sabez, ista tardi totz con os gaiters en o zentro zelebrando iste logro ta l'aragonés... Encara que cal remerar que iste no ye que o prenzipio d'una corrida que s'abentura positiba por muitos barraches que bi'n aiga.

En a prensa:

http://actualidad.terra.es/cultura/articulo/concluye_academia_congreso_aragones_crea_987150.htm

http://www.heraldo.es/heraldo.html?noticia=171628

4 comentarios:

Anónimo dijo...

Buen resumen d'a chornada, sí señor. Yo agora tiengo saturau o mío blog y no i puedo fer cosa... Pero dimpués de tú poco i hai que dezir. Con tot u con ixo, malas que pueda, feré a cronica d'o día yo tamién.

Muitas grazias por fer iste blog tan bueno. Agora ya sé que si deixo o Chemeco d'ar parolas i hai atro que continará o camino.

Ye un día istorico. Cal tener muita alegría y ilusion:

YA TENEMOS ACADEMIA!

Choben dijo...

Muitas grazias por as tuyas balurazions Charrabís.

Nunca no te se pase por mente dixar o tuyo blog: si escomenzipié con iste ye prezisamén por o tuyo. A la ora de fer o blog disiempres he teniú como referenzia o tuyo blog: o chemeco d'as parolas. Cuento que ye o millor que tiene l'aragonés güe por güe.

En o tocán a l'academia, agora cal que ista triballe de contino, con chen que siga dispuesta a charrar de buen implaz ta empentar l'aragonés an que ha d'estar.

Ta yo iste ye o prenzipio de una corrida. Una corrida que se ye estada parando en dos añadas, pero no ye que ixo, o prezipio de una nueba puenda ta l'aragonés: agora cal continar con a corrida.

Anónimo dijo...

Quiesto Choben:

Solamén puedo dizir-te lo mesmo que ya t'ha dito Charrabís: norabuena de tot corazón por o sobrebuén resumen que has feito d'a chornada de güe en o Congreso.
Te boi a dizir una coseta. Me fa imbidia a rasmia que tiens, y a bonomía y a onradez que beigo en tu. Istas cualidaz no son muito comuns en istos tiempos que nos ha tocau bibir.

Quiesto Choben, te sigo, te leigo
con interés. No dixes de ser como yes, y danos muitas begadas ixa asperanza, ixa frescor e ixa berdá que beigo que abita en tu.

Con muitos como tu, l'aragonés tien un futuro esplendoroso, pleno de zielos escoscaus, sin tacas, sin tanta malura. Creigo que qui te conoxca beyerá las tuyas cualidaz, que yo solamén puedo apreziar en as tuyas parolas.

Á, una atra coseta, Choben. Prexino que yes ixo, choben, o futuro te pertenexe, ye de tu, encara tiens debán de tu tot l'orizón d'a bida, si agora yes como yes, estoi combenziu que o fruito que nos darás será un fruito infinito de frescor, de buena esenzia.

Atros, como yo, ya no somos tan chóbens (anque prebamos de ser-lo en o corazón), emos perdiu muito tiempo, emos preso camins esbarraus... Tu yes choben. No cometas as erradas que atros emos feito.

Con chen como tu l'aragonés tien un futuro gran, muito gran.

Con toda la sinzeridá de que soi capaz, te deseyo lo millor. Esprisions, amigo.

Chuan Chusé Bielsa

Choben dijo...

D'a mesma traza que le dizié a charrabís, muitas grazias por as tuyas parolas y balurazions.

He de dizir que tampoco no soi reyalmén como me muestro en o blog: muitas begadas esborro cosas que no considero que sigan correutas, encara que las piense (istos zaguers diyas isto no lo he feito de tot, más que más porque tampoco no teneba muito tiempo ta pensar bien o que quereba escribir, y agora que beigo as mías parolas, me pienso que puestar que bella cosa no abría d'aber-la dito... pero lo dito, dito ye).

Me beyes con rasmia, onradez y bonomía: si a rasmia ha d'estar por obligazión biolenta (estoi que ni tu ni yo pensamos asinas) no la tiengo, pero si no ye biolenta... puestar que si: de todas trazas ixo no me corresponde dizir-lo a yo, si no a ixos que me conoxen bien.

Onradez y bonomía? He de dizir que ye difízil dizir ixo nomás beyendo como escribo... En o blog me cuaca d'estar cauteloso, cualidat que no tiengo en a reyalidat. Un exemplo: o primer bez que esquié, en beyer con no me'n cayeba, me metié en una pista negra... y asinas paré.
Con isto quiero dizir que una cosa ye como soi en escribir iste blog, y atra como soi en a reyalidat.

Dizes que con tantos como yo o futuro de l'aragonés ye esplendoroso: no pienso ixo. No ye con tantos como yo, sino que ye con chen que siga ubierta de mente. O que cal t'a luenga ye chen que triballe por ella, prou que sí, pero que antimás siga ubierta de mente.

Que no yes choben cuan yes luitando por una causa chusta? No lo beigo asinas. Me quiers dizir que yes más biello que bel compañero de clase que nomás bibe ta meter-se zorro y drogar-se os sabados de tardis?
De todas trazas, a mía balurazión d'a chobellana de güe no ye buena: a mallor parti d'os míos compañers pasan de tot, no les en fa que ixo que ye d'els y prou. Son chen maja, pero desintresada, que cuasi nunca leyen un periodico... por no charrar de ir t'un museo por exemplo. Tanimientras o numero de chen que se fica en as drogas ye mallor.

No tiengo que dizir-te que soi muito agradexiú tanto por as tuyas parolas como por as de charrabís, y que no aspero que l'aragonés, y tot ixo que le'n merexca, marche entabán.